 |
 |
Prezident İlham Əliyev Azərbaycan Respublikasının Vergi Məcəlləsində dəyişiklik edilməsi haqqında qanunu təsdiqləyib.
Vergi Məcəlləsində Avropa Liqasının final oyunu və UEFA 2020 Futbol çempionatının oyunları ilə bağlı gəlir vergisindən azadolmalar və güzəştləri nəzərdə tutan dəyişikliklər edilir.
Aşağıdakı məzmunda 102.1.34-cü maddə əlavə edilir:
“102.1.34. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2019 Avropa Liqasının final oyunu və UEFA 2020 Futbol çempionatının oyunları ilə əlaqədar malların təqdim edilməsi, işlər görülməsi və xidmətlər göstərilməsinə cəlb olunmuş qeyri-rezident fiziki şəxslərin bu fəaliyyət çərçivəsində qeyri-rezident futbol klublarının oyunçularının və işçilərinin həmin oyunlarla bağlı əldə etdiyi gəlirləri.”;
1.2. 106.1.24-cü maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 106.1.25-ci və 106.1.26-cı maddələr əlavə edilsin:
“106.1.25. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2019 Avropa Liqasının final oyunu ilə əlaqədar UEFA-nın, onun yaratdığı qeyri-rezident hüquqi şəxslərin, qeyri-rezident futbol klublarının (assosiasiyalarının) həmin oyunla bağlı əldə etdiyi gəlirləri;
106.1.26. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2020 Futbol çempionatının oyunları ilə əlaqədar UEFA-nın, onu təmsil edən və onun yaratdığı qeyri-rezident hüquqi şəxslərin, habelə qeyri-rezident futbol klublarının (assosiasiyalarının) çempionatla bağlı əldə etdiyi gəlirləri.”;
1.3. aşağıdakı məzmunda 125.4-cü maddə əlavə edilsin:
“125.4. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2019 Avropa Liqasının final oyunu ilə əlaqədar UEFA-nın, onun yaratdığı qeyri-rezident hüquqi şəxslərin və qeyri-rezident futbol klublarının dividend və faiz gəlirlərinə, habelə UEFA 2020 Futbol çempionatı ilə əlaqədar UEFA-nı təmsil edən qurumların dividend gəlirlərinə bu maddənin müddəaları tətbiq edilmir.”;
1.4. 164.1.42-ci maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 164.1.43-cü və 164.1.44-cü maddələr əlavə edilsin:
“164.1.43. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2019 Avropa Liqasının final oyunu ilə əlaqədar UEFA, onun yaratdığı qeyri-rezident hüquqi şəxslər və qeyri-rezident futbol klubları (assosiasiyaları) tərəfindən həmin oyunla bağlı malların təqdim edilməsi, işlər görülməsi və xidmətlər göstərilməsi, habelə malların idxalı;
164.1.44. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2020 Futbol çempionatı ilə əlaqədar UEFA, onu təmsil edən, habelə onun yaratdığı və tərəfindən səlahiyyətləndirilmiş hüquqi şəxslər tərəfindən çempionatla bağlı malların təqdim edilməsi, işlər görülməsi və xidmətlər göstərilməsi, habelə malların idxalı.”;
1.5. 165.1.7-ci maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 165.1.8-ci maddə əlavə edilsin:
“165.1.8. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2020 Futbol çempionatının oyunları ilə əlaqədar UEFA və onun yaratdığı hüquqi şəxslər, habelə bu fəaliyyət çərçivəsində UEFA tərəfindən cəlb edilmiş qeyri-rezident fiziki şəxslər tərəfindən malların təqdim edilməsi, işlər görülməsi və xidmətlər göstərilməsi.”;
1.6. 188.1.5-ci maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 188.1.6-cı maddə əlavə edilsin:
“188.1.6. müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada müvafiq icra hakimiyyəti orqanının müəyyən etdiyi orqan (qurum) tərəfindən verilmiş təsdiqedici sənəd əsasında Azərbaycan Respublikasında keçirilən UEFA 2019 Avropa Liqasının final oyunu və UEFA 2020 Futbol çempionatının oyunları ilə əlaqədar idxal edilən mallar.”.
Qanun 2019-cu il martın 1-dən 2020-ci il avqustun 1-dək qüvvədədir.
"Əgər beynəlxalq ictimaiyyət nüvə proqramı ilə bağlı Birgə Fəaliyyət Planını saxlamaq istəyirsə, İranla iqtisadi əlaqələri normallaşdırmalıdır".
ONA-nın İRNA-ya istinadən verdiyi xəbərə görə, bu barədə İranın xarici işlər naziri Məhəmməd Cavad Zərif yaponiyalı həmkarı Taro Kono ilə birgə keçirdiyi mətbuat konfransında deyib.
"Mən yaponiyalı həmkarıma bildirdim ki, İran regionda gərginlik yaratmağa çalışmır, ancaq Tehran öz hüquqlarını müdafiə edəcək", - deyə Cavad Zərif bildirib.
Yaponiyann xarici işlər naziri isə öz ölkəsinin Birgə Fəaliyyət Planına sadiq olduğunu qeyd edərək, regionda gərginlik yaradılmasından uzaq olmağa çağırıb.
Ermənistan rəhbərliyi Azərbaycanın işğal altındakı ərazilərində keçirilən “qələbə” mərasimlərində iştirak edib, qol qaldırıb oynayandan bir neçə gün sonra Brüsseldə tamam başqa “hava”ya oynamağa başladılar. Baş nazir Nikol Paşinyan və xarici işlər naziri Zöhrab Mnatsakanyan Brüsseldəki “Şərq Tərəfdaşlığı” proqramının 10 illiyinə həsr olunmuş tədbirlər çərçivəsində verdikləri açıqlamalarda və keçirdikləri görüşlərdə yenə konstruktiv görünməyə, “sülh çələngi” hörməyə cəhd göstərdilər.
Ermənistan rəhbərliyi destruktiv fəaliyyətinə yalnız Avropa səfərində moratorium qoydu və danışıqlar tərəfdarı kimi çıxış etdi. Tədbir çərçivəsində N.Paşinyanla Azərbaycan Prezidenti İlham Əliyev arasında qısa görüşün baş tutmasını uğur sayan xarici dairələr Ermənistan hakimiyyətinin elə son həftə sərgilədiyi təxribatçı davranışlarını belə irad tutmadılar. Bu kimi ikili davranışlar təbii ki, işğalçı ölkənin rəhbərliyinin növbəti özbaşınalıqlarını stimullaşdırır.
Xüsusilə də qarşılıqlı məsuliyyət hissi olmadan danışıqların davamına qərar verilməsi Ermənistanın maraqlarına tam cavab verir. Çünki rəsmi İrəvan anlayır ki, müharibə Ermənistan üçün fəlakətli sonluqla nəticələnə bilər. Üstəlik, Paşinyan bu ilin əvvəlində Parisdə XİN başçılarının əldə etdiyi razılaşmanı unutmamalıydı. Fransa paytaxtında ATƏT-in Minsk Qrupunun həmsədrlərinin vasitəçiliyi ilə tərəflər xalqların sülhə hazırlanması barədə razılaşma əldə etmişdilər. Ancaq hər halda, N.Paşinyanın Şuşada yallı getməsi xalqların sülhə hazırlanmasına yox, düşmənçiliyin alovlandırılmasına xidmət edən hərəkət oldu.
Brüssel səfəri öncəsi verdiyi açıqlama ilə Azərbaycan XİN-in etirazına səbəb olan və rəsmi Bakıdan cavab bəyanatı alan Ermənistan xarici işlər naziri Zöhrab Mnatsakanyan Belçika paytaxtında deyib ki, Vaşinqtonda Əliyev-Paşinyan görüşü hazırlanır. Ermənistan xarici işlər naziri Qarabağ münaqişəsinə dair növbəti yüksək səviyyəli danışıqların ABŞ-da baş tutacağına eyham vurub.
Virtualaz.org xəbər verir ki, Mnatsakanyan Brüsseldə jurnalistlərlə söhbətində bu haqda danışıb. Onun sözlərinə görə, Azərbaycan və Ermənistan liderlərinin yeni görüşü Vaşinqtonda baş tutacaq, amma indidən ev sahibi tərəfi qabaqlayaraq nəsə demək düzgün olmazdı. Mnatsakanyan “bir az da gözləməyə” çağırıb, deyib ki, tərəflər görüşlərin yeni raundunun təşkil edilməsi üçün müəyyən konkretləşməni gözləyirlər. O, qəbul edən tərəfin bu görüşün nə zaman baş tutacağı və hansı formada təşkil ediləcəyi haqda özü açıqlama verməli olduğunu deyib. Bundan sonra münaqişə tərəfləri də müzakirə edib vaxtı dəqiqləşdirə, öz razılığını verə bilərlər.
Xatırladaq ki, bundan əvvəl yayılan xəbərlərə görə, Vaşinqtonda əvvəlcə Azərbaycan və Ermənistan xarici işlər nazirləri görüşəcəklər. Hər iki tərəf görüşün anonsunu versə də, hələlik ABŞ-dan konkret açıqlama gəlməyib.
ABŞ-ın Azərbaycandakı səfiri Li Litzenberger ötən həftə “Turan” informasiya agentliyi və “Amerikanın Səsi” radiosuna müsahibəsində Qarabağla bağlı ölkəsinin mövqeyini açıqlamışdı. Diplomat demişdi ki, ABŞ-ın bu istiqamətdə mövqeyi çox aydın və açıqdır: “ATƏT-in Minsk Qrupunun həmsədrlərindən biri olan ABŞ Dağlıq Qarabağ münaqişəsinin dinc yolla həllini dəstəkləyir. Bu da o deməkdir ki, biz münaqişəyə cəlb olunan iki tərəfdən göstərilən və nəticə etibarilə sülh sazişinə gətirib çıxara bilən səyləri çox dəstəkləyirik. Biz ötən il həm yüksək səviyyədə olan təmasların sayının artırılmasını, eyni zamanda təmas xəttində zorakılığın azalmasını müşahidə etmişdik. Bu iki amil çox müsbət olan amillərdir. ABŞ digər iki həmsədr dövlətlə birgə fəaliyyət göstərərək Azərbaycanla Ermənistan arasında olan sülh danışıqlarına bağlılığı və tərəflər arasında etimadın artırılması üçün göstərilən fəaliyyətlərə də dəstək verəcək. Çünki bu fəaliyyətlər nəticə etibarilə iki tərəf arasında sülh razılığının əldə olunmasına yardım edəcək. Təmaslar barədə danışdım. Düşünürəm ki, iki dövlətin liderləri və ümumiyyətlə, xarici işlər nazirləri arasında həyata keçirilən görüşlər vacibdir. Lakin dövlət rəhbərləri və xarici işlər nazirlərinın görüşlərinə əlavə olaraq tərəflər öz xalqlarını münaqişənin razılaşdırılmış həlli üçün hazırlaya bilərlər”.
Vaşinqton görüşünə gəldikdə, səfir bildirib ki, ABŞ xarici işlər nazirləri arasında görüşləri alqışlayır: “Adətən lazım olan müvafiq hazırlıq işləri yekunlaşandan sonra eyni zamanda görüşə qatılan bütün tərəflər görüşün keçirilməsi barədə bəyanat verir. İki nazirin görüşməsini biz çox istəyərdik və ümid edirəm ki, yaxın gələcəkdə iki nazir arasında görüş barədə bəyanatlar veriləcək”.
Li Litzenberger deyib ki, görüşə qatılan tərəflər hələ ictimaiyyətə görüş barədə bəyanat verməyiblər: “Düşünürəm ki, hazırda aidiyyəti olan bütün məsələlər müzakirə edilir. Bu kimi görüşlər barədə bir tərəf qərar vermir. Bütün dövlətlər tərəfindən ümumiləşdirilmiş qərar verilir”.
ABŞ diplomatının son fikirlərindən belə qənaətə gəlmək olar ki, söhbət digər həmsədr ölkələrdən, xüsusilə də Rusiyadan gedir. Düzdür, adətən Qarabağ məsələsində ABŞ və Rusiya arasında ziddiyyətli mövqelər müşahidə olunmur - baxmayaraq ki, bu iki dünya gücü digər məsələlərdə “soyuq müharibə” vəziyyətindədir, amma Qarabağ məsələsi onları “birləşdirir”. Fransa və Rusiyada baş tutan görüşlərdən sonra XİN rəhbərlərinin sayca üçüncü həmsədr ölkənin paytaxtında bir araya gəlməsi normaldır. Lakin bu da faktdır ki, Qarabağ tənzimlənməsində təşəbbüsün digər tərəfə keçməsi daim qıcıqla müşahidə olunub. Xüsusilə də söhbət dövlət başçılarının görüşünə ev sahibliyindən gedirsə, Rusiyadakı müəyyən dairələrin buna laqeyd yanaşacağı normal görünmür.
Xatırladaq ki, 2016-cı ilin martında ABŞ-da nüvə təhlükəsizliyi ilə bağlı keçirilən sammit çərçivəsində Azərbaycan və Ermənistanın birinci şəxslərinin görüşü planlaşdırılırdı. Lakin o zaman təmas xəttində Ermənistanın təxribatları baş verdi və aprel döyüşləri başladı. Nəticədə görüş baş tutmadı. Bu mənada amerikalı elçinin fikirləri uzaqgedən nəticələr çıxartmağa imkan verir. Münaqişə tərəfləri burada müzakirə və mübahisə mövzusu ola bilməz, çünki hər iki tərəf danışıqlara hazır olduğunu bəyan edib. Elə Azərbaycan XİN rəhbəri Elmar Məmmədyarov Brüsseldə bəyan etdi ki, Azərbaycan substansiv danışıqlara hazırdır.
Ermənistanın xarici işlər naziri Zöhrab Mnatsakanyan azərbaycanlı həmkarı Elmar Məmmədyarovla Brüsseldəki son qısa görüşü barədə də danışıb. AzadlıqRadiosunun erməni redaksiyasının “Sizin Elmar Məmmədyarovla ayrılıqda söhbətiniz oldumu” sualına erməni nazir belə cavab verib: “Əgər siz söhbəti, ünsiyyəti nəzərdə tutursunuzsa, bu, belə formatda görüşlər üçün normal haldır. Biz də insanıq və bir-birimizlə ünsiyyətdə ola bilərik. Və vacib deyil ki, hər bir ünsiyyət zamanı müzakirəsi üçün əlimizdə əsas olmayan məsələlərə toxunaq...” (Moderator.az). Nazirlərin növbəti görüşünə əngəl yaradacaq tək amil işarənin üçüncü paytaxtdan verilməsi ola bilər...
Politoloq Tofiq Abbasov Vaşinqton görüşü mövzusunda “Yeni Müsavat”a danışarkən bildirdi ki, siyasi prosesdə elə bir gözəçarpan dəyişiklik yoxdur: “Hər şey köhnə qaydada davam edir, yəni Azərbaycan işğalçı tərəfi ağıla və müdrikliyə dəvət edir, Ermənistan isə öz dağıdıcı xəttini müxtəlif gediş və oyunbazlıqla davam etdirir ki, bunun sonu çox acınacaqlı olacaq. Burada dərin məntiq axtarmağa ehtiyac yoxdur - ya sülh naminə təmaslar davam etdiriliməlidir, ya da onların səmərəsiz olduğu diqqətə çatdırılıb yeni format, ya da yeni yanaşma tətbiq edilməlidir. Amma bütün hallarda işğalçı qoşun Azərbaycan ərazilərini tərk etməlidir. Bu olmasa, heç bir sülhdən danışmağa dəymir”.
O ki qaldı Vaşinqtondakı görüşlərin mahiyyətinə, T.Abbasov bildirdi ki, orada yeni bir element və ya işlək mexanizminin ərsəyə gələcəyinə inanmır: “ABŞ Rusiyanın fəal moderatorluğunu qətiyyən həzm edə bilmir, buna görə də prosesdə özünün dominant olmasını həkk etdirməyə çalışır. Əgər Rusiyada erməni lobbisi cidd-cəhdlə çalışırsa ki, sülh prosesi çöksün, elə Amerikadakı erməni təşkilatları da bu istiqamətdə daha böyük səylə fəaliyyətlərini davam etdirirlər... Bunları nəzərdən keçirdikdə istər-istəməz müharibə yolunun yeganə alternativ olması ilə razılaşmamaq olmur”.
Moskva və Vaşinqtonun Qarabağ siyasətinə toxunan T.Abbasov bildirdi ki, ABŞ və Rusiya heç vaxt müttəfiq olmayacaq: “İndiki geosiyasi konyunktura göstərir ki, onlar bir çox hallarda bir-birinin acığına hərəkət edirlər, sabotaj metodikasından geniş istifadə edirlər. Münaqişəli vəziyyətlərə gəlincə isə onların hər birinə vacibdir ki, barışıq, ya həll yolu onlardan birinin diplomatik zəfərinə çevrilsin. Yaxın Şərq problemində bu iki nəhəngin amansız rəqabəti problemin dərinləşməsinə səbəb oldu. Bəyəm Vaşinqton və Moskva vahid yanaşma sərgiləsəydilər, böhran cilovlanmazdımı? Əlbəttə ki, həllini tapardı. Məhz onların bir-birinə maneə yaratması vəziyyəti yan üstə saxlayır... Həmin vəziyyəti biz Qarabağ münaqişəsi kontekstində də müşahidə edirik. Ancaq bu müstəvidə vacib nüans var. Amerika harada müharibə və gərginlik olursa-olsun, bir o qədər də üzülmür. Çünki onlar hamısı ABŞ hüdudlarından çox uzaqlarda baş verir. Qarabağ problemi isə Rusiya sərhədləri boyunca baş verir və Moskva müharibə və ya əlavə gərginliklərdə istər-istəməz sığortalamağa məcburdur. Bir də ki, bu məsələdə İran amili olduğundan Vaşinqton son dərəcə maraqlıdır ki, əlində işlək rıçaq və ya mexanizm olsun. Con Boltonun bölgəyə səfəri bir daha təsdiqlədi ki, Vaşinqton ilk növbədə özünün problemlərini həll edir və bunun üçün digər dövlətləri özü üçün sipər etməyə çalışır. Əslində bu vərdiş bütün fövqəlgüclərə xasdır”.
Ermənistan XİN rəhbəri Vaşinqton görüşünün anonsunu verib, özü də liderlər səviyyəsində keçiriləcək görüşün. Hələlik nə rəsmi Bakı, nə də həmsədrlər bu anonsa münasibət bildirib. Ancaq ola bilsin ki, bu açıqlamadan sonra erməni nazir Rusiyaya tərəf boylanıb, axı Lavrov təşəbbüsün əldən çıxmasını heç vaxt istəməz... \\musavat.com\\
Azərbaycan Respublikasının Prezidenti İlham Əliyev mayın 16-da Çex Respublikası Parlamentinin Deputatlar Palatasının sədri Radek Vondraçekin başçılıq etdiyi nümayəndə heyətini qəbul edib.
ABŞ-ın Nyu-Meksiko ştatının Albukerke şəhəri mayın 28-ni “Azərbaycan Milli Günü” elan edib.
Azərbaycanın Los-Ancelesdəki Baş Konsulluğundan verilən məlumata görə, bununla bağlı şəhər meri Timoti M. Keller (Timothy M. Keller) tərəfindən müvafiq bəyannamə imzalanıb.
Azərbaycanın Los Ancelesdəki Baş Konsulluğuna göndərilmiş bəyannamədə Azərbaycan xalqının müsəlman dünyasında ilk dünyəvi və demokratik respublika yaratdığı, həmin respublikanın qısa müddətdə böyük sayda mütərəqqi islahatlara imza atdığı, nəinki müsəlman dünyasında ilk dəfə, eləcə də dövrün bir sıra qabaqcıl dövlətlərindən də öncə qadınlara səsvermə hüququ verdiyi vurğulanır.
Bəyannamədə Azərbaycanın 1991-ci ildə öz müstəqilliyini bərpa etdikdən sonra ABŞ-ın ölkəmizi tanıyan və onunla diplomatik münasibətlər quran ilk dövlətlərdən biri olduğu bildirilir. Ölkəmizin müstəqilliyini bərpa etdikdən sonra öz suverenliyini və müstəqilliyini gücləndirdiyi, dünyanın ən sürətlə inkişaf edən və çağdaşlaşan dövlətlərindən birinə çevrildiyi, bu gün regionun ən böyük iqtisadiyyata malik ölkəsi və ABŞ-ın Cənubi Qafqazda ən böyük ticarət tərəfdaşı olduğu vurğulanır.
Sənəddə həmçinin ABŞ və Albukerke şəhəri də daxil olmaqla, bütün dünyada yaşayan azərbaycanlıların 28 may tarixini Azərbaycanın Milli Günü kimi bayram edərək, öz ata-babalarının Qafqaz, Mərkəzi Asiya və Yaxın Şərq regionlarında demokratiyanın yayılmasına verdiyi töhfələri xatırladığı və Azərbaycan Respublikasının azad və müstəqil dövlət kimi önəmli uğurlarını qeyd etdiyi bildirilir. Bəyannamənin sonunda 28 may tarixi Albukerke şəhərində “Azərbaycan Milli Günü” elan edilir.
“Orta ixtisas təhsili müəssisəsinin Nümunəvi Nizamnaməsi”nin və “Azərbaycan Respublikası Nazirlər Kabinetinin dəyişiklik edilmiş bəzi qərarlarının siyahısı”nın təsdiq edilməsi haqqında” qərara dəyişiklik edilib.
Bu barədə qərarı Baş nazir Novruz Məmmədov imzalayıb.
Qərarla “Dövlət və bələdiyyə tərəfindən yaradılan orta ixtisas təhsili müəssisəsinin Nümunəvi Nizamnaməsi” təsdiqlənib.
Qərara görə, orta ixtisas təhsili müəssisələri publik hüquqi şəxslərə çevriləcək.
Mərkəzi və yerli icra hakimiyyəti orqanlarına tabeliyində olan orta ixtisas təhsili müəssisələrinin (xüsusi təyinatlı orta ixtisas təhsili müəssisələri istisna olmaqla) publik hüquqi şəxslərə çevrilmə şəklində yenidən təşkili barədə təkliflərini bir ay müddətində hazırlayıb Nazirlər Kabinetinə təqdim etmək tapşırılıb.
Həmçinin dövlət mülkiyyətində olan və ya paylarının (səhmlərinin) nəzarət zərfi dövlətə məxsus olan hüquqi şəxslər tabeliyində olan orta ixtisas təhsili müəssisələrinin publik hüquqi şəxslərə çevrilmə şəklində yenidən təşkili barədə təkliflərini bir ay müddətində hazırlayıb Nazirlər Kabinetinə təqdim etməlidirlər.
Daxili işlər orqanlarında daha bir təyinat olub.
Unikal.org xəbər verir ki, bu barədə daxili işlər naziri, general-polkovnik Ramil Usubov müvafiq əmr imzalayıb. Əmrə əsasən, polis mayoru Elvin Rizvanov Yevlax Rayon Polis Şöbəsi rəisinin xidmət üzrə müavini təyin edilib.
Xəbəri Yevlax Rayon Polis Şöbəsindən Unikal.org-a təsdiqləyiblər.
Qeyd edək ki, Yevlax Rayon Polis Şöbəsinin xidmət üzrə keçmiş rəis müavini polis polkovnik-leytenantı Atif Həsənov Ağcabədi Rayon Polis Şöbəsi rəisinin xidmət üzrə müavini təyin edilib.
Hüquqşünas Cavid Əfəndizadə: “Ziya Məmmədov da, Arif Əsgərov da dindirilməli, yeri gəlsə, istintaqa cəlb olunmalıdırlar”
Nəqliyyat Nazirliyinin Rabitə və Yüksək Texnologiyalar Nazirliyinə birləşdirilməsindən sonra işsiz qalan Ziya Məmmədov və onun müavini Arif Əsgərovun adları mətbuatın gündəmindən düşmür. Bir neçə müddətdir ki, Məmmədovla Əsgərovun adı həm də beynəlxalq korrupsiya qalmaqalında hallanmağa başlayıb. Məlum oldu ki, Nəqliyyat Nazirliyi 2013-cü ildə Kanadanın “Bombardier Inc.” şirkəti ilə Azərbaycan dəmir yollarının 500 km-lik bölməsində siqnal avadanlıqları quraşdırmaq üçün 340 milyon dollarlıq kontrakt bağlayıb. Kontrakt üzrə 56 milyon dollar ortadan itib.
Həmin vaxt bu məsələ dünya mətbuatının gündəmini zəbt etmişdi. Böyük yeyinti faktlarını üzə çıxaran isə İsveçin SVT telekanalı, TT agentliyi və “Radio Canada”, habelə mütəşəkkil cinayətkarlıq və korrupsiya araşdırmaları üzrə jurnalistika Mərkəzi OCCRP-dir. Jurnalistlər aşkara çıxarıblar ki, Kanadanın beynəlxalq nəqliyyat infrastrukturu şirkəti olan “Bombardier İnc”in bu ölkədəki törəmə şirkəti “Bombardier Transportattion”un vasitəsilə böyük korrupsiyaya yol veriblər. “Bombardier” şirkəti ilə “Azərbaycan Dəmir Yolları” QSC arasında bağlanmış müqaviləyə əsasən, 46 siqnal avadanlığı birbaşa Azərbaycana göndərilir, ancaq pullar Londonda qeydiyyatdan keçmiş, nə ofisi, nə ünvanı, nə telefon nömrəsi olmayan hansısa şirkətə köçürülür. Sövdələşməyə əsasən siqnalizasiya avadanlıqlarının təchizatı iki ayrı müqavilə əsasında həyata keçirilir.
Birinci müqavilə üzrə “Bombardier” şirkəti tərəfindən “Ebilock-950″ siqnalizasiya avadanlığı 126 milyon İsveç kronuna Londonda qeydiyyatdan keçmiş həmin ”Multiserv Overseas” şirkətinə satılır, həmin şirkət isə avadanlığı bu dəfə 5,5 dəfə baha qiymətə, yaxud o vaxtkı məzənnə ilə 695 milyon krona və ya 104 milyon dollara Azərbaycana satır. İsveç prokurorluğu bildirir ki, Azərbaycan məmurları “Bombardier” şirkəti ilə bağlanmış müqavilədən bu fırıldaq mexanizm sayəsində “otkat” alıblar. İsveç hüquq-mühafizə orqanları diqqəti belə fakta yönəldir ki, 2013-cü ildə “Azərbaycan Dəmir Yolları” QSC-nin elan etdiyi həmin tenderə “Bombardier” şirkətindən başqa bir neçə şirkət də qatılmışdı və onlar xeyli aşağı qiymət təklif etmişdilər. Lakin müqavilə “Bombardier”lə bağlanıb. Həmçinin üzə çıxıb ki, müqavilə üzrə işlərin görülməsi zamanı 56 milyon dollar Azərbaycan məmurlarına ötürülüb. Bundan sonra Rusiya vətəndaşı olan şirkət əməkdaşı həbs olunub. O dövrdə məsəl ilə bağlı azərbaycanlı məmurların həbs edilə biləcəyi gözləntisi vardı. Amma sonrada işdəki əsas şahidin mövqeyini dəyişməsi məhkəmənin korrupsiya sövdələşməsini sona qədər araşdırmasına mane oldu. Məsələnin yenidən gündəmə gəlməsinə səbəb isə Dünya Bankının Kanadanın “Bombardier Inc.” şirkətinə korrupsiyaya görə xəbərdarlıq etməsidir.
Arif Əsgərov 6 il – 2009-2015-ci illərdə “Azərbaycan Dəmir Yolları” Qapalı Səhmdar Cəmiyyətinin (QSC) sədri postunu tutub. Göründüyü kimi, Arif Əsgərov vəzifədə olarkən adı böyük korrupsiya qalmaqallarında keçib, büdcənin dağıdılması, millətin pullarının talan edilməsi, həm də Azərbaycanın adının beynəlxalq aləmdə korrupsiya mövzusunda hallanmasına yol açan hərəkətlər edıb.
Bu ittihamlar təsdiqlənərsə, Arif Əsgərovu hansı cəza gözləyir?
Hüquqşünas Cavid Əfəndizadə deyir ki, rüşvətxorluq korrupsiyanın ən təhlükəli təzahürüdür: “Azərbaycan Respublikası CM-in 311-ci maddəsində rüşvət alma, 312-ci maddəsində isə rüşvət vermə cinayətləri nəzərdə tutulur. Rüşvət alma və rüşvət vermə korrupsiyanın ən geniş yayılmış və təhlükəli təzahür formalarından hesab edilir. Rüşvət alma cinayətinin təhlükəliliyi ondadır ki, o, hakimiyyətin və dövlət idarəçiliyinin əsaslarını sarsıdır, dövlət orqanlarını əhali qarşısında hörmətdən və nüfuzdan salır, vətəndaşların hüquq və mənafelərinin, mühüm sosial prinsiplər olan ədalətliliyin və bərabərliyin pozulmasına səbəb olur. Rüşvət vermənin spesifik xüsusiyyətlərinə gəlincə isə bu zaman dövlət qulluqçularının korrupsiyaya qurşanmasına əlverişli zəmin yaradılır, vətəndaşlar arasında qanun çərçivəsindən kənara çıxan davranışa yol verməyə meyl yaranır.
”Bombardier” şirkəti ilə “Azərbaycan Dəmir Yolları” QSC arasındakı sövdələşmədə korrupsiya izlərinin olması, ortada Azərbaycana 5,5 dəfə baha qiymətə və ya 104 milyon dollar avadanlıq satılması faktı araşdırılmalıdır. Azərbaycan dövləti niyə 18 milyon dollarlıq avadanlığı 104 milyon dollara almalıdır? Həmin pul dövlət büdcəsindən ödənilib, yəni Azərbaycan xalqının puludur. Xalqın 86 milyon dollarının oğurlanması ilə bağlı çox ciddi, əsaslı şübhələr var. Bu şübhələr araşdırılmalı, hüquqi qiymət verilməlidir. Ziya Məmmədov da, Arif Əsgərov da həmin 86 milyon dolların artıq ödənməsi məsələsinə görə dindirilməli, yeri gəlsə, istintaqa cəlb olunmalıdırlar”.
Xalq artisti Rasim Balayev bir neçə gün öncə Prezident İlham Əliyev və birinci xanım Mehriban Əliyeva ilə görüşməsi barədə danışıb.
Sənətkar “Ölkə.Az”ın əməkdaşı ilə bildirib ki, ölkə rəhbəri ona tez-tez görüşəcəklərini deyib:
“Tədbirə sənətkarlar da dəvət edilmişdi. Zeynəb Xanlarova, Tahir Salahov, mən və bir neçə sənətkar yaxın oturmuşduq. Tədbirdən çıxanda biz tərəfə də yaxınlaşdı. Ayaqüstü qısa söhbətimiz oldu. Yaradıcılıqla bağlı heç nə danışmadıq. Çünki orada elə geniş danışmağa imkan da yox idi. Sonra dedi ki, sağlıq olsun, hələ tez-tez görüşəcəyik”.
Qeyd edək ki, mayın 10-da ümummilli lider Heydər Əliyevin anadan olmasının 96-cı ildönümünə və Heydər Əliyev Fondunun yaradılmasının 15 illiyinə həsr olunmuş təntənəli mərasimdə Prezident İlham Əliyev və xanımı Mehriban Əliyeva xalq artisti Rasim Balayevlə görüşüb söhbət etmişdilər.
Sabiq vergilər naziri Fazil Məmmədova məxsus bisnes strukturlarında, o cümlədən “AtaBank”da son illər gedən proseslər, baş verən qeyri-adi hadisələrlə bağlı məlumat vermişdik
“AzPolitika.info”ya daxil olan məlumatlarda sabiq nazir tərəfindən bankın rəhbərliyinə gətirilən qohumlarının – bacısı oğlu Dəyanət Quliyev və yeznəsi Namiq Quliyevin “AtaBank”ı iflas həddinə çatdırdıqları, vəsaitləri müxtəlif vasitələrlə mənimsədikləri iddia olunub.
Xeyli müddət keçsə də, nə bank, nə adları çəkilən şəxslər, nə də Fazil Məmmədov bu məlumatları təkzib etməyib. “AzPolitika.info”ya daxil olan yeni məlumatlarda isə “AtaBank”da növbəti qanunsuzluqların baş verdiyi iddia olunur. Belə ki, sabiq nazir Fazil Məmmədovun biznes strukturlarında ciddi problemlərin yaşandığını bildirən məlumatlı mənbə, “AtaHoldinq” və “Synergy Group”da maliyyə və idarəetmə böhranın hökm sürdüyünü iddia edir.
“Bu şirkətlərə kimin və necə rəhbərlik etdiyi bəlli deyil. Ciddi sağlamlıq problemləri olan F.Məmmədov bu şirkətlərə faktiki nəzarət edə bilmir, bunun da nəticəsində şirkətlər iflas həddinə çatıb”, - mənbə bildirir.
Elə bir müddət öncə hər ikisi keçmiş nazirə məxsus olan şirkətlər arasındakı borc probleminin məhkəməyə daşınmasına dair yayılan məlumatların da bundan xəbər verdiyi bildirilir.
“Belə ki, “AtaHoldinq”ə daxil olan “AtaSığorta şirkəti ödənilməmiş 9918 manat sığorta haqqına görə “Synergy Group”u məhkəməyə vermişdi. 1 saylı Bakı İnzibati-İqtisadi Məhkəməsində işə baxılaraq, həmin vəsaitin “Synergy Group”dan tutularaq “AtaSığorta”nın xeyrinə ödənilməsi qət edilmişdi. Hər zaman iri maliyyə qurumu kimi təqdim edilən “Synergy Group”un cəmi 9918 manat sığorta haqqını ödəyə bilməməsi, buna görə də eyni şəxsə məxsus digər şirkət tərəfindən məhkəməyə verilməsi sabiq nazirin şrkətlərində idarəetmənin iflic hala düməsini, sahibsizliyin hökm sürməsini əyani göstərir”, – məlumatda qeyd olunur.
Mənbənin sözlərinə görə, “AtaBank”dakı problemlər ictimailəşdikdən sonra “AtaSığorta”da da analoji proseslər getməyə başlayıb: “Belə ki, “AtaSığorta” ASC-nin İdarə Heyətinin sədri Müseyib Əliyev bir neçə gün əvvəl öz ərizəsi ilə işdən çıxıb. 15 ildən çox F.Məmmədovun şirkətlərində çalışmış M.Əliyevin məhz indiki anda işdən ayrılmasının səbəbi artıq bu şirkətlərin iflas həddində olması ilə bağlıdır”.
F.Məmmədova məxsus şirkətlər içərisində ən böyük problemin isə “AtaBank”da qaldığı vurğulanır. Bankın həm nəzarət orqanlarını, həm də öz müştərilərini aldatdığı bildirilir: “Bir müddət öncə hər bir bank kimi “AtaBank”da öz illik maliyyə vəziyyətini açıqlayaraq, bankın 2018-ci ili 127 min mənfəətlə başa vurduğunu bəyan etdi. Lakin təcrübəli iqtisadcılar bu məlumatın yanlış olduğunu, əslində bankın zərərlə işlədiyini, bankın öhdəliklər içərisində itib-batdığını mediaya açıqladılar. Belə ki, 2018-ci il üzrə əvvəlki illə müqayisədə “AtaBank”ın mənfəəti 63% düşüb. Təkcə müştəri hesablarında üç ayda 7 milyon 724 min manat azalma qeydə alınıb. Bankın aktivləri də 7% azalıb.
Bankın 435 milyon 893 min manat öhdəliyi vardır ki, onun 20 milyon manatı Mərkəzi Bank qarşısındadır. Bankın mənfəət və zərər hesabatına əsasən, bankın 2019-ci ilin birinci rübündə faiz gəlirləri illik müqayisədə 19,1% azalaraq 8 milyon 627 min manat, faiz xərcləri 12% azalaraq 5 milyon 620 min manat, qeyri-faiz gəlirləri 60% azalaraq 917 min manat, qeyri-faiz xərcləri isə 8% azalaraq 5 milyon 297 min manat təşkil edib.
Bank əməliyyatda da zərər edib. Belə ki, “AtaBank”ın 2019-ci ilin birinci rübündə əməliyyat zərəri 1 milyon 373 min manat olub. Halbuki, bank 2018-ci ilin birinci rübündə 833 min manat əməliyyat mənfəəti əldə etmişdi.
Bank 2019-ci ilin birinci rübündə aktivlər üzrə ehtiyatlardan 1 milyon 500 min manat vəsaiti geri çəkdiyi üçün bu rübdə 127 min manat xalis mənfəət əldə edib. Əks halda bankın rəsmən zərərlə işlədiyi təsbit olunmalı idi.
Beləliklə də, bank üzrə mütəxəssislərin fikrincə, “AtaBank”ın təqdim etdiyi maliyyə hesabatı, onun mövcud likvidlik və dayanıqlıq vəziyyəti ilə qətiyyən uyğun gəlmir”.
Verilən məlumatda “AtaBank”ın dollarla kredit almış müştərilərinə dövlət tərəfindən ödənilmiş kompensasiyaları vermədiyi iddia edilir: “Məsələnin ən acınacaqlı tərəfi isə, bankın dollarla kredit almış müştərilərinə dövlət tərəfindən ödənilmiş kompensasiyaların onlara verilməməsidir. Maliyyə Bazarlarına Nəzarət Palatasının açıqlamasına görə, Prezident İlham Əliyevin “Fiziki şəxslərin problemli kreditlərinin həlli ilə bağlı əlavə tədbirlər haqqında” Fərmanına uyğun olaraq, vaxtilə ABŞ dolları ilə götürülmüş kreditlər üzrə kompensasiya almalı olan vətəndaşların 71,8%-nə ödəniş edilib.
Lakin “AtaBank” tərəfindən bir qrup müştəriyə xırda məbləğdə kompensasiyalar verilsə də, böyük məbləğdə olan hissənin verilməsi əsassız olaraq yubadılır. Bununla bağlı isə bank heç bir mövqe bildirmir.
Qaydalara görə, 500 manatdan çox olan kompensasiya məbləği yalnız bank kartları vasitəsilə ödənilməlidir. Ona görə də, “AtaBank” bu qəbildən olan müştərilərə kompensasiyaları ödəmək üçün bank kartlarını təqdim etmişdir. Lakin maraqlısı odur ki, bu kartlarda indiyədək heç bir vəsait yoxdur. Palatanın kompensasiyaların verilməsinin artıq bitmə üzrə olduğunu bəyan etməsi fonunda, “AtaBank” müştərilərinə içində vəsait olmayan boş bank kartlar verib. Bunu isə nə ilə izah edildiyi bəlli deyildir”.
Mənbənin məlumatına görə, bankın bu davranışı xeyli sayda müştərinin haqlı narazılığına səbəb olub: “Bu müştərilər dəfələrlə banka müraciət etsələr də, müsbət cavab ala bilmirlər. Müştərilər artıq özlərinin bank tərəfindən aldadıldığını düşünürlər. Ona görə də bu qanunsuz hərəkətləri barədə media vasitəsilə nəzarət orqanlarını məlumatlandırmaq niyyətindədirlər”.
Verilən məlumata həmçinin qeyd olunur ki, bank əməkdaşları da yaranmış vəziyyətdən çox narahatdırlar: “Davamlı olaraq bankdan peşəkar əməkdaşlar ayrılmaqdadırlar. Onlar ümumiyyətlə hazırki sədr Dəyanət Quliyevin bankı idarə edə bilməməsini, bunun üçün onun korporativ təcrübəsinin olmamasını, “Ata Bank”ın bu səbəbdən iflic vəziyyətə düşməsini düşünürlər. Həqiqəti əks etdirməyən maliyyə məlumatlarını yaymaqla bank fəaliyyətini davam etdirə bilməz. Bankın fəaliyyəti kəskin risklərlə xarakterizə olunur.
Əgər qısa zamanda bankın likvidliyi və korporativ idarəetməsi düzəldilməsə onun bağlanacağı şübhəsizdir. Gedişat onu göstərir ki, Fazil Məmmədov sahibi olduğu “AtaBank”ın ayaqda qalmasına heç bir dəstək göstərməyəcək”.
Sonda qeyd edilir ki, “AtaBank”da vəziyyətin gündən-günə pisləşməsi Fazil Məmmədovun artıq bankın problemlərini həll etmək niyyətində olmadığından xəbər verir. Sabiq nazirin iflic vəziyyətə düşmüş bankı müştəriləri, dövlət orqanları və digər kreditorları ilə birlikdə baş-başa qoyduğu, bununla bağlı yaranacaq məsuliyyəti də idarəetmədə olanların üzərinə yönəldəcəyi bildirilir.
Qeyd olunan iddialarla bağlı “AtaBank”ın da mövqeyini dərc etməyə hazırıq.