 |
 |
Bakının baş toksikoloqu yayda açıq havada istirahətə üstünlük verən və "piknik"i sevən valideynlərə övladlarını nəzarətsiz qoymaması ilə bağlı xəbərdarlıq edib.
Bakı şəhər Baş Səhiyyə İdarəsinin baş toksikoloqu, Kliniki Tibbi Mərkəzin Toksikologiya şöbəsinin həkimi, dosent İsmayıl Əfəndiyev Trend-ə açıqlamasında bildirib ki, uşaqların kimyəvi zəhərlənməsi təsadüf nəticəsində və valideyn nəzarətsizliyi şəraitində baş verir.
Onun sözlərinə görə, yalnız 2018-ci ildə Azərbaycanda bütün kimyəvi zəhərlənmə hallarının 17 faizi yaşı 14-dək olan uşaqların payına düşüb. Bunların əksəriyyəti təsadüfi zəhərlənmələrdir:
"Yayda insanlar bağlara köçür və açıq şəraitdə kabab bişirirlər. Çox zaman böyük yaşlı insanlar neft məhsullarını nəzarətsiz qoyurlar və bu da uşaqların əlinə keçir. Uşağın bir udum neft içməsi onun sağlamlığı üçün həyatı təhlükə yaradır.
Bu, uşaqlarda çox ağır toksiki pnevmaniyaya səbəb olur.
Ona görə də uşaq hətta bir udum neft məhsulu içsə belə, onu təcili xəstəxanaya aparmaq lazımdır. Çünki birinci sutkada uşaqda təhlükəli əlamətlər hiss edilmir.
Amma 2 və 3-cü günlərdə uşaqda ağır zəhərlənmə halları, pnevmaniya başlayır və xəstəlik inkişaf edir. Bu, hətta ölümlə də nəticələnə bilər.
Ona görə də valideynlər bilməlidirlər ki, uşaq bir az belə neft içsə də, onu dərhal xəstəxanaya-toksikologiya şöbəsinə aparmaq lazımdır".
İ.Əfəndiyev qeyd edib ki, bəzən valideynlər uşaqların sırf neft qəbulundan sonra sətəlcəm olmasından şübhələnməyərək, onların soyuqladığını düşünür və onu zəhərlənmədən 2-3 gün sonra toksikoloqa deyil, qeyri-ixtisas həkiminin yanına aparırlar. Bu isə xəstəliyi daha da inkişaf etdirir:
"Valideynlər bilməlidirlər ki, bu halda uşaqda infeksiyon deyil, toksiki pnevmaniya baş verir. Buna görə də uşağı gecikdirmədən lazımi mütəxəssisin yanına aparmaq lazımdır ki, ağırlaşmalar daha da artmasın".
Toksikoloq neft məhsullarından zəhərlənmə hallarının xüsusilə 4-6 yaşlı uşaqlar arasında baş verdiyini söyləyib.
İ.Əfəndiyev qeyd edib ki, 2017-ci ildə 21 uşaq, 2018-ci ildə 20 uşaq neft məhsullarının qəbulundan zəhərlənmə ilə xəstəxanaya yerləşdirilib.
O, uşaqların marağını nəzərə alaraq, valideynlərə neft məhsullarını azyaşlıları özünə cəlb edən içki şüşələrində saxlamamasını da tövsiyə edib: "Yandırıcı məhlulları heç zaman belə qabların içində saxlamaq olmaz.
Uşaqlar elə bilirlər ki, o qabların içində su, yaxud kompot var, susuz olduqda onu dərhal götürüb içirlər və bu da zəhərlənməyə səbəb olur".
Bu gün Bakının bəzi ərazilərində su olmayacaq.
Magistral su kəmərlərində aparılan yenidənqurma işləri ilə əlaqədar 21-22 may 2019-cu il tarixlərində Suraxanı rayonunun bir hissəsinə (Suraxanı, Hövsan, Əmircan qəsəbələrinə və Qaraçuxur qəsəbəsinin bəzi hissələrin) içməli su müəyyən fasilələrlə veriləcək.
Bu barədə "Ölkə.Az"a “Azərsu” ASC-dən məlumat verilib.
Yaranmış narahatlıqla əlaqədar “Azərsu” ASC abonentlərdən üzr istəyir.
Günəş gözlüyü olmadan bunları etsəniz, gözünüzü itirə bilərsiniz
Havaların istiləşməsi günəş gözlüyünün vacibliyi məsələsini bir daha aktuallaşdırır. Əslində mütəxəssislər nəinki isti aylarda, o cümlədən soyuq aylarda və qarlı havalarda da xüsusi eynəklər taxmağı məsləhət görürlər.
Sputnik Azərbaycan-ın Türkiyə mediasına istinadən xəbərinə görə, türkiyəli həkimlər belə havalarda günəş eynəyi olmadan çölə çıxmamağı məsləhət görürlər. Bundan başqa, buludlu havalarda da günəş eynəyi taxmaq tövsiyə olunur.
“Günəş eynəyinin görünüşünə deyil, keyfiyyətinə fikir verin. Bundan başqa, hovuza və dənizə də xüsusi eynəklərlə girməyi tövsiyə edirik” – deyə mütəxəssislər məsləhət verirlər.
Baş Dövlət Yol Polisi İdarəsi UEFA Avropa Liqasının final oyununun Bakıda keçirilməsi ilə əlaqədar avtomobil sahiblərinə və sürücülərə müraciət edib.
İdarədən bildiriblər ki, carı il mayın 29-da Bakıda Olimpiya Stadionunda “Arsenal” və “Çelsi” futbol klublarının iştirakı ilə UEFA Avropa Liqasının final oyunu keçiriləcək. Final oyununa tamaşa etmək üçün xarici ölkələrdən paytaxtımıza gələcək çoxsaylı qonaqların, azarkeşlərin və rəsmi şəxslərin nəqliyyat vasitələrinin sərbəst hərəkətinin təşkil olunması üçün Baş Dövlət Yol Polisi İdarəsi tərəfindən əlaqəli qurumlarla birlikdə zəruri tədbirlər həyata keçirilir.
Bununla əlaqədar Bakıda nəqliyyatın sıxlığının azaldılması, habelə avtomobillərin və piyadaların şəhər daxilində rahat, fasiləsiz hərəkətinin təşkili məqsədilə respublikanın digər şəhər və rayonlarından paytaxta gəlmək istəyən vətəndaşlarımıza carı il mayın 27-dən 30-dək olan müddətdə ictimai nəqliyyat vasitələrindən, marşrut avtobuslardan istifadə etməyi tövsiyə edirik. Sumqayıt sakinləri isə avtobuslarla yanaşı, Bakı-Sumqayıt marşrutu üzrə fəaliyyət göstərən sürətli elektrik qatarlarından istifadə edə bilərlər.
“Xatırladırıq ki, Bakı şəhərinin giriş hissələrində lazımi şəraitlə təchiz olunmuş və mühafizə olunan ödənişsiz duracaqlar fəaliyyət göstərir. Paytaxta fərdi minik avtomobilləri ilə gəlmək məcburiyyətində qalan şəxslər avtomobillərini həmin duracaqlarda saxlayaraq xüsusi marşrutla işləyən avtobuslarla ən yaxın metro stansiyasına gedə bilərlər. Eyni zamanda, paytaxt sakinlərindən həmin müddət ərzində fərdi nəqliyyat vasitələrindən mümkün qədər az istifadə etmələrini, xüsusilə Bakının mərkəzi hissəsinə yalnız ictimai nəqliyyat vasitələri ilə hərəkət etmələrini tövsiyə edirik”, – deyə Baş Dövlət Yol Polisi İdarəsinin məlumatında qeyd olunub.
Şəmkir küçələrinin zibil içində olması, rayonda hökm sürən antisanitariya haqda “Yeni Müsavat”ın ötən saylarında “Şəmkirdə zibil korrupsiyasından kimlər qazanır” sərlövhəli reportaj təqdim edilib.
Şəmkirin əsas küçələrində, Şəhidlər Xiyabanı önündə belə çirkabın dizə çıxdığını oxucularımızla bölüşüb. Burada hələ də vəziyyət dəyişməyib, üstəlik, bir qədər də qəlizləşib. Artıq inəklər şəhərin mərkəzində, düz rayon icra hakimiyyətinin 1 addımlığındakı “İstiqlal” parkında otlayırlar. Dahi Üzeyir Hacıbəyovun, cümhuriyyəti şeirlərində quran şair Əhməd Cavadın heykəlləri önündə indi heyvanlar gəzir. Bu o vaxt baş verir ki, rayona “DOST” mərkəzi xətti ilə 550 işçi ştatı verilib. Hər ay həmin şəxslərə minimum əmək haqqı ödənişi gerçəkləşdirilir. Haradadır 550 işçidən 3-ü, 5-i? Yəni həmin 550 nəfərdən “İstiqlal” parkına ayrılan işçisi qüvvəsi olmayıb?
Şəmkirdə inəklərin mərkəzi parkda “parad”ı rayonda pul yığımı xəbərlərinin dolaşdığı bir vaxta təsadüf edib. Belə xəbərlər var ki, Alimpaşa Məmmədov kənd icra nümayəndələrindən, bələdiyyə sədrlərindən pul yığdırır. İddia olunur ki, şəhərin abadlığı adı ilə toplanan pullar əslində “JEK” rəisi Teymur Hacıyevi “təmizə” çıxarmaq üçün toplanır. Ümumilidə toplanan məbləğin 200 min manat civarında olduğu bildirilir. Yada salaq ki, Teymur Hacıyev bu il aprelin 2-də bankomatdan fəhlələrin əvəzindən maaş alarkən “iş başında” yaxalanıb. Yayılan məlumatlardan belə aydın olurdu ki, “JEK” rəisi 2 ay izlənilib, nəhayətdə bankomatdan 32 “ölü can”ın adına olan bank kartı ilə pul çıxararkən, necə deyərlər, “veşdok”la tutulub. Onun barəsində cinayət işi başlanıb, Baş Prokurorluq bu haqda məlumatları təsdiqləyib. Teymur Hacıyev hazırda ev dustağıdır. Bu olayı Şəmkirdə bilməyən yoxdur, hər kəs maraqla arestant rəisin cinayət işinin hansı sonluqla nəticələnəcəyini gözləyir. Teymur Hacıyevin isə əlinə vurulacaq qandalın bir halqasının da onu bu işlərə məcbur edənin qoluna vurulacağını başçıya çatdırması xəbəri də vardı…
Belə görünür ki, Teymur Hacıyev istəyinə nail olmaq üzrədir. Maraqlıdır ki, Alimpaşa Məmmədov 200 min manata Teymur Hacıyevi “zibil”dən təmizləyə biləcəkmi?
Yada salaq ki, Əmək və Əhalinin Sosial Müdafiəsi Nazirliyi Şəmkir rayonuna “DOST” mərkəzi xətti ilə məhz təmizlik işləri üçün 550 nəfərin işlə təminatını həyata keçirir. Hər ay bu məqsədlə dövlət büdcəsindən hər bir fəhləyə 180 manat əməkhaqqı da kəsilib. Şəmkirdə “DOST”dan fəhlələrin əməkhaqları hər ay alınsa da, 550 fəhləni görən olmayıb. “İstiqlal” parkında inəklərin rahat şəkildə gəzib-dolaşması deyilənləri bir daha təsdiqləmiş olur.
Gəncə Şəhər Təhsil İdarəsində məsləhətçi vəzifəsində çalışan 1994-cü il təvəllüdlü Ceyhun Qabil oğlu Bağırov itkin düşüb.
Bu barədə “Report”a açıqlamasında onun atası Qabil Bağırov deyib.
“Oğlum mayın 17-si işlədiyi Gəncə Şəhər Təhsil İdarəsinə gedib. Amma saat 10-dan sonra oğlumla heç bir əlaqə saxlaya bilməmişik. Həmin gündən uşaq yoxa çıxıb. Hazırda Gəncə Şəhər Polis İdarəsindəyik. Axtarışlar davam edir. Oğlumu görənlərdən xahiş edirəm ki, bizimlə əlaqə saxlasınlar”, – Q.Bağırov bildirib.
Q.Bağırovun sözlərinə görə, oğlu nişanlıdır: “Toy mərasimi üçün hazırlıq işləri görürük. İyunun 11-də toy mərasimini planlaşdırmışıq”.
C.Bağırovu görənlərdən aşağıdakı telefon nömrəsi ilə əlaqə saxlamaları xahiş olunur:
050 640 67 73 (Qabil Bağırov)
Bu gün Şəmkir Rayon İcra Hakimiyyətinin başçısı cənab Alimpaşa Məmmədov istirahət günüdə öz evində Dilqəm Əsgərovun oğlu Kürdoğlu Əsgərovla görüşüb.
Minval.info-ya daxil olan məlumata görə, görüş zamanı Kürdoğlu Əsgərovun icarəyə götürdüyü torpaq sahəsi ilə bağlı müzakirələr aparılıb.
“Səmimi görüş zamanı Kürdoğlu Əsgərova ərazinin çay yatağı olduğundan icarəyə götürülməsi üçün aidiyyətli qurumlar – FHN, Ekologiya və Təbii Sərvətlər Nazirliyi, Əmlak Məsələləri Dövlət Komitəsi və Azərbaycan Meliorasiya və Su Təsərrüfatı Açıq Səhmdar Cəmiyyəti tərəfindən müsbət rəy verilməsinin vacibliyi bildirilib” – məlumatda bildirilir.
Vurğulanıb ki, Kürdoğlu Əsgərov torpaq sahəsini icarəyə götürmək üçün müraciət etdiyi anda dərhal aidiyyətli qurumlara Şəmkir Rayon İcra Hakimiyyəti tərəfindən rəsmi müraciət ünvanlanıb.
“Müzakirə zamanı məlum oldu ki, məsələnin kökündə qısa anlaşılmazlıq olub. Torpağın icarə müqaviləsini artırmaq üçün vətəndaş tərəfindən aidiyyəti dövlət orqanların rəyi gözlənilməlidir.
Çay süfrəsi arxasında keçirilən səmimi görüşdə Cənab Alimpaşa Məmmədov hər zaman olduğu kimi bundan sonra da Kürdoğlu Əsgərova yaxından dəstək olacağını, məsələnin həll olunması üçün əlindən gələni əsirgəməyəcəyini bildirib” – məlumatda qeyd olunur.
“Avesta” şirkətinin prezidenti Hacı İbrahim Nehrəmli Nazirlər Kabinetinin sifariş etdiyi binanı 7 ildir tikib təhvil verə bilmir.
“Qafqazinfo”ya müraciət edən sakin Fuad İsmayılzadə bildirib ki, Həsən bəy Zərdabi küçəsi 74 ünvanında yerləşən, 2012-ci ildə tikintisinə başlanılan və 3 ilə təhvil verilməsi nəzərdə tutulan tikilidə işlər hələ də tamamlanmayıb:
“Bina Nazirlər Kabinetinin sifarişi ilə onun əməkdaşları üçün tikilib və mənim atam həmin qurumda işlədiyi üçün biz də endirimli qiymətlə oradan mənzil almışıq. Amma 2017-ci ildən işlər dayanıb, Fövqəladə Hallar Nazirliyi bir neçə dəfə binanı təhvil götürmək üçün gəlib və yoxlayıb, işlər tamamlanmadığı üçün sənəd verilməyib. Binada 4 lift var, 3-ü ümumiyyətlə işləmir, biri də tez-tez xarab olur, balkonların şüşələri qoyulmayıb və kommunikasiya ilə bağlı başqa işlər qalıb. 2017-ci ildən sonra isə demək olar ki, ümumiyyətlə, işlər dayanıb”.
Binanı “Avesta” holdinqə daxil olan “Tərəqqi” MTK tikir. “Avesta”nın sahibi İbrahim Nehrəmli bir müddət əvvəl sakinlərlə görüşüb və onlara bildirib ki, 3 gün ərzində işlərin görülməsi ilə bağlı qrafik tərtib edəcəklər və yaxın müddətdə təhvil veriləcək.
Tikinti üzrə layihə rəhbəri Qurban Əhmədov “Qafqazinfo”ya açıqlamasında bildirib ki, hazırda binada görülən işlərin ekspertizası ilə bağlı Fövqəladə Hallar Nazirliyindədir: “İşlər davam etdirilir, təxminən 95 faiz iş görülüb, xırda işlər qalıb. Daxili kommunikasiya xətləri çəkilib, onların ana xəttə birləşdirilməsi qalıb. Bəzi mənzillərdə yaşayış var, bəzilərində yoxdur. Binaya köçən sakinlər kommunal xətlərdən istifadə edirlər. Bu ilin sonuna kimi tikilinin tam təhvil verilməsi nəzərdə tutulub”.
Bakıda fəaliyyət göstərən məşhur “Ege” Hospitalda rəhbərliklə həkimlər arasında yeni böhran yaşanır.
Bu barədə Bakupost.az-a daxil olan məlumatda bildirilir ki, ötən il təmtəraqlı şəkildə rebrendinq edən və adını “Grand” Hopsitaldan “Ege” Hospitala dəyişən xəstəxanada işləyən türkiyəli həkimlər Azərbaycanı tərk etməyə başlayıb.
Bildirilir ki, bir il əvvəl böyük ümidlərlə adını dəyişən və demək olar, bütün yerli kollektivi qalmaqallı şəkildə işdən qovaraq xəstəxanaya türkiyəli mütəxəssisləri dəvət edən rəhbərlik, reklam kampaniyalarına böyük büdcələr ayırsa da, gözlədikləri nəticələri ala bilməyiblər.
Adının “Grand” Hopsital olduğu dönəmdə müəmmalı ölüm faktlarının ardıcıl şəkildə ictimailəşdiyi xəstəxana bu mənfi reputasiyasını tamamilə unutdurmaq üçün inqilabi addım atmış, xəstəxananın adını dəyişmiş, onlarla azərbaycanlı həkimi işdən heç bir xəbərdarlıq etmədən bir həftənin içərisində işdən uzaqlaşdırəb, onların yerinə Türkiyədən mütəxəssislər dəvət etmişdi. Bu dəyişimlə eyni zamanda da böyük bir reklam kampaniyasına start verən, hətta tanınmış aparıcı Hacı Nuranı belə qalmaqallı formada özlərinin reklam simasına çevirən xəstəxana rəhbərliyinin ümidləri isə özünü doğrultmayıb.
Əldə etdiyimiz məlumata görə, xəstəxanada işləyən türkiyəli həkimlərin Azərbaycanda işləmək icazə almaqda çətinliklər yaşaması və zaman-zaman rəhbərliklə yaşadıqları maliyyə problemləri onları ölkələrinə qayıtmağa sövq edib.
Türkiyəli həkimlərin ölkələrinə qayıtmaqlarının bir səbəbi kimi də onlara verilən böyük vədlərin yerinə yetirilməməsi göstərilir. Bildirilir ki, xəstəxananın rəhbərliyi həkimlərə yüksək maaşlar vəd edib Azərbaycana dəvət etsə də, bir müddət sonra bu vədlərini yerinə yetirməkdə çətinlik çəkməyə başlayıblar. Bunun səbəbi kimi isə klinikadakı fantastik qiymətlər göstərilir. Bildirilir ki, Azərbaycan standartlarında həddən artıq yüksək qiymətlərin təklif edildiyi bu xəstəxanada müraciət edənlərin sayı da xəstəxana rəhbərliyinin gözlədiyi qədər olmayıb. Buna görə də bir müddət sonra maliyyə problemləri yaşanmağa başlayıb.
Mənbəmiz onu da əlavə edir ki, “Ege” Hopsitalın rəhbərliyi artıq büdcələrini kiçilməklə bağlı addımlar atmağa başlayıb. Bildirilir ki, xəstəxana türkiyəli həkimlərin böyük əksəriyyəti ilə vidalaşıb, lakin türkiyəli həkimlərin hamısı göndərilməyib. Yenidən ad dəyişikliyinə getməmək üçün türkiyəli bəzi həkimlərlə xəstəxanada işləməyə davam edəcək. Onlarla paralel şəkildə yerli həkimlər də xəstəxanaya cəlb edilir.
Şəmkir rayon icra başçısı Alimpaşa Məmmədov erməni girovluğunda olan Dilqəm Əsgərovun oğlu Kürdoğlu Əsgərova məxsus torpaq sahəsini əlindən alır.
Bu haqda Modern.az saytına Kürdoğlu Əsgərov məlumat verib.
O bildirib ki, 5 il bundan qabaq icarəyə götürdüyü torpaq sahəsinin müqaviləsinin vaxtı qurtarmaq üzrədir.
Qeyd edib ki, buna görə dəfələrlə müraciət etsə də, icra hakimiyyəti müqaviləni yeniləmir.
“Məqsədləri isə budur ki, mənə məxsus ərazini türk şirkətlərinə külli miqdarda vəsait qarşılığında satsınlar. Aidiyyatı dövlət qurumlarından xahiş edirəm ki, bu məsələyə münasibət bildirsinlər. Şəmkir rayon icra başçısına yerini bildirsinlər ki, mənim atam Dilqəm Əsgərov bu vətən uğrunda canlı-canlı çürüyərkən icra başçısı mənim torpağımı əlimdən alır.
Qeyd edək ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər. Digər Azərbaycan vətəndaşı Həsən Həsənov isə güllələnərək öldürülüb.
Həsənovun meyiti düşməndən alınaraq Bakıda dəfn edilib.
Separatçı Dağlıq Qarabağ rejiminin qondarma “məhkəməsi” ötən il dekabrın 19-da D. Əsgərovun ömürlük, Ş. Quliyevin isə 22 il müddətinə azadlıqdan məhrum edilməsi barədə qərar çıxarıb.
“Apellyasiya Məhkəməsi” bu qərarı qüvvədə saxlayıb.