Son vaxtlar paytaxtımızda fəaliyyət göstərən taksi şirkətlərinin sayının artması təəssüf ki, rəqabət amilinə və keyfiyyətə təsir etmir.

Əksinə, bəzən taksi şirkətlərində əvvəl müşahidə edilməyən müəyyən çatışmazlıqlar da meydana çıxır.

Axar.az xəbər verir ki, sakinlər tez-tez sosial şəbəkələrdə taksi şirkətlərinə müraciət edən zaman aşağıdakı neqativ hallarla qarşılaşdıqlarını yazırlar:

1. Sifariş edilən ünvanın yaxınlığında maşın olmur.

2. Sürücülər çağırılan ünvana gec gəlir.

3. Sürücü tıxacda qaldığını əsas gətirərək, taksi sifariş verən sərnişinin avtobusa minib onun olduğu yerə gəlməsini istəyir.

3. “Xırda pul yoxdur” deyən sürücülər gedişhaqqının qalığını qaytarmır.

Ən münasib qiyməti olan taksi şirkətlərindən biri - “Ailə taksi”nin mətbuat katibi sürücünün “siz mənim olduğum yerə avtobusla gəlin” deməsindən xəbərsiz olduğunu bildirib və belə hal baş verərsə, müştərinin dərhal mərkəzlə əlaqə saxlamasını istəyib. O, problemi yerində həll edilərək sürücü haqqında da lazımı tədbirlərin görüləcəyini bildirib. Şirkət rəsmisi taksinin ünvana vaxtında gələ bilməməsini isə tıxacla və sifarişlərin çoxluğu ilə əlaqələndirib.

“Ekonom taksi” (*9111) şirkətindən də bildirdilər ki, taksinin gec gəlməsi sifarişlərin çoxluğu ilə əlaqədardır: “Ola bilər ki, həmin ərazidə taksi yoxdur. Bu zaman gecikmə baş verə bilər. Pulun qalığının geri qaytarılması ilə bağlı problem yarandığı zaman isə sürücü mütləq şəkildə cəzalandırılır. Sərnişinlərdən də xahiş edirik ki, belə hallarla bağlı bizi məlumatlandırsınlar”.