 |
 |
“Azərbaycan Dövlət Akademik Musiqili Teatrının rəhbəri Əliqismət Lalayev, efir vasitəsi ilə üzümü tuturam sənə, bəsdir teatrın, aktyorların qanını içdin!”
Bu sözləri Əməkdar artist Çingiz Əhmədov ATV telekanalında yayımlanan “Bizimləsən” sosial-ictimai proqramda ekspert qismində iştirak edərkən deyib.
Sənətçi teatrda baş verən özbaşınalıqlara üsyan edib, Əliqismət Lalayevin ünvanına kəskin ittihamlar səsləndirib: “5-6 il o, teatra yaxşı direktorluq etdi. Amma sonra teatra, aktyorlara diqqət yetirməkdənsə, bu diqqəti özünü həsr etdi, özü ilə oynayır. Teatrın mətbuat xidmətinin rəhbəri Fəridə Aslanova, deyirsiz ki, mən 2008-ci ildə prezident mükafatı almışam. Ə.Lalayevin bundan xəbəri olmayıb. Zamanında nazirin (keçmiş Mədəniyyət Naziri Əbülfəz Qarayev – red.) qapısına gedib, o mükafatı almışam. 2012-ci ildə Ə.Lalayevin xəbəri olmadan Əməkdar artist fəxri adına layiq görülmüşəm. Bunun üçün yenə də nazirin qapısını döymüşəm. 18-ə yaxın mükafat almışamsa, yenə də Ə.Lalayevin onlardan xəbəri olmayıb.
Ə.Lalayev son zamanlar aktyorların maaşını kəsir. Aktyor bir gün işə gecikəndə onun maaşından 30 manat pul tutur. Həmin 30 manatları yığıb cibinə qoyur. Bütün teatr direktorlarını ayağa qaldırıb demişəm ki, siz aktyorların maaşını tutursuz? Deyirlər ki, bu, cinayətdir.
Teatrda heç kim başını qaldırıb söz deyə bilmir. Kimsə Ə.Lalayev barədə nəsə xoşagəlməz bir söz deyəndə aparıb qoyurlar onun ovucuna. Belə hegemonluq etmək olmaz. Teatrın direktor müavini Vəfa xanıma Ə.Lalayev səlahiyyət verib ki, bax gör hansı aktyor məşqə gəlməyib, onun məvacibindən pul kəsəcəyəm. Novruz Qartalın 74 yaşı var, 400 manata kirayədə qalır. Üç nəvəsi var. Ə.Lalayev 81 yaşlı aktyora mükafat yazır, amma Novruza yazmır. Emil Heydərov rus bölməsinin aparıcı aktyorudur, ona da heç bir mükafat vermir. İllərlə bu teatrda çalışan aktyorlara mükafat vermir.
2019-cu ildə Ə.Lalayev dedi ki, mənim, Afaq Bəşirıqızının, İlham Namiq Kamalın adına kassadan bilet alırlar. Əgər mənim adıma tamaşaçılar bilet alırlarsa, bəs niyə mənə hörmətsizlik edirsən?” oxu.az
[center][img]https://www.bizimyol.info/az/wp-content/uploads/2020/06/Nadir.jpeg[/img][/center]
"Hamısına təşəkkür edirəm, həkimlər çox əziyyət çəkirlər. Sağ olsunlar. Xəstəxanada mənə çox yaxşı baxırlar".
Bu fikirləri "Report"a açıqlamasında koronavirusa yoluxan futbol məşqçisi Nadir Qasımov durumu barədə danışarkən deyib.
Hazırda Mərkəzi Neftçilər Xəstəxanasında olan 71 yaşlı mütəxəssis hər şeyin ikinci testin nəticəsinə əsasən müəyyənləşəcəyini bildirib. Qasımov bu gün ikinci dəfə testdən keçmə ehtimalının olduğunu söyləyib: "Artıq özümdə heç nə hiss etmirəm. İki gündür temperaturum yoxdur, öskürək də təmizlənib. Bunlar məndə elə də çox olmayıb. İnanıram ki, bu yaxınlarda evə buraxacaqlar".
Məşqçinin sözlərinə görə, virusa yoluxduğunu özü hiss edib: "Mən qanuna riayət edən adamam. Özüm hiss etdim ki, temperaturum artıb. 103-ə zəng etdim, baxdılar və nümunə götürdülər. Bir gündən sonra bilindi ki, koronavirusa yoluxmuşam. Həmin gün də təcili yardım gəldi və məni Mərkəzi Neftçilər Xəstəxanasına gətirdi. Artıq 8 gündür ki, buradayam.
Nə lazımdır, hamısını edirlər. AFFA da daim mənimlə əlaqə saxlayır, vəziyyətimi soruşublar. AFFA-nın icraçı vitse-prezidenti Elxan Məmmədov, Oktay Abdullayev, Ağasəlim Mircavadov, Vaqif Sadıqov - hamısı mənimlə maraqlanır. İnanıram ki, bu yaxınlarda evə getməyə icazə verərlər, evimizə qayıdarıq".
Qasımov xəstəxanadan çıxmaqla bağlı qərarı həkimlərin verəcəyini sözlərinə əlavə edib: "Mən yalnız gözləyirəm, həkimlərə əmr verə bilmərəm. Amma özləri də görürlər ki, bütün tələblərə əməl edirəm. Dərmanları vaxtı-vaxtında qəbul edirəm. Sağlıq olsun, necə alınacağını görəcəyik. Hazırda həkimlər otaqları gəzir və xəstələrə baxırlar. Bəlkə, günortadan sonra mənə də yaxınlaşdılar.
Çox xahiş etdim ki, bu gün yenə test götürsünlər, nəticəyə baxaq. Özümə də maraqlıdır. 3 gün evdə, 8 gün isə burada olmuşam. Mənə müntəzəm olaraq yaxşı baxdılar. Hər gün sistemlər, dərmanlar qəbul etdim. Artıq mühit məni sıxır, buna alışmamışam. Həmişə sərbəst olmuşam, amma burada sərbəstlik yoxdur, hərəkətlərimiz məhduddur. Bu gün baxacaqlar, görək, nə deyirlər".
Sonda təcrübəli mütəxəssis Azərbaycan xalqına müraciət etməyi vacib sayıb: "Mən xalqıma müraciət etmək istəyirəm. Hansısa qüvvələr əhalini virusla bağlı başqa yönə istiqamətləndirmək, bu xəstəliyə inanmamalarını istəyirlər. Koronavirus həqiqətən də var, çox əziyyət verən xəstəlikdir və insanı hərtərəfli sıxır.
Xəstəliyə qalib gəlmək üçün ilk növbədə, iradə lazımdır. Gərək deyilənlərə əməl edəsən ki, istədiyinə nail olasan. Yox, əgər qulaqardına vursalar, nəticəsi pis ola bilər. Nə qədər həkimlərə kömək etsək, xəstəliyə qalib gəlmək mümkündür. Arzu edirəm ki, daha millətimizdən heç kim bu xəstəliyə tutulmasın. Həmişə sərbəst millət olmuşuq, təmiz havada olmağı xoşlamışıq. Amma xəstəxanada bir otaqda sıxılırsan. Əlbəttə, çox çətindir. Hamı özlərini və uşaqlarını qorusun, deyilən tələblərə əməl etsin".
Qeyd edək ki, Nadir Qasımov “Bakı fəhləsi”, “MKT-Araz”, “Avtomobilçi”, “Bakılı”, “Şuşa-Qarabağ” kimi komandalarda işləyib.
“Adımı çəkməsələr də, hansısa jestlərlə mənə söz atırlar. Mən də onları öz jestlərimlə cavabsız qoymuram”.
Bu sözləri məşhur rəqqasə və iş xanımı Fatimə Fətəliyeva "ATV Maqazin 10larla" proqramına müsahibə verərkən deyib.
Rəqqasə onun arxasınca danışan sənət yoldaşlarını heçə saydığını bildirib:
“Onlarda gərək ürək olsun ki, söz atanda adımı çəksinlər. Arxamca danışanları boş verirəm. Ən əsası susmaqdır. Susmağımla onları yandırıram”.
Şou-biznesin məşhur xanımı bir müddət öncə səhhətində problemlər yarandığı açıqlayıb:
“Neçə vaxt idi ki, xəstə idim. Soyuqlamışdım. Bununla bağlı analiz verdim. Şükürlər olsun ki, analizlərin cavabı yaxşı çıxdı. Ona görə əhvalım yaxşıdır”.
Müsahibəsi zamanı F.Fətəliyeva keçirdiyi plastik və estetik əməliyyatlardan əvvəl daha gözəl olduğunu söyləyib:
“Bu sənətə gəldiyimdə əməliyyatdan öncəki burnum mənə çox yaraşırdı. Efirdə isə burnu zırpı Fatimə idim. Amma həyatda elə deyil idim. Bədən şəkilləndirici əməliyyatı da ona görə elətdirdim ki, efirdə arıq görünüm. Çünki ekranda ətli-qanlı görünürdüm. Allah mənə hər şey verib, bir tək boydan başqa”. oxu.az
Qeyd edək ki, may ayının ilk günlərində F.Fətəliyevanın Zəhra adında qız nəvəsi dünyaya gəlib.
“Mən bu mübarizəyə yeni başlamışam. Gələn həftənin əvvəlində digər verilişlərdə də çıxış edəcəm. Mən bu mübarizədə tək deyiləm. Mənimlə birlikdə Əliqismət Lalayev tərəfindən haqsızlığa düçar olan digər həmkarlarım var. Biz səsimizi lazım olan yerlərə çatdıracağıq”.
Bu sözləri “Ölkə.Az”ın əməkdaşı ilə söhbəti zamanı Əməkdar artist Çingiz Əhmədov Akademik Musiqili Teatrın rəhbəri Əliqismət Lalayevlə aralarında baş verən qalmaqala fikir bildirərkən deyib.
O, bu gün “ATV” telekanalında yayımlanan “Şou ATV” səhər proqramında Teatrın rəhbərinə qarşı sərt ittihamlar səsləndirərkən mikrafonun söndürülməsi məsələsinə də münasibət bildirib.
“Bəli, həqiqətən verilişdə mikrafonumu söndürdülər, mənə qarşı haqsızlıq etdilər. Əgər bura “Azad Azərbaycan”dırsa niyə qoymadılar ki, azad formada öz fikirlərimi səsləndirim. Verilişdən sonra mənə çox zənglər oldu, insanlar çox narahatdılar. Sadəcə, mən Lalayevdən mükafatımı kəsdiyi üçün haqqımı tələb edirəm. 12 ildir bu insan teatrda rəhbərlik edir. Bu illər ərzində Xalq artisti adını almağım üçün Nazirliyə bir təklif belə yollamayıb. Mən 1972 –ci ildən bu sənətdəyəm, televiziyada böyümüşəm. Mənim buna haqqım var. Dəfələrlə özü də bildirib ki, Afaq Bəşirqızı, İlham Namiq Kamal və Çingiz Əhmədova görə teatrın biletləri satılır. Bəs indi nə oldu? Məndən qat-qat cavan aktyorlar o adı alır, mənim 2 ildən sonra 60 yaşım olacaq, ancaq mən buna layiq deyiləm? Niyə axı siz mənim adımı təqdimata salmırsınız? Fəxri ad Prezident tərəfindən verilir, siz isə mənə bu işdə maneə törədirsiniz.
Mən Nəsibə Zeynalova, Eldəniz Zeynalov, Həsənağa Salayevdən tərbiyə almışam. Ustadım Əliağa Ağayev olub. Hər zaman xalqımı, dövlətimi sevmişəm. Əliqismət Lalayev, bəsdir illərdir orada oturub haqqımızı yedin”,- deyə, əməkdar artist fikrini tamamlayıb.
Tanınmış idmançı, peşəkar məşqçi, son vaxtlar xeyriyyə işləri ilə məşhurlaşan Kamil Zeynallı “Ölkə.Az”a geniş müsahibə verib.
Müsahibə almaq üçün Kamillə zəngləşib, məşq zalına yollandıq. Elə söhbətimiz də idmançının aylardır ayrı düşdüyü zalında baş tutdu. Bir neçə aydan sonra idman zalına daxil olmağın ona ayrı bir zövq verdiyini açıq-aşkar görünürdü. Kamil indi hər zaman məşq etməyə öyrəşdiyi zala müsahibə üçün gəlmişdi...Beləcə maraqlı söhbətimiz başlayır..
- Kamil bəy, son zamanlar etdiyim müşahidələr nəticəsində demək olar ki, böyük əskəriyyət sizi sevir, hörmət edir. Bəs özünüz özünüzə 3 kəlməylə necə təqdim edərdiniz? Əslində, Kamil necə bir insandır?
- Kamil gördüyünüz kimidir. İstər evdə qızının, anasının yanında, istərsə də kasıb insanların yanında məni necə görürlərsə, həyatda da o insanam. Üç kəlmə - Kamil gördüyünüz kimidir.
- Sizi necə təqdim edəndə xoşunuza gəlir? İdmançı, yoxsa xeyriyyəçi?
- Mənə fərq etməz. İnsan biznesmen, xeyriyyəçi və ya idmançı ola bilər. Ancaq əsas məsələ, insanı insan kimi tanımaqdır. Yoxsa indiki dövrdə xeyriyyəçi olmağa nə var ki? Yenə də təkrar edirəm, bu işlərin arxasında əsas insanlıq durur. Əsl xeyriyyəçi sabah bir kasıb insanla rastlaşanda onun acısına həqiqətən ürək yanğısı ilə yanaşmağı, ona kömək etməyi bacarmalıdır. Bunun üçün də əsl insan ürəyi lazımdır.
Amma xeyriyyəçiliklə imkan daxilində məşğul olmaq lazımdır. Heç kəsin kiməsə yardım etməyə borcu yoxdur. Kim edirsə, Allah razı olsun. Mən yardım edəndə insanları seçmirəm. İnsan barmaqlarının arasında necə fərq qoya bilər? Bu da belə bir şeydir. Hər kasıbın, yoxsulun, xəstə insanın bir problemi var. Mən də imkan daxilində çalışıram ki, bacardığım qədər insanlara yardım edim. Bu işdə xeyirxah insanlar bizə dəstək oldular, sağ olsunlar. Mənə gün ərzində yenə də insanlar yazırlar. Sadəcə, indi dəstək azaldığına görə xeyriyyə işlərini bir müddətlik dayandırmışam.
- Kamil bəy, bu yardım kampaniyasında sizə dəstək olan insanlarla yanaşı, videoları paylaşdığınıza görə sizi qınayanlar da oldu. Hətta sizi özünü reklam etməkdə də günahlandırdılar.
- Mən karantindən əvvəl də hər zaman insanlara yardım etməyə çalışmışam. Hətta ad günlərimi də bir neçə dəfə kimsəsizlərlə, qocalar evində, əlil insanlarla qeyd etmişəm. Özüm də bu yolu keçmişəm. İmkansızlığı, şəraitsizliyi, kasıbçılığı görmüşəm deyə, onların dərdlərini daha yaxşı anlayıram. Anamla həmin o vəziyyəti illərlə yaşamışam. Ona görə də özüm-özümü dərk edəndən, əlimə bir az artıq pul gələndən, çalışmışam kiməsə yardım edim. Mən bunu Allah yolunda edirəm. Ona görə də bunu özümə borc bilirəm. Bunu mən bilim, bir də Allah bilsin. Kimlərsə qıraqdan qoy bunu reklam, özünü göstərmək, gözə soxmaq saysın, özləri bilər. Bunun mənim üçün heç bir əhəmiyyəti yoxdur. Kim ki məni bilmədən qınayır, mənə şər-böhtan atır, qoy Allah, bir də özü bilsin. Mən bunu nə yolla edirəm, hansı məqsədlə edirəmsə, qoy mənimlə də Allah bilsin. Onsuz da insanların 20-30%-i hər zaman düşünüb ki, mən bunu reklam xatirinə edirəm. Mən bu yardımları neçə illərdir edə-edə gəlirdim. Kamil bu karantin vaxtı sübut etdi ki, bu yaxşılıqları təmiz qəlblə edir. Bunu çəkib göstərəndən sonra nə qədər insan həvəsə gəlib, kimsəsiz insanlara kömək etdi. İnsanlarda bu işə həvəs yaratdım, bir nümunə oldum. Məqsədim də bu idi ki, onlar da etsinlər. 4-5 il bundan əvvəl mütəmadi qocalar evinə gedirdim. Bilirsiz, niyə onu çəkib göstərirdim? İstəyirdim, insanlar da oraları ziyarət edib, kimsəsizlərə, yoxsullara yardım etsin. Bilməyənlər də baxsın, görsün ki, filan yerdə qocalar evi var, bəlkə, kimsə kömək etmək istəyər.Mən özümü Dubay səyahətimlə, avtomobillərimlə reklam edərəm də, yoxsa, bu yazıq insanlarla özümə xal qazanıb, özümü göstərəcəm? Tək əldən səs çıxmaz, axı Bu yardımlaşma kampaniyasına dost-tanışlarım da qoşuldu. Aksiyanın 90 %-ni onların sayəsində etdim. Yoxsa, Kamil bunu heç vaxt tək edə bilməzdi. Çəkib göstərirdim ki, onlar da bilsinlər etdikləri yardımlar öz ünvanlarına çatır.
- Bu yardım kampaniyanızda sizə məşhur simalardan, müğənnilərdən, cəmiyyətdə üzdə olan insanlardan kömək edən oldu?
- Nazənin xanım yardım etdi, sağ olsun. Sonra o özü də bir neçə ailəyə kömək etdi. Müğənni Nüşabə Musayeva da mənə yardımlarda dəstək oldu. Sonra Vüsal Əliyev də aksiyamıza qoşulanlardan oldu. Bəziləri mənə zəng vurub, öz təşəkkürlərini bildirdilər. Şərt o deyil ki, mütləq şəkildə mənim kampaniyama qoşulsunlar. Onlar da bir çox insana yardım etdilər.
Mən heç kimə tək-tək müraciət etməmişəm. Sadəcə demişəm ki, dostlar, gəlin millətimizin bu ağır günlərində onlara dəstək olaq. Sadəcə vicdanı olan insanların vicdanlarının oyanmasına vəsilə olmuşam.
- Belə fikirlər də var ki, Kamil Zeynallı 10 günlük həbsdən sonra sanki qorxdu, çəkindi. Doğrudanmı indi daha ehtiyatlı davranmağa başlamısınız?
- Yox, əsla. Mən həbsə düşəndə karantin qaydaları yumşalmamışdı. Biz yardımlarımızı camaat evdən çıxa bilməyəndə edirdik. Qazanc yeri olmayan insanlar, ailələr vardı. Mən həbsdən çıxdıqda artıq qaydalar yumşalmışdı. İnsanlar evlərindən rahat çıxa biləndə daha yardımlara ehtiyac yox idi. Ona görə bu aksiyanı dayandırdım. Yəni, özüm bu qərarı verdim. Hətta polislər mənə xeyriyyə kampaniyamı davam etdirməyimi tövsiyə etdilər. Mən də məsələni sizə izah etdiyim kimi dedim. Onlar hətta bildirdilər ki, birdən hamı elə bilər ki, biz sənə təzyiq etmişik, ona görə də fikrindən dönmüsən. İnanın, mənə polis tərəfindən heç bir qadağa qoyulmayıb, onlar əksinə təşəbbüsümü dəstəkləyirdilər. Bəziləri düşünürdülər ki, təzyiq olunub və buna görə də həbsə düşmüşəm. Ancaq bu, belə deyil, sadəcə qayda pozuntusu olub. Rayonlara da icazəsiz getmişəm, heç bir icazəm yox idi. Hamı da bilirdi ki, yardım üçün bunu edirəm, sağ olsunlar, hər zaman da mənə dəstək olublar. Umumiyyətlə, heç kim təzyiq göstərməyib. Sözsüz ki, yardımlarımız davam edəcək, sadəcə, gündə 400-500 ailəyə olmayacaq.
- Cəmiyyətdə belə bir fikir də formalaşmışdı ki, guya siz hansısa icra başçısının sifarişi ilə tutulmusunuz...
- Bu dəqiqə bütün icra başçıları öz canları ilə əlləşirlər. Həm onların nə ixtiyarı var ki, məni həbs etdirsinlər? Yəni elə bir icra başçısı varmı, məni tutdurub öz hərəkətinin arxasında dayana bilsin? Mən nə etmişəm ki? İcra başçısının öz, mənim də öz işim var. Başçı kimdir axı, adam tutdursun? Cinayətkarı tutdurmaq haqları var. Mən axı cinayətkar, cani deyiləm? Bu yola Prezidentimin çağırışı ilə çıxmışam. Cənab Ali Baş Komandan İlham Əliyevin “Biz birlikdə güclüyük” sözü ilə bu yolda addımlamışam. Mən də əlimdən gəldiyi qədər millətimə, dövlətimə dəstək olmağa çalışmışam. Məni həbs etdirmək hansı icra başçısının başı üçündür, axı? Onlar bu dəqiqə etdikləri günahlarını gizlətməyə yer axtarırlar. Cinayətkar olsam, məni hüquq mühafizə orqanları - polis, DTX həbs edər.
- Bir vaxtlar Kamil Zeynallıya qarşı çıxan, onu tənqid edən, sonradan onu qəhraman edən bir cəmiyyətə bel bağlamaq olarmı? Heç kəs qarantiya vermir ki, sabah oxşar vəziyyət təkrarlanmayacaq.
- Vallah, insan xaricdə olanda düşünür ki, millətimin yaxşısına da qurban olum, pisinə də. Mən insanları qınamıram. Həyatları boyu o qədər min cildli, ikiüzlü, rəngarəng insanlar görürlər ki, heç kəsə inamları qalmayıb.Ona görə hər kəs güvənini öz hərəkəti ilə bildirməlidir. Mən də etdiyim əməllərimlə əsl simamı göstərdim. Gördülər ki, mənim bir məqsədim var - dar gündə insanlara yardım etmək. Burada söhbət yalnız maddiyyatdan getmir, həm də mənəvi dəstək rol oynayır. Onlar həqiqi Kamili gördükdən sonra, mənə qarşı olan münasibətləri dəyişdi. Əvvəllər də mənə inanmaq istəyirdilər, sadəcə, mənim müəyyən yanlışlarımı görüb, çaş-baş qalırdılar. Mənim təhqirlərim, acılamaqlarım, davalarım insanlarda bir növ çaşqınlıq yaradırdı. Onu da göstərdim ki, durduğum yerdə heç kəsi söyüb, təhqir etməmişəm. Heç vaxt birinci mən dava etməmişəm. Mənimlə işləri olmasa, mən də heç kəsə baş qoşmaram. Bu yardımları edəndə də, məni tənqid edənlər oldu. Ancaq mən heç kəsə fikir vermədim. İnandırım sizi, buna heç vaxtım da yox idi.
- Bildiyimə görə karantin dönəmində ümumilikdə 100 min manat civarında yardımlar etmisiniz. Həmin vəsaitləri kim göndəribsə, istəsəniz adlarını çəkə bilərsiniz.
- Yox, 100 min deyildi, məbləğ 200 min manatdan çox idi. Çünki biz bu dönəmdə 20 mindən çox ailəyə yardım payladıq. Yardım edənlərin siyahısı ad çəkməklə bitməz. Bütün ölkələrdə yaşayan həmvətənlərimiz bu aksiyaya qoşulmuşdular. Sibirdən yardım yollayırdılar. ABŞ, Kanada, Afrikada və digər ölkələrdə yaşayan soydaşlarımız da dəstək oldu. Cənab Prezidentimizin sözləri hamını ruhlandırmışdı.
- Gələcəkdə sizə hər hansı vəzifə təklif olunsa, münasibətiniz necə olar?
- Mən etdiyim heç bir hərəkətin qarşılığını güdməmişəm. Bunun üçün nəsə güdmək axmaqlıqdır. Bu, kişilikdən deyil. Hər şeyi təmiz ürəklə etmək lazımdır. Əgər etdiyimiz əməllərə görə nəsə gözləsək, bunun sonu olmayacaq. İnsan özünü sevdirmək istəyirsə, gərək olduğu kimi görünsün. Həyatda rol oynamamalısan. Mən evdə oturum, kef edim, bəs, bu kasıb insanlar nə etsin? Gecə beynimdə bu fikirləri təhlil etdim və səhər qərar verdim ki, mütləq bu insanlara yardım etmək lazımdır. Zəng vurdum dostlarıma ki, gəlin, bu insanlara yardım edək. Özüm də müəyyən məbləğ xərclədim və başladıq. Sonra arxası yavaş-yavaş gəlməyə başladı. Sonradan eşidən-bilən zəng vurub kömək etməyi təklif etdilər. Bu gün mən vəzifəyə görə deyil, xalqıma və dövlətimə görə işləyib, əziyyət çəkərəm. Yoxsa bu 10 gündə mənə heç nə olmadı. Sadəcə, tutulmağıma görə insanlar narahat oldular. Bu yaxşılığın qarşılığında həbs olunmağım onlara haqsızlıq kimi gəldi. Onlar gözləyirdilər ki, mən bu etdiyim əməllərə görə qiymətləndiriləcəyəm. Ancaq bunun əksinə, bu hadisə oldu deyə, onlara pis təsir etdi. Yəni mənim həbs olunmağım 7-dən 77-yə hamıya təsir etdi. Hər yerdə məni ilin adamı elan edirdilər, mənə vəzifə verilməyini təklif edirdilər. Mən də bu yazıları oxuyanda gülürdüm, deyirdim ki, axı mən bu əməllərimə görə heç nə güdmürəm. Mən bunların heç birinə fikir vermirdim, beynimdə ancaq öz yolum haqqında düşünürdüm. Heç kəsdən narazı deyiləm. Əksinə 10 gün dincəldim (gülür).
- Vəzifədən söz düşmüşkən, 2025-ci ildə Milli Məclis seçkilərinə qatılmağınız mümkündürmü?
- Özünü tərifləmək kimi çıxmasın, ancaq hansı dövlət işçisi indiyə kimi mən etdiyim hərəkətləri edib? Mənim 2 ayda etdiyimi dövlət məmurları, deputatlar, icra başçıları var ki, üst-üstə yığsan heç 15 ildə etməyib. Düşünürəm ki, orada oturanlar məndən artıq deyillər. Hansısa vəzifəni də icra edəndə, mütləq gərək xalqa can yandırmalısan. Məmurlar xalqın sevgisini qazansalar, bir o qədər insanlar tərəfindən qiymətləndiriləcəklər. Narazı olanları da razı salmaq artıq məmurların üzərinə düşür. Mütləq millətin problemləri ilə maraqlanmalıdırlar. Çoxusu buna tənbəllik edirlər, oturduqları yerdən tərpənmək istəmirlər.Cənab Prezident onları vəzifəyə təyin edəndə, onlara etimad göstərəndə hər zaman tapşırır ki, insanlara qayğı göstərin, onların problemlərini həll edin. Yoxsa, oturmaqla iş bitməz. Ay məmur, oturduğun yerdən bir az tərpənmək lazımdır! Sən orada oturub qalmamalısan. İnsanlar televizor deyil ki, sən onları uzaqdan idarə edəsən. Ancaq mənim deputat olmaq kimi bir fikrim yoxdur. Yoxsa, durub "etdiyim hərəkətlərə görə məni mütləq millət vəkili seçməlisiniz" deməyəcəyəm. Bu, mənə yaraşmaz.
Baxın, 3 ildi qəbirsanlıqda yatan kişi vardı, qohumu gəlib onu aparıb. Belə bir neçə insanların yaxınları tapılıb. İndi istəyirəm, gedib baxım, görüm o insanlara necə baxırlar. Bax, əsl təbliğat budur. İtlərin gözlərini çıxartmışdılar, əməliyyat etdirmişəm. Onları da nəzarətdə saxlayıram. Dərmanlarını almışam, bir it xərçəng idi, onun kimyaterapiyasını etdirmişəm. Artıq onların da vəziyyətləri yaxşıdır. Etdiyim işlərlə maraqlanıram ki, nəticəsiz qalmasın.
- Elə insanlar oldu ki, yaxşı olanda yanınızda oldu, ancaq dar gününüzdə yoxa çıxdılar?
- Vallah, bunun mənim üçün heç bir fərqi olmadı. Düzdür, mən özüm hamıya tapşırmışdım ki, yanıma heç kim gəlməsin. Bu, onsuz böyük bir müddət deyildi. Buna ehtiyac da yox idi. Mən həbsdə olanda da köməkçim vasitəsilə yardımları paylayırdıq. Ona görə kim maraqlandı, kimi maraqlanmadı, bunların heç birinə fikir vermirdim. Allah insanı betər gündən qorusun.
- 10 günlük müddətdən sonra evə qayıdanda bir məqam diqqətimi çəkdi. Orada ananız, qızınız və qaynananız sizi gözləyirdi. Amma nədənsə Gülay xanım gözə dəymədi. Bəlkə elə bu kimi məqamlar ayrılmağınızla bağlı şayiələr yaradır? Bu sual çoxlarına maraqlıdır...
- Mən özüm demişdim ki, gəlməsin. Çünki orada mənim dostlarım iştirak edirdilər. Mən kimin ailəsinə hansı gözlə baxıramsa, onlar da o cür edirlər. Məsələnin əsli bu idi. Bu söz-söhbət mənə maraqlı da deyil. İnsanlar bir az öz ailələri ilə maraqlansınlar. Mən kiminsə ailəsi ilə maraqlanıram ki, vəziyyətləri necədir? Bu, hər kəsin öz şəxsi işidir. Məni bu gün əsas övladım maraqlandırır. Əsas onun canı sağlam olsun. Yüz dənə ailə qurban olsun övladıma. Uzaq olsun, övladımızın dırnağına zərər gələndə hər şey, bütün ruh, bədən bir-birindən ayrılır. Mən yüz dəfə ailə qurub, boşana da bilərəm.
- Sizin qalmaqallı bir fikriniz vardı. Azərbaycanda hacıların çox hissəsi “moşennik”dir. Bu fikirdə qalmısınız, yoxsa nəsə dəyişilib?
- Müəllimlərin də, həkimlərin də, idmançıların da, məmurların da içərisində yaxşısı da var, pisi də. Bunu hacılara da aid edirəm. Ancaq onların içərisində yaxşı azdır. Heç kəs öz ayranına turş deməz. Heç kəs lovğalanmasın ki, mən namaz qılıram, səcdə edirəm. Bununla iş bitmir. Əsas ondan sonra bunu əməllərində göstərməlisən. Namaz qılıb, Həccə getmək məktəbin birinci sinfi sayılır. Daha sonra məktəbi bitirməlisən. Əgər bir insan Həccə gedibsə, gələndən sonra bütün pis əməllərindən çəkinməlidir. Qayıdıb yenə pis yolda olacaqsansa, insanları aldadacaqsansa və digər pis əməllər törədəcəksənsə bunun heç bir əhəmiyyəti qalmır. Ondansa öz yerinə hansısa bir kasıb, əsl dindarın xərcini çək, qoy o, gedib müqəddəs torpaqları ziyarət etsin. Bu onlara daha çox savab qazandırar. Mən bu gün dediyim hər bir sözün sonuna qədər arxasındayam. Bu gün insanların din adamlarına inamları azdır. Çünki, onlar din adı altında bir çox insanı aldadıblar. Ona görə bu gün cəmiyyətdə yaxşı, əsl dindarlar azdır. Əsas Həccə gedib gəldikdən sonra etdiyin əməllərdir. Niyə axı, siz hacı adını ləkələyirsiz?
Söhbətləşdi: Vüsalə Balayeva
Foto/VİDEO: Rüfət Qasımzadə
Xalq artisti, tanınmış iş adamı Emin Ağalarov sensasion açıqlama verib.
Musavat.com xəbər verir ki, Azərbaycanın xalq artisti koronavirusa yoluxduğunu, amma bunu mediadan gizlətməyə məcbur olduğunu etiraf edib
E.Ağalarov opera müğənnisi Yusif Eyvazovun İnstaqramda etdiyi canlı yayımda qonaq olub. O, verdiyi müsahibədə xəstəliyə yoluxduğunu, amma adının ətrafında çoxsaylı şayiələri artırmamaq üçün bu xəbəri gizlətdiyini deyib.
E.Ağalarovun sözlərinə görə, xəstəlik səbəbindən kifayət qədər ciddi imtahandan keçib. Həyatında heç vaxt tək qalmadığını deyən müğənni xəstəlik səbəbindən iki həftə özünü izolyasiya etmək məcburiyyətində qalıb
"40 il ərzində ilk dəfə özümlə tanış oldum", - deyə, musiqiçi izolyasiyada keçirdiyi vaxta işarə edərək zarafatından da qalmayıb.
Ağalarov xəstəlik zamanı qanında əmələ gələn antikorların onu bundan sonra koronavirus infeksiyasından qorumağa imkan verəcəyinə inandığını bildirib.
O, xəstəlik səbəbindən uşaqları ilə məsafəli görüşdüyünü, onlar üçün darıxdığını söyləyib.
Dövlət Təhlükəsizliyi Xidmətinin (DTX) Mədəniyyət Nazirliyində keçirdiyi əməliyyatdan sonra işdən çıxarılan Əbülfəs Qarayevlə bağlı ziddiyyətli məlumatlar bir-birini əvəzləyir. Onunla bağlı yayılan məlumatlarda sabiq nazirin istintaqa cəlb olunduğu, iş üzrə şahid qismində dindirildiyi, yaxın vaxtlarda onun da müavini Rafiq Bayramov və Mədəniyyət Nazirliyi yanında Mədəni İrsin Qorunm ası, İnkişafı və Bərpası üzrə Dövlət Xidmətinin rəisi Zakir Sultanov kimi həbs olunacağı iddia olunur.
Ə.Qarayev vəzifəsindən çıxarılandan sonra onun MDB və ya Avropa ölkələrindən birinə səfir göndərilə biləcəyi ehtimalı da var. Azərbaycanda "vurulmuş” kadrların səfir göndərilməsi praktikasını yada salanda bu xəbərlər bir az inandırıcı görünür. Amma onun "qara pulları”nın izinin Panama, Malta, Litva və Rusiyada üzə çıxması barədə yayılmış materiallar Qarayevin işinin yaxşı olmadığını təsdiq edir.
Ə.Qarayevin bir neçə ölkəyə, o cümlədən offşor adalara səpələnmiş çoxsaylı şirkətləri barədə sənədləri araşdırmaçı jurnalist Cavanşir Həsənli yayıb. Belə məlum olur ki, Ə.Qarayevin ailə şirkətləri Azərbaycanla yanaşı, Rusiya, Litva, Panama və Maltanı da əhatə edir.
Əslində DTX-nın Mədəniyyət Nazirliyində aşkarladığı bəzi korrupsiya faktları Qarayevin mədəniyyət pullarını necə taladığı haqda müəyyən təəssürat yaradırdı. İndi isə məlum olur ki, o, Azərbaycandan çıxardığı pullarla xarici ölkələrdə daşınmaz əmlak və digər aktivlər alıb. Belə ki, keçmiş nazirin yeganə övladı - qızı Suad Qarayeva hələ 2002-ci ildən ad və soyadının baş hərflərini özündə ehtiva edən "SQ-FUTURE” MMC-nin təsisçisidir. Bakı şəhəri, Səbayel rayonu, Müslüm Maqomayev küçəsi, ev 22-də hüquqi qeydiyyatda olan şirkətin qanuni təmsilçisi Ülviyyə Məcidovadır. Həmin ünvanda 2006-cı ilin martında Ə.Qarayevin həyat yoldaşı Lalə Tofiq qızı Kazımovanın təsisçiliyi ilə Mədəniyyət Nazirliyi tərəfindən maliyyələşdirilən "Yol+İlk elmi-populyar dərgi redaksiyası” MMC qeydə alınıb. O, "Jazz Dostları” ictimai birliyinin də təsisçisidir. Lalə Kazımova 2010-cu ilin dekabrında Türkiyədə ad və soyadının abbreviaturasını ifadə edən "KL Bodrum Emlak Ticaret ve Sanayi Limited Şirketi”ni təsis edib. Şirkət İstanbul Ticaret Sicili Memurluğunda 5000 TL nizamnamə kapitalı ilə qeydiyyatdan keçib.
Nizamnaməyə görə, Qarayevlərin ailə şirkəti Türkiyədə və ölkə xaricində turizm obyektləri, hotel, yaşayış binaları, villa və idman təsisatlarına sahib olmaq, işlətmək hüququ əldə edib. Qarayevlərin Türkiyədəki turizm təsisatları barədə məlumat olmasa da, keçmiş nazirin xanımının sosial şəbəkələrdəki hesabında Bodrumdakı 5 ulduzlu "Kuum” hotelinin simvolunu (qoşaqanadlı mələk) profil şəkli seçməsi maraq doğurur. Lalə Kazımovanın adına Litvada da şirkət qeydiyyata alınıb. "Triat Exire” UAB (LTD, qeydiyyat nömrəsi 302521161) 10 ilə yaxındır ki, Litvanın daşınmaz əmlak bazarında fəaliyyət göstərir. Vilnüsdə Şaltinıy 22-də Qarayevlər ailəsinə məxsus çoxsaylı daşınmaz əmlak icarəsindən gəlir 35 min dollardan artıqdır. Ə.Qarayevin qızı Suad Qarayevanın təsisçisi olduğu daha bir daşınmaz əmlak şirkəti 2013-cü ildə Rusiya paytaxtında qeydiyyatdan keçib. "Qals” MMC (QALS OOO) 20 min rubl nizamnamə kapitalı ilə Moskvanın Tatarskaya küçəsi 7 ünvanında hüquqi qeydiyyata alınıb. Baş direktoru Fərid Oqtay oğlu Cəfərovdur. Şirkətin adı Qarayevlər ailəsinin soyad və adlarının abbreviaturasından götürülüb: Qarayev, Abulfas, Lalə və Suad. Şirkət üzərindən Qarayevlər ailəsi Moskvada icarəyə verilmiş çoxsaylı mənzillərə, ticarət obyektlərinə sahibdir.<ins'>
Rusiya Federal Vergi Xidmətində QALS MMC-yə aid məlumatlarda qeyd olunur ki, şirkət 2018-ci ildə daşınmaz əmlak biznesindən 6.7 milyon rubl (təxminən100 min dollar) gəlir əldə edib, federal büdcəyə 430 min rubl vergi ödəyib. Qarayevlər ailəsinin GALS adı ilə daha bir neçə şifkəti isə Azərbaycandadır. "GALS Gallery” MMC 2013-cü il aprelin 19-da qeydiyyatdan keçib. Qanuni təmsilçisi Əbülfəs Qarayevin həyat yoldaşının rəfiqəsi Vəzirova Liana Leonidovnadır. O, Mədəniyyət Nazirliyi nəzdindəki Muzey Mərkəzi binasının inzibati və təsərrüfat müdiriyyətinin direktorudur. Muzey Mərkəzi "Rus muzeyi” də adlanır. Fəaliyyəti elektron-rəqəmsal və çap materialları əsasında rus mədəniyyətini öyrənmək və təbliğ etməkdir. Muzey Mərkəzinin direktorunun adına rəsmiləşdirilmiş şirkət Bakı şəhəri, Səbayel rayonu, Y.Məmmədəliyev küçəsi, ev 14 ünvanında qeydiyyatdadır. Həmin ünvanda keçmiş nazirin xanımına məxsus "Gals Beauty and SPA” MMC isə 2013-cü il mayın 3-də qeydiyyatdan Araz Nağıbəyli Əli oğlunun qanuni təmsilçiliyi ilə qeydiyyata alınıb. Lalə Kazımova bu şirkətə bağlı, Bakının mərkəzindəki "NailRoom” (Rəşid Behbudov küçəsi 53c və 31c) gözəllik salonlarına da sahibdir. Ə.Qarayevin özü isə "otkat”lardan aldığı payını daha uzaqlara yatırmağa üstünlük verib. Onun və Milli Məclisin deputatı Hüseynbala Mirələmovun şərik olduğu RİMBA SA. offşor şirkəti 2004-cü ilin fevralında Panamada qeydiyyata alınıb. Adı "sivilizasiyadan, mədəniyyətdən uzaq, cəngəllik” anlamına gələn şirkətin 2005-ci ildə Azərbaycanda qeydiyyatdan keçmiş nümayəndəliyi isə bu yaxınlarda ləğv edilib. 2015-ci ildə Əbülfəs Qarayevin qızı Suad Qarayeva - Maleki ilə ailə quran İran əsilli Britaniya vətəndaşı Şəhriyar Maleki də bu izdivacdan sonra Azərbaycanda iri biznesə sahib olub. O, 2016-cı ildən Bakıda "COLAB” biznes mərkəzlərinin şərikidir.
Paytaxtda iki ünvanda - Neftçilər pr. 151-də PORT BAKU MALL-da və "Time” Business Mərkəzində hər biri 1000 kvadratmetrlik iki böyük iş mərkəzlərində ofislər, seminar və konfrans salonları icarədədir. Keçmiş nazirin kürəkəni 2016-cı ilin noyabrında Azərbaycanda "Green Farms Azerbaijan” MMC şirkətini də qeydiyyatdan keçirib. Şirkətə aid saytda qeyd olunur ki, o, "Green Farms International” şirkətinin Azərbaycan üzrə nümayəndəliyidir. Ə.Qarayevin nazir kimi nüfuzu sayəsində "Green Farms Azerbaijan” MMC 2017-ci ilin mayında Biləsuvar İcra Hakimiyyətindən 5 min hektar torpaq sahəsini olduqca aşağı qiymətə 49 illik icarəyə götürüb. https://www.greenfarms.az/ Həmin ərazi Qarayevlərin və qohumlarının nəzarətinə keçənə qədər qışlaq sahəsi olub və yerli əhali tərəfindən təyinatı üzrə istifadə edilib. Ə.Qarayev 2017-ci ildə Nazirlər Kabinetinin sərəncamı ilə bu ərazinin əkin sahəsi kimi istifadə olunmasına və qudasının Maltadakı şirkətinin nəzarətinə verilməsinə nail olub. İcarə müqaviləsinə imza atan keçmiş icra başçısı, Ə.Qarayevin yaxın dostu Mahir Quliyev aprelin 29-da DTX tərəfindən saxlanılıb. Biləsuvarda böyük torpaq sahələrini ələ keçirən "Green Farms İnternational LTD” 2016-cı ilin oktyabrında Maltada qeydiyyatdan keçib.
Maltadakı şirkətin təsisçisi isə Ə. Qarayevin Avstriya və Monako vətəndaşı olan qihumu İsgəndər Malekidir. O, 2016-cı ilin iyunundan Maltada daha bir şirkətin AS Limited-in səhmdarıdır. Şirkətin digər səhmdarı qismində Adinotec LTD offşor şirkəti çıxış edir. İsgəndər Maleki vaxtilə İngiltərənin ən nüfuzlu iş adamlarından olub. Onun xanımı Fatimə Maleki və Şəhriyar Maleki 1991-2009-cu illərdə Britaniyada çoxsaylı maliyyə şirkətlərinə rəhbərlik edib, neft treyderi kimi tanınıb, sonrakı illərdə biznesində durğunluq yaranıb.
Malekilər ailəsi dünyanın ən bahalı tarixi incəsənət nümunələrinin kolleksiyaçıları kimi də məşhurlaşıblar. Onlar Londonda Ə.Qarayevin qızının çalışdığı və tarixi əsərlərin hərrac yolu ilə satışa çıxarıldığı Sothebys incəsənət auksionunun daimi müştəriləridir. Güman ki, Qarayevlərin Malekilərlə qohumluğu da buradan başlayır. Ümumiyyətlə, Sotheby’s hərracında Azərbaycana aid tarixi mədəniyyət əsərlərinin satışa çıxarılıb-çıxarılmadığının çox ciddi araşdırmaya ehtiyacı var. (musavat.com)
Ana Vətən Partiyasının Mətbuat Xidmətinin Rəhbəri Tünzalə İsmayıllının
XəbərAl.az Saytına Ekiskuliziv Müsahibəsini Sizlərə Təqdim Edirik!
Sizi necə təqdim edək? – Necə tanıyırsınız?
Tanıdığınız kimi.
İlk dəfə hansı mətbuatda işləmisiniz?
– İlk iş yerim “Xocalı Soyqırımını Tanıtma” İctimai Birliyi olub. Mən özüm könüllü xüsusi müxbir olaraq getdim və bir müddət sonra orda da Mətbuat Xidmətinin rəhbəri vəzifəsində çalışdım.
Neçə ildir Fəzail Ağamalı ilə işləyirsiniz?Fəzail müəllimlə işləmək çətin deyil?
8 il xeyir. İşini bilən, məsuliyyəti olan üçün heç nə və heç kim çətin olmaz.
Bilirik ki, yeni övladınız dünyaya göz açıb.Bu sizin işinizə maneəçilik etməyəcək?
-Heç bir maneəçilik də yoxdur. İnanın səmimiyyətimə, əməliyyat otağından mətbuata məlumat ötürüb əməliyyata girmisəm. Bildiyiniz kimi bu mənim ikinci övladımdır. Yəni təcrübə var artıq.
Ana olmaq məsuliyyətlidir yoxsa mətbuat xidmətinin rəhbəri?
Ana, bütün vəzifələrdən məsuliyyətli və şərəfli bir hissdir. Heç bir vəzifə ömürlük verilimir. Anacaq valideylik ömürlük məsuliyyətdir.
İşinizə göz dikib maneə yaradanlar var?
– Qeyri-peşəkar jurnalistlər var, bu məni yorur. Başqa heç nə narahat etmir (gülür).
Bilirik ki, neçə ildir media sahəsində çalışsanız da, hələ də kirayədə yaşayırsınız. Bu sizə çətinlik yaratmır?
– Yaradır əlbəttə. Göydə uçan quşu belə Allah yuvasız qoymasın!
Əgər qız övladınız olsaydı, jurnalist və ya mətbuat xidməti rəhbəri işləməsinə icazə verərdiniz?
İstədikləri peşəni seçməyi özlərinə həvalə edərəm, ancaq mənə qalsa, icazə verməzdim.
Bildiyimiz qədər vaxtı ilə idmanla məşqul olmusunuz, niyə davam etdirmədiniz və oğlanlarınızın bunu davam etdirməsini istərdinizmi?
İdman mənim üçün peşə deyil, maraq olub. Şərt deyil idmancı, siyasətçı və ya jurnalıst olsunlar. Əsas vətənimizə layiq övlad olsunlar.
Gələcəkdə “Ana Vətən” partiyasının və sizin planlarınız?
-Onu gələcəkdə görərsiniz, inşallah.
Təşəkkür edirəm səmimi müsahibə üçün!
Çox sağ olun!
"İzzətin bir mahnısı var, çox sevirəm o mahnını. İzzətin ifasında o mahnını çox sevmişəm. Bir zaman çox məşhur idi o mahnı "Yaşım yolun yarısı".
Milli.az xəbər verir ki, bu açıqlamanı "Şou ATV"də aparıcı Nanə Ağamalıyeva edib.
Verilişdə qonaq olan İzzət Bağırov aparıcının sözünü yarımçıq kəsərək sözügedən mahnı ilə bağlı maraqlı bir faktı açıqlayıb:
"Onda qoy bir dənə açıqlama verim: Nanə o vaxtlar ATV-də radioda çalışırdı. O mahnını gündə bəlkə bir 10 dəfə verirdi. Axırda ona görə töhmət aldı. Ay qız, bəsdir də. Bir müğənninin mahnısını gündə nə qədər verəcəksən?! Dedim "Nanə, etmə də. Elə bilərlər ki, mən sənə nəsə verirəm".
“Ağlayan müğənni onsuz ilboyu ağlayacaq. Mən müğənni tanıyıram ki, Bayılda bahalı villası var, onu bir şirkətə uzun müddətli kirayə verərək 300 min manat pul alıb”.“Ölkə.Az” xəbər verir ki, bu sözləri jurnalist Ülviyyə Alovlu “Youtube” kanalında yayımlanan “Bomba Tv” adlı verilişində deyib.
O, həmin ifaçının adını çəkməsə də, onun kirayə verdiyi bir neçə mənzilinin olduğunu da deyib:
“Həmin o müğənni, kirayə haqqı aldığı pula bir neçə mənzil alıb, onları da kirayə verib. Düzdür, sonradan lazım olub, mənzilin birini satıb. Ancaq bu da “ağlamağa” səbəb deyil. Bilirsiz, elə bil müğənnilər bizə ancaq “ağlayan” tərəflərini göstərməyə çalışırlar”.