 |
 |
Gəncə-Qazax-Gürcüstan avtomobil yolunun daha iki zolaq genişləndirilməsinə start verilib. Tikinti Şəmkir rayonunun kənd təsərrüfatı istifadəsində olan torpaqlarda və boş ərazilərdə aparılır. Yol çəkilişində yalnız asfalt örtüyündən deyil, yerin alt qatındakı xammaldan (çınqıl) da istifadə edilir. Həmin xammal isə milyonlarla manat deməkdir. Elə bu səbəbdən də Şəmkir rayonu ərazisindən keçən yolda icra başçısı Alimpaşa Məmmədov nəzarəti əlinə alıb. Bir çox iş adamlarını oradan kənarlaşdırıb, hətta şəxsi torpağı olanlara qanunsuz olaraq qadağa qoyub.
Alimpaşa Məmmədovun bu məsələdə Fövqəladə Hallar Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Komitəsində özünə “həmkarlar” tapdığı və onların vasitəsilə insanların hansısa sənədlərinin yerində olmadığı bildirilir. Nəticə etibarilə isə insanların torpaqları əlindən çıxır.
Erməni girovluğunda saxlanan Dilqəm Əsgərovun oğlu Kürdoğlu Əsgərovun torpaq məsələsi də həmin işin tərkib hissəsidir. Məsələ mediaya çıxarıldığı üçün Alimpaşa Məmmədov geri addım atmağa məcbur oldu…
Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli Modern.az-a bildirib ki, layihə Avropa Yenidənqurma və İnkişaf Bankı ilə imzalanmış saziş əsasında həyata keçirilir:
“Uzunluğu 130 kilometr olan yoldakı işlərə tam olaraq 1 aydır start verilib. Ərazidə geoloji və mobilizasiya işləri yekunlaşıb. Hazırda torpaq işləri görülür, yeni yol yatağının inşası aparılır. İşlər AAYDA-nın sifarişi əsasında iki türk şirkəti tərəfindən həyata keçirilir”.
Onun sözlərinə görə, M-2 Bakı-Qazax-Gürcüstan Respublikası ilə dövlət sərhədi avtomobil yolunun Gəncə-Qazax-Gürcüstan sərhədi hissəsinin 4 zolağa genişləndirilməsi layihəsinin 2021-ci il ərzində yekunlaşdırılması nəzərdə tutulur:
AAYDA rəsmisi qeyd edib ki, layihə əvvəlcədən bütün dövlət qurumları ilə razılaşdırıldığı üçün hər hansı rayonun ərazisində tikinti işlərinə heç bir maneə yoxdur: “Bütün işlər “İnşaat Norma və Qaydaları”nın tələblərinə əsasən aparılır”
Ötən gün İmişlidəki mənbədən Conflict.az-a maraqlı br foto daxil olub. Şəkər xəstəsi olan rayon sakini dövlət tərəfindən verilən test aparatını rayonda fəaliyyət göstərən apteklərdən birində satır. Hətta həkim olmayan vətəndaş belə anlayır ki, bədəndəki şəkərin qədərini müəyyən etmək üçün nəzərdə tutulan aparat əslində həyatı əhəmiyyətlidir.
Bildiyimiz kimi şəkər xəstələrində şəkərin enməsi və yüksəlməsi hər iki halda həyat üçün təhlükəlidir. Bəs belə olan təqdirdə nədən bir şəxs qiyməti o qədər də yüksək olmayan bir test aparatını satmaqla həyatını təhlükəyə salsın? Deməli şəxs xəstə deyil. Əgər xəstə deyilsə bəs necə olur ki, adam qeydiyyata alınır? Və o lazımı peraparatlarla təmin olunur. Conflict.az-ın əməkdaşı məsələ ilə əlaqədar İmişli MRX-də baş həkimin müavini vəzifəsində çalışan Elnur həkimlə əlaqə saxladı. Baş həkimin müavininin cavabı konkret oldu: biz xəstələrin o kimi işlərinə nəzarət edə bilmirik.
Doğrudur. MRX hər xəstənin səhiyyə müəssisəsindən sonrakı hərəkətlərinə nəzarət etməyə borclu deyil. Lakin xəstə olmayanları aşkarlamağa bilavasitə borcludur. Eyni zamanda həmin şəxslərin hansı yolla qeydiyyata düşmələrini araşdırıb üzə çıxarmaqdan da sorumludur. Çünki bu tip insanların hərəkətləri dövlət büdcəsinə yönəli addımdır. Bu isə iqtisadi cinayətdir.
Lakin İmişli MRX ilə bağlı məsələ bununla da yekunlaşmır. Rayondakı mənbədən Conflict-az-a onu da bildirdilər ki, rayon Təhsil şöbəsində metodist vəzifəsində işləyən Sevdimalı Hüseynov bir müddət öncə insult keçirib. Uzun müddət paytaxtdakı tibb müəssisələrindən birində müalicə alan xəstə hal-hazırda ev şəraitində müalicəsini davam etdirir. S.Hüseynovun yaxınları onun xəstəliyinin ağırlığı səbəbi ilə xəstəliyi təsdiq edən sənədin - bülletinin vaxtının uzadılması məqsədilə MRX-nın həkim komissiyasının sədri Zakir Cəbrayılzadəyə müraciət ediblər. Komissiya sədri “artıq vaxtı gecikdirmisiniz” – deyə bülleteni imzalmaqdan imtina edir. Mənbənin bildirdiyinə görə xəstə yaxınlarının baş həkimə müraciəti də hər hansı bir nəticə vermir. Bu zaman ortaya maraqlı nüans çıxır. Adam de-fakto yataq xəstəsidir. Yəni müstəqil hərəkət imkanları məhduddur. Belə olan təqdirdə Zakir Cəbrayılzadə nəyi əsas gətirərək vaxtın gecikdirilməsini səbəb olaraq göstərir? Adamın real durumu onun xəstəliyini təsdiq edən səbəb deyilmi? Əgər bir möhür və ya imza müqabilində hansısa marağın təmini güdülürsə, artıq burada ədalət prinsipi itir. Hippokrat andı içərək hətta xəstə düşmənə belə yardım öhdəliyi götürmüş həkimin sağlamlığı kiritik olan soydaşına bu qədər ədalətsiz yanaşması dəhşətverici faktordur. Belə çıxır ki, İmşlidə dünyasını dəyişmiş şəxs sağ ikən MRX-ya ölüm tarixi ilə bağlı məlumat verib sonra dünyasını dəyişməli idi? Axı bu mümkünsüzdür cənablar. Unutmayın ki, edilən hərəkətlər bumeranq xarakterlidir. Ölkənin səhiyyə sistemini labirintə salanda məhz bu kimi amillərdir. Görəsən İmişli MRX-nın baş həkimi Eynulla Qasımov bu səhiyyə müəssisəsinə rəhbərlik etdiyi müddətdən bəri funksiyasını özü üçün nə vaxt müəyyən edəcək?
Onu da xatırladaq ki, bir müddət öncə İmişli rayon uşaq poliklinikasında da eyni vəziyyət hökm sürürdü Belə ki, Mirzağa Mirişov adlı həkim xəstə uşaqlara epiqriz verməkdən imtina edirdi. Səbəb kimi “onsuz da bu sənəd keçərli deyil” – deyə məqsədli şəkildə bəhanələr gətirməklə, valideyinləri günlərlə get-gələ salır. Və bu halda da sual olunur: Əgər sənin imzaladığın sənəd keçərsizdirsə, bəs nədən o posta əyləşmisən? Yox əgər başqa məqsədin varsa o halda cənab Prezidentin dövlət insanlar üçündür tezisini sənə xatırlatmaqda xeyir var. Düzdür bu sizin zehniyyətdəki “xeyir” deyil. Lakin...
Bu tip hallar İmşli MRX-də ilk və hələ ki, son da deyil. Rayon tibbi komissiyanın üzvi Anar Əliyevdə həmkarlarından geri qalmır. Mənbənin bildirdiyinə görə həm “məqsədinə” nail olan, həm də insanların sənədlərini verməkdən imtina edən Anar Əliyevlə bağlı da baş həkim Eynulla Qasımova edilən müraciətlər nəticəsiz qalır. “Bütün hadisələr Cəsur həkimin vaxtında olub. Mənə dəxli yoxdur.” – deyə cavab verən baş həkimə yuxarıda qeyd edilənlərdə daxil, bəs görəsən nəyin dəxli var?
Mövzuya qayıdacağıq.
Redaksiya məlumatda adı çəkilən qurum və şəxslərində cavab haqlarını tanıyır, dərc etməyə hazırdır.
Ölkə səhiyyəsinin mövcud vəziyyəti Azərbaycandan milyonlarla manat vəsaitin xaricə daşınmasına səbəb olur.
Azərbaycan vətəndaşları sağlamlıqlarının qeydinə qalmaq üçün Türkiyə, İran, Rusiya, Belarusiya,Ukrayna, Gürcüstan, Avropa ölkələrinə üz tutur. Bu məqsədlə ay ərzində minlərlə vətəndaş müayinə və müalicə üçün xarici ölkələrə yollanır.Azərbaycana isə müayinə və müalicə məqsədilə gələn yoxdu.Səhiyyə turizmi ölü nöqtədən tərpənmir.
Savadlı 3-5 faiz həkim korpusu bu acınacaqlı vəziyyəti etiraf edir və bunun sonunun necə tamamlanacağı qənaətini söyləməkdə çətinlik çəkir. İctimaiyyət, millət vəkilləri, KİV nümayəndələri səhiyyənin tənəzzül dövrünü yaşadığının fərqində olduğunu etiraf edirlər. Artıq gizlətməli heç nə qalmayıb.İstedadlı şagirdlər isə ATU-ya qəbul olunub,orada 6 il vaxt itirmək istəmir, YÖS və digər kurslarda məntiq,riyaziyyat,ingilis dili fənlərini mükəmməl mənimsəməklə ölkədən çıxırlar. Bunun qarşısını almaq üçün təklif verənlərin olmadığı bir şəraitdə isə tibbi təhsilimizə cavabdeh şəxslər heç nə baş vermirmiş kimi davranır,əcnəbi “məruzəçiləri”ölkəmizə dəvət edir,ödənişli elmi praktik konfranslarda baş aldadırlar.
İndi isə təşkil olunan konfranslardan birinin mahiyyətində bir məqama diqqət yetirək:
Azərbaycan Tibb Universiteti Neyrocərrahiyyə kafedrasının 50 illiyinə həsr olunmuş “Neyrocərrahiyyənin müasir problemləri” adlı Beynəlxalq elmi praktiki konfransı keçirilib və orada iştirak ödənişli olub.
Faktinfo.az-ın əldə etdiyi məlumata görə, rektor Gəray Gəraybəylinin təşkilat komitəsinin sədri olduğu elmi praktiki konfrans 11-12 may tarixlərində ATU-nun Tədris Cərrahiyyə Klinikasında baş tutub.Təşkilati məsələlərə, xarici məruzəçi həkimlərin kimliyinə, məlum konfransdan həkimlərin nə isə bir şey öyrənməsinin fərqinə varmırıq, sadəcə ictimaiyyətə, tibbi personala məlum olmayan bir nüansın üzərində xüsusi dayanırıq.
Ödənişli konfranslarda kredit balının tətbiqində məqsəd nədir?!
Niyə həkimlərin iştirakının ödənişsiz olduğu, onların biliyinin artırılmasına xidmət edən elmi praktiki konfranslarda iştiraka görə həkimlərə kredit balı tətbiq olunmur, amma ödənişli olan, öz ölkələrində elə də tanınmayan əcnəbi məruzəçilərin cəlb olunduğu elmi praktiki konfransda iştiraka görə həkimlərə kredit balı tətbiq olunur və bu da 5 ildən bir həkimlər üçün keçirilən sertifikasiya imtahanında nəzərə alınır?!
Bu formatla, belə “kriteriyalar”la ATU-nu, onun klinikalarını, ölkənin tibbi personalını dünyaya, həmçinin qonşu olan dövlətlərə nümayiş etdirə bilərikmi?
Sayt bəzi suallara cavab axtarmaq,qarşı tərəfin mövqeyini öyrənmək məqsədilə universitetlə əlaqə yaratmağa çalışıb.Təssüf ki,həmişə olduğu kimi zənglərimiz cavabsız qaldı.Qarşı tərəfin də mövqeyini dərc edə bilərik.
Faktinfo.az onu bildirir ki, elmi praktiki konfrans ödənişli təşkil edilirsə, istər-istəməz özünə güvəni olmayan həkimlərin hələ neçə belə illər işləməsi, işləyib aldatması və dərman firmaları ilə işləmələri mümkünləşəcək.Bu qəbildən olan həkimlər elmi praktiki konfranslara nağd ödəniş etmədən onların konfranslardakı xərcini dərman firmaları öz hesabına qarşılayacaq. Necə deyərlər “əl-əli yuyar,əl də qayıdıb üzü”.
Həmçinin,xəstələrə yazılan lazımsız firma dərmanları konfranslarda “rola sahib olub” bəzi həkimlərin iştirakını mümkünləşdirsə də, vicdanı təmiz, savadı olan yüzlərlə həkimi ixtisaslarına uyğun təşkil olunan elmi praktiki konfranslardan kənarda saxlayır.Yekunda savadı şübhə doğuran, xəstələrinə lazımsız olduğu halda firma dərmanları tətbiq edən həkimlərin elmi praktiki konfranslardan öyrəndikləri bir şeylər olmasa belə, “iştirakları” onlara kredit balı üçün, kredit balı isə 5 ildən bir tətbiq olunan sertifikasiya imtahanından asanlıqla keçmələri üçün keçərli olacaq.
Digər tərəfdən, bu məsələdəki məcburiyyət davam edib, elmi praktiki konfranslarda iştirakına görə, həkimlərdən kredit balı sertifikasiya imtahanında tələb olunacaqsa, əksəriyyət özünə güvəni olmayan tibbi personalın üzvüləri ilə peşəkar həkimlər fərqlənməyəcəklər.Bu da tibbi sğortanın tətbiqinə keçid aldığımız müddətdə mənfi təmayüllərlə nəticələnəcək.
İndi özünüz deyin, cənablar! Yaşadığımız cəmiyyətdə kimlər bizi müalicə edəcək? Ciblərimizi soyacaq tibbi preparatlar kim(lər)ə dərman olacaq?!
Daim imkansız, maddi yardıma ehtiyacı olan vətəndaşlar haqqında yazaraq məlumat verir, onların problemlərinin həllinə, səsinin dövlət qurumlarına çatdırılmasına çalışırıq.
Növbəti qəhrəmanımız 5 yaşlı uşağı ilə tək-tənha yaşayan bir qadındır. II qrup əlil olan Simuzər Həsənova internet evində böyüyüb. Uşaqlıqdan sümük boşluğundan əziyyət çəkən Simuzər hələ 9 yaşı olarkən anası tərəfindən 7 saylı fiziki və əqli qüsurlu uşaqlar üçün internat evinə atılıb. Həyatda heç bir yaxını, qohumu olmayan bu kimsəsiz qadın hazırda maddi imkansızlıqdan və xəstəlikdən əziyyət çəkir.
Qeyd edək ki, daha öncə də, Simuzər Həsənova haqqında yazmışdıq. Ağır epilepsiya xəstəsi olan qadın əmək qabiliyyətini də itirdiyindən hazırda işləmək imkanından məhrumdur: “5 yaşlı oğlum var, o da xəstədir. Yoldaşım xəstə olduğumu bildikdən sonra məni atıb getdi, uşağımı atasız böyüdürəm”.
S.Həsənova epilepsiya ilə yanaş, ürək ağrılarından da əziyyət çəkir. Ürək qapaqlarının zədələndiyini deyən gənc qadın güclü müalicəyə ehtiyacı olduğunu, lakin maddi imkanı olmadığından bunu həyata keçirə bilmədiyini qeyd etdi.
1993-cü il təvəllüdlü Simuzərin 5 yaşlı oğlu Pərviz Həsənov isə ürək qüsurludur: “İldə bir dəfə müalicə etdirirəm. Ürəyində dəlik var, hələ də düzəlməyib. Çox zəif uşaqdır. Hazırda Xırdalan rayonunda kirayədə yaşayıram. Əksər dövlət qurumlarına yazıb müraciət etmişəm, ancaq cavab gəlməyib. Hazırda çörək almağa, dərmanlarımı almağa pulum yoxdur. İmkansız vəziyyətdəyəm, dövlət qurumlarından, imkanlı insanlardan yardım istəyirəm. Həm müalicəm üçün, həm də uşağın gündəlik ehtiyaclarını təmin etmək üçün köməyə ehtiyacım var”.
Əlil və köməksiz qadına kömək etmək istəyənlər 055 994 16 46 nömrəsi ilə əlaqə saxlaya bilərlər.
musavat.com
"Sabunçudan Bakıya hərəkət edən qatarlarda gediş haqqı 50 qəpik təşkil edəcək".
Milli.Az ölkə.az-a istinadən bildirir ki, bu barədə AzTV-nin efirində "Azərbaycan Dəmir Yolları" Qapalı Səhmdar Cəmiyyətinin sədri Cavid Qurbanov məlumat verib.
Cavid Qurbanovun sözlərinə görə, qatarda gediş haqqı avtobuslara nisbətən daha ucuz olacaq. Eyni istiqamətdə marşrut avtobuslarında gediş haqqı 60 qəpikdir.
"Dayanacaqları nəzərə almaqla Sabunçu dəmir yolu vağzalından Bakı stansiyasına 15 dəqiqə ərzində çatmaq mümkün olacaq. Gələcəkdə dəmir yolu xətləri Əhmədli, Zirə, Pirallahı, həmçinin Heydər Əliyev adına Hava Limanına qədər uzanacaq".
Qeyd edək ki, mayın 21-də Azərbaycan Respublikasının Prezidenti İlham Əliyev Sabunçu dəmir yolu vağzalı kompleksinin açılışında iştirak edib, yeni inşa edilən Bakı sərnişin - Sabunçu dəmir yolu xətti üzrə görülən işlərlə tanış olub.
Sabahdan etibrarən İranda sıxılmış təbii qaz (CNG) bahalaşır.
Bu barədə İranın Milli Neft Məmulatlarının Distribyutorluğu Şirkəti elan verib.
Milli.Az Trend-ə istinadən bildirir ki, şirkət bildirib ki, 22 may tarixindən ibarət hər bir kq təbii sıxılmış qazın qiyməti (CNG) 6568 rial (rəsmi məzənnə ilə 0,15 dollar) olacaq.
İndiyədək qiymətin 6 min rial olduğunu bildirən şirkət qiymət artımının 10%-dən aşağı olduğunu əlavə edib.
İranın Milli Neft Məmulatlarının Distribyutorluğu Şirkəti qiymət artımı ilə əldə olunan vəsaitin yanacaqdoldurma məntəqələrində təhlükəsizliyin artırılması, avadanlıqların quraşdırılmasına sərf olunacağını bildirib.
İnstaqramın 50 milyon istifadəçisinin şəxsi məlumatları internetdə açıq-aşkar yayılıb.
Milli.Az "Qafqazinfo"ya istinadən xəbər verir ki, bura məşhurların və brendlərin hesabları da daxildir.
Kibercinayətkarlar istifadəçilərin telefon nömrələrini, elektron poçt ünvanlarını və profildə reklamın dəyərlərini yayıblar.
Kənd Təsərrüfatı Nazirliyi yanında Dövlət Baytarlıq Xidməti bildirir ki, havaların istiləşməsi ilə əlaqədar heyvanlar arasında ilansancmaları baş verə bilir.
Milli.Az bildirir ki, ilansancma adətən, heyvanların çınqıllı otlaq sahələrdə, güneylərdə, qaya ətrafı, yarımsəhra (meşə, çöllük, daş karxanası və s.) ərazilərdə otarılması zamanı baş verir. Vaxtında baytarlıq yardımı göstərilməzsə heyvanın zəhərli ilansancmadan ölümü qaçılmazdır.
Heyvanda ilansancması zamanı toxumaların ödemi (şişməsi) və dişlənən yerdə bərk ağrı, limfaangit və limfaadenit, sonra ümumi intoksikasiya (orqanizmin zəhərlənməsi) əlamətləri-hərarətin artması, zəiflik, süstlük halları müşahidə olunur.
Zəhərlənmə sürətlə, demək olar ki, sancmadan dərhal sonra inkişaf edir. Bu zaman ilan sancan heyvanın yaşı, növü və s. faktorlar da əhəmiyyət kəsb edir. İlanvurmaya təkdırnaqlı heyvanlar daha həssas və dözümsüzdür.
Zəhər heyvan orqanizmə yeridikcə zəhərlənmə əlamətləri tədricən inkişaf edir:
- İlan çalma yerində güclü ağrı, qızartı, göyərmə və şişkinlik;
- Heyvanda koordinasiyanın pozulması;
- Nəbzin artması;
- Təngnəfəslik;
- Ümumi zəiflik, süstlük;
- Yemdən imtina;
- Gövşəmənin dayanması;
- Titrəmə, soyuq tər buraxması;
Mütəxəssis gələnə kimi ilansancma arxa və ya ön ətraflardadırsa, mümkün qədər dişləmə yerindən azca yuxarı hissədən kəndir və ya kəmərlə sıxaraq qan işləməsinin qarşısı alınmalıdır. Zərərçəkmiş heyvanın vəziyyəti çox vaxt düzgün və vaxtında göstərilən baytarlıq yardımından asılı olur. Odur ki, dərhal rayon (şəhər) baytarlıq idarəsinə məlumat verilsin.
Bütün aparılan tədbirlər aşağıda qeyd edilən ardıcıllıqla həyata keçirilməlidir:
-Heyvanın hərəkətsizliyi təmin edilməli,
-Yaranın antiseptik maddələrlə (yod, hidrogen-peroksid, kalium-permanqanat və s.) işlənməsi aparılmalıdır.
Antiseptik maddələr olmadığı halda heyvanın yarası (ilan və ya əqrəb sancdığı yer) ayran və ya təmiz su ilə yuyulmalıdır.
İlanvurmaya məruz qalmış heyvan dərhal otlaq sahədən çıxarılmalı, sakit və kölgəli yerə gətirilməli və qısa müddət ərzində heyvana ilan zəhəri əleyhinə zərdab(serum) vurulmalıdır.
Xatırladırıq ki, zərdab(serum) vurulana qədər aşağıdakıları həyata keçirmək əks göstərişdir:
- Maksimum dərəcədə heyvanın hərəkətsizliyi təmin edilməli;
- Yem qəbulu dayandırılmalı;
- Yara yandırılmamalı, kəsilməməli və deşilməməli;
- İsidicilərdən istifadə edilməməli;
- Qoyulmuş sarğılar çıxarılmamalıdır.
Əgər zərərçəkən heyvanda ilan dişlərinin izi görünürsə, lakin zəhərlənməyə xas əlamətlər müşahidə edilmirsə belə, yenə də heyvana zərdab vurulmalıdır.
Heyvanlar təhlükəli sahələrdə (meşə, çöllük, daş karxanası və s.), xüsusi ilə gecələr otarılmamalıdır.
Fermerlər yadda saxlamalıdırlar ki, ilansancma zamanı yaranın ətrafına sıxıcı sarğı qoymaq və ya həmin nahiyəni yandırmaq, kəsikləri aparmaq və buz qoymaq qəti qadağandır. Hətta zəhərlənməyə xas əlamətlər olmasa belə, əgər ilanın dişlərinin izi görünürsə xəstə ən azı 12 saat ərzində müayinə olunmalı, 12-24 saat ərzində müşahidə altında saxlanmaqla ilan zəhəri əleyhinə zərdab vurulmalıdır. Əks halda heyvanın ölümü baş verə bilər.
İlansancmadan tələf olmuş heyvanın ətindən istifadə etmək qəti qadağandır.
Fermer profilaktik məqsədlə ilkin olaraq örüşdən qayıdan heyvanın arxa və ön ətraflarına, eləcə də yelininə, dodaqlarına və çənəaltı nahiyələrinə diqqət yetirməlidir. Çünki ilan ən çox heyvanı bu nahiyələrdən sanca bilir. Bütün bunları nəzər alaraq fermerlərin bir daha diqqətinə çatdırırıq ki, heyvanlar ilansancmalarına məruz qalığı halda dərhal ərazinin sahə baytarlıq məntəqəsinə və ya rayonun baytarlıq idarəsinə müraciət etsinlər!
Dövlət Baytarlıq Xidməti bildirir ki, mövsümlə əlaqədar bütün rayon(şəhər) baytarlıq idarələri ilan zəhəri əleyhinə zərdabla(serumla) təmin ediliblər.
Bu gün Azərbaycan Milli Elmlər Akademiyası (AMEA) ilə Rusiya Elmlər Akademiyası arasında elmi-texniki əməkdaşlıq haqqında saziş imzalanıb.
Milli.Az Trend-ə istinadən bildirir ki, sənəd AMEA prezidenti, akademik Akif Əlizadə ilə ölkəmizdə rəsmi səfərdə olan Rusiya Elmlər Akademiyasının (REA) prezidenti, akademik Aleksandr Sergeyev arasında baş tutan görüş çərçivəsində imzalanıb.
Görüşdə çıxış edən akademik Akif Əlizadə uzun illərdir AMEA ilə REA arasında mövcud olan səmərəli əməkdaşlıq əlaqələrindən danışıb. O bildirib ki, REA prezidentinin Azərbaycana etdiyi bu səfər tərəflər arasında olan əlaqələrin inkişafına, gələcək əməkdaşlığa töhfə verəcək.
A.Əlizadə deyib ki, ötən dövrdə elmin müxtəlif sahələrində baş verən dəyişikliklər Rusiya Elmlər Akademiyası ilə Azərbaycan Milli Elmlər Akademiyası arasında imzalanan müqavilənin yenilənməsinə ehtiyac yaradıb.
Akademik Aleksandr Sergeyev gələcəkdə müxtəlif sahələr üzrə fundamental tədqiqatların genişləndirilməsi məsələsi barədə danışıb.
Onun sözlərinə görə, bu gün hər iki ölkə üçün önəmli olan, mineral resurslarla zəngin Xəzər dənizi ilə bağlı tədqiqatların aparılması önəmlidir.
A.Əlizadə isə bildirib ki, Xəzərin, onun dib çöküntülərinin, resurslarının öyrənilməsi nəzərdə tutulur: "Qafqazın Rusiya alimləri ilə birlikdə öyrənilməsi, insanların Qafqazda məskunlaşması, dənizaltı, sahil-arxeoloji tədqiqatların aparılması Rusiya və Azərbaycan alimləri üçün çox vacib istiqamət olub".
Rusiya Elmlər Akademiyasının prezidenti sazişin imzalanmasının elmin, texnologiyaların və innovasiya fəaliyyətinin inkişafı sahəsində əməkdaşlığın daha da genişləndirilməsi və hər iki qurum arasında müxtəlif sahələr üzrə elmi əlaqələrin gücləndirilməsi məqsədini daşıdığını vurğulayıb.
AMEA-nın vitse-prezidenti İbrahim Quliyev qeyd edib ki, olduqca unikal ərazi olan Qafqaz regionunun, xüsusilə seysmoloji vəziyyətin və vulkanların öyrənilməsi baxımından araşdırılması faydalı olar.
AMEA-nın İctimai elmlər bölməsinin akademik-katibi Nərgiz Axundova Rusiya alimləri ilə humanitar sahələr üzrə birgə tədqiqatların aparılmasını təklif edib.
Sonda AMEA və REA arasında elmi-texniki əməkdaşlıq haqqında saziş imzalanıb. Sənəddə elm və texnologiyaların prioritet istiqamətləri üzrə birgə elmi və elmi-texniki layihələrin hazırlanması və həyata keçirilməsi, bilik, təcrübə və informasiya mübadiləsi, yüksəkixtisaslı kadrların hazırlanması, birgə tədbirlərin keçirilməsi kimi məsələlər öz əksini tapır.
Sazişi AMEA-nın prezidenti, akademik Akif Əlizadə və REA-nın prezidenti, akademik Aleksandr Sergeyev imzalayıblar.
Sabah ölkə ərazisində gözlənilən hava şəraiti ilə bağlı məlumat açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Milli.Az-a verilən məlumata görə, Bakıda və Abşeron yarımadasında mayın 22-də havanın dəyişkən buludlu olacağı, əsasən yağmursuz keçəcəyi gözlənilir. Şimal küləyi gündüz cənub-şərq küləyi ilə əvəz olunacaq.
Havanın temperaturu Abşeron yarımadasında gecə 15-18, gündüz 23-28, Bakıda gecə 16-18, gündüz 26-28 dərəcə isti təşkil edəcək.
Atmosfer təzyiqi 765 mm civə sütunundan 760 mm civə sütununa enəcək, nisbi rütubət gecə 70-80, gündüz 50-55 faiz olacaq.
Rayonlarında mayın 22-də havanın əsasən yağmursuz keçəcəyi, lakin gecə və axşam bəzi dağlıq və dağətəyi rayonlarda qısamüddətli yağış yağacağı gözlənilir. Ayrı-ayrı yerlərdə dolu düşəcəyi ehtimalı var. Səhər saatlarında duman olacaq. Şərq küləyi əsəcək.
Havanın temperaturu gecə 12-17, gündüz 27-32, dağlarda gecə 5-10, gündüz 17-22 dərəcə isti təşkil edəcək.
Mayın 22-də Abşeron yarımadasında komfort temperatur şəraiti və zəif küləklərin üstünlüyü meteohəssas insanlar üçün əsasən əlverişlidir.