 |
 |
İlqar Süleymanovun ikinci cəhdi baş tutacaqmı…
Bakının ən böyük rayonlarından olan Xətai rayonu 6 aya yaxındır rəhbərsiz qalıb. Uzun illər bu rayona rəhbərlik etmiş Razim Məmmədov 2018-ci ilin 13 dekabr tarixində ölkə prezidentinin sərəncamı ilə vəzifəsindən azad edilib. Bu vaxta qədər də o posta təyinat olmayıb. Prosesin bu qədər uzanması haqda ictimaiyyətə heç bir məlumat verilmir.
Bəzi iddialara görə, olduqca əhəmiyyətli olan Xətai rayonuna başçı axtarışları başa çatmayıb. Çox güman ki, dövlət rəhbərliyi bu cür strateji əhəmiyyətli rayona korrupsiya çirkabına bulaşmamış, adı rüşvətdə, başqa çirkin işlərdə hallanmamış kadr təyin etməyi planlaşdırır. Son dövrlər icra başçıları təyinatında əsas götürülən xətt məhz budur: təmiz reputasiyalı, gənc, intellektual, xarici dil bilən, müasir texnologiyalardan istifadə etməyi bacaran kadrlara etimad göstərilir.
Xətai rayonundan narazılıq çoxdu. Təkcə bir faktı deyək: yaşıllıqların məhvi məsələsi uzun illərdi aradan qaldırılmır. İcra başçısı vəzifədən getsə də yaşıllıqlara qənim kəsilən dəstə hələ də iş başındadı. Bu ayın əvvəllərində rayonun Məhəmməd Hadi küçəsində baş verən “yaşıl soyqırım” buna bariz nümunədir. Ənənə necə qoyulubsa, təəssüf ki, onu dayandırmaq hələ də mümkün deyil.
Musavat.com-un əldə etdiyi məlumata görə, məhz bu cür işlər, vəzifədə olduqları dövrdə yol verdikləri nöqsanlar səbəbi ilə Xətai RİH-nin bir neçə vəzifəli şəxsinin fəaliyyəti hələ də təftiş edilir. Bildirilir ki, onların barəsində açılmış cinayət işi, başladılmış istintaq dayandırılmayıb.
İlqar Süleymanov
Bu arada, Xətai rayonunun icra başçısı olmaq istəyən xeyli adamın hərəkətə keçdiyi də gələn xəbərlər sırasındadır. Onlardan biri də hazırda Binəqədi Rayon İcra başçısının 1-ci müavini vəzifəsində işləyən İlqar Süleymanovdur.
İ.Süleymanov keçmiş vergi işçisi olub. Hazırda işlədiyi posta vergilər sistemindən gətirilib. Sabiq vergilər naziri Fazil Məmmədovun ən etibarlı kadrlarından, yaxın adamlarından olub. Binəqədinin keçmiş başçısı Xaləddin İsgəndərov da Fazil Məmmədovun yaxın qohumu və inandığı kadrlarından olsa da İlqar Süleymanovla heç vaxt yol getməyiblər. Deyilənə görə, Xaləddin İsgəndərov İ.Süleymanovu özünə potensial rəqib görürmüş. Mənbəmiz iddia edir ki, İ.Süleymanovun gənc və savadlı olması, təsərrüfat işini və idarəetməni yaxşı bilməsi, ən əsas da Fazil Məmmədov tərəfindən etimad qazanması Xaləddin İsgəndərovu daim narahat edirmiş. Bu səbəbdən də həmişə İ.Süleymanovla X.İsgəndərov araslında soyuq münasibət olub. Başqa bir iddiaya görə, onlar vaxtaşırı bir-biriləri haqda mətbuata gizli yolla ifşaedici məlumatlar ötürürmüşlər.
Ötən il may ayında Xaləddin İsgəndərov vəzifədən çıxarıldıqdan sonra İlqar Süleymanov Binəqədinin icra başçısı olmaq üçün çox çalışıb. Bu haqda ötən il mediada xeyli yazılıb. Musavat.com-a Süleymanovun yaxın çevrəsindən verilən məlumata görə, o, çox çalışsa da, niyyəti baş tutmayıb. Ona hələ bir müddət də 1-ci müavin postunda işləməsi tövsiyə edilib.
İndi isə boş qalmış başqa bir posta – Xətainin icra başçısı vəzifəsinə təyinat alması üçün İ.Süleymanovun ciddi çalışdığı deyilir. Bunun üçün o, tərcümeyi-halının bəzi məqamlarını “təmizləmək” işinə girişib deyirlər. Mənbə bildirir ki, onu ən çox narahat edən karyerasının Fazil Məmmədovla bağlı olmasıdı.
Mənbə bildirir ki, İ.Süleymanovun tərcümeyi-halında ona mane ola biləcək təkcə Fazil Məmmədova bağlı məqamlar deyil. Deyilənə görə, o, 1-ci müavin olduğu dövrdə adı xeyli xoşagəlməz fəaliyyətlərdə hallanıb. Bu haqda indiyədək bəzi KİV-lərdə yazılar da gedib. Musavat.com İ.Süleymanov haqda yazılanların hamısının həqiqət olduğunu iddia etmir. Sadəcə bu məqamı xatırlatmaqla kifayətlənir.
Yazılanlarla bağlı İlqar Süleymanov mövqe bildirmək istəsə, onun mövqeyini, açıqlamasını dərc etməyə hazırıq.
Azərbaycanın energetika sektorunun uzunmüddətli inkişaf Strategiyası hazırlanacaq.
Prezident İlham Əliyev “Azərbaycan Respublikasının energetika sektorunda islahatların sürətləndirilməsi haqqında” sərəncam imzalayıb.
Sərəncama əsasən, Energetika Nazirliyi qabaqcıl beynəlxalq təcrübəni nəzərə almaqla energetika sektorunun inkişafının əsas prioritetləri və hədəfləri müəyyən edilməklə “Azərbaycan Respublikasının energetika sektorunun uzunmüddətli inkişaf Strategiyası”nın layihəsini 1 il müddətində hazırlayıb Azərbaycan Respublikasının Prezidentinə təqdim edəcək. Nazirlik elektroenergetika sektorunda rəqabətə əsaslanan liberal bazar modelinə mərhələli keçidlə bağlı təklifləri 3 ay müddətində hazırlayıb Prezidentə təqdim etməlidir.
Ölkənin elektroenergetika sisteminin səmərəliliyinin artırılması məqsədilə bu sahəyə özəl investisiyaların cəlb edilməsi barədə təkliflər isə İqtisadiyyat Nazirliyi və Əmlak Məsələləri Dövlət Komitəsi ilə razılaşdırmaqla 6 ay müddətində Azərbaycan Respublikasının Prezidentinə təqdim olunacaq. Həmçinin bərpaolunan enerji mənbələrindən istifadənin təşviq edilməsi, bu sahədə əlverişli investisiya mühitinin yaradılması və özəl sahibkarlıq fəaliyyətinin dəstəklənməsi tədbirlərinə dair təkliflərini hazırlanıb 4 ay müddətində Azərbaycan Prezidentinə təqdim edilməlidir.
Bundan başqa, ölkədə qaz və istilik təchizatı sistemlərinin səmərəliliyini artırmaq, istehlakçıların tələbatının etibarlı şəkildə ödənilməsini təmin etmək üçün bu sahələrdə islahatların aparılması ilə bağlı təkliflər isə 6 ay müddətində Azərbaycan Respublikasının Prezidentinə təqdim olunmalıdır.
Nazirlər Kabineti “Elektrik enerjisi istehsalında bərpa olunan enerji mənbələrindən istifadə haqqında”, “Energetika və kommunal xidmətlər sahələrində tənzimləyici haqqında” Azərbaycan Respublikası qanunlarının layihələrini, habelə “Energetika haqqında” və “Qaz təchizatı haqqında” Azərbaycan Respublikası qanunlarının yeni layihələrini hazırlayıb 1 il müddətində Azərbaycan Prezidentinə təqdim etməlidir. Həmçinin Sərəncamdan irəli gələn tapşırıqların icrasını təmin etmək məqsədilə tanınmış beynəlxalq məsləhətçi şirkətlərin cəlb olunması üçün maliyyə təminatı məsələlərini həll olunmalıdır.
Sabiq nəqliyyat naziri Ziya Məmmədovun oğlu Anar Məmmədov instaqramda maraqlı paylaşım edib.
Musavat.com verdiyi xəbərə görə, o, “Arsenal”- “Çelsi” oyunundan özünün instaqram səhifəsində video paylaşıb. Videodan belə anlaşılır ki, sabiq nazir oğlu Bakıdadır.
Xatırladaq kı, Anar Məmmədov bir neçə ildir ki, Böyük Britaniyanın paytaxtı Londonda yaşayır. Azərbaycan və Böyük Britaniya mediası onun Londondakı evinin şəklini bir neçə dəfə yayıb.
Həmin videonu təqdim edirik:
“Avropa Məhkəməsi bu yaxınlarda “Çıraqov işi” ilə bağlı qərar qəbul edib. Qərarda bildirilib ki, Ermənistan Dağlıq Qarabağ üzərində nəzarətə malikdir”.
ONA-nın məlumatına görə, bunu bu gün Milli Məclisdə keçirlən “Azərbaycan Avropa məkanında” adlı konfransda Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib.
S.Seyidov deyib ki, BMT və digər beynəlxalq təşkilatların qərarlarında Azərbaycan torpaqlarının işğalı faktı əksini tapır: “Bu gün dünyada real və beynəlxalq KİV-lərin təqdim etdiyi Azərbaycan var. Real Azərbaycan sabit, inkişaf edən, beynəlxalq tədbirlərin keçirildiyi Azərbaycandır. Həmin KİV-lərin təqdim etdiyi Azərbaycanda isə guya bunların əksi var, insanların hüquqları pozulur. Strasburqun mərkəzində sinaqoq var, ancaq o sinaqoq təhlükə səbəbindən açılmır. Bu gün Azərbaycanda, Bakıda sinaqoq açıqdır, Avropadan fərqli olaraq, heç kim düşünmür ki, oturub orada bir yerdə çay içmək təhlükəlidir. Bakının mərkəzində erməni kilsəsi də var. Lakin Azərbaycanın işğal olunmuş ərazilərində bir məscid də qalmayıb”.
S.Seyidov Azərbaycan parlamentində rus və yəhudi azlıqların nümayəndələrinin təmsil olunduğunu da xatırladıb: “Azərbaycan islam və demokratiyanın bir arada olması barədə Avropanın tapmadığı sualların cavabını tapıb. Azərbaycanda başı örtülü qadınların sayı Rusiyada başı örtülü qadınların sayından azdır”.
Azərbaycan Prezidenti İlham Əliyev mayın 29-da Bakı Sərgi Mərkəzində XXVI Beynəlxalq “Xəzər Neft və Qaz-2019” sərgi və konfransının açılışında iştirak edib.
Dövlət başçısı tədbirdə nitq söyləyib.
Sonra İlham Əliyev sərgi ilə tanış olub.
Mayın 28-də Azərbaycan Respublikasının Prezidenti İlham Əliyev, birinci xanım Mehriban Əliyeva və ailə üzvləri paytaxtın Dənizkənarı Milli Parkında gəzintiyə çıxıblar.
Dövlətimizin başçısı və birinci xanım Dənizkənarı Milli Parkda istirahət edən sakinlərlə və şəhərimizin qonaqları ilə görüşüblər.
.jpg "Prezident və ailəsi bulvarı belə gəzdi - Fotolar")
Azərbaycan Beynəlxalq Bankının sabiq sədri Cahangir Hacıyevin həyat yoldaşı Zamirə Hacıyevanın Londonda 16 milyon funt sterlinqi necə və hara xərclədiyi bəlli olub.
"Qafqazinfo" BBC Azərbaycanca-ya istinadən xəbər verir ki, əvvəlcə o, çox ehtiyatla alış-veriş edirmiş - £842 uşaq kitablarına və £140 ətirlərə xərcləyib.
Sonra o, Cartier daş-qaş əşyaları dükanında £181, Miu Miu dizayner geyimlərinə £1,600 və Ferragamo ayaqqabılarına £1,539 ödəyib.
2007-ci ildə o, yenidən Miu Miu dükanına gedib və 25 ədəd American Express kartlarından £10,616 ödəyib.
Bundan sonra 55 yaşlı Zamirə Hacıyeva daha bahalı əşyalar almağa başlayıb.
Harrods-da naməlum əşyalara £66,000, Tom Dixon dizaynerinin əşyalarına isə £17,000 xərcləyib.
Zamirə Hacıyevanın 10 ildə çox pul xərclədiyi əsas Harrods mağazaları
Boucheron daş-qaş dükanı: £3.5 milyon
Cartier daş-qaş dükanı: 1.4milyon
Dennis Basso (ABŞ dəb dizayneri) dükanı: £402,000
Sandwich by Tom - "sendviç" barında: £332,000
Harrods ətir kassaları : £160,000
20 iyun 2008-ci ildə o, £925 funta alt paltarı və corab alır.
Düz 63 dəqiqə sonra o, sevimli dükanı olan Cartier-də £433,389.79 funt sterlinq xərcləyir.
Həmin günün axşamı isə 374 funt sterlinqə "kişi paltarları dizayneri"ndən əşya alır.
Günlər sonra o, Elie Tahari dizaynerindən 8,387 funt sterlinqlik bazarlıq edir və £847 məbləğində ətir alır.
26 iyunda isə lüks saat dükanında üç əşya üçün £17,000 xərcləyir.
Ən maraqlı ödəniş isə 99,000 funt sterlinqdir. Bu məbləğ Disney-in eksklüziv mağazasında Bibbidi Bobbidi Boo kassasında xərclənib.
Kimin üçün olması bəlli olmasa da, Disney dükanında, həmçinin uşaqlar üçün qız və oğlan şahzadə geyimlərinin bir saatlıq istifadəsinə görə £1,000 ödənilib.
Həmin gün o, Boucheron daş-qaşına £160,000 xərcləyib.
O, pulu təkcə özünə xərcləməyib, həmçinin hədiyyə də alıb. Bir dəfə o, kişi əşyaları dükanında hədiyyə bağlaması üçün £1,371 ödəyib.
Beləliklə, Zamirə Hacıyeva 29 sentyabr 2006-cı ildən 14 iyun 2016-cı ilədək Harrods-da 16,309,077.87 funt sterlinq xərcləyib və bu xərclərin 6 milyonu ərinin bankına məxsus 35 kredit kartındən ödənib.
Ümumilikdə isə o, 54 kredit kartından istifadə edib.
Milli Cinayət Agentliyindən (MCA) Nicola Bartlett deyir ki, ərinin Azərbaycan bankından ailə üzvlərinə heç vaxt geri qaytarılmamış kredit kartları verməsinə dair iddialar fonunda Zamirə Hacıyevanın xərcləri "əhəmiyyətlidir".
Onun alış-verişləri Azərbaycanda oğurlandığı iddia edilən zamandan bir il sonra, Hacıyevanın Britaniyaya yerləşmək istəyindən sonra başlayıb.
Zamirə Hacıyeva Britaniyada varlı sərmayeçi qismində viza almaq istəyib.
MCA bildirib ki, Zamirə Hacıyevanın hər hansı gəlirinin olması barədə dəlil tapa bilməyib. Pul ona ərindən gəlib və bir də Britaniya banklarında olan depozitlərindən 27000 funt sterlinq məbləğində mənfəət əldə edib.
O, Britaniyada ilk dəfə tətbiq edilən "İzahedilməz Sərvət Sərəncamı" (UWO) çərçivəsində həbs olunub, sonra isə ev həbsinə buraxılıb.
Zamirə Hacıyeva dəfələrlə heç bir yanlış iş tutmadığını bildirib və Milli Cinayət Agentliyindən məhkəməyə şikayət edib.
O, məhkəməyə deyib ki, həyat yoldaşı həbsdə olduğu üçün onlar müdafiə edilə bilməyiblər və buna görə ərinin uğurlu biznes imkanlarını və qanuni yollarla pul qazanmasını göstərmək mümkün olmayıb.
Mayın 27-də “Buta” sarayında Azərbaycanın milli bayramı – Respublika Günü münasibətilə rəsmi qəbul keçirilib.
Azərbaycan Prezidenti İlham Əliyev və birinci xanım Mehriban Əliyeva rəsmi qəbulda iştirak ediblər.
YAP-ın sədr müavini, icra katibi Əli Əhmədov sabiq Səhiyyə naziri Əli İnsanov haqqında məqalə yazıb.
Ə. Əhmədov məqaləsində bildirib ki, özünü cəmiyyətə yeni obrazda təqdim etməyə çalışan korrupsiyaya və xəyanətə görə suçlu bilinərək həbs olunan keçmiş səhiyyə naziri Əli İnsanov radikal müxalifətin ənənələrinə uyğun olaraq yalan və böhtan yolunu seçib: “Əli İnsanov Azərbaycanda tibbi sığortanın tətbiq olunmamasında kimlərisə günahlandırmaq istəyir. İlk növbədə onu qeyd edim ki, pilot şəklində tibbi sığorta iki ildən çoxdur ki, sınaqdan keçirilir, 2020-ci ildən isə bütün ölkə boyu tətbiq olunacaq. Ancaq demək istədiyim başqa həqiqət də var. 1999-cu ilin dekabrında “Tibbi xidmət haqqında” qanun qəbul olundu. Qanunun bir fəsli icbari tibbi sığortaya həsr olunub və 2000-ci ildən etibarən bu sahədə əməli işlər həyata keçirilməli idi. Lakin, 2000-ci ilin əvvəllərində səhiyyə naziri Əli İnsanov dövlət başçısına müraciət edərək tibbi sığortaya keçid üçün şəraitin olmaması bəhanəsi ilə onun 2005-ci ilə qədər təxirə salınmasını xahiş etmişdir. Müvafiq müraciət və sənədlər Nazirlər Kabinetində saxlanılır”.
Əli İnsanovun ikinci yalanı onun zamanında guya səhiyyədə intensiv islahatların keçirilməsi ilə əlaqədardır. Prezident Heydər Əliyevin rəhbərliyi altında iqtisadiyyatda, kənd təsərrüfatında, xidmət sahələrində əsaslı dəyişikliklərin həyata keçiriliməsi tarixi faktdır. Lakin o da həqiqətdir ki, islahatlar strategiyasından kənarda qalan az sahələrdən biri səhiyyə idi. Yuxarıda tibbi sığorta ilə əlaqədar dediyim fakt da bunu sübut edir. Səhiyyədə islahat təşəbbüsünün boğulmasının əsas günahları da məhz səhiyyə naziri Əli İnsanov idi.
Əli İnsanovun üçüncü yalanı Yeni Azərbaycan Partiyasının idarə heyətindəki çıxışı ilə əlaqədardır. İddia etdiyinin tam əksi olaraq həmin iclasda Əli İnsanov kimi və ya nəyisə tənqid etmək barədə deyil, partiya rəhbəri tərəfindən ona diqqətin az olmasından gileylənmək istədi. Lakin, sədrin arqumentli cavabı ilə razılaşmalı oldu. Məsləhət görərdim Əli İnsanov idarə heyətinin iclasından bir gün sonra partiyanın icra katibliyinə gəlib, məndən partiya sədrinə çatdırmaq üçün nəyi xahiş etdiyini xatırlasın.
Ya məlumatlığının azlığı üzündən, ya da başqa səbəbdən o, iddia edir ki, Azərbaycana xarici tərəfdaşları etibar etmir. Böhtandır. ABŞ-dan tutmuş bütün Avropa dövlətlərinə qədər əməkdaşlıq etdiyimiz dövlətlərin rəhbərləri dəfələrlə ölkəmizlə əməkdaşlığa böyük önəm verdiklərini etiraf etmişlər. Azərbaycan bir çox sahələrdə qlobal və regional əhəmiyyət daşıyan layihələrdə ayrı-ayrı dövlətlərlə sıx əməkdaşlıq edir.
Keçmiş Səhiyyə naziri iddia edir ki, Azərbaycanda islahatlar həyata keçirilmir. Həqiqət isə ondan ibarətdir ki, Azərbaycan bütün dünyada ən çox və səmərəli islahat keçirən ölkə kimi tanınır. Dünyanın ən mötəbər beynəlxalq qurumları bu faktı öz hesabatlarına daxil edib. İqtisadiyyatda başlayan islahatlar indi digər sahələri də əhatə edib. Ən başlıcası isə islahatlar faydasını verməyə başlayıb. Bu yaxınlarda maaşların, pensiyaların, müavinət və güzəştlərin əhəmiyyətli dərəcədə artırılması həmin islahatların birbaşa nəticəsidir.
Qəzəb, kin, nankorluq Əli İnsanovun gözünü elə tutub ki, olanları nə görə, nə də qiymətləndirə bilir. Hələ ölkədəki əminamanlığı, təhlükəsizliyi demirəm. Əli İnsanov, indi azadlıqdasan, imkanın var ki, ətrafimizda olan dövlətlərin vəziyyətinə, dağılan ölkələrə, puç olan talelərə, milyonlarla insan faciəsinə baxıb müqayisə aparasan. Azacıq ədalət hissin, düz danışmağı bacarmaq cürətin olsa, etiraf etməyə bilməzsən ki, Azərbaycan əminamanlıq, sabitlik adasıdır. Səncə bunlar kimin sayəsində əldə olunub? Əlbəttə İlham Əliyevin sayəsində, onun təmkini, qətiyyəti, uzaqgörənliyi, düzgün idarəçiliyi sayəsində. Xalq bunu bilir və qiymətləndirir. Sən isə, Əli İnsanov, İlham Əliyev barədə danışmaq haqqını çoxdan itirmisən.
Və nəhayət, Yeni Azərbaycan Partiyasının fəallarına, Prezidentin ətrafında olan adamların sədaqətinə və dəyanətinə şübhə ilə yanaşan Əli İnsanova xatırlatmaq istəyirəm ki, 2005-ci ildə, sədaqətinə dönük çıxıb xəyanət edən sən özün oldun. İndi o günlərdə, ondan sonra da dəfələrlə sınaqdan çıxanları ləkələmək cəhdi əbəsdir. Ataların məşhur bir sözünü dəyişdirsək belə alınacaq: xəyanətkar elə bilir ki, hamı xəyanətkardır”.
Daxili işlər orqanlarında kadr dəyişikliyi olub.
Unikal.org-un əldə etdiyi məlumata görə, Daxili İşlər naziri, general polkovnik Ramil Usubovun əmri ilə, polis polkovnik-leytenantı Zaur Nəsirov Xətai rayon Polis İdarəsi rəisinin xidmət üzrə müavini təyin edilib. O, bu təyinata qədər Bərdə rayon Polis Şöbəsində əməliyyat işləri üzrə rəis müavini vəzifəsində çalışıb.
Xəbəri Xətai rayon Polis İdarəsindən təsdiqləyiblər.