Banqladeşdə 2019-cu ildə bir universitet tələbəsini sosial şəbəkədəki paylaşımlarına görə döyərək öldürən 20 nəfər edam cəzasına məhkum edilib.

Axar.az xəbər verir ki, qətldə təqsirli bilinən 5 nəfərə isə ömürlük həbs cəzası verilib.

Qeyd edək ki, universitetin ikinci kurs tələbəsi Abrar Fahad 7 oktyabr 2019-cu ildə Hindistan və Banqladeş arasında imzalanan müqavilə ilə bağlı hökuməti və baş nazir Şeyx Hasinanı tənqid edən sosial media paylaşımları etdiyi üçün döyülərək öldürülüb.

Azərbaycan yeni müharibəyə və ya ən azı, Ermənistanı dövlət sərhədi xəttinin müəyyənləşdirilməsinə məcbur etmək üçün hərbi əməliyyatlara başlaya bilər.

Bunu Axar.az-a açıqlamasında rusiyalı tarixçi, hərbi ekspert Oleq Kuznetsov bildirib.

Onun sözlərinə görə, əgər Azərbaycan cəmiyyətində bir müddət öncə Zəngəzur nəqliyyat dəhlizinin Azərbaycan tərəfindən Ermənistana qarşı hərbi təzyiq olmadan açılacağına əminlik mühiti mövcud idisə, bu gün artıq belə gözləntilər yoxdur və Prezident İlham Əliyevin bu mövzuda dünənki bəyanatı insidentlərin bu cür transformasiyasını yalnız təsdiq edir.

“Mən əminəm ki, Prezident Əliyevin Zəngəzur nəqliyyat dəhlizinin açılışının dəqiq tarixi barədə sualı Ermənistan tərəfindən cavabsiz qalacaq. Hətta bu sual heç dekabrın 15-də Brüsseldə Baş nazir Paşinyanla görüş zamanı da cavablanmayacaq. Brüssel Bakının yox, İrəvanın meydanıdır. Bu görüşü səbirsizliklə gözləyən də məhs Ermənistandır. Artıq hamıya bəlli olur ki, İrəvan öz xoşu ilə üçtərəfli sazişin tələblərini yerinə yetirmək istəməyəcək”, - deyə həmsöhbətimiz qeyd edib.

Kuznetsovun fikrincə, mövsümi təbii-iqlim şəraitinə və ərazinin xarakterinə görə Zəngəzur istiqamətindəki istənilən hərbi fəallıq çox çətin olacaq:

“Dağlarda, qış aylarında yayla müqayisədə hərbi əməliyyat aparmaq ikiqat, üçqat mürəkkəbdir. Buna görə də “Zəngəzur dəhlizinin açılmasına məcburetmə əməliyyatı”nın fəal fazasını gözləmirəm.

Bütün bunlarla yanaşı, əgər Ukrayna ətrafında hərbi-siyasi gərginlik qış aylarında öz pik nöqtəsinə çatsa, dünyanın diqqəti məhz bu regiona yönələcək. Bu halda Azərbaycan bu “səs-küy”dən istifadə edərək Zəngəzur məsələsini birdəfəlik həll edə bilər. Qışa, çətinliyə baxmayaraq, Azərbaycan Ordusu bu missiyanı da layiqincə yerinə yetirə biləcək. Azərbaycan Ordusu istənilən yerdə, istənilən hava şəraitində hərbi əməliyyatlar teatrı çərçivəsində döyüşlər aparmaq üçün kifayət qədər təchiz edilib və hazırlanıb.

Onu da qeyd edim ki, İlham Əliyev hazırda bir sözü ilə regionun taleyini dəyişə biləcək yeganə şəxsiyyətdir”.

Gürcü fəallar Tiflisdə Gürcüstan Prezidentinin iqamətgahı qarşısında aksiya keçirərək, keçmiş dövlət başçısı Mixail Saakaşvilinin əfv olunmasını və azadlığa buraxılmasını tələb edirlər.

Axar.az xəbər verir ki, bu barədə gürcü mediası məlumat yayıb.

"Bu, sırf Mişaya dəstək aksiyasıdır. Hətta Mişanın günahsız olduğunu etiraf etməyən, lakin onu siyasi məhbus sayanlar da bura toplaşır. Salome Zurabişvilinin qütbləşməni başa çatdırmaq üçün tarixi şansı var”, - deyə aksiyanın təşkilatçısı Nanuka Jorjoliani bildirib.

Qeyd edək ki, bundan əvvəl Gürcüstanın hazırki prezidenti Salome Zurabişvili Saakaşvilini heç vaxt əfv etməyəcəyini bildirib.

Gürcüstanın eks-prezidenti Mixail Saakaşvili müalicə almaqdan imtina edib.

Axar.az xəbər verir ki, bu barədə o özü məlumat verib.

Saakaşvili qeyd edib ki, Gürcüstanın Dövlət Müfəttişliyi Xidmətinin Ədliyyə Nazirliyinin cəzalandırılması ilə bağlı qərarı yerinə yetirilməyib və bunun əksinə olaraq intiqamçı addımlar atılıb.

M.Saakaşvili qərar icra olunmayana və ziyarətçiləri onun yanına normal qaydada buraxılmayana qədər etirazını davam etdirəcəyini bildirib.

Rusiyadan gələn təhdidlərə baxmayaraq, iqtisadiyyatımız inkişaf etməkdə davam edir.

Axar.az xəbər verir ki, bu açıqlama ilə Ukraynanın Türkiyədəki səfiri Vasili Bodnar çıxış edib.

"Türkiyə ilə mövcud əlaqələrimiz sayəsində müdafiə sənayesində potensialımız güclənir", - Bodnar vurğulayıb.

O qeyd edib ki, Ukrayna-Türkiyə münasibətləri təkcə hökumətlərarası razılaşmalarla deyil, həm də iş dünyası arasında qurulacaq təmaslar vasitəsilə daha da möhkəmlənəcək.

Koronavirus pandemiyası insanlar arasında sona çatır, o, “yeni sahibi”ni – heyvanları axtarır.

Axar.az xəbər verir ki, bu barədə rusiyalı immunoloq, xüsusi təhlükəli infeksiyalar üzrə mütəxəssis Vladislav Jemçukov deyib.

“Virus təbiətdə yeni sahiblərini axtarır. Əgər onu öldürməyəcək heyvan tapsa, elə orada da qalacaq və yeni infeksiya ocağı yaranacaq”, - deyə ekspert bildirib.

Onun sözlərinə görə, pandemiyanın sona çatması üçün insanlar arasında 70 faizlik immun təbəqəsi formalaşmalıdır:

“ÜST sükanı ələ keçirməli və daha az vaksinasiya olanları peyvəndləməlidir. Peyvəndlənənlər 70-80 faiz olduqda, virus yeni "sığınacaq" tapacaq”.