Qarabağ həqiqətlərinin beynəlxalq ictimaiyyətin diqqətinə çatdırılmasında hər kəs, hər təşkilat, o cümlədən vətəndaş cəmiyyətinin nümayəndələri öz töhfəsini verməlidir.

Bu sözləri Axar.az-a açıqlamasında Azərbaycan İnternet Forumunun prezidenti Osman Gündüz deyib.

O.Gündüz hazırda Azərbaycanda sosial mediadan istifadə edənlərin sayının 2 milyondan çox olduğunu deyib:

“Bu gün sosial şəbəkələr həyatımızın ayrılmaz parçasına çevrilib. Lakin əsas məsələ internetdən istifadə zamanı informasiya məsuliyyətini əsas tutaraq, məlumatların ictimaiyyətə çatdırılmasında, auditoriyanın formalaşdırılmasında peşəkarlığı artırmaqdır. Çünki Qarabağ həqiqətlərinin beynəlxalq ictimaiyyətə düzgün və obyektiv şəkildə çatdırılmasında internet resurslarının rolu əvəzsizdir. Hazırda Azərbaycanın informasiya siyasəti güclənməkdədir və bunun daha da inkişaf etdirilməsi üçün müəyyən işlər görülür. Baş verən Alxanlı hadisələrinin sosial media istifadəçiləri tərəfindən dünya ictimaiyyətinin diqqətinə çatdırmaq üçün gördüyü işlər öz nəticəsini verdi. Bir çox ölkələrin məşhur qəzet, TV və saytlarında kiçik Zəhra ilə bağlı xəbərlərin getməsinə nail olundu. İnformasiya yaymaq cəhətdən tək uğurumuz bu hadisələr deyil. Artıq erməni lobbisinin dünyada dominantlıq təşkil edən informasiya siyasətinin zəiflədiyini müşahidə edirik. Bu onu göstərir ki, erməni yalanlarının qarşısının alınması həqiqətlərimizin daha çox yayılmasından keçir”.

O.Gündüz hər bir sosial media istifadəçisinin öz sahəsində yeni informasiyaların dünyaya çatdırılmasında müəyyən işlər görə biləcəyini qeyd edib:

“Bunun üçün Vikipediyada yeni informasiya resursu yarada bilərlər. Fikrimcə, müasir dövrdə faydalı, elmi, ictimai əhəmiyyətli yazılara ehtiyac var. Bu sahədə konkret bir mövzular seçilib işlənməlidir. Bu cür addımlar Vikipediyanın Azərbaycan seqmentinin zənginləşdirilməsini və ermənilərdən bir addım öndə olmağımıza şərait yarada bilər. Bundan başqa sosial mediadan müxtəlif dillərdə həqiqətləri dünya ictimaiyyətinin diqqətinə çatdırmaq, Qarabağ həqiqətləri ilə bağlı müxtəlif dillərdə informasiya yayan şəxsi bloqlarını yarada bilərlər. Adicə müxtəlif xəritə xidmətləri göstərən şirkətlər var (Yandeks, Quql, Əpl və s.). Sadə internet istifadəçiləri Azərbaycan ərazilərinin xəritədə daha yaxşı tanıdılmasında, mövcud biliklərin zənginləşdirilməsində yaxından iştirak edə bilərlər. Ən çox da işğal altında olan ərazilərimizin Azərbaycanın ərazisi olaraq verildiyinə nəzarət etməlidirlər”.