 |
 |
Preziden İlham Əliyev “Məhkəmə-hüquq sistemində islahatların dərinləşdirilməsi haqqında” fərman imzalayıb.
Fərman ədalət mühakiməsinin keyfiyyətinin və səmərəliliyinin artırılması məqsədi daşıyır.
Fərmanda deyilir ki, ölkəmizin davamlı tərəqqisinin təmin edilməsi üçün bütün sahələrdə həyata keçirilən islahatlar məhkəmə-hüquq sisteminin inkişafında yeni mərhələnin başlanmasını və bu sahədə islahatların dərinləşdirilməsini zəruri edir.
Müasir dövrün tələblərinə cavab verən, cəmiyyətdə yüksək nüfuza malik ədalət mühakiməsinin formalaşdırılması prosesini sürətləndirmək məqsədilə məhkəməyə müraciət imkanları daha da genişləndirilməli, məhkəmələrin fəaliyyətində şəffaflıq artırılmalı, məhkəmə icraatının effektivliyi yüksəldilməli, məhkəmə qərarlarının tam və vaxtında icra edilməsi təmin olunmalı, süründürməçiliyin və digər neqativ halların aradan qaldırılması üçün görülən tədbirlər gücləndirilməlidir.
Eyni zamanda, ədalət mühakiməsi mexanizmlərinin effektiv fəaliyyətinin təmin edilməsi üçün hakim və məhkəmə aparatı işçilərinin sosial müdafiəsi daha da yaxşılaşdırılmalı, müvafiq infrastrukturun yenilənməsi işləri davam etdirilməli, məhkəmə icraatında müasir informasiya texnologiyalarının tətbiqinin üstünlüklərindən hərtərəfli istifadə edilməli, digər mühüm məsələlər həll olunmalıdır.
1. Azərbaycan Respublikasının bütün məhkəmələrinin sədrlərinə və hakimlərinə tövsiyə edilsin ki, məhkəmə hakimiyyətinin nüfuzunun artırılması və cəmiyyətdə məhkəmələrə etimadın möhkəmlənməsi üçün fəaliyyətlərində ədalət, qanunçuluq, qərəzsizlik, aşkarlıq, hər kəsin qanun və məhkəmə qarşısında bərabərliyi və Azərbaycan Respublikasının Konstitusiyası və qanunlarında təsbit edilmiş ədalət mühakiməsinin digər prinsiplərinə dönmədən riayət etsinlər.
2. Cəza siyasətinin humanistləşdirilməsi və cinayətlərin dekriminallaşdırılması üzrə tədbirləri davam etdirmək məqsədilə Azərbaycan Respublikasının Ali Məhkəməsinə və Azərbaycan Respublikasının Baş Prokurorluğuna tövsiyə edilsin, Azərbaycan Respublikasının Ədliyyə Nazirliyinə tapşırılsın ki, müvafiq qanun layihələrini hazırlayıb üç ay müddətində Azərbaycan Respublikasının Prezidentinə təqdim etsinlər.
3. Azərbaycan Respublikasının Ali Məhkəməsinə və Məhkəmə-Hüquq Şurasına tövsiyə edilsin, Azərbaycan Respublikasının Ədliyyə Nazirliyinə tapşırılsın ki, aşağıdakı məsələlərə dair normativ hüquqi aktların layihələrini hazırlayıb iki ay müddətində Azərbaycan Respublikasının Prezidentinə təqdim etsinlər:
3.1. sahibkarların məhkəməyə müraciət imkanlarının asanlaşdırılması və sahibkarlıqla bağlı mübahisələrə müvafiq sahədə daha dərin hüquqi bilik və təcrübəsi olan hakimlər tərəfindən baxılmasını təmin etmək məqsədilə vergi və gömrük ödənişləri, məcburi dövlət sosial sığorta haqlarının ödənilməsi ilə bağlı yaranan mübahisələrə, habelə sahibkarlıq fəaliyyəti ilə əlaqədar digər məsələlərə dair işlər üzrə ixtisaslaşmış məhkəmənin yaradılması;
3.2. məhkəmələrin hüquqi məsələlərin həllinə yanaşmasının sabitliyini və normativ hüquqi aktların tətbiqi ilə bağlı hüquqi mövqeyinin proqnozlaşdırılan olmasını təmin etmək məqsədilə Azərbaycan Respublikası Ali Məhkəməsinin vahid məhkəmə təcrübəsi formalaşdırmaq vəzifəsinin və həmin vəzifənin icra olunması mexanizminin təsbit edilməsi;
3.3. hakimlərin müstəqilliyini təmin etmək məqsədilə məhkəmələrin fəaliyyətinə müdaxilənin qarşısının alınması mexanizmlərinin təkmilləşdirilməsi və belə müdaxiləyə görə məsuliyyətin artırılması;
3.4. hakimlərin sosial müdafiəsinin gücləndirilməsi məqsədilə onların maddi təminatının əhəmiyyətli dərəcədə artırılması;
3.5. məhkəmələrdə baxılan işlər üzrə ödənilən dövlət rüsumunun dərəcələrinin verilən iddiaların qiymətinə müvafiq olaraq diferensiasiya edilməsi;
3.6. məhkəmələrdə baxılan işlər üzrə ödənilən dövlət rüsumunun müəyyən hissəsinin məhkəmə aparatları işçilərinin sosial müdafiəsinin gücləndirilməsinə və məhkəmələrin maddi-texniki bazasının möhkəmləndirilməsinə yönəldilməsi;
3.7. məhkəmə icraatının obyektivliyini daha dolğun şəkildə təmin etmək üçün bütün məhkəmə iclaslarının fasiləsiz audioyazısının aparılması və protokolun məhkəmə iclasının audioyazısına uyğun tərtibi tələbinin müəyyən edilməsi;
3.8. mülki işlər, habelə inzibati xətalara, iqtisadi və inzibati mübahisələrə dair işlər üzrə məhkəmə ekspertizasının keçirilməsi və ekspert rəyinin verilməsi müddətlərinin dəqiqləşdirilməsi, məhkəmə prosesi tərəflərinin ekspertiza təyin edilməsi ilə bağlı hüquqlarının genişləndirilməsi.
4. Mülki işlər və iqtisadi mübahisələr üzrə məhkəmə icraatının effektivliyinin artırılması, xüsusən sahibkarlıqla bağlı məsələlərin məhkəmələrdə daha sürətli və səmərəli həllinin təmin edilməsi məqsədilə Azərbaycan Respublikasının Ali Məhkəməsinə, apellyasiya instansiyası məhkəmələrinə, Azərbaycan Respublikasının Vəkillər Kollegiyasına və Azərbaycan Respublikasının Sahibkarlar (İşəgötürənlər) Təşkilatları Milli Konfederasiyasına tövsiyə edilsin, Azərbaycan Respublikasının Ədliyyə Nazirliyinə, Azərbaycan Respublikasının İqtisadiyyat Nazirliyinə və Azərbaycan Respublikasının Vergilər Nazirliyinə tapşırılsın ki, mülki prosessual qanunvericiliyi kompleks şəkildə birgə təhlil edib, bu sahədə qabaqcıl beynəlxalq təcrübə nəzərə alınmaqla onun təkmilləşdirilməsi barədə təkliflərini altı ay müddətində Azərbaycan Respublikasının Prezidentinə təqdim etsinlər.
5. Məhkəmə-Hüquq Şurasına tövsiyə edilsin ki:
5.1. hakimlərin müstəqilliyinin təmin edilməsi, məhkəmələrin fəaliyyətinə müdaxilə və digər neqativ halların aradan qaldırılması məqsədilə müvafiq məlumatların qəbulu üçün qaynar xətt yaratsın;
5.2. hakimlərin və məhkəmə sədrlərinin peşəkarlıq səviyyəsinin qiymətləndirilməsi prosedurlarında şəffaflığı daha da artırsın, bu sahədə tətbiq edilən meyarları təkmilləşdirsin;
5.3. hüquq pozuntularına və Hakimlərin Etik Davranış Kodeksinin pozulması hallarına yol verən hakimlərin intizam məsuliyyətinin labüdlüyünü təmin etsin;
5.4. ədalət mühakiməsinin həyata keçirilməsində aşkarlığın və qərəzsizliyin daha dolğun şəkildə təmin edilməsi məqsədilə aşağıdakı sahələrdə “Məhkəmələr və hakimlər haqqında” Azərbaycan Respublikası Qanununun tələblərinə məhkəmələrin riayət etməsinin mütəmadi monitorinqini aparsın:
5.4.1. məhkəmə qərarlarının elektron qaydada dərc edilməsi;
5.4.2. məhkəmələrdə işlərin təsadüfi və avtomatik şəkildə elektron qaydada bölüşdürülməsi;
5.4.3. qeyri-prosessual münasibətlərin yolverilməzliyinin təmin edilməsi.
6. Azərbaycan Respublikasının Ali Məhkəməsinə tövsiyə edilsin ki:
6.1. məhkəmələrdə hüquqi məsələlərin həllinə yanaşmanın sabitliyini təmin etmək məqsədilə vahid məhkəmə təcrübəsinin formalaşdırılması üçün ciddi tədbirlər görsün;
6.2. ədalət mühakiməsinin keyfiyyətinin artırılması məqsədilə məhkəmə təcrübəsinin öyrənilməsi və ümumiləşdirilməsi sahəsində fəaliyyətini gücləndirsin;
6.3. məhkəmə təcrübəsinin ümumiləşdirilməsi nəticəsində müəyyən edilmiş, sistemli xarakter daşıyan nöqsanların aradan qaldırılması üçün müvafiq mexanizm yaradılması barədə təkliflərini iki ay müddətində Azərbaycan Respublikasının Prezidentinə təqdim etsin.
7. Azərbaycan Respublikasının Ədliyyə Nazirliyi:
7.1. məhkəmələrin və digər orqanların qərarlarının qanunla müəyyən edilmiş müddətdə icrasının təmin edilməsi, “Elektron icra” informasiya sisteminin tətbiqinin genişləndirilməsi, icra məmurlarının süründürməçilik və sui-istifadə hallarına yol vermələrinin qarşısının alınması məqsədilə ciddi tədbirlər görsün;
7.2. məhkəmələrin və digər orqanların qərarlarının icrasının sürətləndirilməsi və effektivliyinin artırılması məqsədilə bu sahədə qanunvericiliyin təkmilləşdirilməsi ilə bağlı təkliflərini iki ay müddətində Azərbaycan Respublikasının Prezidentinə təqdim etsin;
7.3. məhkəmələrin və digər orqanların qərarlarının icrasının alternativ mexanizmləri, o cümlədən icranın özəl qurumlara həvalə edilməsi ilə bağlı qabaqcıl beynəlxalq təcrübəni öyrənsin və həmin təcrübənin Azərbaycan Respublikasında tətbiqinin mümkünlüyü barədə üç ay müddətində Azərbaycan Respublikasının Prezidentinə məlumat versin;
7.4. məhkəmə ekspertizası fəaliyyətinin alternativ mexanizmləri, o cümlədən ekspertizanın özəl qurumlar tərəfindən həyata keçirilməsi ilə bağlı beynəlxalq təcrübəni təhlil etsin və müvafiq təkliflərini üç ay müddətində Azərbaycan Respublikasının Prezidentinə təqdim etsin;
7.5. ədalət mühakiməsinin əlçatanlığını və şəffaflığını daha da artırmaq məqsədilə:
7.5.1. “Elektron məhkəmə” informasiya sisteminin tətbiqi ilə əlaqədar təşkilati işlərin yekunlaşdırılmasını təmin etsin;
7.5.2. “Elektron məhkəmə” informasiya sistemində dərc edilən məhkəmə qərarları üzrə müxtəlif meyarlar əsasında effektiv axtarış aparmaq üçün müvafiq funksional imkan yaradılması məqsədilə tədbirlər görsün;
7.5.3. fiziki və hüquqi şəxslərin “Elektron məhkəmə” informasiya sistemindən istifadəsinin təşviqi üçün tədbirlər görsün;
7.6. mediasiya prosesinin tətbiqi ilə bağlı maarifləndirmə və təşviqat tədbirlərini həyata keçirsin.
7.7. Azərbaycan Respublikası Ədliyyə Nazirliyinin Məhkəmə Ekspertizası Mərkəzinin və Ədliyyə Akademiyasının fəaliyyətinin müasirləşdirilməsi, infrastrukturunun və maddi-texniki təchizatının yaxşılaşdırılması üçün Azərbaycan Respublikasının İqtisadiyyat Nazirliyi və Azərbaycan Respublikasının Maliyyə Nazirliyi ilə birlikdə təkliflərini hazırlayıb iki ay müddətində Azərbaycan Respublikasının Prezidentinə təqdim etsin;
7.8. birinci instansiya məhkəmələrində kargüzarlığın aparılması ilə bağlı dövlət büdcəsində nəzərdə tutulmuş vəsaitin birbaşa hakimlərin bank hesablarına köçürülməsi barədə təkliflərini bir ay müddətində Azərbaycan Respublikasının Prezidentinə təqdim etsin.
8. Azərbaycan Respublikasının Baş Prokurorluğuna tövsiyə edilsin ki, məhkəmələrdə dövlət ittihamının müdafiəsi və protest verilməsi təcrübəsini mütəmadi təhlil etsin və bu fəaliyyətin keyfiyyətinin artırılması üçün tədbirlər görsün.
9. Azərbaycan Respublikasının Vəkillər Kollegiyasına tövsiyə edilsin ki, vəkillərin hakimlərlə və cinayət təqibini həyata keçirən orqanların əməkdaşları ilə qeyri-prosessual münasibətlərə yol verməsinin qarşısının alınması üçün tədbirləri gücləndirsin.
10. Azərbaycan Respublikasının Maliyyə Nazirliyi:
10.1. bu Fərmanın 3.1-ci və 3.4–3.6-cı bəndlərində nəzərdə tutulmuş layihələrin hazırlanmasında iştirak etsin;
10.2. Azərbaycan Respublikasının Ədliyyə Nazirliyi ilə birlikdə aşağıdakı məsələlər barədə təkliflərini bir ay müddətində Azərbaycan Respublikasının Prezidentinə təqdim etsin:
10.2.1. məhkəmələrdə mövcud olan iş yükünü nəzərə alaraq, onlara məhkəmə icraatının təmin edilməsi, o cümlədən kargüzarlığın aparılması üçün ayrılan vəsaitin ehtiyaclara uyğun artırılması;
10.2.2. Azərbaycan Respublikasının İqtisadiyyat Nazirliyi ilə birlikdə məhkəmə infrastrukturunun təkmilləşdirilməsi və məhkəmələrdə “Elektron məhkəmə” informasiya sisteminin tətbiqi ilə əlaqədar təşkilati işlərin yekunlaşdırılması məqsədilə əlavə maliyyə vəsaitinin ayrılması.
11. Azərbaycan Respublikasının İqtisadiyyat Nazirliyinə və Azərbaycan Respublikasının Ədliyyə Nazirliyinə tapşırılsın və Azərbaycan Respublikasının Sahibkarlar (İşəgötürənlər) Təşkilatları Milli Konfederasiyasına tövsiyə edilsin ki, sahibkarlıq fəaliyyəti ilə bağlı mübahisələrin məhkəmədənkənar həlli vasitələrinin genişləndirilməsi məqsədilə, xarici dövlətlərin qabaqcıl təcrübəsi nəzərə alınmaqla ölkəmizdə səmərəli beynəlxalq arbitraj prosedurlarının təşviqinə dair birgə təkliflərini üç ay müddətində Azərbaycan Respublikasının Prezidentinə təqdim etsinlər.
12. Məhkəmələrin fəaliyyətinin daha optimal şəkildə qurulması, ədalət mühakiməsinin keyfiyyətinin yüksəldilməsi və məhkəmələrdə işlərə baxılma müddətlərinin qısaldılması məqsədilə Azərbaycan Respublikasının məhkəmə sisteminə daxil olan məhkəmələrin hakimlərinin ümumi sayı 200 nəfər artırılsın.
13. Azərbaycan Respublikasının Nazirlər Kabineti:
13.1. dövlət hesabına həyata keçirilən hüquqi yardım üçün tələb olunan vəsaitin dəqiq proqnozlaşdırılmasını və mərkəzləşdirilmiş uçotunu təmin etmək məqsədilə cari ilin və növbəti illərin dövlət büdcəsində dövlət hesabına göstərilən hüquqi yardıma görə vəsaitin birbaşa Azərbaycan Respublikasının Vəkillər Kollegiyasına ayrılması barədə müvafiq normativ hüquqi aktların layihələrini hazırlayıb bir ay müddətində Azərbaycan Respublikasının Prezidentinə təqdim etsin;
13.2. bu Fərmandan irəli gələn digər məsələləri həll etsin.
Elxan Şahinoğlu: “Məsələnin uzanması Türkiyədə siyasi gərginliyi artıra bilər”; Əziz Əlibəyli: “Az ehtimaldır, amma nəticənin dəyişməsi fəlakətli ola bilər”
Türkiyədə martın 31-də keçirilən bələdiyyə seçkiləri bitsə də, proses yekunlaşmayıb. Hakim Ədalət və İnkişaf Partiyasının (AKP) İstanbul mahal nümayəndəliyinin etirazından sonra Türkiyənin Ali Seçki Qurumu İstanbulun 8 mahalı ilə bağlı qərarını verib.
Modern.az Türkiyə mediasına istinadən xəbər verir ki, Fateh, Beykoz, Çekmeköy, Şile, Bayrampaşa və Çatalca kimi mahallarda etibarsız səslər yenidən sayılacaq. Səslərin sayılması prosesi partiya nümayəndələrinin iştirakı ilə baş tutacaq. Seçki qurumu AKP-nin Bəyoğlu və Sancaqtəpə ilə bağlı etirazını isə rədd edib.
Qeyd edək ki, AKP İstanbulun 39 mahalında seçkinin nəticələrinə etiraz etmişdi. Hakim partiyanın bu etirazları çoxsaylı müzakirələrə səbəb olub. 8 mahalda sayılacaq səslərin nəticələri dəyişib-dəyişməyəcəyi yönündə ən müxtəlif fikirlər səslənir. Doğrudur, əksəriyyət hazırkı nəticələrə əsasən qalib olan ana müxalifətin namizədi Əkrəm İmamoğlunun üstünlüyünü qoruyacağını düşünür. Ekspertlər Türkiyə iqtidarının paytaxt Ankaranı, İzmir kimi böyür şəhərləri seçkilərdə müxalifətə uduzduqdan sonra ən strateji şəhər sayılan İstanbulu əldən verməmək üçün sona qədər cəhd göstərdiyini düşünürlər.
“Atlas” Araşdırmalar Mərkəzinin rəhbəri Elxan Şahinoğlu AKP iqtidarının məğlubiyyəti həzm edə bilmədiyini düşünür:“Türkiyə prezidenti Rəcəb Tayyib Ərdoğan Ankaranı məğlub olmağa bəlkə də hazır idi, ancaq İstanbul bələdiyyəsinin itirilməsini həzm edə bilmir. Özü də buradan siyasətə başlayıb. Ona görə də təslim olmaq istəmir. Əlbəttə, səslərin yenidən sayılması tələbi istənilən partiyanın haqqıdır. Ancaq bunu süni surətdə uzatmaq da doğru deyil. Çünki birincisi, məsələnin uzanması Türkiyədə siyasi gərginliyi artıra bilər. İkincisi, bələdiyyə ilə bağlı qeyri-müəyyənlik hakim partiyanın özünün imicinə mənfi zərbə vurur. 1994-cü ildə Ərdoğan İstanbul bələdiyyə başçısı seçiləndə normal şəkildə təhvil-təslim prosesi olmuşdu. Bu dəfə isə məğlub müqavimət göstərir və qalibin əlini sıxmaq istəmir”.
Beynəlxalq münasibətlər üzrə şərhçi Əziz Əlibəyli: “Öncəliklə onu qeyd edim ki, AKP tərəfindən İstanbulda Binəli Yıldırımın namizəd kimi göstərilməsi uzun zaman müzakirə doğurdu. Məclis spikerinin, sonuncu baş nazirin cəmi 8 ay işlədikdən sonra istefaya gedib bələdiyyə seçkisinə qatılmasını çox adam izah edə bilmədi. Yəni haradan-haraya sualı ciddi olaraq ortada fırlanmağa başladı. Əslində isə Yıldırımın İstanbuldan namizəd olması birbaşa prezident Ərdoğanın planı idi. Binəli Yıldırımın isə bununla razılaşması böyük ehtimalla onu qırmamaq istəyi ilə bağlı olub. Çünki Ərdoğan Yıldırımı bələdiyyə başqanı seçdirməklə daxili qərarnamə ilə bir müddət sonra İstanbul valiliyinin səlahiyyətlərini də ona vermək niyyətində idi. Amma göründüyü kimi, seçimlərin ilkin açıqlamasında onun rəqibi Əkrəm İmamoğlu 22 min səs artıq topladı. Hesab edirəm ki, Ərdoğan başqanlığındakı ölkə kifayət qədər yüksək demokratiya nümunəsi ortaya qoydu - baxmayaraq ki, böyük şəhərləri itirdi, amma bölgələrdə, xüsusilə də HDP-nin əlindən vacib kürd şəhərlərini ala bilməsi böyük uğur idi.
İstanbulda YSK-nın bəzi rayonlarda təkrar seçim qərarı nəticəyə təsir göstərə biləcəyi barədə xəbərlər yayılır. Amma burada bir arqument var ki, əgər səslər hesablanarkən yanlışlığa yol verilibsə, bu, təkcə AKP üçün zərərli deyil. Digər partiyaların da ümumi səsi zədə görmüş olardı. Belə olan halda indiki faizləri bütün partiyalardan silmək lazım gələcək. O durumda İmamoğlu da bildirdi ki, qələbəsini dəyişəcək faktor mövcud deyil. Əlbəttə, AK Partiya rayonlarda qalib gəlib, şəhəri uduzmaq böyük şanssızlıqdır. Nəticələr dəyişməyəcək. Amma İstanbul seçimi göstərdi ki, AKP rəhbərliyində ciddi idarəetmə problemi yaranıb. Çünki açıq etiraf edildi ki, bu seçimlərdə hakim partiyadan üç şəxs səmimi olaraq seçimlərdə iştirak etdi: Ərdoğan, Binəli Yıldırım və Süleyman Soylu. Az ehtimaldır, amma seçimin nəticəsi dəyişərsə, İstanbulda əsl fəlakət yaşana bilər. Artıq təkrar hesablamalarla bağlı ABŞ-dan etiraz bildirildi. Belə həssas bir anda nəticəni dəyişəcək istənilən sonuc Türkiyədə ciddi qarşıdurmalar yarada bilər. Əminəm ki, prezident Ərdoğan buna izin verməz. Seçkidə alınan mesajları düzgün oxuyub, zəif detalları aradan qaldıra bilər”.
Prezident İlham Əliyev Heydər Əsədovun Azərbaycan Dövlət Dəniz Akademiyasının rektoru təyin edilməsi haqqında sərəncam imzalayıb.
Sərəncamla Heydər Xanış oğlu Əsədov Azərbaycan Dövlət Dəniz Akademiyasının rektoru təyin edilib.
Qeyd edək ki, H.Əsədov 1959-cu il oktyabrın 24-də anadan olub. 1978-ci ildə Bakı Sovet Ticarəti Texnikumunun mühasibat uçotu fakültəsini, 1983-cü ildə isə D.Bünyadzadə adına Azərbaycan Xalq Təsərrüfatı İnstitutunun Uçot-iqtisad fakültəsini bitirib.
1978-1984-cü illərdə İnstitutda oxuduğu illərdə fəhlə, mühasib, böyük mühasib, böyük təftişçi vəzifələrində çalışıb. 1983-1992-ci illərdə Azərbaycan Dövlət İqtisad İnstitutunda müəllim, baş müəllim vəzifələrində işləyib, 1987-ci ildə M.V.Lomonosov adına Moskva Dövlət Universitetində namizədlik dissertasiyasını müdafiə edərək iqtisad elmləri namizədi alimlik dərəcəsini alıb.
1992-1995-ci illərdə Türkiyənin Mərmərə Universitetinin doktorantı olub.
1995-ci ildə Azərbaycan Respublikası Prezidentinin sərəncamı ilə maliyyə nazirinin müavini təyin edilib, 1996-2007-ci illərdə Maliyyə Nazirliyi yanında Baş Dövlət Xəzinədarlığının Baş direktoru, Azərbaycan Respublikası maliyyə nazirinin müavini, 2007-2013-cü illərdə isə Azərbaycan Respublikası Hesablama Palatasının sədri vəzifələrində çalışıb.
2013-ci ilin oktyabrın 22-dən 2018-ci ilin aprelin 21-dək Azərbaycan Respublikasının kənd təsərrüfatı naziri vəzifəsində işləyib.
2011-ci ildə 2-ci dərəcəli “Vətənə xidmətə görə” ordeni ilə təltif olunub. 3 monoqrafiyanın və 30-dan çox elmi əsərin müəllifidir.
Ailəlidir. Üç övladı var.
Azərbaycan ordusunun 3 il öncəki möhtəşəm blits-hərb zəfərinin ildönümü günlərini yaşayırıq. Məhz aprel şəhidlərinin qanı hesabına cəmiyyətimizdə “uğursuzluq kompleksi” aradan qalxmış oldu, millətimizin qaməti xeyli dərəcədə düzəldi, özünəinamı gücləndi, işğalçı erməni ordusunun “məğlubedilməzlik” mifi isə darmadağın edildi. Azərbaycan xalqı böyük hərb zəfərinby uzaqda olmadığnı hiss elədi və atəşkəs dönəmində ilk dəfə onun “dadını” duydu.
Dünən Azərbaycan prezidenti İlham Əliyevin rəsmi facebook səhifəsində aprel qələbəsinin ildönümü münasibətilə videoçarx paylaşılıb. Dövlət başçısı “Qəhrəmanlarımızla fəxr edirik! APREL 2016" sözlərini qeyd edib. Təbii ki, bütün xalq onlarla fəxr edir.
Yada salaq ki, “4 günlük” aprel döyüşlərində Azərbaycan ordusu şəhidlər versə də, düşmənin itkiləri bundan qat-qat çox olub (320 ölü, yüzlərlə yaralı)...
*****
Əlamətdardır ki, dünən - ildönüm günündə İlham Əliyev Müdafiə Nazirliyinin Xüsusi Təyinatlı Qüvvələrinin N saylı hərbi hissəsində olub. Hərbi geyimdə hərbçilər qarşısında çıxış edib. Bu da işğalçı tərəfə özünəməxsus mesaj sayıla bilər. Çünki aprel hərbi zəfərində mühüm rol oynamış ən elit hərbb birləşmələr kimi Xüsusi Təyinatlı Qüvvələrin hissəsinə baş çəkməklə dövlət başçısı düşmənə Azərbaycanın istənilən an aprel zəfərini qat-qat böyük miqyasda təkrarlamağa hazır olduğunun mesajını verib.
Prezident çıxışında qeyd edib ki, bu gün hər bir Azərbaycan vətəndaşı haqlı olaraq Azərbaycan ordusu ilə fəxr edə bilər, Azərbaycan ordusu dövlətimizin ərazi bütövlüyünün qorunması işində rol oynayan əsas amildir. “O ki qaldı Ermənistan-Azərbaycan Dağlıq Qarabağ münaqişəsinin həllinə, burada bizim mövqeyimizdə heç bir dəyişiklik yoxdur. Bu münaqişə yalnız ölkəmizin ərazi bütövlüyü çərçivəsində öz həllini tapmalıdır. Dağlıq Qarabağ bizim əzəli, tarixi torpağımızdır. Əsrlər boyu xalqımız bu torpaqlarda yaşayıb, qurub, yaradıb. Bu gün bütün dünya Dağlıq Qarabağı Azərbaycanın ayrılmaz hissəsi kimi tanıyır. Bütün mötəbər beynəlxalq təşkilatlar müvafiq qərar və qətnamələr qəbul etmişlər. Bu, tarixi və hüquqi əsasdır. Heç bir ölkə qondarma ”Dağlıq Qarabağ respublikası"nı tanımayıb, əminəm ki, tanımayacaq", - ölkə rəhbər vurğulayıb.
“Danışıqların davam etdirilməsinin məqsədi işğal edilmiş torpaqların azad olunmasıdır. Haqq-ədalət, tarixi həqiqət bizim tərəfimizdədir. İqtisadi güc də, hərbi güc də bizim tərəfimizdədir. Son illərdə görülmüş işlər, hərbi sahədə aparılan islahatlar, hərbi gücümüzün artırılması, həm siyasi meydanlarda, həm də döyüş meydanlarında qələbələr bizi daha da ruhlandırır, daha da gücləndirir” - prezident bildirib.
*****
Niyə də olmasın. Bu gün dünya ordularının reytinq siyahısında 52-ci yerdə qərarlaşan Azərbaycan Silahlı Qüvvələri Cənubi Qafqazın ən güclü ordusu sayılır. İşğalçı ölkə isə 96-cı yerdədir. Ermənistanın müdafiə naziri David Tonoyanın çərənləməsinə, ölkəmizi yeni ərazi işğalı ilə hədələməsinə rəğmən, aradakı fərq özlüyündə hər şeyi deyir. Azərbaycan müharibə hazırlığını bitirib.
Yeri gəlmişkən, “4 günlük” aprel müharibəsi zamanı Tonoyan müdafiə nazirinin müavini olub. Görünür, Azərbaycan əsgərinin verdiyi dərsdən yaxşı nəticə çıxarmayıb və onu daha böyük miqyasda təkrarlamaq lazım gələcək. Məlumatlara görə, Tonoyanın heç hərbi təhsili də yoxdur.
Əfsus ki, özünü dünyaya, Qərbə demokrat, sülh carçısı kim sırımağa çalışan baş nazir Nikol Paşinyan Tonoyanın Vyana görüşündən dərhal sonra verdiyi bu sərsəm bəyanatına dəstək verib. “Əgər Tonoyan başqa bəyanat versəydi, mən onu vəzifəsindən azad edərdim” deyib.
“Tonoyanın bəyanatı ətrafında yaranan ajiotaj mənasızdır. O deyib ki, əgər müharibə başlayarsa, biz qələbə qazanmağa cəhd edəcəyik. Tonoyanın bəyanatı həll prosesinə heç bir halda kölgə salmır”, - deyə o iddia edib. Paşinyan Tonoyanın onun nəzarəti altında hərəkət etdiyini də bildirib.
*****
Doğrudur, Tonoyan onun nəzarətindədir. Bəs “qərbçi” Paşinyanın özü kimin nəzarətindədir? Nədən Vyana görüşü bitər-bitməz o, Kremlə əlüstü zəng elədi? Suallara erməni siyasi şərhçinin dili ilə cavab verəcəyik.
“Bu gün Ermənistan Qərbdən əvvəlki rejimlərdəki tək uzaqdır. Üstəlik, Paşinyan öz sələfləri kimi Putinlə istənilən məsələ ilə bağlı məsləhətləşməyə tələsir. İlham Əliyevlə növbəti danışıqlar aparan Paşinyan Vyanadan qayıtmağa macal tapmamış dərhal Rusiya prezidentinə zəng vurdu ki, danışıqların gedişi və nəticələri barədə ona hesabat versin”. “Yeni Müsavat” xəbər verir ki, bu barədə Armenianreport.com saytındakı dünənki baş məqalədə deyilir.
Məqalənin davamında bildirilr: “Sual olunur: bu halda Paşinyan Kremlin oyuncaqları olmuş Serj Sərkisyan və Robert Köçəryandan nə ilə fərqlənir? Onlar da eyni cür hərəkət edirdilər. Belə çıxır, Paşinyan da Ermənistanın əvvəlki rejimlərinin başçıları tək Putinə yaltaqlanmaqdan qurtula bilməyib. Maraqlıdır ki, Əliyev belə şey eləmədi. Moskvaya zəng vurub Paşinyanla görüşün nəticələri haqda hesabat vermədi. Bizimki isə verdi”.
Müəllif bunun ardınca kinayəli şəkildə Moskvanın artıq Paşinyan sarıdan arxayın olmalı olduğunu qeyd edir: “Kreml və onun analitikləri arxayın ola bilərlər: Ermənistan Rusiyadan uzağa getməyib və belə görünür, yaxın zamanlarda heç yerə də getməyəcək. Müxalifətçi Nikol Paşinyan Ermənistanı Qərbə yaxınlaşdıracağını vəd eləmişdi. Ancaq onun timsalında bu, o demək deyil ki, baş nazir Paşinyan da eyni cür hərəkət edəcək. Odur ki, Moskvada rahat nəfəs ala bilərlər - Ermənistan KP MK-nın 1-ci katibi, yoldaş Nikol Vovayeviç Paşinyan Sov. İKP MK-nın baş katibi yoldaş Vladimir Vladimiroviç Putinin müdrik kursuna və göstərişlərinə bundan sonra da əməl etməyə hazırdır”.
*****
Paşinyanın Kremlə sədaqəti şübhə yox ki, şəxsi hisslərlə yox, ən əvvəl Qarabağ konfliktinin həllinə Rusiyanın hələ də qalmaqda olan güclü təsir imkanı ilə bağlıdır. Erməni baş nazir Kremlin susqunluğu fonunda Azərbaycanın aprel müharibəsini daha geniş miqyasda təkrarlayacağından ehtiyatlanır.
Məsələ də ondadır ki, Vyana görüşünün kövrək nəticəsini sıfırlayan Paşinyan və onun müdafiə nazirinin son davranışları, baş nazirin öz sələfləri kimi absurd və davakar ritorika sərgiləməsi sülh anlaşmasına şans qoymur.
“Qarabağ münaqişəsini müharibəsiz nizamlamaq mümkün deyil”. “Yeni Müsavat”ın məlumatına görə, bunu rusiyalı tanınmış siyasi-hərbi analitik Aleksandr Xramçixin “168 jam” nəşrinə müsahibəsində deyib.
“Vyanada hər hansı müsbət nəticə əldə eləmək üçün əsaslar yox idi. Əgər ritorika bu qədər sərtləşibsə, demək, Vyanada liderlər bircə məsələni belə razılaşdıra bilməyiblər və bu da təbiidir. Dəfələrlə dediyim kimi, bir-birinə diametral zidd mövqedə olan Azərbaycan və Ermənistan rəhbərləri nə barədə anlaşa bilərdilər ki? Qarabağ münaqişəsini müharibəsiz nizamlamaq mümkün deyil. Mən bundan necə qaçılacağını anlamıram. Sadəcə, müharibənin konkret nə vaxt olacağını söyləməkdə çətinlik çəkirəm”, - deyə o qeyd edib.
Rusiyalı analitikə görə, belə vəziyyətdə həll yalnız tərəflərdən birinin tam kapitulyasiyası nəticəsində mümkündür. “Mən bilmirəm hansı tərəf müharibəsiz kapitulyasiya etməlidir və niyə etməlidir. Kapitulyasiya daha bir müharibənin nəticəsində mümkündür” - Xramçixin əlavə edib.
O da Ermənistan olacaq. Təkcə fərqli hərbi və iqtisad göstəricilərə görə yox. Həm də o səbəbə ki, tarixdə heç bir işğalçı yiyələndiyi yad torpaqları uzun müddət əlində saxlaya bilməyib...
“Yeni Müsavat”
Yeni Azərbaycan Partiyasının icra katibinin müavini, Milli Məclisin deputatı Siyavuş Novruzov “Qafqazinfo”ya geniş müsahibə verib.
Müsahibənin birinci hissəsini təqdim edirik:
- Bu ilin əvvəlindən başlayaraq dövlət başçısı sosial sahədə bir neçə istiqamət üzrə əməkhaqlarını artırıb. Ancaq artım söhbəti eşidilən kimi ərzaq bazarında qiymətlər bahalaşmağa başladı. Vətəndaşlar da hesab edir ki, bu artımlar elə çoxalan xərclərə sərf olunur və cibdən gedir. Sizcə, bu məsələyə necə nəzarət edilməlidir?
- Məsələyə ciddi şəkildə nəzarət etmək lazımdır ki, süni artımlar ortaya çıxmasın. Bilirsiniz ki, qiyməti qaldıran dövlət yox, ayrı-ayrı ticarət müəssisələridir. Bunlar da xüsusi mülkiyyətdir. Onlar da artımları eşidən kimi daha çox qazanc əldə etməyə çalışırlar. Vətəndaşların hətta öz səhvi belə olsa dövlət yükü öz üzərinə götürür. Bundan da bəhrələnmək istəyənlər var. Pensiyaçının pensiyası artıbsa şəkərin, soğanın, qiymətinə hansısa əlavələr etmək ancaq möhtəkirlərin, süni şəkildə qiymət bahalaşdıranların fəaliyyətidir. Azərbaycanda Qida Təhlükəsizliyi Agentliyi strukturu yaradılıb. Hesab edirəm ki, bu məsələlərlə bağlı əlavə səlahiyyətlər həmin quruma verilməlidir. Həmçinin inhisarçılığa qarşı mübarizə aparan digər strukturlar da bu prosesə qoşulmalıdır.
- Soğandan bəhs etdiniz. Elə soğanın qiyməti də kəskin bahalaşıb. Bu da əhalinin əsas istifadə etdiyi kənd təsərrüfatı məhsulu olduğuna görə, bir qədər narazılıq yaradıb. Daxili bazarda soğanın qiymətini tənzimləmək mümkündürmü?
- Rayon və kənd yerlərində yaşayan insanlar bilir ki, mart ayı bir fəslin bitməsi digər fəslin başlamasıdır. Bu zaman köhnə məhsul başa çatmaq üzrədir, yenisi isə hələ yoxdur. Yəni, yeni soğan çıxana kimi proses ola bilsin ki, belə olsun. Təbii ki, burada süni şəkildə vəziyyətdən istifadə etmək də var. Daxili bazarın qorunması məsələsində fermer razı, vətəndaş isə narazı qalır. Hesab edirəm ki, bu cür məsələlərlə bağlı proqnozlaşdırma olmalıdır. Kənd Təsərrüfatı Nazirliyi ölkə üzrə hansı məhsullara təlabatın nə qədər olmasını müəyyənləşdirməlidir. Həmçinin, dövlət vətəndaşlarla müqavilə bağlamalıdır ki, əgər o, hansısa məhsulu istehsal etsə, onu kəndlidən alacaq. Təbii fəlakət baş versə qarşılıqlı anlaşma şəklində məsələnin həlli razılaşdırılmalıdır. O zaman bu məsələlər həllini tapacaq.
- Dövlətin vətəndaşların problemi ilə bağlı məsələni öz üzərinə götürdüyünü vurğuladınız. Ancaq ekspertlər hesab edir ki, dövlət büdcəsini bu qədər yükləmək olmaz. O büdcə vətəndaşların ödədiyi vergilərdən formalaşır...
- Təbii ki, bir neçə hallar var, bunlar aradan qaldırılmalıdır. Bunlardan birincisi sığorta sistemidir. Məsələn, mənim deputat seçildiyim Naxçıvan Muxtar Respublikasında bütün dəyəri olan əmlaklar sığortalanıb. Bu proses davam edir. Orada da bəzən deyinmələr olur ki, niyə sığorta haqqı ödəməliyəm?! Sonradan effektini görəndə bunu başa düşürlər. Cənab prezident də çıxışında dedi ki, sığorta sistemində yeniliklər olmalıdır. Vətəndaşlarımız da çalışmalıdır ki, bu sahədə köməklik etsinlər. Hər biri öz evini, nəqliyyat vasitəsini sığortalatdırsın. “Diqlas” ticarət mərkəzində malları yanan sahibkarların və icarədarların çıxışlarına qulaq asıram. Biri deyir ki, malının sayını bilmir. Necə sayını bilmirsən? Bir qələmin itsə göydə bilirsən ki, o itib. Bu cür yanaşma düzgün deyil. Böyük bir restoranın sahibi oradakı pomidor-xiyarın sayını əzbər bilir. Sən bilmirsən ki, satdığın mal nə qədərdir? Axı gündəlik hesabat aparırsan. Araşdırmaq üçün yarım saat vaxt lazımdır ki, səmimi şəkildə orada olan əmlakları ilə bağlı komissiyaya məlumat versinlər. Biri deyir ki, 2 milyon malım var. Sual olunur, bu qədər mal haradan gəlib? Bunun gömrüyü, vergisi var. Dövlət bu qədər addım atıb yükü öz üzərinə götürüb. Vətəndaş, sahibkar da gərək buna qarşılıqlı cavab versin.
- Sığorta şirkətlərinə “niyə ticarət müəssisələrini sığortalamırsız?” sualını verəndə deyirlər ki, onlar malların uçotunu düzgün aparmırlar. Bir çox ticarət müəssisələri heç vətəndaşlara kassa çekləri də vermirlər. Müvafiq dövlət qurumları nəzarəti gücləndirməli deyilmi?
- Mütləq. Vətəndaşlar özləri də çekləri tələb etməlidir. Azərbaycan nağdsız ödəniş sisteminə keçib. Ona görə mütləq ticarət müəssisəsi kassa aparatından istifadə etməlidir. Görürük ki, kassa aparatından istifadə olunmur. Burada vətəndaşın da məsuliyyətini düşünməliyik. O bilməlidir ki, verdiyi puldan vergi veriləcək, o da sonradan vətəndaşa qayıdır. Ona görə də biz buna göz yummamalıyıq. Bəzən görürsən ki, çekdə aldığı qiymətdən başqa qiymət yazılır. Qanunsuz halları görəndə sosial şəbəkələrdə yaza bilərlər, qurumların qaynar xəttinə də müraciət edə bilərlər. Biz bunların heç birini etmirik. Gərək birinci addımı özümüz ataq.
- Bəzən də elə olur ki, iri sahibkarlar öz məsələlərini həll etməyərək vətəndaşı incik salır. Elə bu günlərdə Şərurlu İsfəndiyar kimi tanınan tikinti maqnatının şəhid ailəsinə qarşı narazılıq yaradan müəyyən hərəkətləri oldu. Birinci vitse-prezident bu işə qarışaraq ailəni evlə təmin etdi. Amma tək onlar yox, həmçinin bu tikinti maqnatından narazı qalan başqa vətəndaşlar da var...
- Mən məsələni mətbuatdan oxudum, başa düşmədim ki, kim təqsirkardır. Bunun ən düzgün yolu məhkəmə qaydasında araşdırmadır. Hesab edirəm ki, şəhid ailəsinə hər birimiz diqqətlə yanaşmalıyıq. Hətta ödənişi həyata keçirə bilməyibsə də, şirkət imkanlıdırsa onun sosial proqramı olmalıdır. Bundan da istifadə edib dəstək göstərilməlidir. Mənə də onlarla müraciət daxil olur. Elə hallar var ki, orada vətəndaş haqlıdır. Bəzi hallarda isə vətəndaş qanunsuz halda sahibkardan mənzil tələb edir. Hələ də sosializm düşüncəsi cəmiyyətdə qalmaqdadır. Sahibkar deyəndə mütləq beyinlərdən keçir ki, bu, oğrudur, quldurdur və. s. Ancaq bu sağlam şəkildə iqtisadiyyatı bilən insandır. Bu psixologiyadan tədricən çıxmalıyıq. Məhkəmələr bunu araşdırmalıdır. Bununla bağlı islahatlar gedir. Qərar da dərhal icra olunmalıdır, mexanizm mütləq işləməlidir.
- Məhkəmələrdə hansı islahatların aparılması gözlənilir?
- Biz istəyirik məsələ qaldıraq ki, məhkəmələrdən təkrar qətnamə qaytarmaq məsələsi olmasın. Bir instansiya qərar qəbul edir, sonra Apelyasiyaya verilir, sonra Ali Məhkəməyə məsələ gedib çıxır. Ali Məhkəmə yenidən qərarı ilkin instansiyaya göndərir. İlkin stansiya səhv qərar çıxarıbsa, ilk növbədə, o cəzalandırılmalıdır. Məhkəmənin qərarı dövlətin adından çıxarılır. Deməli, ya məsuliyyətsizlik edib, ya öz sahəsini bilmir. Ya da dolayısıyla hansısa marağı olub ki, bu qərarı qəbul edib. Ona görə də kifayət qədər işlər bu günə qədər gəlib çıxır və icra etmək mexanizmi qalır. Bu da illər çəkir. Bir iş 4 dəfə geri-irəli gedib-gəlir. Nəticədə vətəndaşın əsəb sistemi pozulur. Biz bunu dərk edirik. Hesab edirik ki, məhkəmə strukturlarında yenilik olmalıdır.
- Elə onlar da siz dediyiniz ki, get- gəllərdən əsəblərinin pozulduğunu vurğulayırlar. Üstəgəl, məhkəmə həmin şəxsləri zərərçəkmiş kimi də qəbul edib, amma icra mexanizmi yoxdur. Dələduzluğa məruz qalıblar.
- Şirkət dələduzluq etməyə çalışır. Gərək vətəndaş da buna aldanmasın. Əmlak məsələləri ilə bağlı yeni sistemə keçilib. Artıq bu məsələlərin hamısı ciddi nəzarət altındadır. Vahid tikinti reyestri var və sənədlər də orada qeydiyyatdan keçib. İlkin dövrlərdə, tikinti bumu başlayanda belə hallar baş verdi. Bir mənzili bir neçə nəfərə satmaq halı oldu. İndi bu kimi hallar tamamilə aradan qalxıb.
- Dövlət rəhbəri iclasların birində təhsil sahəsində islahatların aparılacağına toxundu. Orta məktəb şagirdləri və valideynlər dərsliklərin qəliz dildə yazıldığını, 1-ci və ya 2-ci sinif uşağının onları qavramağının çətin olduğunu qeyd edirlər. Bununla bir növ təhsilsizliyə getdiyimizi vurğulayırlar...
- Ümumiyyətlə, təhsildə vahid bir sistem mövcud olmalıdır. Mən indi bu sahədə olan insanları qınamıram. Amma çoxu sovet psixologiyasından əl çəkə bilmir. Deyir ki, bir- iki dəfə müdafiə etməlidir. Elmlər namizədi olmalıdır, sonra doktor olmalıdır. Buna görə də biz 10 il “Təhsil haqqında” qanunu qəbul edə bilmədik. Hər alim özünün düşündüyünü tətbiq etmək istəyir. Bir az Avropadan, bir az Asiyadan, bir az postsovet məkanından götürməklə olmaz. Vahid bir sistem olmalıdır. Şagird də belə olanda sxemə düşə bilmir. Sovet dövründə I sinifdə oxuyanda bilirdin ki, ya 10-cu sinifdə ali məktəbə gedəcəksən, ya da 8- ci sinifdən peşə təhsilinə gedəcəksən. Amma indi 2 ildən bir qərar qəbul olunur. Tutaq ki, şagird birinci sinifdə nəzərdə tutub ki, dəqiq elmlər sahəsinə gedəcək. Dəyişiklik olanda bu da şagirdə təsir edir. Test sistemi yaxşıdır. Oxuyan gedib universitetə daxil ola bilir. Bu sahədə inkişaf var, amma müəyyən dəqiqləşdirilmələr də getməlidir.
- AMEA-nın ləğvi mümkün ola bilərmi?
- Hesab etmirəm. Çox ciddi işlər gedir. Milli Elmlər Akademiyasının strukturu iki hissədən ibarətdir. Bir sahə dövlət üçün lazım olan sahədir. Gəlir gətirməsə belə, dövlətin tapşırıqlarını yerinə yetirir. Elə sahələr də var ki, onlar dövlət büdcəsindən vəsait almaqla yanaşı, ayrı-ayrı şirkətlərlə müqavilələr bağlayıb qrantlar alırlar. Məsələn, ərəb ölkələrində akademiya yoxdur. Bu da millətin səviyyəsini müəyyənləşdirir. Bizdə hələ dövlətin nəzarəti altındadır. Ayrı-ayrı institutlar var ki, onlar özləri də qazanc əldə edir.
- Bu günlərdə 31 Mart soyqırımı qeyd olundu. Ancaq bu soyqırımları xarici auditoriyaya tanıtmaq lazımdır. Bunun üçün də ən təsirli vasitə film çəkməkdir. Amma illərdir ki, kino sahəsinə pul ayrılsa da, bunlarla bağlı fundamental film çəkilməyib. Sizcə, niyə?
- Bu fikirlə mən razıyam. Birinci ssenari olmalıdır. Çəkəndə isə onu yüksək texnologiya əsasında çəkmək lazımdır. 1905, 1918-ci ilin soyqırımları, Xocalı soyqırımı. Məsələn, Xocalı soyqırımını öz gözümüzlə görmüşük. Biz daxildə ağlaşma kampaniyası üçün yox, xaricə erməni vəhşiliyini tanıtmaq üçün film çəkməliyik. Eyni zamanda, ermənilərin havadarları da burada öz əksini tapmalıdır. Bu məsələdə maliyyə ilə yanaşı, vətənpərvərlik ruhu və vətəndaşlıq məsuliyyəti da olmalıdır. Türkiyədə tarixi sərkərdələrlə bağlı seriallar çəkirlər. Bizim də dövlət quran sərkərdələrimiz olub. Məsələn, Şah İsmayıl Xətai ilə bağlı bir dənə də filmimiz yoxdur. Ancaq baxırsan ki, hər kanalda serial gedir. Bunu orada öldürdülər, bunu burada öldürdülər. Bəs biz hara baxırıq? Bunları niyə görmürük? Bu ölənin bir yası olmalıdır da. Biz nəyi təbliğ edirik? Rusiyanın kriminal aləmindən ssenari götürüb onu Azərbaycanlaşdırırlar. Ordan bunu gətirib Azərbaycanda serial çəkməyin nə mənası var?
- Belə kinolara baxanda da gənc nəsl kriminal aləmə rəğbət bəsləməyə başlayır...
- Bilirsiniz, onlar keçmiş sistemi görməyiblər, gördükləri bunlardır. Ancaq bir nəfər binadan yıxılanda da Azərbaycanda bütün kanallar, sosial şəbəkələrdə məlumat gedir. Bəs bu qədər qırğınlar harada baş verdi? Çəkilişlər olanda bu reallığı əks etdirməlidir. Film canlı həyatın reallığıdır. Bunlardan da cəmiyyət bir tərbiyə almalıdır. Ancaq gəldim, zalda insanları güldürdüm, getdim şəklində olmamalıdır. Xarici ədəbiyyatlara müraciət olunmalıdır. Keçmiş dramaturqlarımızın əsərləri yenidən səhnəyə qoyulmalıdır.
- Qeyd etdiniz ki, ermənilərin vəhşiliyi ilə bağlı film çəkmək üçün vətənpərvərlik olmalıdır. Onda belə çıxır ki, bizim yazıçılarımızda bu hiss yoxdur? Məsələn, xalq yazıçısı Anar niyə bu təşəbbüslə çıxış etmir? Prezidentin mədəniyyət xadimləri ilə görüşündə də ictimaiyyət onları tənqid etdi ki, hərə öz problemini qaldırdı. Kimsə bu cür məsələ ilə bağlı çıxış etmədi...
- O görüş çox əhəmiyyətli bir görüş idi. Ulu öndərimiz, hazırkı dövlət başçısı İlham Əliyev və birinci xanım Mehriban Əliyeva mədəniyyət xadimləri ilə mütəmadi olaraq görüşüb. Onların həm şəxsi, həm də mədəniyyət sahəsində olan məsələləri həll edilir. Bir çox ölkələrdə yaradıcı təşkilatlar ümumiyyətlə, özəl təşkilatlardır. Azərbaycanda isə bu təşkilatlar dövlət büdcəsindən maliyyələşir. Dövlət buna da diqqət və qayğı göstərir. Bu, lazımdır. Yeni nəslin də inkişafına yol açır. 50 nəfər gənc yazıçıya əlavə təqaüd verilir. Rəssamlara, bəstəkarlara və başqalarına da dəstək göstərilir. Büdcədən ayrılan vəsaitdə, məsələn, siyasi partiyalara ayrılan vəsaitdə qeyd olunur ki, onun neçə faizi əməkhaqqı, neçə faizi isə digər sahələrə sərf olunmalıdır. Bu zaman hesabatlılıq bilinir. Həmin təşkilatlara da ayrılan vəsaitin konkret proqramı olmalıdır. Əgər vəsaitə ehtiyac varsa, dövlətə müraciət edilməlidir. Özəl sektor da buna diqqət göstərməlidir.
- Sizin otağınızdakı şkafın üstündə Quranla bağlı bir neçə kitab var. Çoxu Quranı evinin ən hündür yerinə qoyur, amma oxumur. Maraqlıdır ki, bəs siz bu kitabları oxumusunuzmu?
- Mən parlamentin dini qurumlar komitəsinin sədri olmamışdan qabaq həm din tarixi, həm də müasir dövrlə bağlı maraqlanmışam. Hansı ölkəyə gedirəmsə orada kilsəyə də, sinaqoqa da, məscidə də gedirəm. Çin-Azərbaycan dostluq qrupunun rəhbəriyəm. Orada buddanın çox böyük abidələri var. Bütün bu yerlərin hamısını gəzirəm. Biri deyir ki, mən Quranı 8 dəfə oxumuşam. Quranı istəsən 20 dəfə oxu, əgər ona qədər 50-yə yaxın kitab oxumasan, Qurandan heç nə başa düşəsi deyilsən. Quranda cümlə yoxdur, surə və ayələr var. Bu kitaba gəlib çatmaq üçün bütün dinlər, onların yaranma tarixi, müsəlman hüquq məktəbləri, ayrı-ayrı cərəyanları, qopmaları bildikdən sonra deyə bilərsən ki, tutaq ki, Nur surəsinin 31-ci ayəsində göstərilən məsələ nəyi əhatə edir. Yoxsa 10 dəfə yuxarıdan aşağıya oxusan da heç nə dərk edə bilməzsən.
- Son zamanlar siyasət cameəsində aktivlik müşahidə olunur. Müəyyən təşkilatlar yaranır. Prezidentin əfv sərəncamı ilə azadlığa çıxan Əli İnsanov hakimiyyət əleyhinə açıqlamalar verir. Bütün bunlarla bağlı nə deyə bilərsiniz?
- Birincisi, siyasət cameəsində aktivləşmə deyəndə burada sui- istifadədən söhbət gedir. Bilirsiniz ki, 2018-ci ilin prezident seçkilərindən sonra Azərbaycan xalqının yekdilliklə cənab prezidenti dəstəklədi. Seçkinin çox yüksək səviyyədə keçirilməsi, demək olar ki, bir dəfə də olsun neqativ halın baş verməməsi Qərbi və bəzi dairələri, o cümlədən Amerikanı, Azərbaycanı istəməyən qüvvələri və erməni lobbisini narahat edir. Partiyanın təbliğatında iştirak edən şəxslər seçicilərlə 1000-dən artıq görüş keçiriblər. Bu görüşlərdə toplanan bütün məlumatlar, təkliflər, şikayətlər cəmləşdirilərək cənab prezidentə təqdim olundu. Dövlət büdcəsi də təsdiq olunanda bu layihələrin əksəriyyəti onun tərkibinə daxil edildi. Yanvar ayından bu tərəfə isə dövlət büdcəsinin icrası başlanıldı. Artıq bunlar gördülər ki, nədən yapışmaq istəyirlərsə həll olunub. Bu yaxınlarda aprelin 6-da mitinq keçirmək istəyirdilər. Bundan qabaq Əli Kərimli çıxış edərək “Diqlas” da zərərçəkən sahibkarları mitinqə dəvət etdi. Deyir ki, gəlin iştirak edin, sizin haqqınız müdafiə olunacaq. Bu insanların problemlərindən sui-istifadə etmək cəhdidir. Ona görə də bunlar məsələ qaldırır ki, 19 yanvarda keçirilən mitinqdə etdikləri çıxışlara görə hökumət sosial layihələrlə bağlı qərar verdi. Əslində isə buna hazırlıq 1 il qabaqdan gedirdi. Mitinqlə heç nəyi həll etmək mümkün deyil. Bunlar 1989 və 1990-cı illərin düşüncəsində qalıblar. O cümlədən Azərbaycanda heç bir siyasi məhbus yoxdur. Ölkədə bu və ya digər şəkildə cinayət törətmiş şəxslər var. Elə adamlar var ki, bu gün Avropadadır. Onların bizdə ərizələri var. Biz indi o ərizələri açıb göstərmirik, çünki düzgün çıxmaz. Əfv müraciətlərində yazıb ki, əgər əfv olunsa, ölənə qədər prezidentə sədaqətlə xidmət edəcək. Bizdə ərizəsi var.
- Son əfv sərəncamıyla azadlığa çıxanlar arasında da beləsi var?
- Ondan qabaqkıları da var, sondakılar da. Bir çoxunda var. Amma həbsdən çıxanda hərəsi bir cür bəyanat verir. Qohumları, valideynləri cənab prezidentə onlarla müraciət ediblər ki, məhkumun səhhəti ağırlaşıb, onu əfv etsin. Yaxud tabeliyində uşaq var. Əfv Komissiyasına 1000-dən artıq müraciət daxil olmuşdu. Komissiyada bunların hər birinə baxılır. Çünki rəsmi şəkildə müraciət daxil olmadığı halda ona baxıla bilməz. Bundan əlavə, qeyri-hökumət təşkilatlarında fəaliyyət göstərən şəxslərdən də cənab prezidentə xahişlər daxil olub. Cənab prezident də bütün bunları nəzərə alaraq konstitusion hüququndan istifadə edərək bunları əfv edib. İndi çıxıb kimsə nəsə danışırsa, bu, artıq cəmiyyəti aldatmaqdır.
- YAP-ın qurucularından olan, “91”lərin nümayəndəsi Əli Nağıyevin partiyadaşları haqqında söylədiyi fikirlərə diqqət çəkmək istəyirəm. Hansı ki, YAP-çı deputatlar da bunu təhqir hesab edirlər. Sizcə, Əli Nağıyev niyə incikdir?
Ardı ikinci hissədə...
“Doktorantlara, ali təhsil, orta ixtisas və peşə təhsili müəssisələrinin, həmçinin Azərbaycan Milli Elmlər Akademiyasının magistratura səviyyəsinin tələbələrinə təqaüdlərin təyin olunması və ödənilməsi Qaydası”nda dəyişiklik edilib.
Minval.info-nun məlumatına görə, bu barədə qərarı Baş nazir Novruz Məmmədov imzalayıb.
Dəyişikliyə əsasən, ali və orta ixtisas təhsili müəssisələrində, həmçinin magistratura səviyyəsi üzrə Azərbaycan Milli Elmlər Akademiyasında akademik məzuniyyət götürən doktorant və tələbələrə cari tədris semestri müddətində təqaüd tam həcmdə ödəniləcək və həmin şəxs akademik məzuniyyətdən qayıtdıqda ona təqaüd yalnız növbəti imtahan sessiyasının nəticələrinə əsasən ümumi əsaslarla veriləcək. Peşə təhsili müəssisələrində akademik məzuniyyət götürən tələbələrə təqaüdün verilməsi onlar akademik məzuniyyətə getdiyi gündən dayandırılacaq və akademik məzuniyyətdən qayıtdıqda tələbələrə təqaüdün verilməsi davam etdiriləcək.
Qüvvədə olan qaydaya əsasən, hamiləliklə, doğuşla əlaqədar və müvəqqəti olaraq əmək qabiliyyətini itirmiş doktorant və tələbələrə səhiyyə müəssisələri tərəfindən verilmiş xəstəlik vərəqəsinə əsasən onlara müəyyən olunmuş müddətdə (cari tədris semestrinin müddətindən çox olmayaraq) təqaüd tam həcmdə ödənilib
Azərbaycan Respublikasının Prezidenti İlham Əliyev aprelin 3-də Bakı-Tbilisi-Qars dəmir yolu xəttində hərəkət edəcək sərnişin qatarı ilə tanış olub.
Bu barədə Prezidentin Mətbuat xidmətindən məlumat verilib.
Azərbaycan ordusunun zəfəri ilə yekunlaşan aprel döyüşlərinin başlanmasından üç il ötür.
2016-cı ilin mart ayının ortalarından başlayaraq Ermənistan tərəfi atəşkəsi intensiv pozmağa başlayıb. Aprelin 1-dən 2-nə keçən gecədən başlayaraq isə bütün cəbhə boyu Azərbaycan ordusunun mövqeləri və yaşayış məntəqələri düşmən tərəfindən intensiv atəşə məruz qalıb. Nəticədə ermənilər aprel ayının 2-dən 5-dək qoşunların təmas xəttində silahlı təxribatlar törədiblər. Təxribatlar zamanı dinc əhaliyə də hücumlar olub. Bu hadisələr nəticəsində Azərbaycan ordusu şəhid verib, həmçinin mülki əhali arasında da ölən və yaralananlar olub.
Döyüşlər zamanı Azərbaycan ordusu da ermənilərin mövqelərinə cavab zərbələri endirib, həyata keçirilən sürətli əks-həmlə zamanı 2000 hektardan artıq ərazi azad edilib və daha çox ərazi əməliyyat baxımından nəzarət altına keçib. Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli “Lələ təpə” adlandırılan yüksəklik də Azərbaycan ordusunun nəzarətinə keçib. Bu döyüşlər nəticəsində 320 erməni hərbçisi məhv edilib, 500-dən artığı isə yaralanıb.
Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdikləri qəhrəmanlıq və igidliyə görə Azərbaycan hərbçilərinin xüsusi fərqlənən bir qrupu 2016-cı il aprelin 19-da Azərbaycan Respublikası Prezidentinin müvafiq sərəncamları ilə yüksək fəxri ada layiq görülüb, orden və medallarla təltif olunub. Vətən qarşısındakı xidmətlərinə görə təltif edilənlər arasında “Azərbaycanın Milli Qəhrəmanı” fəxri adına, “Azərbaycan Bayrağı” və “Vətənə xidmətə görə” ordenlərinə, “Vətən uğrunda”, “İgidliyə görə” və “Hərbi xidmətlərə görə” medallarına layiq görülənlər var.
Ötən müddət ərzində işğaldan azad olunan ərazilərdə, o cümlədən aprel zəfəri ilə düşmən təhlükəsinin uzaqlaşdırıldığı Cəbrayıl rayonunun Cocuq Mərcanlı kəndində təmir bərpa işləri aparılıb, orada yeni qəsəbə salınıb, didərgin salınan insanlar geri dönüblər. Kənddə məscid tikilib, Cocuq Mərcanlı kənd məscidi dini icması fəaliyyət göstərir.
Aprel döyüşlərinin siyasi çalarları da az deyil. Bakıya təklif olunan şərtlər məhz aprel döyüşlərindən sonra yumşalmağa başladı. Bakı sübuta yetirdi ki, bölgədə sülhə təhlükə mənbəyi Ermənistandır və Bakı öz ərazilərini hərbi yolla da azad edə bilər. Əgər hansısa anda münaqişənin yenidən qızışdırılması Yerevanın marağında olacaqsa, ermənilər Qarabağda daha bir ağır məğlubiyyət yaşaya biləcəklərini unutmalı deyillər.
Burada bir məqama da diqqət yetirmək lazım gəlir. Aprel döyüşləri təmas xəttində status-kvonun dəyişməzlik mifini sındırdı. Lakin aprel olayları münaqişənin hər zaman böyük müharibəyə çevrilmə ehtimalını gücləndirdi. Digər tərəfdən, qarşı tərəf düşünürdü və təbliğ edirdi ki, istədiyi vaxt Kürə qədər irəliləyə bilər. Bu olaylar ermənilərin bu təbliğatını alt-üst elədi.
Bununla belə, toqquşmalar danışıqlar masasında rolları dəyişmədi, sülh danışıqları aprel döyüşlərindən sonra çoxsaylı və müxtəlif səviyyəli görüşlərə baxmayaraq, bir addım da irəliləməyib. Hələlik tərəfləri qane edən model tapılmayıb.
Məsələ ondadır ki, Ermənistanın yeni hakimiyyəti sadəcə olaraq çabalayır. Nə daxildə vəziyyətə nəzarət edə bilir, nə də xarici siyasət prioritetləri var. Baş nazir Nikol Paşinyanın əsas məqsədi rəqiblərini sıradan çıxarmaqdır.
Paşinyan Dağlıq Qarabağ münaqişəsi ilə bağlı da qəbulolunmaz bəyanatlar səsləndirir. Paşinyan da anlayır ki, Azərbaycan torpaqlarını əbədi olaraq işğal altında saxlanılmasının mümkün deyil. Müxtəlif bəhanələrlə danışıqlardan açıq şəkildə yayınırsa, Bakı savaş variantına üstünlük verə bilər. Ermənistan 2016-cı il aprel hadisələri zamanı Azərbaycanın hərbi baxımdan dəfələrlə güclü olduqlarını anladı. Əgər onlar bundan nəticə çıxarmasalar, nəinki aprel hadisələrinin təkrarı ola bilər, hətta bundan artığı da mümkündür. Ermənistan reallığı başa düşməlidir. Bakı istər sülh, istər hərb variantında uğur qazanacaq. Yerevan bunu anlayır və vaxt qazanmağa çalışır… (sputnik.az)
Xəbər verildiyi kimi, Müsavat Partiyası 7 aprelə, AXCP-dən ibarət olan Milli Şura isə 6 aprelə aksiya təyin edib. İlk qərar Müsavatdan gəlib və bundan dərhal sonra MŞ bir gün öncəyə mitinq qərarı verib. Bu da hər iki düşərgəni üz-üzə qoyub.
Tərəflər bir-birinin ünvanına ən ağır ittihamlar, tənqidlər, hətta təhqirlər belə səsləndirirlər. Müsavat MŞ-nı prosesləri ələ almaq üçün tələm-tələsik aksiya təyin etməkdə və mitinqlərinə kölgə salmaqda ittiham edir. Əks tərəf isə bunu təkzib edir və mitinq qərarlarının yarım ay öncədən olduğunu deyir. Təkcə sıravi üzvlər səviyyəsində qarşıdurmalar yaşanmır, artıq hər iki müxalif qurumun funksionerləri məsələ ilə bağlı sosial şəbəkələrdə statuslar paylaşırlar. Hər bir status isə qalmaqal yaradır. MŞ-nın əsas arqumenti budur ki, hökumət icazə verəndə bazar gününə deyil, şənbə günü mitinqlərinə icazə verir. Müsavat tərəfi isə bu arqumentə etiraz edir.
Fransada mühacir həyatı yaşayan AXCP-nin mətbuat xidmətinin rəhbəri Natiq Ədilovun paylaşdığı status gərginliyi daha da artırıb. O yazır: “Müsavat funksionerləri ilə mübahisə etmək fikrimiz yoxdur. Əlimizdə vacib iş var. Mitinqə hazırlaşırıq. Ancaq bu qeydləri yazıram ki, müxalifətdaxili intriqalardan bizim birtərəfli qaydada imtinamızı bəzi adamlar fürsət bilib, öz yalanları ilə adamları çaşdırmasın. Mən bu yazımda bəzi vacib bildiyim məqamlara aydınlıq gətirəcəm, ancaq digər cəbhəçi dostlardan xahiş edirəm ki, bundan sonra ünvanımıza nə yazılmasından asılı olmayaraq onlar bu mövzuda yazmasınlar.
Natiq Ədilov
1. Müsavat partiyasının Milli Şuradan çıxmaqla müxalifət birliyinə vurduğu zərbəni və s. iradlarımızı gözardı edərək, Milli Şura müxalifətin yenidən konsolidasiyasına nail olmaq niyyətilə 2018-ci ildə 3 mitinqini ard-arda Müsavatla birlikdə keçirdi.
2. 2019-cu ildə Müsavat partiyası 12 yanvar tarixinə təkbaşına mitinq təyin etdi. Və faktiki 2018-ci ildə formalaşmış formatdan çıxdı. Biz bir şey demədik. Hüquqlarıdır saydıq.
3. Milli Şura 19 yanvar mitinqini təyin etdi. Həmin mitinqə nəinki Müsavat partiyasını, digər müxalifət partiyalarını da dəvət etdi. Mitinqi hamı birlikdə keçirdi. 19 yanvar mitinqində 8 nəfər çıxışçının arasında AXCP-dən yalnız partiya sədri Əli Kərimli var idi. Başqa sözlə, mitinqin daha çox əziyyətini çəkən siyasi qüvvə əldə etdiyi tribunanı hamı ilə paylaşmışdı. Milli Şura və AXCP bu geniş formatlı birliyi davam etdirmək istəyirdi.
4. Milli Şura bir neçə dəfə mitinq təyin etdikdən sonra Müsavat başqanı Arif Hacılı AXCP sədri Əli Kərimliyə təklif edib ki, yenidən 2018-ci ildə formalaşmış və Müsavatın özünün imtina etdiyi formata qayıdılsın və mitinqlər Milli Şura və Müsavat partiyası tərəfindən birgə keçirilsin. Təklif Milli Şura və AXCP-də müzakirə olunub. Hesab olunub ki, bu ilin 19 yanvar mitinqində əldə olunmuş daha geniş müxalifət birliyi formatı daha arzuolunandır və Milli Şura 19 yanvar prosesini davam etdirsin, ən azı buna çalışsın.
5. Milli Şura da, Müsavat partiyası da ayrı – ayrılıqda mitinq müraciətlərini davam etdirib. Ancaq bu zaman fərqli taktikadan istifadə olunub. Milli Şura mitinqlərini təyin edən kimi mitinqlərin təbliğatına başlayıb ki, razılıq veriləcəyi təqdirdə mitinqlərin daha da izdihamlı olması təmin edilsin. Milli Şura həm də çalışıb ki, mitinqə razılıq verməmək üçün hökumətə heç bir bəhanə verməsin. Mitinqlər hər zaman hökumətin razılaşdığı “Məhsul” stadionuna və 6-cı günlərə təyin olunub. Müsavat partiyası isə mitinq üçün başqa meydanlar tələb edib, hazırkı mərhələdə hökumətin yürüşlərə və bazar günü mitinqlərinə razı olmadığını hamımız bildiyimiz halda məhz bazar günləri, məhz yürüş tələb olunub. Bununla da ictimaiyyətə əvvəlcədən məlum olub ki, elan olunmuş bu yürüş – mitinq faktiki keçirilməyəcək.
6. Əlbəttə, bazar günləri, üstəlik də yürüşlər keçirmək Müsavat partiyasının hüququdur. Hökumət bu hüququ təmin etməlidir. Ancaq təəssüf ki, hələlik toplumun gücü hökuməti buna məcbur edə bilmir. Odur ki, Müsavat partiyasının həftənin bazar günlərində, üstəlik, yürüşlü mitinq istəməsi yalnız o baxımdan əhəmiyyətlidir ki, ölkədə bu hüququn olmadığını sübut etsin. Yeri gəlmişkən, Milli Şura və AXCP də məhz bu hüququn olmadığını sübut etmək üçün dəfələrlə şəhərin mərkəzinə mitinq, yürüş təyin edib. Ancaq biz həmin mitinq, yürüş cəhdləri haqda baş tutmayacağını bildiyimiz üçün heç ictimaiyyətə məlumat verməmişik. Gözləmişik, hökumətin “yox” cavabından Avropa İnsan Hüquqları Məhkəməsinə şikayət etmişik və beynəlxalq təşkilatlara məlumat vermişik ki, hökumət beynəlxalq öhdəliklərini yerinə yetirmir.
7. Beləliklə, həftənin bazar günlərinə yürüş – mitinqləri təyin etmək istənilən siyasi partiyanın hüququ olsa da baş tutmayacağı əvvəlcədən məlum olan mitinq müraciətinə görə bütün həftəni məşğul etmək, başqalarının və həm də real mitinq keçirmək məqsədilə etdiyi mitinq təşəbbüslərinə qısqanclıqla yanaşmaq, üstəlik, müxalifətdaxili münasibətləri gərginləşdirmək üçün ardıcıl təşəbbüslər göstərmək yumşaq desək, heç də yaxşı hərəkətlər deyil.
8. Bəzi adamları məyus edəcəm, bizi genişmiqyaslı müxalifətdaxili mübahisələrə cəlb etmək mümkün olmayacaq. Əminik ki, hazırkı mərhələdə mitinqlərə hazırlıq gündəmin əsas məsələsi olmalıdır. Hər kəsi 6 aprel mitinqinə hazırlığa çağırıram. Unutmayaq ki, hökumət də siyasi prosesləri ciddi monitorinq edir və mitinq ovqatının aşağı düşməsini gözləyir”.
Mustafa Hacıbəyli
Statusun altında N.Ədilovla Müsavat Partiyasının mətbuat xidmətinin rəhbəri, “Bastainfo” saytının redaktoru, Müsavat başqanı Arif Hacılının qardaşı Mustafa Hacıbəyli kəskin polemikaya giriblər.
M.Hacıbəyli MŞ-nı mitinqləri toqquşdurmaqda ittiham edib. N.Ədilov isə öz növbəsində Müsavatın mitinqlə bağlı təbliğatdan daha çox əks-təbliğata üstünlük verdiyini qeyd edib. Müsavat funksioneri MŞ-nın əks-təbliğat apardığını bildirib.
Statusun altında virtual savaşa AXCP Nizami rayon şöbəsinin sədri Paşa Umudov və Müsavat Partiyası Səbayel rayon şöbəsinin sədri Zakir İsmayıl da qoşulub.
P.Umudov Müsavat funksionerinin qaşınmayan yerdən qan çıxardığını bildirərək, əslində mitinqlə bağlı rəqiblərini qabaqlamaq ənənəsini Müsavatın gətirdiyini söyləyib. Z.İsmayıl rəyə cavabında şöbə sədrini yalan danışmaqda suçlayıb. P.Umudov onu təhqir etdiyi üçün Z.İsmayılı mədəniyyətsiz adlandırıb. Bundan sonra tərəflər bir-birilərini tənqid, təhqir etməyə davam ediblər.
Müsavat Partiyası Salyan rayon şöbəsinin sədri Nizami Osmanuşağının MŞ-nın mitinq qərarı ilə bağlı statusu belədir: “Vallah, ayıbdır. Heç olmasa adınızdan, elmi dərəcənizdən, keçmiş mübarizənizdən utanın. Görünən odur ki, bunlarla iqtidar arasında heç bir fərq yoxdur. Xalq birlik tələb edir, bunlar birliyə badalaq atır. Nüfuz qazanmaqdısa, bu olanı da itirmək deməkdir. Ana müxalifət söhbətidirsə, saxta seçki olan yerdə müxalifət söhbəti ola bilməz. Əvvəl demokratik seçki keçirilməsinə nail olacağıq, biləyin ki, kim iqtidardır, kim ana müxalifət.
Maraqlı olan odur ki, sıravi cəbhəçilər bu badalağa necə baxırlar? Hələ də fəxr edirlər ki..?”.
Müsavat Partiyasının başqan müavini Fərəc Kərimlinin atası Raqif Kərimlinin statusu isə daha sərtdir: “Gecə hakimiyyətlə bir yorğanın altında yatıb, gündüz müxalifət olmaq belə olur . Hələ “bir gecələr yat, a Qurban” da deyirik”.
Həm Müsavatın Divan, həm də Milli Şuranın üzvü olan Tofiq Yaqublu 6-7 aprel mitinqləri ilə bağlı paylaşdığı geniş statusda MŞ-nın qərarının əvvəldən olduğunu söyləyib. Bu da müsavatçıların ciddi etirazlarına səbəb olub. Hətta T.Yaqublunun qarşısına ya Müsavatı, ya da MŞ-nı seçməsi ilə bağlı tələb qoyulub. Divan üzvünün statusunun altında da müsavatçılarla cəbhəçilər bir-birini “qırırlar”.
AXCP Suraxanı rayon şöbəsinin sədri Bəhruz Həsənli bu rəyi yazıb: “Xalqımız Milli Şuradan kənarda təyin olunan mitinqlərə ciddi dəstək verməyəcək! Yol birgə mübarizədən keçir”.
B.Həsənliyə Z.İsmayılın cavabı: “Doğurdanmı?
Bu cür ciliz təfəkkür sizdə haradandır?
Eyforiyaya bu dərəcədə qapılmayın.
19 yanvar mitinqi isə bizim birgə mitinqimiz olub.
Təbii ki təşkilatçilarin əməyi daha çox olmali idi”.
Müsavat Partiyasının Məclis üzvü Valeh Hümmətoğlu statusun altından bunu yazıb: “Tofiq bəy bir onu demədi ki, MŞ bu gün cəmiyyətə hava və su kimi lazım olan və hakimiyyəti narahat edən müxalifətin birliyinə zərbə vurur və birgə mitinqlərdən imtina edir. 1998-ci və 2003-ci ilin taktikası”.
Rəylər bununla bitmir. 300-ə yaxın gələn şərhlərdə iki cəbhə açılıb. AXCP Gənclər Komitəsinin üzvü Elturan Rüstəmli (hazırda Polşada yaşayır), Müsavat Partiyasının üzvü Sərdar Ağayev (hazırda İsveçdə yaşayır), Müsavat Partiyası Masallı rayon təşkilatının üzvü Yasər Səfəroğlu və digər müsavatçılar və cəbhəçilər ən ağır formada bir-birilərini təhqir, tənqid ediblər. Əsas suallar isə heç şübhəsiz ki, statusun müəllifi Tofiq Yaqubluya ünvanlanıb.
Cavanşir ABBASLI
“Yeni Müsavat”
Prezident, Ali Baş Komandan İlham Əliyev Müdafiə Nazirliyinin Xüsusi Təyinatlı Qüvvələrinin N saylı hərbi hissəsində olub.
Bu barədə AZƏRTAC məlumat yayıb.