Komissiyanın üzvü: “Sərəncam olarsa, təbii ki, çox yaxşı olar…”
Ötən ilin avqustunda əfv sərəncamının verilməsi bu il də ənənənin davam etdiriləcəyinə ümid yaradıb. Avqustun sonunda əfv sərəncamının veriləcəyi haqda müzakirələr aparılır.
1994-cü ildən indiyədək imzalanmış 46 əfv sərəncamı ilə 5 min nəfərdən artıq şəxs cəzadan azad edilib. Sərəncamların 14-ü İlham Əliyev, 32-si isə mərhum prezident Heydər Əliyev tərəfindən imzalanıb. İndiyədək imzalanan 8 amnistiya aktı 40 min məhkuma şamil olunub. Sonuncu dəfə əfv sərəncamı bu ilin martında verilib, azadlığa çıxanların siyahısı kifayət qədər geniş olub. Məhbəsdən azad edilənlərin arasında siyasilər də az deyildi.
Azad olunan şəxslər sırasında müxtəlif beynəlxalq təşkilatların siyasi məhbus kimi tanıdığı 50-dən çox şəxs olub. Avropa İttifaqının alqışladığı bu qərar ən böyük əfv sərəncamı kimi qiymətləndirilib. Hazırda hüquq müdafiə təşkilatının siyasi məhbus kimi tanıdığı AXCP sədrinin müavini Seymur Həzi, Asif Yusifli, jurnalist Əfqan Muxtarlı, Saleh Rüstəmov, Səid Dadaşbəyli, vəkil Əliabbas Rüstəmov həbsdədirlər. İctimaiyyətdə belə bir fikirlər var ki, bu ilin avqustunda növbəti əfv sərəncamı imzalanacaq. Ekspertlər bildirirlər ki, siyasilərin azadlığa buraxılması daha məqsədəuyğundur.
Hər zaman əfv sərəncamından öncə Əfv Komissiyasının tez-tez iclasları keçirilir. Həmin iclaslarda məhbusların ərizələrinə baxılır və siyahı hazırlanır. Adətən bu iclaslar keçirildikdə ictimaiyyətə açıqlama verilir və nə qədər məhbusun ərizəsinə baxılması ilə bağlı məlumat yayılır. Sonuncu əfv sərəncamı ərəfəsində də Əfv Komissiyasının iclasları barəsində mətbuatda tez-tez informasiyalar yayılırdı. Lakin hazırkı ərəfədə belə bir məlumatlara rast gəlinmir…
Milli Məclisin deputatı, prezident yanında Əfv Məsələləri Komissiyasının üzvü Çingiz Qənizadə “Yeni Müsavat”a deyib ki, əfv sərəncamının verilməsi prezidentin səlahiyyətinə aiddir: “Düzdür, ötən il belə bir sərəncam verildi. Bu ilin martında da Novruz bayramı ilə bağlı daha bir sərəncam imzalandı. Ancaq son olaraq böyük əfvin olduğunu nəzərə alaraq hesab edirəm ki, avqust ayında əfv olmaya bilər. Olarsa, təbii ki, bu, çox yaxşı olar”.
Çingiz Qənizadə əfv məsələləri ilə məşğul olan işçi qrupuna üzv olan deputatların tətildə olduqlarını da nəzərə çatdırdı.
Hüquq müdafiəçisi Səidə Qocamanlı da “Yeni Müsavat”a bildirdi ki, ötən əfv sərəncamının imzalanmasından çox az zaman keçib. Ona görə də yenidən əfvin olacağını gözləmir: “Martda böyük siyahını əhatə edən əfv sərəncamı verildi. Ötən ilin avqust ayında da əfv sərəncamı verilib. Amma bu ilin martında ayrı-ayrı şəxslərin məhkəmə qərarı və ya şərti cəza ilə azadlığa buraxılması halları ola bilər”.
Ekologiya və Təbii Sərvətlər Nazirliyinin əməkdaşları Xəzər dənizinin Bakı,Sumqayıt, şimal və cənubsahil zolağında fəaliyyət göstərən ictimai-iaşə obyektlərində tullantı sularının idarə olunması vəziyyəti ilə bağlı növbəti reydlər keçirib və bundan əvvəl verilən məcburi göstərişlərin icra vəziyyəti yoxlayıb.
“Report”un məlumatına görə, Nazirliyin Mətbuat xidmətinin rəhbəri İradə İbrahimov jurnalistlərə açıqlamasında bildirib ki, reydlər zamanı Xaçmaz rayonu ərazisində fəaliyyət göstərən “Palma”, “Riverin”, “Ober Lyuks”, “El Faro”, “Təhsil”, “Atlant” istirahət mərkəzlərində su təmizləyici qurğuların quraşdırıldığı, Sumqayıtda fəaliyyət göstərən “Dostluq”, “Caspian Breeze”, “Şərur”, “Amore”, “Nicat”, “Freqat”, “Regnum”, “Röya”, “Turan”, “Təndir”, “Qala” istirahət mərkəzlərinin çirkab sularının mərkəzi kanalizasiya şəbəkəsinə qoşulduğu müəyyən olunub.
Xaçmaz rayonundakı “Çıraqqala”, “Jalə”, Sumqayıt şəhərindəki “Duyğu”, “Liman”, “Atlantida”, “Flaqman”, “Narınqala”, Balıqçı”, “Alma”, “Neptun, “Antalya”, “Qala”, Bakı şəhərindəki “Mirvari”, “Riyad park”, “Caspian Beach”, “1001 gecə”, “Eldarado”, “Dostluq”, “Aquapark” istirahət mərkəzlərinə bir müddət əvvəl verilən “məcburi göstəriş”lərin tələbləri icra edilmədiyi üçün onların fəaliyyətlərinin dayandırılması ilə bağlı məhkəmə qarşısında vəsadət qaldırılıb.
Reydlər zamanıNabranda fəaliyyət göstərən “Lotos”, “Ulduz”,Sumqayıtda “Katamaran”, “Sahil”, “Diana”, Bakıda “Bizim sahil”, “Xəzər”, “Türkan”, “Simurq”, “Voyage”, “Qala”və “Antalya” istirahət mərkəzlərində, Lənkəran-Astara zonasında isə “Dağlar oğlu”, “Həsirli”, “Su pərisi”, “Panorama” ictimai-iaşə obyektlərində də formalaşan tullantı sularının təmizlənmədən dənizə axıdıldığı aşkar edilib və cavabdeh şəxslər barəsində akttərtib olunub.Formalaşan tullantı sularının təmizlənməsi üçün sözügedən obyektlərin sahiblərinə icrası məcburi olan “məcburi göstəriş”lər verilib.
Nazirlər Kabineti “Azərsu” Açıq Səhmdar Cəmiyyətinin strukturu ilə bağlı bəzi məsələlər barədə” qərar verib.
Qərara əsasən, “Azərsu” ASC-nin tabeliyində, “Azərsu” ASC-nin “Birləşmiş Sukanal” Məhdud Məsuliyyətli Cəmiyyətinin Xaçmaz, Quba, Qusar, Şabran, Siyəzən və Xızı sukanal idarələrinin bazasında 1 №-li, Şamaxı, Ağsu, Ucar, Zərdab, Kürdəmir və Qobustan sukanal idarələrinin bazasında 2 №-li, Cəlilabad, Masallı, Yardımlı, Lerik, Lənkəran və Astara sukanal idarələrinin bazasında 3 №-li, İmişli, Saatlı, Sabirabad, Biləsuvar, Neftçala, Hacıqabul, Salyan və Cəbrayıl sukanal idarələrinin bazasında 4 №-li, Bərdə, Ağdam, Tərtər, Ağcabədi, Laçın, Beyləqan, Füzuli və Xocavənd sukanal idarələrinin bazasında 5 №-li, Balakən, Zaqatala, Qax, Oğuz, Qəbələ və İsmayıllı sukanal idarələrinin bazasında 6 №-li, Yevlax, Göygöl, Samux, Naftalan, Goranboy, Kəlbəcər, Xocalı və Daşkəsən sukanal idarələrinin bazasında 7 №-li və Şəmkir, Gədəbəy, Tovuz, Ağstafa və Qazax sukanal idarələrinin bazasında 8 №-li regional sukanal idarələri yaradılıb.
“Azərsu” ASC-nin İstehsalat-Texniki Komplektləşdirmə İdarəsinin adı dəyişdirilərək “Anbar Təsərrüfatı İdarəsi” adlandırılıb. Eyni zamanda “Azərsu” ASC-nin “Birləşmiş Sukanal” MMC onun tərkibində hüquqi şəxslər kimi fəaliyyət göstərən “Göyçay Sukanal” TSC və “Ağdaş Sukanal” TSC-nin ona qoşulmaları şəklində yenidən təşkil ediləcək. “Azərsu” ASC-nin “Birləşmiş Sukanal MMC hüquq varisliyi qaydasında ona qoşulan “Göyçay Sukanal” TSC-nin və “Ağdaş Sukanal” TSC-nin bütün hüquq və öhdəliklərini öz üzərinə götürəcək. “Göyçay Sukanal” TSC-nin və “Ağdaş Sukanal” TSC-nin “Birləşmiş Sukanal” MMCyə qoşulmaları ilə bağlı təhvil aktlarının təsdiq edilməsi səlahiyyəti “Azərsu” ASC-nin sədrinə verilib.
“Birləşmiş Sukanal” MMC-nin nizamnamə kapitalı “Göyçay Sukanal” TSCnin və “Ağdaş Sukanal” TSC-nin nizamnamə kapitalları miqdarında artırılacaq.
İsti havada avtomobildə kondisionerin olması komfortun əsas şərtidir.
Lakin maşında olan kondisionerdən düzgün istifadə etmək lazımdır ki, bu xəstəliyə səbəb olmasın. Həkimlər qeyd edirlər ki, yayda məhz maşında kondisionerlərin olmasına görə angina, faringit və hətta bronxit və pnevmoniyanın halları artır.
Bunun qarşısını almaq üçün ilk növbədə ətraf mühitlə maşının salonunda olan hava temperaturunun fərqi 10 dərəcədən çox olmamalıdır. İnsan maşından düşəndə və yenidən maşına minəndə temperatur fərqi onun sağlamlığına mənfi təsir edir, immun sisteminin zəifləməsinə gətirib çıxardır. Bu gün ərzində dəfələrlə təkrarlanırsa respirator xəstəliklərinin riski də artır.
Bundan əlavə hərarət fərqi ürək tutmasına səbəb ola bilər. Bu ürək xəstəlikləri olanlarda, yaşlı insanlarda xüsusilə tez-tez baş verir.
Soyuq hava axınını üz və ayaqlara istiqamətləndirməyin, bu da xəstəliyin riskini artırır.
Saglamolun.az bildirir ki, maşında olan kondisionerin filtrləri vaxtı-vaxtında təmizlənməlidir. Bu filtrlərdə çoxlu mikroblar yığılır və sonra hava axını ilə insanın nəfəs yollarına düşür.
Maşında kondisionerin olmasının komfortdan əlavə digər faydası da var. Araşdırmalar göstərir ki, maşında kondisionerin olmaması isti havada qəzaların riskini xeyli artırır. Məsələ burasındadır ki, çox isti hava insanın mərkəzi sinir sisteminə mənfi təsir edir – diqqət azalır, insan çətin vəziyyətdə daha gec reaksiya verir ki, bu da nəticədə qəzaların artmasına səbəb olur.
Alman alimlərinin araşdırmalarına görə, maşın salonunda temperaturun 32 C qədər yüksəlməsi qəzaların riskini 15%, 37 C qədər yüksəlməsi isə 35% qədər artırır.
“Ortada “villası yarımçıq qalıb” söhbəti olub. Biz villa tikdirənik?!”
Bir müddət öncə Bakıda plastik əməliyyatdan sonra həyatını itirən Sona Gürgün Vəliyevanın vəkili hadisə ilə əlaqədar plastik-estetik cərrah Sirus Qoçqanini günahlandırır. O, həkimi mənəvi zərəri pul vasitəsilə ödəməməkdə ittiham edir. Sirus Qoçqani isə deyilənlərlə razılaşmır və ölüm hadisəsinə görə, təqsirinin olmadığını bildirir. Həkim qanun çərçivəsində məsələnin araşdırılmasını istəyir. Hər iki tərəf qarşılıqlı olaraq bir-birilərini ittiham edir.
Minval.info-ya müraciət edən vəkil Samir Zeynalov plastik-estetik cərrahın uğursuz əməliyyatlar həyata keçirdiyini iddia edir. Onun sözlərinə görə, iki uşağı anasız qoyan, respublikanı yeganə ixtisas baxımından həkimsiz qoyan Dr. Sirus Qoçqani hadisənin mənəvi zərərini pul vasitəsilə qarşılamaq məqsədilə mərhumə Sona Gürgün Vəliyevanın ailə üzvləri ilə görüşüb:
“Lakin səhlənkarlığa yol verdiyini bu addımı ilə təsdiq edən həkimin təklifi ağlabatan olmayıb. Sirus Qoçqani yol verdiyi həkim səhvi nəticəsində ailəyə dəymiş maddi ziyanı hər aya düşən sabit pul məbləği ilə kredit formatında fiksasiya etmək istəyib. Bu görüşlərdən sonra isə bir daha Sirus Qoçqanidən xəbər almaq mümkün olmayıb. Görünən odur ki, adı çəkilən həkim istər peşə, istərsə də digər xarakterli hərəkətlərinə birmənalı olaraq cavabdeh deyil”.
Vəkil iddia edir ki, plastik-estetik cərrahın həm köməkçisi, həm də həyat yoldaşı olan Könül xanım Sona Gürgünə əməliyyatdan bir müddət öncə liposaksiya əməliyyatı üçün nəzərdə tutulmuş yeni aparatın heç bir həyati risk yaratmadığını söyləyib: “Bu aparatla emboliyanın baş vermədiyini, əməliyyatın bu baxımdan tamamilə təhlükəsiz olacağını və hər şeyin uğurla nəticələnəcəyini bildirməklə sonuncuda əminlik hissi yaradıblar. Bu barədə əldə edilən səs yazıları belə deməyə əsasən bizə əsas verir. Həkim Sirus Qoçqanin barəsində analoji uğursuz əməliyyatlarının bir daha gerçəkləşməməsi üçün cinayət hüququ qaydasında Bakı Şəhər Prokurorluğuna müraciət ediləcək”.
Mövzuyla əlaqədar minval.info-ya açıqlama verən Siruz Qoçqani ittihamlarla razı olmadığını dilə gətirib:
“Nə əsasla bizi günahlandırırlar? Bununla bağlı dövlət orqanları – Səhiyyə Nazirliyi, prokurorluq var. Kimsə gəlib günahlandırırsa, bu, artıq olmaz. İkincisi, rəhmətə gedən tərəfə bildirdik ki, əgər bizi günahkar hesab edirsinizsə, meyiti morqa verin, ekspertiza təyin olunsun, araşdırılma aparılsın. Mən şəxsən özüm xahiş etdim ki, bunun səbəbin tapsınlar. Bizlik heç bir problem yoxdur. Söylədim ki, ərizə də yazın, qanun çərçivəsində hər işləri görsünlər. Burada məmin heç bir günahım olmayıb, əzizim. Nə ediblərsə, özləri ediblər”.
Plastik-estetik cərrah bildirir ki, onun yanına gələrək 150 min dollar pul istəyiblər: “Hansı əsasla? O zaman da dedim, nə narazılıqları varsa, şikayətlərini etsinlər. Qanuni olaraq, mənim barədə nə rəy yazsalar, bunu qəbul edirəm. Demişdim ki, insani cəhətdən kömək edə bilərəm. Mən xarici vətəndaşam, problem olarsa, dərhal deport edərlər. Bunu kimsə nə pulla, nə də ki, dost-tanışla yuya bilər. Dayağım da, “day-dayım” da yoxdur. Bir neçə ölüm hadisəsi ilə bağlı adım hallandı, bu da müvafiq qurumlar tərəfindən araşdırıldı və hüquqi qiymət verildi. Mən işimi düzgün aparıram. Sözügedən aparata gəldikdə isə bununla bir çox əməliyyatlar həyata keçirilib və heç bir problem olmayıb”.
Məsələ ilə bağlı həkimin həyat yoldaşı və assistenti Könül xanım da minval.info-ya açıqlama verib:
“Qarşı tərəf şikayətçiydisə, nəyə görə ərizə yazmadılar?! Bizi davamlı zənglərlə görüşə dəvət edirdilər. Hansısa restoranın həyətinə çağırıb, qarşımıza pul tələb qoyublar. Bu nə deməkdir? Adam ölənə görə, susur, dinmir. Ortada “villası yarımçıq qalıb” söhbəti olub. Biz villa tikdirənik? “Mənimlə yazışması var” deyirlər, onu ortaya çıxarsınlar. Biz yaslara gedirdik. Əvvəlcə doktorun adını çəkdilər. Dedik ki, yazıları göstərsinlər. Əllərində heç bir sübut olmadı. Daha sonra anestezioloqun adını çəkdilər. Başqa sözlər danışdılar, etik olmadığı üçün söyləmək istəmirəm. İndi isə mənim adımı çəkirlər. Biz özümüz məhkəməyə müraciət edəcəyik. Telefonumda belə, o xanımın nömrəsi yoxdur. Amma onların göndərdiyi “pulu verin” səs yazıları telefondadır. Bizim onlara verəcəyimiz bir qəpik də yoxdur. Ən azından ölənə hörmət etsinlər, ayıbdır. Onlar etmirlərsə, biz də hər şeyi açıb ortalığa qoyacağıq”.
Xatırladaq ki, mərhumə Sona Gürgün Vəliyeva Səhiyyə Nazirliyi Elmi-Təhqiqat Ağciyər Xəstəlikləri İnstitutunun həkimi olub.
Samir Mirzə
“Kommersant.az” xəbər verir ki, sonuncu dəfə belə bir “əməliyyat” «Azərpoçt» MMC-nin paytaxtdakı 2 saylı filialının 138 saylı poçt şöbəsində həyata keçirilib:
““Azərpoçt”un təkcə Bakı şəhərində 100-dən artıq şöbəsi fəaliyyət göstərir. Sovet dövründə əksər binaların birinci mərtəbəsini başdan-başa əhatə edən poçt şöbələrinin çoxunun ərazisi ya satılıb, ya da kiçildilərək balaca bir otağa çevrilib. Məsələn, “İnşaatçılar” metrosunun yaxınlığında yerləşən 138 saylı Poçt Şöbəsinin də sahəsi satılıb. Şöbəyə əvvəlcə ATS-in binasında, sonra isə yeni açılan “Şəbəkə” xidmət mərkəzində yer verməklə kifayətləniblər”.
Qeyd edilir ki, həmin şöbənin yerləşdiyi əmlak “Azərpoçt”un rəhbərliyi tərəfindən satılıb: “100 kv.metrdən çox sahəsi olan poçt şöbəsi “Azərpoçt” rəhbərliyi tərəfindən 650 min manata satılıb. Ən maraqlısı odur ki, “Azərpoçt”un baş direktoru poçt şöbələrini satır, sonra da yeni sahibindən baha qiymətə icarəyə götürür…”
Mənbə qurumun rəhbəri Emin Əfəndiyevin hətta nazirlə də hesablaşmadığını iddia edir: “Maraqlı məqamlardan biri odur ki, baş direktor ya özü həddindən artıq sərbəst adamdır, ya da onun üçün bu cür sərbəstliyi yaradanlar var. Çünki o, hətta nazir Ramin Quluzadənin belə sözünə məhəl qoymur…”
Bakının Nəsimi rayonu, Dilarə Əliyeva küçəsi (“Azərbaycan Dəmir Yolları” QSC-nin inzibati binasının yaxınlığında yerləşən parkın ərazisində səkini çayxanaya çeviriblər.
Demokrat.az xəbər verir ki, bu barədə ərazidə yaşayan sakinlər etiraz ediblər.
Sakinlər deyir ki, müvafiq dövlət qurumlarının vəzifəli şəxsləri vətəndaşların istirahəti üçün nəzərdə tutulmuş parkda qanunsuz biznes obyektləri açıblar. Bunun nəticəsində isə insanların səkidən istifadəsi əngəllənib.
“Yaşıllığı qorumurlar, qoruyanda da amansızcasına istifadə edirlər. Səkini çayxanaya çeviriblər, bizneslə məşğuldurlar, insanların səkidən istifadəsi əngəllənib. Günortadan sonra oradan keçmək mümkün olmur. Biz sakinlərin narazılığına məhəl qoyan yoxdur. Bu işdən Nəsimi Rayon İcra Hakimiyyətinin başçısı Asif Əsgərovun xəbərinin olmaması mümkün deyil. Yəqin ki, həmin biznes obyektləri icra başçısının razılığı ilə açılıb”.
Ərazidən çəkilmiş fotonu təqdim edirik (Ekofakt).