“Mən səssizliyi sevirəm. Kiminsə qəlbinə dəymədən, incitmədən, atmaca atmadan, qüruruna toxunmadan yaşamaqdan həzz alıram. Hər qəlbin bir ahı var. O ahı almaqdan qorxuram”.
“Qafqazinfo” xəbər verir ki, bu sözləri müğənni Damla istirahət fotolarını tənqid edənlərə cavabında bildirib. Sənətçi, əvvəlcə fotosunu paylaşıb, yazılan mənfi rəylərdən sonra şəklinə status əlavə edərək açıqlama yayıb.
“Özünüzə, duyğularınıza, ruhunuza zaman ayırın. O bunu etdi, bura getdi, bunu dedi, deməklə dəyərli vaxtınızı kiminsə həyatını müzakirə edərək xərcləməyin. Ən gözəl günləri dua edin. Beyninizi başqalarının həyatını düşünməklə yükləməyin. Həyat o qədər qısadır ki, vallah dəymir. Kiməsə neqativ şərh yazıb, başqalarının yanında onu alçaltmaqdansa, özünə zaman ayır. Təmiz havada gəz, idmana başla.
Vallah kiməsə bəslədiyin kinə, nifrətə görə hədiyyə almayacaqsan. Əksinə, Allahın sənə hədiyyə etdiyi sağlam canı yarı can edəcəksən. Heç nəyə gec deyil. Hər açılan sabah bir başlanğıcdır”, - deyə sənətçi instaqram hesabında qeyd edib.
İçərişəhərdə kitab evi təmirə bağlanıb. İllərdir Elman dayının kitab mağazası kimi tanınan məkanın book-kafe olaraq fəaliyyət göstərəcəyi barədə məlumat yayılıb.
“Qafqazinfo” mövzu ilə bağlı “İçərişəhər” Dövlət Tarix-Memarlıq Qoruğu İdarəsi ilə əlaqə saxlayıb. İdarənin mətbuat xidməti kitab evinin yeniləndiyini qeyd edib:
“Kitab Evinin sahibi Elman Mustafayev bu ilin fevralında dünyasını dəyişib. İlin sonuna kimi ənənəni pozmadan kitab evini gözəl və mədəni istirahət məkanına çevirməklə həm kitab evi, həm də kafe kimi fəaliyyətini davam etdirməsi planlaşdırılır. Müasir həyatın trendlərinə uyğun olaraq məkanda köhnə və müasir kitabların satışı ilə bərabər onlayn satış da həyata keçiriləcək”.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən, təmirsiz həyətlərin abadlaşdırılmasına yönəlmiş "Bizim həyət" layihəsi çərçivəsində növbəti həyətin açılış mərasimi keçirilib.
"Qafqazinfo"ya daxil olan məlumata görə, yenilənmiş həyət Binəqədi rayonu, İsrafil Həşimov küç. 8 ünvanında 2000 nəfər sakinin yaşadığı binaları əhatə edir.
“Bizim həyət” layihəsinin əsas məqsədi Bakı həyətlərinin ekoloji cəhətdən təmiz və abad edilməsi, şəhər ekologiyasının sütununu təşkil edən yaşıllıqların bərpası, sağlam həyat tərzinin formalaşdırılması, sakinlər üçün təhlükəsiz və rahat yaşam şəraitinin yaradılmasıdır.
Layihəsi çərçivəsində abadlaşdırılan növbəti həyətdə də əlil və sağlamlıq imkanları məhdud insanların rahat hərəkəti nəzərə alınmış, bütün yaş qrupları üzrə uşaqların inkişafı üçün əlverişli şəraitin yaradılması və gənclərin asudə vaxtlarının səmərəli keçirmələri məqsədilə ərazidə 1 ədəd mini futbol meydançası, şahmat meydançası, 4 ədəd idman qurğusu, uşaqlar üçün oyun meydançası və 16 ədəd oturacaq quraşdırılmışdır. Bu cür meydançaların salınmasında əsas məqsəd gənclərin sağlam həyat tərzi sürmələrinə, sağlamlıqlarını möhkəmlədirmələrinə, asudə vaxtlarını səmərəli keçirmələrinə, o cümlədən onlarda sistematik idmanla məşğulolma refleksinin yaradılmasına nail olmaqdır.
Sakinlərin istək və maraqları nəzərə alınaraq, yeni işıqlandırma dirəkləri quraşdırılmış, binaların fasadları və giriş hissələri də tam təmir olunaraq onların istifadəsinə verilib. Həyətin ərazisindəki mövcud yaşıllıqların bərpası ilə yanaşı, əlavə olaraq 50 ədəd ağac əkilib və1735kv.m ərazidə yaşıllıq zolağı salınıb.
Binəqədi rayonunda sakinlərin istifadəsinə verilmiş həyət layihə çərçivəsində abadlaşdırılan iyirmi beşinci həyətdir.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın bu nəcib təşəbbüsü ilə paytaxt rayonlarında təmir olunub istifadəyə verilən həyət və məhəllələr sakinlər tərəfindən çox böyük rəğbətlə qarılanır, onların hədsiz sevincinə səbəb olur. Bununla əlaqədar ölkəmizdə və onun sərhədlərindən kənarda xeyriyyəçilik, təhsil, səhiyyə və digər sahələrdə böyük böyük işlər həyata keçirən, öz ictimai-siyasi fəaliyyətı ilə gənclərimizə örnək olan Leyla Əliyevaya gələcək fəaliyyətində uğurlar arzu edirik.
Müğənni Zenfira İbrahimova məşqçi həyat yoldaşı Anar Heydərovla istirahətə yollanıb. “Qafqazinfo” xəbər verir ki, tanınmış cütlük tətil üçün Antalyanı seçiblər.
Zenfira Anarla fotolarını instaqramda paylaşaraq sevgiyə aid bir parça şeir yazıb: “Eşq dediyin bir bəladır, sonu nədir bilmək olmur. Dəli kimi bağlanırsan, heyif bir də silmək olmur”.
Əməkdar artist Yusif Mustafayev “Ay Zaur” verilişinin qonağı olub.
Axşam.az xəbər verir ki, müğənni qardaşına dəstək olmadığı üçün onu qınayanlara cavab verib:
“Qardaşlarım, qohumlar məni qınayırlar ki, niyə qardaşını da efirə çıxarmırsan? Gərək insanın özü əziyyət çəksin. Bir-iki dəfə efirə çıxardım, amma dişlə-dırnaqla irəli getməlisən. Gecələr oyaq qalmalısan ki, nəsə qazanasan. İnsana balıq vermək yox, balığı tutmağı öyrətmək lazımdır”.
“Mənim xanımım bizə gələn gündən ruzim artıb. Heç vaxt onun xətrinə dəyməmişəm, dəymərəm də. Onun ruzisidir, ayağı ocağımıza düşərli oldu. O, bizim evimizə gələndən mən Yusif oldum. Ata-anamın məsləhəti ilə evləndik.
Yoldaşım qayınatamın kiçik pul sandıqcasını cehizinin arasında gətirmişdi. Bir gün qayınatam dedi ki, bütün ruzimiz o sandıqla gedib.
Pulu özüm yığıram, ailənin nə işi var büdcə ilə… Bir də iki oğlum məşğuldur büdcə ilə”.
“Deyirlər ki, yaşına yaraşmayan hərəkətlər edir. Bəzi şeylər var ki, balalarım irad tutur. Deyirlər, bizim də ətrafımız var. Mən də zarafat etməsəm, yaşaya bilmərəm. Qardaşım oğlu idi, efirdə ona sözü dedim (“köpəkoğlu” sözünü nəzərdə tutur – red.). Bilmədim mikrofon açıq idi. Özümə həvəs yığıram, gülmək üçün dedim. Onunla mən cavanlaşıram. Qınamasınlar, qoyun yaşayaq. Çalışırıq yaşımızdan cavan görünməyə çalışırıq”.
Müğənni qardaşının başına açdığı oyundan söz açıb:
“Yanırdım, qardaşım tufağımı dağıtdı. Bizim ailədə bir adət var: 10 uşağıq, hamımızın süfrəsi birdir. Əgər qardaşımın soyuducusu boş olsa, evimdə ət yemərəm. Qardaşım hər şeyimizi məhv etdi. Onu indi çəkmişəm yanıma, qızını oğluma aldım. Böyük məbləğdə pul götürüb, getdi Rusiyaya. Hamı töküldü mənim üstümə. Özümü öldürmək istəyirdim”.
ATV kanalının iki siması - Günay və Zaur Baxşəliyevlərin instaqramda paylaşılan fotoya yazdıqları status müzakirələrə səbəb olub.
“Qafqazinfo” xəbər verir ki, tanınmış cütlük sosial şəbəkədə foto paylaşaraq “Nəhayət ki, 2. Bəs sizdə?” şərhini yazıb. Bundan başqa, Zaur fotoda əliylə iki işarəsini göstərib.
İddia olunub ki, Günay Baxşəliyeva növbəti dəfə hamilədir. Hətta instaqram istifadəçiləri də onları bu münasibətlə təbrik ediblər.
Qeyd edək ki, cütlük 2012-ci ildə ailə həyatı qurub. Onların bir il sonra Dilavər adlı qız övladı dünyaya gəlib.
Şou-biznesin daha iki üzvü arasındakı gərginlik sona çatıb. “Qafqazinfo” xəbər verir ki, bir-birinə söz atan, qalmaqal yaşayan Günay İbrahimli ilə İradə İbrahimova münasibətlərini normallaşdırıb.
Hətta, Günay ötən gün İradənin “Yaşananlar” mahnısını instaqramda paylaşaraq onun adını “tag” edib. Gənc ifaçı İbrahimovaya öpüş və ürək smayliki göndərib.
Xatırladaq ki, iki sənətçi arasında soyuqluq uzun illərdir davam edir. Belə ki, onların arasında sonuncu qalmaqal “ATV maqazin onlarla” proqramında baş vermişdi. İradə Günayı Əməkdar artist Röya Ayxana bənzətdiyini, ailəsini ön plana çəkərək həmkarına acıq vermişdi.
İbrahimli isə qeyd etmişdi ki, İradə ailə və ərindən kimisə “vurmaq” üçün istifadə edir.
Azərbaycanın Xalq artistləri Mənsum İbrahimovla Canəli Əkbərov barışıb. “Qafqazinfo” xəbər verir ki, bir müddət əvvəl bir-birinə ağır sözlər deyən iki məşhur sima küsülülüyə son qoyub.
Belə ki, M. İbrahimov xəstəxanada müalicə alan həmkarını ziyarət edib. O, xəstəxanada foto çəkdirərək instaqram səhifəsində paylaşıb, C. Əkbərova şəfalar diləyib.
Qeyd edək ki, Canəli Əkbərov “Qafqazinfo”ya müsahibəsində muğam müsabiqəsinin 5 münsifi- Sərdar Fərəcov, Əlibaba Məmmədov, Arif Babayev, Səkinə İsmayılova və Mənsum İbrahimov haqqında sərt fikirlər səsləndirmişdi. O, M. İbrahimovun 90-ci illərdə hərbidən yayındığını qeyd etmişdi.