Avtomobillərə yersiz müdaxilə alışmaya səbəb olur.

Bu sözləri Axar.az-a açıqlamasında “Digesta” hüquq firmasının direktoru, ekspert Ərşad Hüseynov söyləyib.

“Son zamanlar avtomobillərin alışıb yanması halları ilə tez-tez qarşılaşırıq. Belə hallar ən çox köhnə avtomobillərdə müşahidə edilir. Avtomobillərin alışıb yanmasına birinci səbəb elektrik naqillərində problemlərin yaranmasıdır. Avtomobilin işıq cihazının, siqnalının dəyişdirilməsi, kondisioner filtrlərinin yerlərinin dəyişdirilməsi ilə naqillərin düzgün bağlanmaması standartdan kənar müdaxilədir. Avtomobillərə əlavə elektriklə işləyən cihazların qoşulması zamanı naqillərin nəzərə alınmaması, onların dözümlülük dərəcəsinin müəyyənləşdirilməməsi, hansı naqilin hansı cərəyan şiddətini saxlaması, hansı müqavimətə hesablandığı haqqında səriştəsizlik avtomobillərin sistemində problemlərin yaranmasına səbəb olur. Nəticədə avtomobilin elektrik şəbəkəsində ya həddən artıq yüklənmə baş verir, ya da açıq boşluqlar olur ki, bu da qığılcım əmələ gətirir və avtomobilin alışıb yanması baş verir. Avtomobillərin mühərriki həmişə isti olur, mühərrikin ətrafı plastik kütlədən yanan materiallarla əhatə olunub. Bunlar avtomobilin qığılcımla tez bir zamanda alışmasına şərait yaradır”, – Hüseynov bildirib.

Ekspert sürücülərə avtomobili alarkən xüsusi baxışdan keçirməyi məsləhət görüb:

“Avtomobillərin xarici ölkələrdən gətizdirilməsi zamanı ustalara göstərilməsi vacibdir. Elektrik xətlərinin xüsusi yoxlanışdan keçirilməsi məsləhət görülür. Avtomobillərdə qısaqapanmanın yaranmaması üçün nəqliyyat vasitəsinin mühərrikini saxlayarkən işlək vəziyyətdə qoymaq təhlükəlidir. Avtomobillərdə hər hansı dəyişikliklər edildikdə bunu professional ustalara əmanət edin. Xüsusilə avtomobilin izolyasiya bağlantısına ciddi nəzarət yetirmək lazımdır. Daha çox yay fəslində kondisioner işlək vəziyyətdə olduqda avtomobili nəzarətsiz qoymaq olmaz”.