 |
 |
Azərbaycan dövlətinin son dövrlərdəki hərbi ritorikası Ermənistanda əməlli-başlı qorxuya səbəb olub.
Bir müddət əvvəl müharibə bəyanatları ilə çıxış edən Tonoyan artıq sülhdən danışır. Belə ki, Ermənistanın müdafiə naziri David Tonoyan jurnalistlərlə söhbət zamanı Azərbaycan hökumətinin hərbi bəyanatlarına münasibət bildirib:
“Biz müharibə istəmirik. Azərbaycanın hərbi-siyasi elitası isə öz ordusunu sülhə hazırlasın”.
Azərbaycan Prezidenti İlham Əliyev Ağstafa Rayon İcra Hakimiyyəti başçısının təyin edilməsi barədə sərəncam imzalayıb.
Sərəncama əsasən, Nizaməddin Məhəmməd oğlu Quliyev Ağstafa Rayon İcra Hakimiyyətinin başçısı təyin edilib.
Dövlət başçısının digər sərəncamı ilə Məhərrəm Böyükağa oğlu Quliyev Ağstafa Rayon İcra Hakimiyyətinin başçısı vəzifəsindən azad edilib.
Bundan başqa, Prezident İlham Əliyevin sərəncamı ilə Nizaməddin Məhəmməd oğlu Quliyev Goranboy Rayon İcra Hakimiyyətinin başçısı vəzifəsindən azad edilib.
Məhərrəm Quliyev Goranboy Rayon İcra Hakimiyyətinin başçısı təyin edilib.
Dövlət başçısı Novruz Nəcəf oğlu Novruzovu Şabran Rayon İcra Hakimiyyətinin başçısı vəzifəsindən azad edib. Digər sərəncamla Asif Həbib oğlu Hüseynov Şabran Rayon İcra Hakimiyyətinin başçısı təyin edilib.
Prezident İlham Əliyev Asif Həbib oğlu Hüseynovu Siyəzən Rayon İcra Hakimiyyətinin başçısı vəzifəsindən azad edib.
Digər sərəncamla Novruz Nəcəf oğlu Novruzov Siyəzən Rayon İcra Hakimiyyətinin başçısı təyin edilib.
Daxili işlər orqanlarında yeni təyinatlar olub.
Bu barədə daxili işlər naziri, general-polkovnik Ramil Usubov müvafiq əmr imzalayıb. Əmrə əsasən, Bərdə rayon Polis Şöbəsinin rəisi İlqar Məmmədov tutduğu vəzifədən azad edilərək Bakının Xətai rayon Polis İdarəsinin rəisi vəzifəsinə təyin edilib.
Nazirin digər əmri ilə bir müddət əvvəl tutduğu vəzifədən azad edilən Xətai rayon Polis İdarəsinin rəisi Muradəli Babayev isə Bərdə rayon Polis Şöbəsinin rəisi vəzifəsinə təyinat alıb.
Bundan başqa, Sumqayıt şəhər Polis İdarəsinin pasport-qeydiyyat şöbəsinin rəisi Mehman Novruzov tutduğu azad edilərək Sumqayıt ŞPİ-nin 4-cü Polis Bölməsinin rəisi vəzifəsinə təyin edilib.
General-leytenant Rövşən Əkbərov: “Ordudan xəbəri olmayanlar, xəbəri olub qara yaxanlar, böhtan atanlar xalqın düşmənidir”
Azərbaycan ordusunun Birlik komandiri, Milli Qəhrəman, general-leytenant Rövşən Əkbərov ordu.az-a müsahibə verib. R.Əkbərov bildirib ki, bu günlərdə başa çatan geniş miqyaslı təlimlər də bir daha sübut etdi ki, Azərbaycan ordusu dinamik inkişaf edir. Təlimlərdə biz şəxsi heyətin döyüş hazırlığının yüksəldilməsi, onun bilik və bacarıqlarının təkmilləşdirilməsi ilə yanaşı, eyni zamanda müxtəlif qoşun növlərinin qarşılıqlı fəaliyyətinin formalaşdırılmasına nail oluruq. Hər təlimin öz təyinatı var:
“Ali Baş Komandanın göstərişi, müdafiə nazirinin rəhbərliyi ilə keçirilən budəfəki təlimlər də şəxsi heyətin döyüş və mənəvi-psixoloji hazırlığının yüksəlməsində əhəmiyyətli rol oynayıb. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev ordu quruculuğu məsələsini daim diqqətdə saxlayır, ona daim və hərtərəfli qayğı göstərir”.
Birlik komandiri deyib ki, ordumuzun əldə etdiyi nailiyyətlərə qara yaxanlar fərdlərdir. Onlar həm də el arasında deyildiyi kimi, “kiçik budaqların üstündə oturub böyük budaqları silkələmək istəyən” fərdlərdir. İstər respublikamızda yaşasınlar, istərsə də xaricdə. Ordudan xəbəri olmayanlar, xəbəri olub qara yaxanlar, böhtan atanlar xalqın düşmənidir: “Uzaqdan-uzağa ordumuz haqqında danışanlar, orduda nöqsan axtaranlar bilsinlər ki, bu, vicdana sığan hərəkət deyil. Bu, heç bir əsl azərbaycanlıya yaraşan hərəkət deyil. Bəzi saytlar belə fərdlərin qərəzli informasiyalarına yer verməklə öz nüfuzunu da nəzərəçarpacaq dərəcədə azaldır. Belə qərəzli fikirlər Azərbaycan ordusunun nüfuzuna təsir göstərə bilməz”.
General ordumuzun silah, texnika arsenalı barədə də müəyyən məlumatlar verib, eyni zamanda qeyd edib ki, elə fərdlər var bircə gün belə olsa orduda xidmət etməyib, əlinə silah almayıb. Belələrinin ordu haqqında fikir söyləməyə haqqı çatmır. R.Əkbərov qeyd edib ki, ordumuzun arsenalına müasir döyüş texnikalarının böyük əksəriyyəti-Belarusun istehsalı olan yüksək manevr və atəş gücünə malik 301 mm-lik əməliyyat-taktiki raket “Polonez B-300″, İsrailin istehsalı olan 624 mm-lik əməliyyat-taktiki raket LORA, 306 mm-lik taktiki raket EKSTRA, texnika üzərində tank əleyhinə idarəolunan raket kompleksi ”Spike-ER” və daşınan tank əleyhinə idarə olunan raket kompleksi “Spike-LR”, Türkiyənin istehsalı olan 300 mm-lik taktiki raket TR-300 E “Qasırğa”, Rusiyanın istehsalı olan 300 mm-lik 9A52-2 “Smerç” (YARS), ağır odsaçan sistem TOS-1A, 203 mm-lik 2S7 “Pion-M” və 152 mm-lik 2S19 “Msta-S” özüyeriyən artilleriya qurğuları, tank əleyhinə kompleks 9K123 “Xrizantema-S”, Çexiyanın istehsalı olan 122 mm-lik yaylım atəşli reaktiv sistem-YARS RM 70 və 152 mm-lik özüyeriyən artilleriya qurğusu DANA daxil edilib. Bundan əlavə, Azərbaycan ordusunun arsenalında olan T-90S tankı, ZTR-82A, 152 mm-lik “Msta-S” özüyeriyən artilleriya qurğusu, 220 mm-lik TOS-1A “Solntsepyok” ağır odsaçan sistemi və s. son illərdə tədarük edilib: “Aldığımız müasir artilleriya sistemlərinin proqram təminatı İsrailin mütəxəssisləri tərəfindən yenilənərək ən yeni sistemlərlə təchiz edilib. Bu da öz növbəsində düşmənin REM vasitələrinin təsirini məhdudlaşdırır və asanlıqla onun üzərində atəş üstünlüyə nail olunur. Həmçinin bu döyüş texnikaları mütəmadi keçirilən irimiqyaslı təlimlərdə tətbiq edilir. Bu və ya digər texnikanın ”köhnə” olduğunu iddia edən həmin fərd texnikanın adını niyə demir?! Xalqını, dövlətini sevməyənlər olmayanları var kimi təqdim etməyi bacara bilməz. Qoy o fərdlər unutmasınlar ki, yalançı vətənpərvərliyin sonu yoxdur. Sözü ilə əməli düz gəlməyənlər gec-tez ifşa olunur. Elələri də var ki, bircə gün belə olsa orduda xidmət etməyib, əlinə silah almayıb. Belələrinin ordu haqqında fikir söyləməyə haqqı çatırmı?! Ordu quruculuğu haqqında səmərəli fikri varsa, buyursun desin”.
R.Əkbərov 2016-cı ilin aprel döyüşlərini tarixi qələbə adlandırıb və bildirib ki, Azərbaycan ordusu bununla torpaqlarımızı işğaldan azad etməyə qadir olduğunu dünyaya nümayiş etdirib.
Azərbaycanlı Famil Sadıqov Rusiyanın “Qazprom” şirkətinin İdarə Heyətinin sədr müavini təyin olunub.
“Qafqazinfo” “TASS”a istinadən xəbər verir ki, o, maliyyə-iqtisadi blokuna rəhbərlik edəcək. Ona qədər bu vəzifəni Andrey Kruqlov icra edib.
Sadıqov 2009-2019-cu illərdə “Qazprombank”ın İdarə Heyətinin sədrinin müavini, bundan əvvəl isə Federal Xəzinədarlığın rəhbər müavini, Rusiya vergilər və rüsumlar nazirinin müavini olub.
Qeyd edək ki, F.Sadıqov 1968-ci ildə Naxçıvanda anadan olub.
Baş Dövlət Yol Polisi İdarəsinin (BDYPİ) Yol Patrul Xidməti (YPX) şöbə rəisi, polis polkovniki Kamran Əliyev “Avtostop” verilişinin aparıcısı Tural Yusifovun Oxu.Az saytında dərc olunmuş “Niyə yollarda qırılırıq?” başlıqlı müəllif yazısına cavab verib.
K.Əliyev saytımıza göndərdiyi açıqlamada onun fikirlərindən bəziləri ilə həmrəy olduğunu dilə gətirib, bəzilərinin isə düzgün müqayisə olunmadığını hesab edir.
“Yol qəzaları ilə bağlı dünyanın ən təhlükəsiz ölkəsi hesab edilən İsveçin müsbət nailiyyətlər əldə etməsinin əsas səbəblərindən biri ölkə vətəndaşlarının qanunların tələblərinə ciddi riayət etmələri, yol qaydalarına hörmətlə yanaşmalarıdır”, – deyə vurğulayan rəis nümunə gətirib:
“Məsələn, həmin ölkədə yaş kateqoriyasından asılı olmayaraq, bir nəfər də olsun piyadanı müəyyən olunmayan yerdən keçən görə bilməzsiniz. Bunun nəticəsidir ki, həmin ölkədə piyada vurulması halları, demək olar ki, sıfıra bərabərdir.
Bizdə isə qəzaların respublika üzrə 52 faizini, paytaxt Bakıda isə hətta 67 faizini piyadaların vurulması təşkil edir. Yəni bizim piyadalarımız da yollarda həmin dövlətin vətəndaşları kimi davransalar, bizdə də hər 100 min nəfərə düşən ölü sayı 7,8 deyil, 4,2 ola bilər ki, bu da yol təhlükəsizliyi baxımından dünyada kifayət qədər yüksək göstərici hesab edilir”.
Polkovnik qeyd edib ki, bu səbəbdən qəzaların baş verməsində yalnız sürücüləri qayda pozmaqda, əzbərçilikdə, məsuliyyətsizlikdə təqsirləndirmək ədalətsiz yanaşmadır.
“O ki qaldı sürücülüyə namizədlərdən təcrübi imtahanların qəbuluna, artıq altı ilə yaxındır ki, nəqliyyat vasitələrini idarəetmə vərdişləri üzrə təcrübi imtahan təkcə qapalı meydançalarda deyil, ikimərhələli prinsiplə – birinci mərhələdə xüsusi bağlı meydançada və ya avtodromda, ikinci mərhələ isə sınaq marşrutlarında qəbul edilir.
Nəzəri imtahanlardakı sualların sayının artırılması, namizədin psixoloji durumunun yoxlanılması məsələlərinə gəlincə, bu sahədə beynəlxalq təcrübə nəzərə alınmaqla, mexaniki nəqliyyat vasitələri sürücülərinin hazırlanması və ixtisasının artırılması üçün təlim-tədris prosesinin təkmilləşdirilməsi, habelə yol hərəkətinin təhlükəsizlik səviyyəsinin yüksəldilməsi, ekoloji vəziyyətin yaxşılaşdırılması, texniki-təhlükəsizlik baxımından və ekoloji cəhətdən yararsız nəqliyyat vasitələrinin dövriyyədən çıxarılmasını təmin etmək üçün nəqliyyat vasitələrinin utilizasiya proqramının hazırlanaraq tətbiq edilməsi və digər məsələlər ötən ilin sonunda qəbul edilmiş “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nda öz əksini tapıb və icrası ilə bağlı hazırda iş gedir.
Odur ki, yol hərəkətinin təhlükəsizliyi üzrə qanunvericiliklə bağlı vaxtaşırı fikirlər paylaşan hörmətli hüquqşünaslarımız, ekspertləriniz, mütəxəssislərimiz elə hesab etməsinlər ki, bu sahəyə cavabdeh olan dövlət qurumları zamanın tələbi ilə dəyişikliklərə zərurət olan halları görmür və ya həlli istiqamətində fəaliyyət göstərmirlər.
Sadəcə, biz qanunvericilik aktları ilə bağlı hər hansı təkliflərimiz haqqında deyil, qanuni qüvvəyə minmiş dəyişikliklər haqqında ictimaiyyətə məlumat verir, izahat işləri aparır və icrasını təmin edirik”, – deyə Kamran Əliyev vurğulayıb.
“Azərbaycanın müstəqilliyini istəməyən qüvvələr fəallaşıb”
Bu günlərdə Azərbaycan parlamentinin üç deputatı “hökumətin həyata keçirdiyi siyasi islahatlara dəstəyi” təmin etmək üçün Vaşinqtona səfər ediblər.
Milli Məclisin üzvləri Səməd Seyidov, Sahibə Qafarova və Asim Mollazadə ABŞ paytaxtında bir həftə ərzində Konqresin bir sıra mühafizəkar üzvləri ilə görüşüblər. Həmçinin İsrailin ictimaiyyətlə əlaqələr üzrə Amerika Komitəsinin-nüfuzlu yəhudi lobbi qruplaşmasının (AİPAC) təşkil etdiyi illik siyasi konfransda iştirak ediblər. Deputatların səsləndirdiyi fikirlər kifayət qədər maraq doğurub.
Demokratik İslahatlar Partiyasının (DİP) sədri, deputat Mollazadə “Yeni Müsavat”a müsahibəsində səfərlə bağlı ətraflı danışdı, maraqlı fikirlər söylədi.
– Asim bəy, ABŞ səfəriniz zamanı səsləndirdiyiniz fikirlər kifayət qədər rezonans doğurdu…
– Mən orada yeni bir söz deməmişdim.
– Amma geniş müzakirə olundu. Sizcə, niyə?
– Mən həm Azərbaycan haqqında, həm də keçmiş sovet sisteminin dəyişdirilməsi və perspektivlər barədə danışdım. Bunlar da hər zaman dediyim sözlərdir. Orada yeni bir şey yoxdur. Mən bunları ABŞ-da birinci dəfə demirdim. Sadəcə olaraq, mövqeyim Azərbaycan iqtidarının fikirləri ilə üst-üstə düşür, onlar da artıq anlayıblar ki, bu yolla getmək lazımdır.
– Maraqlıdır, siz orada müxalifəti təmsil edirdiniz, yoxsa hakimiyyəti?
– Yox. Mən müxalifət və Azərbaycan mövqeyindən danışırdım. Mənə elə gəlir ki, iqtidar-müxalifət olmasından asılı olmayaraq, ən əsas məsələ müstəqillik, ərazi bütövlüyü və inkişaf yoludur. Mənə elə gəlir ki, bu, ümumiyyətlə, siyasi mövqe deyil, ilk növbədə vətəndaş mövqeyidir.
– ABŞ-a səfər etməkdə əsas məqsədiniz nədən ibarət idi?
– Azərbaycan-ABŞ münasibətlərinin inkişafı, Azərbaycan parlamentinin Amerika ilə dostluq qrupu və ABŞ Konqresində olan Azərbaycanla dostluq qrupu arasındakı münasibətlərin inkişafı, əməkdaşlıq perspektivləri idi. Azərbaycan ABŞ-la tərəfdaşlıq siyasəti aparır və bizim bir sıra istiqamətlərdə fikirlərimiz üst-üstə düşür. Bilirsiniz ki, erməni lobbi qrupları və Ermənistanın arxasında duran qüvvələr Azərbaycana qarşı ABŞ-da, dünyada informasiya müharibəsi aparır. Ona görə də ABŞ-la ABŞ Konqresi ilə münasibətlərin gücləndirilməsinə yönəlmiş bir səfər idi.
– Görüşlər əsasən harada keçirildi?
– Həm ABŞ Konqresində, həm Senatda, həm Təmsilçilər Palatasının nümayəndələri ilə çoxsaylı görüşlərimiz keçirildi. Bu görüşlərdə ikitərəfli münasibətlər, ortaq maraqlar və ortaq dəyələrdən danışıldı. Həmçinin Azərbaycan barədə məlumatlar verdik. Əslində Azərbaycan öz dəyərləri ilə dünya üçün çox önəmli bir ölkədir. Biz bir daha ABŞ-da bunu xatırlatdıq.
– Bəs Azərbaycana qarşı vaxtilə qəbul olunmuş və hələ də ləğv olunmamış “907-ci düzəliş”i necə, amerikanlara xatırlatdınızmı?
– Təbii ki, “907″-ni xatırlatdıq. Həm də orada Azərbaycana qarşı çox ciddi qüvvələr var və çox ciddi mübarizə gedir. Əslinə qalsa, Azərbaycan çox fəal olmalıdır. Bizim güclü diasporumuz yoxdur. Həmçinin bizimçün işləyən güclü lobbi qruplar olmadığına görə biz məhz parlament diplomatiyasını gücləndirməyi çox önəmli hesab edirik. Rəsmi diplomatiya ilə yanaşı, parlament diplomatiyasının bu müharibədə böyük rolu var.
– Sizin görüşlərin birində “islahatları aparmaq üçün islahatçılar lazımdır” deməyiniz də marağa səbəb olub.
– Mən gənc nəslin savadlı, peşəkar olmasının, Azərbaycanın təhsil sistemində sürətli islahatlar həyata keçirərək dünyada mövcud olan güclü təhsil sisteminə inteqrasiya etməsinin tərəfdarıyam. Burada da ABŞ-la əməkdaşlığın çox böyük rolu var. Azərbaycanın gələcəyi məhz savadlı, peşəkarın gücü ilə bağlıdır. Yeni siyasi, ictimai menecerlər, biznes menecerləri gələcək, müasir Azərbaycanın ən əsas islahatlarını həyata keçirən qüvvəsi olacaq.
– Bunu həm də hakimiyyətə yönəlik mesaj kimi də qəbul etmək olarmı?
– Mən bu fikirləri Bakıda da, Amerikada da, Avropada da hər zaman deyirəm. Söhbət islahatların zəruriliyindən gedir və Azərbaycan gəncliyinin inkişafı ilə bağlıdır. İlk növbədə də bu inkişafı mən təhsil və mədəniyyət sahəsinin güclənməsində görürəm.
– Asim bəy, Azərbaycanda son zamanlar islahatlarla bağlı atılan addımları ABŞ-da necə qarşılayırlar?
– Müsbət qarşılayırlar. Ən azı dostlarımız çox gözəl anlayırlar ki, Azərbaycan Amerikanın strateji maraqları üçün də çox önəmli ölkədir və Azərbaycanla əməkdaşlığın zərurəti barəsində olan fikirləri həm icra strukturlarında, həm Konqresdə, həm Senatda müdafiə edəcəklər.
– Vaxtaşırı ABŞ-ın Azərbaycanla bağlı planlarının olmasından danışılıb, yazılıb. Bir neçə il əvvəl demişdiniz ki, Ağ Evin Azərbaycan hakimiyyətini dəyişmək planı yoxdur. Budəfəki səfərdə hansı qənaətə gəldiniz, Azərbaycan hakimiyyətinə münasibət necədir?
– ABŞ çox gözəl anlayır ki, hər bir xalq öz yolunu, öz rəhbərliyini seçməlidir. Sadəcə olaraq, demokratiyanın, fikir azadlığının inkişafı üçün dəstək verə bilər. Mən hər zaman bunu demişəm, ABŞ-da da təkrar etməkdən çəkinməmişəm ki, nə demokratiyanın, nə də Trotskinin inqilabının ixracı heç vaxt nəticə vermir. Demokratiyanı ixrac etmək olmaz. Hər bir xalq demokratiyanı öz gücünə, öz dəyərlərinə arxalanaraq, özü inkişaf etdirir. Azərbaycan isə tarixən Türk və İslam dünyasının lideri olub. Birinci dünyəvi dövlət qurub. Hətta ABŞ-dan qabaq qadınlara seçib-seçilmək hüququ verib. Azərbaycan xalqının çox böyük bir potensialı var ki, liderliyini inkişaf etdirsin və bu liderliyini digər ölkələrə də nümayiş etdirsin.
– Oxuduq ki, bu proseslərdə ABŞ və Avropadan dəstək istəmisiniz. Elədirmi?
– Bəli. Dəstəyə də böyük ehtiyac var. Çünki Azərbaycanın müstəqilliyini istəməyən qüvvələr fəallaşıb. Azərbaycanın müasir dövlət kimi inkişafından qorxan dairələr bu yolda Azərbaycanın qarşısını almağa çalışırlar. Ona görə də Azərbaycana dəstək verilməsinə ehtiyac var.
– Sovetizmdən imtina çağırışınızın səbəbi nə idi? Bu ismarış Azərbaycan daxilindəki sovetpərəstlərə, Rusiyaya meyllənənlərə yönəlmişdi?
– İlk növbədə Azərbaycanda köhnə idarəçiliyi həyata keçirən qüvvələrə yönəlik fikir idi. Təbii ki, Azərbaycanın daxilində, yerindən, iqtidar, ya müxalifətdə olmasından, imkanlarından asılı olmayaraq, hər kəsə aid idi. Amma mən təbii ki, ilk növbədə köhnə idarəetmə üsulları həyata keçirən məmurları nəzərdə tuturam. Çünki məmur özbaşınalığı Azərbaycan dövlətini zəiflədir. Məmurlar məhz xalqa yaxın olmalıdırlar və xalqa xidmət eləməlidirlər. Bu fikriləri mən hər zaman ifadə edirəm, yerindən, vaxtından asılı olmayaraq.
– Bakı ilə Avropa İttifaqı arasında əməkdaşlığın inkişaf etməsi şəraitində Rusiyanın Azərbaycana hər hansı təhlükəsi barədə ABŞ-da narahatlıq varmı?
– Əslində hər zaman belə bir təhlükələr var, həm Rusiyadan, həm Rusiya ilə birgə olan qüvvələrdən. Yəni bu təhlükə ilk növbədə bizim müstəqilliyimizə yönəlik təhlükədir. Azərbaycanın müstəqilliyi ölkəmizin və xalqımızın gələcək qarantiyasıdır. Müstəqillik Azərbaycan xalqının əldə etdiyi ən böyük dəyər və nemətdir. Məncə, bu müstəqilliyi qorumaq üçün də beynəlxalq əməkdaşlığı daha da gücləndirməliyik.
– ABŞ-dan bununla bağlı istək varmı?
– Əlbəttə. Mən xatırlatmaq istəyirəm ki, Cənubi Qafqaz ölkələrinin müstəqilliyi, ərazi bütövlüyü ilə bağlı dəstəyə həmişə böyük ehtiyac olub.
– Azərbaycan ərazilərinin işğaldan azad olunması ilə bağlı ABŞ-ın istəyini necə, müşahidə etdinizmi?
– Təbii ki, belə bir istək var. Amma biz unutmamalıyıq ki, Amerika, Avropa, Fransa, yaxud Rusiyada çox güclü və ciddi erməni diasporu, erməni lobbi qrupları var, onlar Azərbaycanla müharibə aparırlar. ABŞ-da onların çox böyük nüfuzu və imkanları var. Onunçün də mən təkrarən bunu vurğulayıram ki, cəbhə xətti tək səngərdən keçmir. Azərbaycana qarşı olan müharibə məhz informasiya müharibəsi, siyasi müharibədir. Bir sıra dövlətlərdə biz bu müharibə ilə bağlı səfərbər olunmalıyıq və mövqeyimizi gücləndirməliyik.
“Aprel döyüşləri ermənilərlə tarixi qarşıdurmanın bir hissəsidir. Erməni xalqı yüz illərlə digər imperiyaların əlində alət olaraq türk millətinə və müsəlmanlara qarşı soyqırımlar törədib. Biz bu tarixdən nəticə çıxarmalı, onu unutmamalı və xalqımızı, millətimizi, Vətənimizi və ana-bacılarımızı müdafiə etməliyik”.
Bunu Azərbaycanın müdafiə naziri, general-polkovnik Zakir Həsənov AzTV-yə müsahibəsində deyib.
Nazir bildirib ki, Azərbaycan dövləti gücləndikcə bəzi qüvvələr ermənilərdən ölkəmizə və millətimizə qarşı istifadə etməyə başlayırlar: “1918-ci ildə ermənilərə Azərbaycan torpaqları üzərində dövlət qurmaları üçün imkan yaradıldı. Buna baxmayaraq, onlar öz dövlətini qurduqdan sonra Azərbaycana, xalqımıza və türk millətinə qarşı cinayətər törətdilər. Ona görə də biz bu tarixi hadisələrdən nəticə çıxarmalıyıq. Ermənilər hər zaman Azərbaycan dövlətçiliyinə qarşı düşmən mövqedə durublar və duracaqlar. Buna görə də biz həmrəy olmalı və xalqımızı müdafiə etməliyik. Azərbaycan höküməti dövlətin gücləndirilməsi üçün planlı şəkildə ciddi işlər həyata keçirir. Daxili və xarici, eləcə də ordu quruculuğu istiqamətində ciddi işlər görülür. Azərbaycan gücləndikcə ermənilər daha da fəallaşmağa başlayırlar. Onlardan istifadə edirlər. Ermənilər bədbəxt millətdirlər. Onlar böyük dövlətlərin əlində alətə çevriliblər”.
Müdafiə naziri vurğulayıb ki, aprel döyüşlərindən öncə Müdafiə Nazirliyinin zabitləri təxribatların qarşısının alınması üçün planlar hazırlayıb: “Azərbaycan gündən-günə güclənir. İlk olaraq ölkənin iqtisadiyyatı, daha sonra isə ordusu güclənir. Prezident İlham Əliyevin Azərbaycan Ordusunda həyata keçirdiyi islahatların nəticəsi olaraq ordumuz gücləndi və düşmənə sarsıdıcı zərbələr endirdi. Aprel döyüşlərindən öncə də bizim ermənilərlə toqquşmalarımız olub. Misal üçün, 2015-ci ildə ermənilər böyük itkilər verdilər. Bundan sonra onlar birləşib təxribatlar törətməyi fikirləşdilər və bu təxribatlara 2016-cı ilin aprelində əl atdılar. Məndən bəzən soruşurlar ki, aprel döyüşlərində əmri kim vermişdi? Biz hərbçi olaraq hər zaman düşmənin təxribatına hazır olmalıyıq. Bu planlar öncədən hazırlanır və təsdiqlənir. Eləcə də, həmin planlar hərbi hissələrdə müəyyən vəzifəli şəxslərə payanılır. Yəni, təxribatın qarşısının alınması qabaqcadan bilinir. Bu planlaşdırılmışdı və ümumi plan Ali Baş Komandan tərəfindən təsdiqlənmişdi”.
"Azərbaycan Ordusunun kiçik bir hissəsi 2016-cı ilin aprelində 3 gündə Ermənistan ordusunu darmadağın etdi. Dördüncü gün ermənilər bütün gücünü bir istiqamətdə toplayaraq hücüma keçmək istədilər. Orada da bir nəticə əldə edə bilmədilər. Əksinə, məğlubiyyətə uğradılar. Onlarda heç bir güc yox idi. Bu da təbii idi. Çünki istər demoqrafiq, istər iqtisadi, istərsə də hərbi baxımdan Azərbaycanla ayaqlaşa bilmirlər", - müdafiə naziri vurğulayıb.
Z.Həsənov bildirib ki, Azərbaycan aprel döyüşlərində cəmi bir tank itirib, o da minaya düşüb: "Biz onu bərpa etmişik. Ermənilər isə 33 tank itiriblər. Azərbaycan 1 top itirib. Onların 15 topunu məhv etmişik. Aprel döyüşlərində düşmənin 300-dən çox şəxsi heyəti məhv edilib, 1000-ə yaxın yaralıları oldu. Bizdə olan məlumata görə, onlardan 500-dən çoxu ağır yaralanıb. Bütövlükdə, aprel döyüşləri Ermənistan üçün dağıdıcı oldu".
Aprelin 3-də Heydər Əliyev Fondu tərəfindən yüksək texnologiyalı protezlərlə təmin olunan hərbçilərlə görüş keçirilib.
AZƏRTAC xəbər verir ki, Heydər Əliyev Mərkəzində keçirilən görüşdə əvvəlcə Aprel döyüşləri şəhidlərinin xatirəsi bir dəqiqəlik sükutla yad edilib.
Azərbaycan Respublikasının Birinci vitse-prezidentinin köməkçisi, Heydər Əliyev Mərkəzinin direktoru Anar Ələkbərov tədbirdə çıxış edərək bildirib ki, üç il bundan əvvəl Heydər Əliyev Fondu “2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi” layihəsinə başlayıb. Artıq bu layihənin ikinci mərhələsi yekunlaşıb. Ötən 3 il ərzində 100-dən çox zabit və əsgər yüksək texnologiyalı protezlərlə təmin olunub. Bugünkü görüşün üç il bundan əvvəlki Aprel döyüşlərinə, ordumuzun qələbə gününə təsadüf etdiyini deyən Anar Ələkbərov Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın görüş iştirakçılarına müraciətini oxuyub.
Müraciətdə deyilir: “Azərbaycanın əzəli tarixi torpağı olan Dağlıq Qarabağ və digər yeddi rayonumuz artıq 25 ildən çoxdur Ermənistan respublikası tərəfindən işğal olunub. Bu hərbi təcavüz nəticəsində torpaqlarımızın 20 faizi işğal altına düşüb, bir milyondan çox azərbaycanlı öz doğma torpağında qaçqın və köçkün vəziyyətində yaşayır. 1994-cü ildə atəşkəs razılığının əldə olunmasına baxmayaraq, Ermənistan Azərbaycana qarşı dəfələrlə silahlı təxribat törətmiş, lakin xalqımızın sizin kimi igid oğullarının qəhrəmanlığı və şücaəti sayəsində Azərbaycan Ordusu bu təxribatların qarşısını alaraq düşmənə hər zaman layiqli cavab vermişdir.
Siz Vətən yolunda qəhrəmanlıq göstərərək Azərbaycanın ərazi bütövlüyünün bərpası, müstəqilliyi, ölkəmizin daha qüdrətli, daha möhkəm olması yolunda sağlamlığınızı itirmisiniz. Bununla da öz ölkənizə, xalqınıza, Prezident və Ali Baş Komandanınıza sadiqlik nümayiş etdirmisiniz. Azərbaycan dövləti sizin fəaliyyətinizi yüksək qiymətləndirir, sizin kimi mərd və cəsarətli oğullarının olması ilə fəxr edir. Sizin apardığınız mübarizə haqq mübarizəsidir. Azərbaycan dövləti münaqişənin ədalətli, beynəlxalq hüququn prinsipləri və Azərbaycanın ərazi bütövlüyü çərçivəsində həll olunması üçün əlindən gələni əsirgəmir.
2016-cı ildə baş vermiş Aprel döyüşlərindən 3 il ötür. Bu döyüşlər bir daha bütün dünyaya nümayiş etdirdi ki, Azərbaycan dövləti işğalla heç zaman barışmayacaq. Aprel döyüşləri Azərbaycan xalqının vətənpərvərliyini, həmrəyliyini və yenilməz iradəsini bir daha nümayiş etdirdi. Məhz Aprel döyüşlərinin cəsarətli iştirakçılarının qəhrəmanlığı nəticəsində bu gün Füzuli, Cəbrayıl və Ağdərə rayonlarının işğaldan azad edilmiş ərazilərində Azərbaycan bayrağı dalğalanır. Bu döyüşlər zamanı bizim itkilərimiz oldu. Bu itkilər bizim hamımız, hər bir azərbaycanlı üçün böyük dərddir. Azərbaycan gəncləri, əsgərlərimiz, zabitlərimiz qəhrəmanlıq göstərərək ömürlərini Vətən yolunda qurban verdilər, şəhid oldular. Öz həyatını Vətən naminə qurban vermiş mərd oğullarımızın xatirəsi bizim qəlbimizdə daim yaşayacaqdır.
Azərbaycan dövləti və Azərbaycan xalqı üçün hər bir əsgər əzizdir, dəyərlidir. Sizin sağlamlığınızın bərpası və normal həyata qayıtmağınız üçün Azərbaycan dövləti bütün lazımi addımları atır və bundan sonra da atacaqdır. Mən sizin hər birinizə cansağlığı və uğurlar arzulayıram”.
Görüşdə polkovnik-leytenant Eldəniz Sadıqov çıxış edərək deyib ki, 3 il bundan əvvəl baş vermiş Aprel döyüşlərində Azərbaycan Ordusu düşmənə və bütün dünyaya öz gücünü sübut etdi. 2016-cı ilin aprel ayında düşmənin kəşfiyyat və diversiya qruplarının hücumunun qarşısı Azərbaycan Ordusu tərəfindən alındı. Düşmənin müdafiə xətti tez bir zamanda yarılaraq mühüm strateji yüksəkliklər işğaldan azad edildi. Bu, bir daha sübut etdi ki, bizim güclü və nizami ordumuz var. Biz öz torpaqlarımızı geri qaytaracağıq. Azərbaycanın Ali Baş Komandanı ordumuza yüksək qayğı göstərir, hərbçilərin məişət şəraitinin yaxşılaşdırılmasına, müasir hərbi hissələrin tikilməsinə, zabitlərin yeni evlərlə təmin olunmasına böyük diqqət ayırır. “Aprel döyüşlərində mən və mənim silahdaşlarım bilmirdik ki, şəhid olacağıq və ya sağ qalacağıq. Biz o haqda heç düşünmürdük. Çünki inanırdıq ki, biz şəhid olsaq da, Ali Baş Komandan, Birinci vitse-prezidentimiz, dövlətimiz və xalqımız bizim ailələrimizin yanında olacaq”, - deyə Eldəniz Sadıqov bildirib.
Xidməti vəzifələrini yerinə yetirərkən sağlamlıqlarını itirən zabitlərin, əsgərlərin özlərini cəmiyyətdən kənar hiss etmədiklərini söyləyən kapitan Amil Dadaşov bununla qürur duyduqlarını qeyd edərək deyib: “Aprel döyüşlərində yaralanan hərbçi yoldaşlarım artıq üç il ərzində dinamik həyat fəaliyyəti ilə məşğul olurlar, insanların arasındadırlar”. Amil Dadaşov onlara göstərilən diqqət və qayğıya görə Prezident İlham Əliyevə, Birinci vitse-prezident Mehriban Əliyevaya təşəkkürünü bildirib.
Baş leytenant Namiq Əliyev qeyd edib ki, Aprel döyüşlərində yaralanmış əsgər və zabitlər Birinci vitse-prezident Mehriban Əliyevanın tapşırığı ilə ən müasir, hər cür hərəkət qabiliyyətinə malik protezlərlə təmin edilib. “Bütün bunlar bizlərə verilən dəyər və qiymətdir. Bu gün biz ayağımızı, gözümüzü itirsək də qürur və əzəmətlə dayanırıq. Çünki biz gücümüzü torpaqdan alırıq”, - deyə Namiq Əliyev bildirib.
Görüşdə MEDİCOM şirkətinin direktoru Anar Rüstəmov Heydər Əliyev Fonduna minnətdarlığını bildirərək, protezlərlə təmin edilən hərbçilərimizə də layihə çərçivəsində görülən işlərdəki ruh yüksəkliyinə görə təşəkkürünü bildirib.
Sonra hərbçilərə Heydər Əliyev Fondunun təşəkkürnamələri təqdim edilib.
Daha sonra Birinci vitse-prezident, Heydər Əliyev Fondunun prezidenti Mehriban Əliyeva yüksək texnologiyalı protezlərlə təmin olunan hərbçilərlə görüşüb, onlarla səmimi söhbət edib.
Hərbçilər göstərdiyi diqqət və qayğıya görə Mehriban Əliyevaya minnətdarlıqlarını bildiriblər.
Sonda xatirə şəkli çəkdirilib.
Qeyd edək ki, Azərbaycanın Birinci vitse-prezidenti Mehriban Əliyevanın tapşırığı ilə Heydər Əliyev Fondu “2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi” layihəsini həyata keçirib. 2017-ci ildə Heydər Əliyev Fondunun və müvafiq dövlət qurumlarının nümayəndələrinin iştirakı ilə yaradılan işçi qrupu 2016-cı il Aprel döyüşləri zamanı yaralanmış və protezləşməyə ehtiyacı olan hər bir əsgər və zabitlə görüşlər keçirib, onlara fərdi yanaşma tətbiq olunub. Belə ki, Aprel döyüşlərində yaralanmış əsgər və zabitlərin fərdi xüsusiyyətləri, onların aktivlik dərəcələri, həyat tərzləri, məşğuliyyətləri və hər bir istifadəçinin protezlərə olan fərdi tələbləri təhlil edilərək hərbçilərimiz üçün uyğun, müasir protez istehsalçıları olan qabaqcıl şirkətlərin yüksək texnologiyalı məhsulları seçilib.
Tətbiq edilən yeni protezlərin texniki imkanları amputasiya olunmuş hissə ilə hərəkət uyğunluq yaradır. Bunun sayəsində protezlə ayaq və yaxud əl bir-birinə maksimum uyğunlaşmış olur. İstifadəçi protezi amputasiya olunmuş hissənin davamı kimi hiss edir və daha rahat addım atır, aktiv hərəkət edir.
.jpg "Mehriban Əliyeva yüksək texnologiyalı protezlərlə təmin olunan hərbçilərlə görüşüb — FOTO")
Altı şəhərin baş planları təsdiq edilib.
Bu barədə Nazirlər Kabineti müvafiq qərarlar qəbul edib.
Beləliklə, Göygöl şəhərinin 2033-cü ilə, Masallı şəhərinin 2034-cü ilə, Şəmkir, Xaçmaz və Salyanın şəhərlərinin 2035-ci ilə, Tovuz şəhərinin 2036-cı ilədək dövrdə inkişafına dair baş planları təsdiqlənib.
Qərarları baş nazir Novruz Məmmədov imzalayıb.