Uşaqların düzgün tərbiyə edilməsi valideynlər üçün daim aktual olan problemdir.

Bu sözləri Axar.az-a açıqlamasında sosioloq Cavid İmamoğlu deyib. Sosioloq bildirib ki, uşaq böyüdən ailələr üçün tərbiyə məsələsi həmişə dəyişməz olaraq qalır:

“Hazırki dövrümüz uşaq tərbiyəsi baxımından çox həssas dövrdür. Çünki müasir texnologiyalar həyatımızı inqilabi kəşflər səviyyəsində dəyişib. Artıq onlar yalnız ünsiyyət vasitəsi deyil, insanlar üçün gündəlik həyatın ayrılmaz bir parçasıdır. Lakin bunun müsbət tərəfləri kimi mənfi tərəfləri də az deyil. Müasir texnologiyalar həyatımızı zəbt etdiyi kimi, azyaşlı uşaqların da əsas əyləncə mənbəyinə çevrilir. Əlbəttə ki, uşaqları texnologiyadan uzaq tutmaq olmaz. Amma bu işdə valideynlər çox diqqətli olmalıdır. Ona görə ki, valideynlər uşaq tərbiyəsində bəzən şəxsi intuisiyalarına, bəzən öz valideynlərinin təcrübəsinə, bəzən isə mütəxəssislərə etibar edirlər. Amma bütün hallarda bu gün valideyn-övlad arasındakı problemlər tərbiyə metodunun düzgün seçilmədiyini göstərir. Bu, əvvəlki illərin təcrübəsini müasir dövrdə uşaqlara təbliğ etməyə çalışdıqlarına görə baş verir. Çünki əsr, zaman dəyişir. Yeni texnologiyaların yaranması yeni tərbiyə metodlarının inkişaf etdirilməsini şərtləndirir. Bu gün valideynlər yalnız uşaqların internetdən istifadə vaxtlarını məhdudlaşdıra bilərlər”.

C.İmamoğlu uşaqlara düzgün tərbiyə metodlarının seçilməsi üçün əsas şərtin valideynlərin də maariflənməsi olduğunu qeyd edib:

“Valideynin diqqətsizliyi uşağın kompüter və telefon arxasında çox vaxt keçirməsinə əsas səbəbdir. Valideyn öz rahatlığı üçün çox vaxt bu vasitələrdən rüşvət kimi istifadə edir. Bu kimi halların olmaması üçün hazırda uşaqların yetişdirilməsində valideynlərin maarifləndirilməsinə böyük ehtiyac var. Bu məsələ ilə bağlı ilk növbədə valideynlərin özünün internetdən düzgün istifadə etməsi üçün maarifləndirici tədbirlər görülməlidir. Hər bir valideyn bilməlidir ki, övlad tərbiyəsinə həm adət-ənənələrin öyrədilməsi, həm də cəmiyyətə faydalı bir vətəndaş yetişdirilməsi üçün yenilikləri onlara təbliğ etmək lazımdır”.