Qrant layihələrin qaliblərinə kifayət qədər böyük məbləğdə maliyyə ayrılacaq.

Lakin əsas olan maliyyənin ayrılması yox, ayrılmış maliyyəyə ciddi nəzarətin təmin olunmasıdır.

Bu sözləri təhsil eksperti Kamran Əsədov məktəblərə ayrılmış qrantların hansı sahələlərə aid edilməsi, qrantların kimlər tərəfindən verilməsi haqda Axar.az-a danışarkən deyib. O bildirib ki, 2007-ci ildə “İlin müəllimi” və “İlin məktəbi” mükafatı yaradıldı, müsabiqə əsasında müəllim və məktəblərin seçilib mükafatlandırılmasına başlanıldı:

“Lakin həmin mükafatlandırmalar özünü doğrultmadığına, eləcə də məktəb və ya müəllimlərin həmin mükafatdan sonra başqa nailiyyətləri olmadığına görə 2016-ci ildə prezidentin sərəncamı ilə dayandırıldı. Dünya təcrübəsinə əsasən, məktəblər müasir dövrün texnologiyaları və ya digər təhsil pillələri üçün təkmilləşmə tələb edən sahələrdə qrant layihələr hazırlamalıdır. Bu layihələr əsasən yetkinlik yaşına çatmış şagirdlərin asudə vaxtlarının dəyərləndirilməsi, onları zərərli vərdişlərdən kənarlaşdırmaq məqsədi daşıyır. Məktəblərimizdə texnologiya ilə bağlı layihələr hazırlayan şagirdlərimiz var ki, onların maliyyələşməsinə ehtiyac yaranıb. Bu gün bizim məktəblərimizdə kifayət qədər bacarıqlı şagirdlər var ki, onlar müəyyən texnoloji uğura imza atırlar.

Təhsil Nazirliyi bu il məktəblər arasında robot texnologiyası sərgisi keçirdi. Sərgidə məktəblilərin robot texnologiyaları, maşın avadanlıqlarını çox gözəl şəkildə hazırladıqlarını gördük. Lakin şagirdlərin sərmayəsi olmadığından onların qurğularını, kəşflərini təkminlləşdirməsi mümkün olmur, daha peşəkar səviyyədə işlər görə bilmirlər. Təhsil Nazirliyi də bundan sonra həmin maliyyə məsələlərini birbaşa təyin olunmuş qrant layihələrə ayıracaq”.

Ekspert həmçinin müəllimlərin bu layihələrdə iştirakına dair fikirlərini də açıqlayıb:

“Sırf müəllimlər tərəfindən də irəli sürülən müəyyən layihələr var ki, onlar təkmilləşdirilməlidir. Təəssüf ki, bizim məktəblərimizdə ümumi oxu, ümumi vəsaitlər yoxdur. Kitabça, jurnallar, qəzetlər yoxdur ki, ümumi istifadə olunsun. Hesab edirəm ki, müəyyən ixtisas fənni üzrə müəllimlər birləşib bu tip braşur və vəsaitlər hazırlayacaqlar ki, məhz qrant layihələri də cəlb edə bilsinlər”.

Ekspert bu mükafatlara edilən nəzarət haqda danışarkən vacib məqamlara toxunub:

“Mən Təhsil Nazirliyi tərəfindən təyin olunmuş qrant layihələrin təsdiq olunmuş istiqamətlərinə baxdım, kifayət qədər geniş əhatə dairəsinə malikdir. Lakin ən çox ehtiyac olan sahələr kompüter, informasiya, robot texnologiyalarıdır. Azərbaycan məktəblilərinin Avropa və dünya məktəblərinə inteqrasiyası və əməkdaşlıq məsələsi müəyyən olunmuş bəndlərdə öz əksini tapıb.

Qrant dövlət büdcəsi hesabına Nazirlər Kabinetinin sərəncamı əsasında Təhsil Nazirliyi tərəfindən yaradılmış işçi qrupu, ekspert qrupu tərəfindən dəyərləndirilərək ən yüksək qiymət almış və bəyənilmiş layihələrə veriləcək. Dövlət büdcəsindən hər il bunun üçün kifayət qədər böyük məbləğ ayrılır. Əvvəl hər il 100 müəllimə “İlin müəllimi” adı verilirdi və 50 məktəb “İlin məktəbi” olurdu. Kifayət qədər böyük həcmdə maliyyə vəsaiti ayrılırdı. 2007-2011-ci illərdə bu adı almış müəllimlərin fəaliyyətini araşdırdığımız zaman görürük ki, onların mükafat alandan əvvəlki və sonrakı fəaliyyəti arasında heç bir fərq yoxdur. Onlar həmin adı almaq üçün bir dəfə nümunəvi dərs hazırlayıblar. Lakin qrant belə deyil. Qrant daha təkmil, daha peşəkar fəaliyyətə əsaslanır”.