 |
 |
Tiflisdə mitinqlər səngimir. İranda da gərginlik artmaqdadır. Tiflisdəki gərginliyin ölkəmizə sıçrama ehtimallarının olub-olmadığı yönündə fərqli fikirlər səslənir. Son olaraq, generalların təyinatı ilə bağlı BBC Azərbaycancada siyasi təhlilçi, Oxford Universitetinin alimi Leyla Əliyeva təhlil yazısı ilə çıxış edib. O yazır ki, prezidentin təyinatları regiondakı gərginliklərlə bağlı ola bilər.
Ana Vətən Partiyasının sədri, deputat Fəzail Ağamalı bildirdi ki, ölkə prezidentinin atmış olduğu bu addım onun həyata keçirməkdə olduğu islahatların tərkib hissəsidir: “Məlum olduğu kimi, 2018-ci ilin aprel seçkilərindən sonra dövlət başçısı bütün istiqamətlərdə həm idarəetmə sisteminin təkmilləşdirilməsi, həm iqtisadi inkişafımızın yüksəlməsini təmin edən sosial problemlərimizin həlli və əhalinin həyat səviyyəsinin daha da yüksəldilməsinin, bunların xarakter daşımasının əsasını qoyan sərəncamlar imzaladı. Cənab generallarımızla bağlı qərar islahatların tərkib hissəsidir. Bu təyinatlar Azərbaycan dövlətçiliyinin güclənməsinə, buna qarşı təhdidlərin peşəkar səviyyədə aradan qaldırılmasına, dövlətimizin təhlükəsizliyinin təmin edilməsinə yönəlmiş olan addımlardır. Hər 4 general fəaliyyətləri ilə dövlətçiliyimizə daim sədaqət nümayiş etdiriblər. Həmçinin onlar yüksək səviyyədə olan peşəkar generallarımızdır. İndiyə qədər çalışdıqları sahələrdə sınaqdan yüksək səviyyədə çıxa biliblər.
Dövlətçiliyimizin ən ağır vaxtlarında dövlətimizlə bərabər olublar. Ramil Usubov Azərbaycanda müasir polis sisteminin qurulmasında, daxili sabitliyimizin təmin olunmasında böyük rol oynayıb. Təhlükəsizlik Şurasının daha peşəkar, işləri hüquqi baxımdan görən generala verilməsi təqdirəlayiqdir. Mədət Quliyev Azərbaycan dövlətçiliyinə qarşı qalxan, hakimiyyəti zorakılıqla ələ keçirməyə çalışanlara qarşı mübarizə aparan, sağlamlığını, həyatını bu yolda qurban verməyə hazır olan milli qəhrəmanımızdır.
O, DTX-yə rəis gəldikdən sonra əvvəlki nazir Eldar Mahmudov və onun bandasının bu sistemə vurduğu zərbəni aradan qaldırmaq üçün özünün şəxsi keyfiyyətlərini, intellektini ortaya qoydu, vurulan zərbəni aradan qaldırmağa nail oldu. Vilayət Eyvazov gənc yaşlarından bu sistemdə çalışan, öz zəhməti ilə bu yerə çatan generaldır. Dövlətçiliyimizə, ulu öndərimizə və cənab prezidentə sədaqətini daim sübut edib. Xatırlayıram ki, 2003-cü ildə seçkilərdə məğlub olan və hakimiyyəti zorla ələ keçirməyə çalışanlara qarşı Vilayət Eyvazov bir vətəndaşlıq nümunəsi ortaya qoydu.
Heç nədən çəkinmədən o proseslərin qarşısının alınmasında mühüm rol oynadı. Əslində o meydanda birinci oldu. Əli Nağıyev isə həyatı və fəaliyyəti təhlükəsizlik sistemi ilə bağlıdır. Adi bir işçidən general rütbəsinə qalxıb. Onun bu sahəyə gətirilməsi də çox müsbət qərardır. Ondan əvvəlki generalımız nə dərəcədə dövlətçiliyimizə sadiq olsa da, təhlükəsizlik sistemində çalışan biri deyildi. Bu sahənin başında hər zaman peşəkar rəhbər dayanmalıdır. Bu generallarımızın hər biri bundan sonra da üzərlərinə düşənləri layiqincə yerinə yetirəcəklər. Heç şübhəsiz ki, ölkədəki sabitlik həm də xarici amillərlə müəyyən olunur. Azərbaycan bu gün elə bir regiondan yerləşir ki, bu region xoşagəlməz bir mərhələyə qədəm qoyub. Regionumuzda ciddi qarşıdurmalar var. Amerika-İran, Amerika-Rusiya qarşıdurması yaşanır. Qonşuluğumuzda düşmən Ermənistan var.
Gürcüstanda da ciddi gərginliklər yaşanır. Qazaxıstanı da bu sıraya əlavə edə bilərik ki, artıq orada da qarşıdurmalar müşahidə olunmağa başlayıb. Belə bir vəziyyətdə ölkənin xaricindən gələn təhlükələrin, təzyiqlərin qarşısını almaq üçün məhz bu cür dəyişikliklərə ehtiyac duyulurdu. Onların bu təyinatları heç şübhəsiz ki, xaricdən gələn təzyiqləri, təhlükələri aradan qaldırmağa yönələn bir addımdır. Əminəm ki, cənab generallarımız bu istiqamətdə onlara tapşırılan işlərin öhdəsindən uğurla gələcəklər, dövlətçiliyimizin, təhlükəsizliyimizin, sabitliyimizin qorunmasında öz töhfələrini verəcəklər. Sizin qəzetiniz vasitəsilə onların hər birini təbrik edir, şərəfli yolda uğurlar arzulayıram”.
Deputat Tiflisdəki gərginliyin ölkəmizə təsirlərinin olub-olmayacağı barədə də danışdı: “İstisna etmirəm ki, bu gün Azərbaycana qarşı da təzyiqlər var. Bu təzyiqlər əsasən kənardan gəlir. Ölkəmizdə gedən proseslərə, inkişafa qısqanclıq var. Bu qısqanclıq bir sıra hallarda açıq xarakter daşıyır. Bəzi hallarda açıq təzyiqləri görmək də mümkündür. Erməni lobbisinin təsirləri ilə bu cür təzyiqlər də olur. Burada xristian təəssübkeşliyinin olduğunu da unutmayaq. Digər amillər də özünü göstərir. İstisna etmirəm ki, ölkəmizə qarşı təzyiqlər daha çox Qərbdən gəlir. Ölkə prezidentinin atmış olduğu bu addımlar dövlətçiliyimizə qarşı yönələn bu cür təhdidlərin aradan qaldırılmasında ciddi rol oynayacaq. Bizim üçün ən vacib olanı ölkənin daxili sabitliyidir. Bir sıra ölkələrin hansı durumda olduğunu bu gün də müşahidə edirik. Həmin ölkələrin daxillərində ayrı-ayrı qüvvələr ələ alınır və onların vasitəsilə daxili gərginlik yaradılır. Bunun da nəticəsində sabitlik pozulur.
Qərb dairələri də öz istədiklərini həyata keçirməyə başlayırlar. Bu, Azərbaycanda da istisna olunmur. Daxilimizdə olan bəzi qüvvələr anti-Azərbaycan qüvvələrlə birlikdədirlər. Belə qüvvələr tək daxildə deyil, xaricdə də az deyil. Bu qüvvələr hər zaman təhlükədir. Onların qarşısını almağın əsas yollarından biri də ölkə daxilində sabitliyin qorunub saxlanılmasıdır. Operativ məlumatları əldə edərək, təhlil etdikdən sonra onun aradan qaldırılması, təhlükələrdən vaxtında xəbər tutub bununla bağlı önləyici tədbirlərin görülməsi olduqca vacibdir”.
Zamirə Hacıyevanın ekstradisiyası üzrə Azərbaycanın tələbi üzrə keçirilən məhkəmə prosesi davam edir.
APA xəbər verir ki, iyunun 26-da keçirilmiş növbəti prosesə Zamirə Hacıyevanın lehinə gizli şahid gətirilib, o, pərdə arxasından 5 saat ərzində həm Zamirə Hacıyevanın vəkili Hugo Keith, həm də Azərbaycan hökumətinin iddiasını müdafiə edən Helen Malcolmun suallarını cavablandırıb.
Sorğuya başlamadan öncə zaldakı jurnalistlərdən və iclası izləməyə gələn digər şəxslərdən Azərbaycan səfirliyini və ya hökumətini təmsil edib-etmədikləri soruşulub. Prosesdə Azərbaycanlı jurnalistin olması haqqında məlumat alan gizli şahid hakim Emma Arbuthnota bundan narahat olduğunu bildirib. Hakim isə şahidin tələbini nəzərə alaraq, APA-nın London müxbirini yanına çağırıb, ondan işlədiyi qurum haqqında məlumat alıb. Jurnalistin mobil telefonu da daxil olmaqla, üzərindəki bütün cihazlar müvəqqəti saxlanmaq üçün götürülüb.
Zamirə Hacıyevanın mənafeyini müdafiə edən gizli şahid Azərbaycan məhkəmə sistemini tənqid edib, insan haqları sahəsində və bütün seqmentlərdə problemlər olduğunu iddia edib. Vəkil Hugo Keith tərəfindən verilən yönləndirici suallar əsasında o, Ramil Səfərov, Xədicə İsmayıl, Mehman Hüseynov, “Nardaran işi” ilə bağlı məhkəmə dosyeləri barəsində özü bildiyi kimi şərhlər verib, Azərbaycanda bir sıra tanınmış simaların məhkəmə sistemi ilə problemlər yaşadığını qeyd edib. Bu zaman Ramil Səfərovun ekstradisiya dosyesi də xüsusi vurğulanıb.
Azərbaycan hökumətinin iddiasını müdafiə edən Helen Malcolm isə Azərbaycanda məhkəmə sistemi və insan haqları mövzusunda gedən islahatlar, Zamirə Hacıyevanın indiyə qədər hər hansı bir siyasi məqalə yazmadığı, siyasi fikir bildirmədiyi və ya siyasi görüşünün olmadığını bildirib. Vəkil 31 avqust 2012-ci ildə Macarıstanın Azərbaycana verdiyi Ramil Səfərov barəsində cinayət işinə səbəb olmuş hadisənin Ermənistan-Azərbaycan münaqişəsi zəminində baş verdiyini açıqlayıb. Müdafiəçi bu cür iddialarla çıxış edən şahidə Zamirə Hacıyevanın Azərbaycandakı banklardan böyük məbləğlərdə nağd pul çəkdiyini və külli miqdarda vəsaiti mənimsədiyini xatırladıb.
Məhkəmə prosesində Zamirə Hacıyevanın Azərbaycana ekstradisiya edilərsə, hansı cəzaçəkmə müəssisəsində saxlanacağı haqqında qarşılıqlı müzakirələr aparılıb, Azərbaycanda qadınlar üçün nəzərdə tutulan müəssisələrin standartlara uyğun olub-olmadığı müzakirə edilib.
Məhkəmə prosesi cümə davam edəcək.
Xatırladaq ki, Beynəlxalq Bankın İdarə Heyətinin sədri Cahangir Hacıyevin həyat yoldaşı Zamirə Hacıyevaya 2009-2015-ciillərdə bank tərəfindən faizsiz kreditlər verilib və bu zaman o, heç bir sənəd təqdim etməyib. Z. Hacıyeva çirkli pulların yuyulması, bankın pullarının mənimsənilməsində günahlandırılır.
Bu gün Milli Məclisin növbədənkənar iclası keçiriləcək.
Trend-in məlumatına görə, iyunun 27-i və 28-də davam edəcək iclasda əvvəlcə deputatlar “Azərbaycan Respublikasının 2018-ci il dövlət büdcəsinin icrası haqqında” qanun layihəsini və “Azərbaycan Respublikasının 2019-cu il dövlət büdcəsi haqqında” qanun layihəsini müzakirə edəcəklər.
Daha sonra “Sosial təminatı və müdafiəni həyata keçirən müvafiq icra hakimiyyəti orqanının 2019-cu il büdcəsi haqqında” qanun layihəsi, “Məhkəmələr və hakimlər haqqında”, “Dövlət satınalmaları haqqında”, “Əmək pensiyaları haqqında”, “İşsizlikdən sığorta fondunun 2019-cu il büdcəsi haqqında”, “Xüsusi mühafizə olunan təbiət əraziləri və obyektləri haqqında”, “Dövlət rüsumu haqqında”, “Baytarlıq haqqında”, “Ekoloji təmiz kənd təsərrüfatı haqqında” və “Lisenziyalar və icazələr haqqında” qanunlara, o cümlədən Vergi Məcəlləsinə, Mülki Məcəlləyə, Cinayət-Prosessual Məcəlləyə dəyişikliklər və digər məsələlər müzakirəyə çıxarılacaq.
Ümumilikdə iclasın gündəliyinə 49 məsələ daxildir.
Jurnalist Fuad Abbasov nəhayət, hava limanından çıxıb. Tərəfdarları və qohumları onu milli qəhrəman kimi qarşılayıblar. Azərbaycan bayraqları və təzərrühatlarla qarşılanan jurnalist qısa açıqlamalarla çıxış edib.
Minval.info musavat.com-a istinadən xəbər verir ki, aeroportun girişində media nümayəndələrinə açıqlama verən F.Abbasov onu dəstəkləyən hər kəsə təşəkkür etdi.
Jurnalist azadlığa çıxmasının onun üçün gözlənilməz olduğunu dedi: “40 gün qapalı vəziyyətdə qaldım. Dünən axşam soruşdurma oldu. Bu sabah gözlənilmədən xəbər çıxdı ki, azadlığa çıxıram”.
F.Abbasov bildirdi ki, dincəlib özünə gələndən sonra mətbuat konfransı keçirəcək: “Baş verən qanunsuzluqlarla bağlı məhkəmə yolu ilə həll edəcəm. Səhhətim qaydasındadır. Heç bir problem yoxdur. 12 gün boyunca aclıq aksiyası oldu. Bundan sonra da jurnalist fəaliyyətim olacaq. Daha güclü şəkildə davam edəcək”.
F.Abbasov media nümayəndələrindən bir neçə gün icazə istəyərək, yaxın zamanda mətbuat konfransı keçirəcəyini bildirdi: “Çox ağır dönəm keçirmişəm. Bir-iki gün icazə verin özümə gəlim, bütün suallarınızı keçirəcəyim mətbuat konfransında cavablandıracam”.
Müharibə hələ bitməyib, hər an hazır olmalıyıq ki, torpaqlarımızı azad edək.
AZƏRTAC-ın məlumatına əsasən, bunu Azərbaycan Prezidenti, Ali Baş Komandan İlham Əliyev Cəmşid Naxçıvanski adına Hərbi Liseydə 26 iyun – Silahlı Qüvvələr Günü münasibətilə kursantları və müəllimləri təbrik edərkən deyib.
Dövlət başçısı bildirib ki, bu gün Azərbaycan Ordusu dünya miqyasında güclü ordular sırasındadır:
“Bizim ordumuzun gücü, döyüş qabiliyyəti, peşəkarlığı artır. Bu gün ordumuz ən yüksək səviyyədədir.
Ulu Öndərin misilsiz xidmətləri Azərbaycan xalqının qəlbində daim yaşayır. Biz onun işini davam etdiririk. Ordu quruculuğu prosesi uğurla, sürətlə gedir. Müasir səviyyədə işlər görülür, hərbi texnika alınır, döyüş qabiliyyəti artır”.
İlham Əliyev vurğulayıb ki, bu gün Azərbaycan Ordusu öz gücünü göstərir və göstərməlidir:
“Biz müharibə şəraitində yaşayırıq. Müharibə hələ bitməyib və biz hər an hazır olmalıyıq ki, doğma torpaqlarımızı işğalçılardan azad edək. Əminəm ki, bu gün gələcək və Azərbaycan ərazi bütövlüyünü bərpa edəcək.
Bizim imkanlarımız artır, maddi vəziyyətimiz yaxşılaşır, orduya lazım olan texnika, silah-sursat alınır, gətirilir. Bir sözlə, biz bütün bu işləri ona görə edirik ki, daha güclü orduya malik olaq və öz ərazi bütövlüyümüzü bərpa edək”.
Prezident qeyd edib ki, Azərbaycan bu gün bütün sahələrdə uğurla inkişaf edir:
“Əminəm ki, bu inkişaf dayanıqlı olacaq. Sizə – burada oxuyan kursantlara və çalışan müəllimlərə yeni uğurlar, cansağlığı arzulayıram. Vətənin qorunması işində siz həmişə fəal olmalısınız və öz gücünüzü göstərməlisiniz. Sizi bir daha təbrik edirəm.
Bütün Azərbaycan xalqını Silahlı Qüvvələr Günü münasibətilə təbrik edir və sizə yeni uğurlar arzulayıram”.
Bir neçə vaxtdır Azərbaycanda elan olunan islahatlar artıq qanunvericilik bazasından kadr bazasına keçdi. Prezident İlham Əliyev bu prosesə güc strukturları ilə başladı.
"Yeni Sabah”a istinadla bildirir ki, islahatların davamlı və dərin olacağı ilə bağlı verilən rəsmi açıqlamalar onu deməyə əsas verir ki, bu, hələlik ilkin addımdır. Kadr yerdəyişmələrinin yaxın günlərdə yeni dalğasının olacağı gözlənilir. Bu baxımdan da hazırda bir sıra nazirliklərdə, dövlət komitələrində narahatçılıqlar mövcuddur.
Bəs prezidentin növbəti kadr dəyişiklikləri hansı sahə ilə bağlı ola bilər? Bu dəfə hansı prinsiplər əsas götürüləcək? Uzun müddət eyni vəzifədə qalmaqamı, yoxsa, rəhbərlik etdiyi sahədə düzgün nizam-intizam qura bilməyən, əksinə problemlərlə baş-başa qalıb xalqı hakimiyyətdən narazı salan kadrlarmı hədəfdə olacaq?
Sonuncu təyinatlarla bağlı sərəncamı analiz etdikdə görünür ki, burada hər iki amil əsas götürüb. Görünən odur ki, prezident hər hansı nazir haqda qərar vermək üçün onun 25 il gözləməyə ehtiyac görmür. Əslində, bir illik fəaliyyət də məntiqi nəticələr çıxarmağa əsas verir. Ona görə də, biz elə bu iki amilin nəticəsində vəzifəsini itirməsi ehtimal olunan şəxsləri ayrı-ayrılıqda qeyd edəcəyik.
Əgər uzun müddət eyni kreslonu zəbt etmək amilindən məsələyə yanaşaq, hazırda Azərbaycanda bir neçə nazir və onlarla icra başçısı var. Bunların sırasında Mədəniyyət naziri Əbülfəs Qarayev (25 il), Kəmaləddin Heydərov (11 il Gömrük Komitəsinin sədri, 13 il FHN rəhbəri), Fikrət Məmmədovun (19 il) adları ilk sırada gəlir. Elmar Məmmədyarov (15 il), Oqtay Şirəliyev (14 il), Samir Şərifov (13 il), Azad Rəhimov da (13 il) uzun illər eyni sahəni idarə edən məmurlardandır.
Əslində, normal və effektiv fəaliyyət göstərmək üçün inkişaf etmiş ölkələrdə bu müddətdə eyni postda qalan məmur tapmaq mümkün deyil. Birinci amili – uzun müddət vəzifədə qalanların istirahətə göndərilməsi və ya yerdəyişməsi baxımından yanaşdıqda adları qeyd olunanların bir hissəsinin yola salınacağını gözləmək olar.
İslahatlarla bağlı qeyd etdiyimiz ikinci yanaşmaya – vəzifəsinin öhdəsindən gələ bilməmək və əhalinin narazı olduğu sahələrdə kadr islahatına gəldikdə isə burada bir sıra yeni kadrların da vəzifəsindən azad olunacağını gözləmək olar. Hər il dövlət rəsmilərinin açıqladığı rəsmi statistikalarda da əhalinin daha çox şikayət etdiyi dövlət qurumlarının siyahısı qeyd olunur. Həm o siyahı, həm də mediada səslənmiş şikayətləri əsas götürərək yeni kadrların bir neçəsinin də ən yaxşı halda yerinin dəyişdiriləcəyini gözləmək olar.
Azərbaycanda son illərdə yüksək vəzifəyə təyin olunmuşlardan -Ceyhun Bayramovun təhsil, Sahil Babayevin əmək və əhalinin sosial müdafiəsi, Səfər Mehdiyevin gömrük və nəhayət İnam Kərimovun kənd təsərrüfatı sahəsində böyük uğurlar qazandığını demək olmaz. Əksinə, hər gün bu sahələrlə bağlı onlarla şikayət və problemlərlə bağlı informasiya ilə qarşılaşmalı oluruq. Və ən problemli sahənin səhiyyə olduğunu da vurğulamaq istərdik. Bu baxımdan O. Şirəliyev hər iki prinsipə görə qarşısına minus işarəsi qoyulacaq kadrlardan biridir.
Rövşən Rzayevin məcburi köçkünlər, Qoşqar Təhməzlinin qida, Fuad Muradovun diaspora, Mikayıl Cabbarovun da vergi sahəsində inqilab etdiyini söyləmək olmaz. Amma ən azından əvvəldə adlarını çəkdiyimiz nazirlərlə müqayisədə bu sahələrdə problemlər say etibarı ilə azlıq təşkil edir.
Başqa nə ola bilər? Hansı vəzifəlilər yola salınacaq? Buraya bir xeyli icra başçısının və komitə sədrlərinin də adlarını qeyd etmək mümkündür. İstənilən halda isə artıq ölkə rəhbərliyi də bu qərara gəlib ki, kadr islahatlarında köklü dəyişikliklərə ehtiyac var. Bunu son 4 təyinatla bağlı sərəncama həm siyasətçilərin, həm şərhçilərin, həm də ümumilikdə sadə insanların reaksiyası da açıq şəkildə ortaya qoydu.
Prezident İlham Əliyev əməkdar artist Sənubər İsgəndərliyə ev bağışlayıb.
Minval.info-nun məlumatına görə, bu barədə əməkdar artist “Facebook” səhifəsində paylaşım edib:
“Möhtərəm Cənab Prezident. Mənim səhnə fəaliyyətimi yüksək qiymətləndirərək ev hədiyyə etdiyinizə görə, sizə dərin minnətdarlığımı bildirirəm. Sizin incəsənət xadimlərinə verdiyiniz dəyər, göstərdiyiniz diqqət, qayğı, bizə qürur və fərəh verir. Mənə və ailəmə bu sevinci yaşatdığınıza görə Sizə bir daha sonsuz təşəkkürümü bildirirəm.
Allah Sizi və Azərbaycanımızı qorusun!”
Əvəz Zeynallı: “Azərbaycan hakimiyyəti bu adamların əllərindəki pullardan, dini baxışlarından ciddi narahat olmalıdır”
Sabiq kənd təsərrüfatı naziri İsmət Abbasovun oğlu Yunis Abbasovun Londonda böyük mal-mülkünün üzə çıxması haqda ötən həftə yazmışdıq. Bu günlərdə isə onun dini baxışları ilə bağlı xəbərlər yayılıb. “Yeni Müsavat”a etibarlı mənbənin verdiyi məlumata görə, Y.Abbasov Londonda radikal dini təriqət üzvü olub. Onun sələfi olduğu haqda məlumatlar dolaşır.
Yunis Abbasov uzun illərdir ki, Londonda yaşayır. Özünün açıqlamalarına görə, orada özünə biznes qurub. Belə iddialar da var ki, oğul Abbasovun Londondakı biznesi ata Abbasovun kapitalı hesabına formalaşıb, dirçəlib. İsmət Abbasov isə heç vaxt biznesmen olmayıb, onun məmur olaraq maaşı da oğluna böyük varidat ötürməsinə imkan verəcək qədər deyil. Ehtimal olunur ki, Yunis Abbasovun biznesinin mayasında atasının nazir və başqa vəzifələrdə işlədiyi dövrlərdə qeyri-qanuni yollarla əldə etdiyi pullar dayanır. Zaman-zaman yerli və xarici mediada Yunis Abbasovun varidatı haqda xəbərlər yayılır. Hazırda Abbasovların Dumanlı Albionda 21 milyon dollarlıq mal-mülklərinin olmasını təsdiqləyən sənədlər ortalıqdadır. Belə anlaşılır ki, Yunis Abbasov bir neçə 10 milyonluq varidatın sahibidir. Onun Böyük Britaniyada radikal dini təriqət üzvü olması xəbəri də yeni deyil. Bildirilir ki, Abbasov hələ Londonda təhsil alarkən dini baxışlarını dəyişib və sələfi təriqətinin daşıyıcısına çevrilib. Böyük pullara sahib Yunis Abbasov məmur oğlu olaraq dini baxışlarını dəyişən ilk azərbaycanlı deyil. Bakının keçmiş icra başçısı Hacıbala Abutalıbovun oğlu İsrafil Abutalıbovun da sələfi olması iddiaları illərdir ki, mətbuatda dolaşır və təkzib olunmur.
Yunis Abbasov
İsrafil Abutalıbov da Yunis Abbasov kimi uzun müddət Londonda yaşayıb. Bakıya illər sonra tamam başqa qiyafədə və düşüncədə qayıdan Hacıbala Abutalıbovun oğlu o dövrdə BŞİH başçısı olan atasının belə işdən çıxmasına təkid etməsi xəbərləri yayılmışdı.
Belə xəbərlər vardı ki, İsrafil Abutalıbov vəhhabilər kimi uzun saqqal saxlayıb, onlar kimi şalvarının balağını gödəldib. Valideynləri bundan təəccüblənsə və gözləmədikləri belə yeniliyə etiraz etsə də, o, heç kimə və heç nəyə məhəl qoymadan düşüncəsindən dönməmişdi.
İsrafil Abutalıbov
İsrafil Abutalıbovun İçərişəhərdəki “Aşurbəy” (“Ləzgi məscidi”) məscidinə baş çəkdiyi, Suriyaya döyüşməyə gedən azərbaycanlı vəhabilər arasında təbliğat apardığı və onlara maliyyə dəstəyi göstərdiyi barədə informasiyalar da vaxtilə mətbuat səhifələrindən düşmürdü. Türkiyə mətbuatında İsrafil Abutalıbovun Abu Bəkr kimi təqdim olunması da yaddaşlardan silinməyib.
Ölkədən çıxarılan milyonlar hesabına xaricdə özlərinə biznes quran, dini baxışlarını radikal təriqətçiliyə dəyişənlərin xoşagəlməz fəaliyyəti də ola bilərmi? Belələrinin Azərbaycan üçün hansı təhülükəsi var?
“Xural” qəzetinin baş redaktoru Əvəz Zeynallı deyir ki, bu adamları Azərbaycanla bağlayan sırf buradan daşınan pullardır: “Bu gün xaricdə olan təkcə Yunis Abbasov, İsrafil Abutalıbobv deyil ki… Eldar Mahmudovun da, Cahangir Hacıyevin və bir çox eks məmurların da övladları Londondadır. Özləri də, ətrafları da, dost-tanışları da hamısı xaricdədir. Yəni bu adamları ölkəyə bağlayan nəsə yoxdur. Azərbaycan hakimiyyəti bu adamların əllərindəki pullardan, dini baxışlarından ciddi narahat olmalıdır”.
Əvəz Zeynallı hazırda həbsdə olan keçmiş məmur-oliqarxlardan birinin yaxını ilə söhbətini xatırlayır: “Yanıma gəlmişdilər, bizdən dəstək istəyirdilər. Mən də dedim ki, mənə 2 ziyalı verin, sağımda, solumda otursunlar, mənim dediklərimi təsdiqləsinlər. Cavab belə oldu belə adamlar yoxdur. Nəslindən qadın, kişi, cavanların yanımda olmalarını istədim. Dedilər ki, ölkədə heç kimləri yoxdur, hamısı xaricdədir. Açıq da dedilər ki, bizi bu ölkəyə heç nə bağlamır, adam həbsdən çıxan kimi ölkədən gedəcək. Yəni bu adamlar ölkədən milyardlarla pul çıxarıblar. Zamirə Hacıyevanın timsalında bunu hamı gördü. Qadın bir günün içində bir neçə milyon funt-sterlinqi xərcləmişdi. Hələlik pullar bahalı şərablara, maşınlara, təyyarələrə xərclənir. Gələcəkdə necə olacaq? Bu pullar əslində hakimiyyətin özü üçün təhlükədir. Perspektivdə ölkəyə yaxşı heç nə vəd etmir. Hakimiyyətdaxili çəkişmələrdə həmin pullardan istifadə olunması da istisna deyil. Bu vəsaitlər Azərbaycan xalqının sərvətidir, halal puludur, hansıları ki, oğurlayıb, xaricə daşıyıblar. Hələlik həmin pullar 100 illik çaxırlara, 500 illik viskilərə, bahalı aksessuarlara, mülklərə xərclənir”.
ABŞ prezidenti Donald Tramp bəyan edib ki, İrana qarşı hərbi əməliyyatlara başlaması üçün ona Konqresin razılığı lazım deyil. “Qafqazinfo”nun məlumatına görə, bu barədə “The Hill” xəbər verib.
Dövlət başçısının son sərəncamlarının daha bir fəlsəfəsi də var: o, kimsəni cəzalandırmadan böyük bir siyasi tənlik həll etdi
20 iyun Azərbaycanın ictimai-siyasi və dövlət həyatında yeni dönəmin başlanğıcı sayıla bilər. Prezident İlham Əliyevin 4 generalla bağlı imzaladığı sərəncamlar təkcə güc strukturlarında rəhbər dəyişikliyi kimi anlaşılmamalıdır. Bu, ölkənin ictimai-siyasi atmosferini dəyişdi.
Ölkənin ən məlumatlı adamının növbəti gedişi
Prezident İlham Əliyev ölkəmizin və regionun ən məlumatlı şəxslərindəndir. Atdığı addımların əsas məntiqi məlumatlılıqdı. Onun ustalıqla qurduğu balanslı münasibətlər sistemi, idarəetmə aparatı və siyasəti bütün mərhələlərdə Azərbaycanı qoruyub və qorumaqdadır. Üstəlik, bu münasibətlər sistemi həm də başqalarına nisbətdə ona informasiya üstünlüyü yaradır. Qlobal və regional güclərin maraqları ilə Azərbaycanın maraqlarını uzlaşdırmaq və hər kəsi müttəfiqə çevirə bilmək! Hər il daha da təkmilləşən bu münasibətlər sistemi sayəsində Azərbaycan bölgə və dünya çapında gedən bəzi proseslərdə ciddi aktyorlardan birinə çevrilib. İlham Əliyevin inşa etdiyi bu sistem yalnız bizim ölkəni işğal edən aqressor Ermənistanı təkləmək xətti yürütmür; bu, minimal hədəfdir; məsələ Azərbaycanı daha da böyütmək, dünya standartlarına yüksəltməkdir; – müharibə və Ermənistanla münasibətlər Prezident üçün prioritetdir, lakin bunun da səbəbi yüksəlişə, inkişafa və bütövlüyə mane olan, sabitliyi təhdid edən faktorları aradan qaldırmaqdır.
Prezidentin 2019-cu il başlayandan atdığı bütün addımlar, verdiyi sərəncamlar, həyata tətbiq etdiyi islahatlar məhz bu xarakterlidir. Ermənistan xaric, digər istiqamətlərdəki xarici faktorlar əlverişli hala gətirilib, balanslaşdırılıb və ölkəmizi birbaşa təhdid etmir. İndi daxili faktorları daha da uyğun hala gətirmək, ehtiyac olan sahələrdə islahatlara başlamaq, əldə olunan sabitliyin əsas aktyoruna – Azərbaycan xalqına daha yaxın olmaq, onun dövlətə, Prezidentə olan inam və etibarının əmsalını yüksəltmək prosesinə start verilib.
Hər bir iqtidarın birinci vəzifəsi özünü qorumaqdı, sonra xalqı. Qəza vəziyyəti yaşayan təyyarələrdə bir təlimat var: öncə özünün oksigen avadanlığını (maska) taxacaqsan, sonra yanında oturanın! Yanındakı övladın da olsa, qayda budur!
İlham Əliyev son 6 aydakı siyasi qərar və addımları ilə bir mesaj verir: bundan sonra da fəaliyyətində xalqa istinad edəcək, onun daxilindəki dayaqlarını daha da artırmaq üçün çalışacaq.
Prezident İlham Əliyev iqtidarını və dövlətini sosiallaşdırır. Azərbaycanın neft gəlirləri sayəsində ölkəsini və xalqını dəyişdirir, insanlara daha yaxşı, daha etibarlı sosial yaşam paketləri təklif edir. Son 6 aya təsadüf edən sosial açılım, islahat və iqtisadi siyasət ölkə daxilindən ciddi təqdir və dəstək aldı. Axırıncı iki devalvasiya ilə başlayan və bu ilin yanvarına kimi davam edən sosial gərginlik tamamilə aradan qaldırılıb. İctimai-siyasi mühit sağlamlaşıb. Prezidentə və dövlətimizə qarşı xaricdən ardıcıl qara piar aparan qüvvələrin auditoriyaları və inandırıcı görünə bilən arqumentləri daralıb.
Və belə bir dövrdə Prezidentin generallarla bağlı 4 sərəncamı ortaya çıxdı. Ölkəsinin və regionun ən məlumatlı adamı bu dəfə komandasını, daha da konkretləşdirsək, güc strukturlarını yeniləmək təşəbbüsü göstərir. Bu, həmin islahatların məntiqi davamıdır – xalqın içində dayaqlarını bərkidən Prezident iqtidarını da möhkəmlədir, hüquq-mühafizə və xüsusi xidmət sektorlarını yenidən formatlayır.
İlham Əliyevin 4 generalı və gerçəkliklər
Prezident Əliyevin kadr islahatlarının bir xüsusi özəlliyi var: məxfilik və gözlənilməzlik. Onun addımlarını bilmək, proqnozlaşdırmaq və həm də qarşısını almaq cəhdi göstərmək mümkünsüzdür.
Sabitlik və sədaqət simvolu olan generallar ölkədəki açılım və islahatlardan yaranan boş sahələrdə təxribat etmək istəyən qüvvələrə qarşı təlimat və mandat aldılar!
Bu dəfə də belə oldu. Müşahidələrimizə görə, cəmiyyətin, hətta hakim düşərgə üzvlərinin əksəriyyəti son təyinatlarla bağlı məlumatlı olmayıblar. İlham Əliyev qətiyyətlidir və verdiyi qərarların məsuliyyətini bölüşməyi sevmir. Bu baxımdan da Azərbaycanda maraqlı olan bir sıra böyük güclərin kadr islahatları ilə bağlı ona təsir, xahiş və təzyiqləri olmur; görünür, bu taktikanı seçməyin bir səbəbi də bu cür faktorları dövlət həyatına buraxmaq istəməməsindən qaynaqlanır.
Nəticə nədir: Prezident 4 generalla bağlı 4 sərəncamla nə qazandı?
Onun bəzi siyasi opponentləri məsələni bəsitləşdirmək istəyirlər, iddia edirlər ki, heç nə dəyişmədi, bunlar onsuz da köhnə və sadiq kadrlar idilər, yenə də iqtidarda onlardır və s. Əslində isə…
Ramil Usubov – dövlət çevrilişlərinə və erməni işğalçılarına qarşı döyüşən POLİSin simvollaşan naziri
Lakin bir sürətli baxış görün ortalığa nələri çıxardır. Ölkənin əsas siyasi idarəsi olan və Prezidentin də oturduğu 1 saylı bina Ramil Usubovun timsalında təcrübəli və cəmiyyəti bilən, sabitlik tərəfdarı olan güclü bir idarəçi qazandı. Ramil Usubov 25 ildir daxili işlər naziridir və bu müddətin də böyük hissəsi müharibə şəraitində keçib. O, sözün bütün mənalarında döyüş generalıdır: Azərbaycan polisi erməni qəsbkarlarına və dövlət çevrilişlərinə qarşı dirənişin, mübarizənin simvoludur. Ölkənin xaosda olduğu o illəri yəqin kimsə unutmayıb. Həmin illərdə Prezident Heydər Əliyev Ramil Usubovu qabağa verdi, sınadı və Azərbaycan polisi ona göstərilən etimadı doğrultdu. Polislərimiz, ümumiyyətlə, sovet dövründən (milis adlandırılanda) milli olublar, Azərbaycan uğrunda ölüb-öldürüblər. Ramil Usubov isə bu vətənpərvər başlanğıcı sistemə çevirdi, Azərbaycan polisini yenidən strukturlaşdırdı, onu daxili faktorun ən mühüm amilinə, stabilliyin simvoluna çevirdi. Onun nazir olduğu müddətdə iqtidara qarşı bütün addımları polis qarşıladı və hamısını da uddu.
Polis gücü bəzən sərt oldu; bizə də, cəmiyyətdə birilərinə də, siyasi opponentlərə də dəydi: lakin belə olmayanda da dövlət təhlükəyə girir, xaos yaranır, (Elçibəy iqtidarı nümunəsində) çökür. Hər bir iqtidarın birinci vəzifəsi özünü qorumaqdı, sonra xalqı. Qəza vəziyyəti yaşayan təyyarələrdə bir təlimat var: öncə özünün oksigen avadanlığını (maska) taxacaqsan, sonra yanında oturanın! Yanındakı övladın da olsa, qayda budur! Dövlət qəzalarının və bu qəzalarda qazavat verən polisin də öz qaydaları var…
Prezident İlham Əliyev deyir: “Sabitlik olmadan heç bir ölkə inkişaf edə bilməz. Bu, aksiomdur. Bunu biz yaxın tarixdə dəfələrlə görmüşük. Sabitlik pozulan zaman inkişaf dayanır, sərmayə qoyuluşu dayanır, ölkə iqtisadiyyatı tənəzzülə uğrayır. Bir sözlə, sabitlik hər bir ölkənin inkişafı üçün başlıca şərtdir”.
Bu, Azərbaycan Prezidenti İlham Əliyevin ən müxtəlif auditoriyalarda, bir az fərqli ifadələrlə səsləndirdiyi heç zaman dəyişməyən məntiqidir. O, haqlıdır! Hazırda dünyada baş verən fəlakətlərin, insanlıq dramlarının əsas səbəbləri sabitlik faktorunun pozulmasıdır. Prezident Əliyev ölkəsində sabitlik olsun istəyir, qan tökülməsin istəyir, insanlar ölməsin, köçlər, qaçqınlar olmasın istəyir və bunun üçün çalışır. Əsas kredolarından birinin sabitlik olduğu Prezidentin son General Sərəncamlarının fəlsəfəsi də budur! Polis naziri Ramil Usubovu siyasi vəzifəyə aparmasının anlamı da buradadır. Sabitlik və sədaqət simvolu olan generallar ölkədəki açılım və islahatlardan yaranan boş sahələrdə təxribat etmək istəyən qüvvələrə qarşı təlimat və mandat aldılar! Yuxarıda qeyd etdiyimiz YÜKSƏK MƏLUMATLILIQ məsələsinə bu nöqtədə yenidən dönək! Və xatırladaq: bu sərəncamları verən bölgə dövlətlərinin içərisində ən məlumatlı Azərbaycan Prezidentidir!
Təhlükəsizlik sistemi Əli Nağıyevin timsalında peşəkar idarəediciyə qovuşdu!
Prezidentin sərəncamlarından biri ilə ölkənin təhlükəsizlik xidməti və əks-kəşfiyyat seqmenti peşəkar rəhbərliyə qovuşdu. Bu, bəzi siyasi opponentlərin “hə, noolsun” janrında mız qoymalarından daha ciddi hadisədir. Azərbaycanın təhlükəsizlik seqmenti Eldar Mahmudovdan sonra ciddi zədələnib və Mədət Quliyevin insani obrazı ilə xeyli reanimasiya olunub. Lakin böhran tam keçməyib. Buna görə də prezident bu cür radikal qərar verdi!
Qəzetçiyik və hər kəslə anındaca təmas qurmaq imkanlarımız var. Bu yazı hazırlanarkən istefada olan iki yüksək rütbəli təhlükəsizlik zabitinin rəyini soruşduq: biri özünü general Əli Nağıyevə dost sayırdı, digəri isə ona xüsusi pozitiv münasibət bəsləmirdi. Amma hər ikisinin bir-birindən xəbərsiz verdikləri rəydə ortaq nöqtə nə oldu? “Peşəkardır, yüksək təşkilatçılıq qabiliyyəti var, güclü komanda toplaya bilir, başladığı işi sona çatdırandır…”
Əli Nağıyev MTN-də nazir müavini olduğu dövrdə təkcə Eldar Mahmudovla vuruşmayıb. O, Eldar Mahmudovun nazirlikdəki və nazirlikdən kənarda formalaşdırdığı cinayətkar şəbəkə ilə savaşıb. Ölkənin qosqoca siyasətçilərini, nazirlərini, başqa yüksək vəzifəli şəxslərini ən müxtəlif üsullarla özünə tabe etdirən, onların bəzilərini “aylıq haqq”a otuzduran, az qala hər şeyə və hər kəsə hökm etmək iddiasında olan Mahmudov bu hikkəsini Əli Nağıyevə keçirə bilmədi. Hətta 2011-ci ildə Ə.Nağıyev vəzifədən gedib, prokurorluq sisteminə təyinat aldıqdan sonra da E.Mahmudov ondan əl çəkməyib. Bu və ya digər şəkildə Ə.Nağıyevi zəiflətmək, ona mane olmaq üçün müxtəlif oyunlar qurmağa çalışıb. Fəqət bunların heç biri baş tutmayıb. Əli Nağıyev Korrupsiyaya Qarşı Mübarizə Baş İdarəsində müavin postunda oturaraq həm ona həvalə edilən vəzifəsinin öhdəsindən layiqincə gəlməyi bacardı, həm də səbrlə vaxtını gözlədi. Siyasi səhv buraxmadan Prezidentin sayəsində zəfər dönüşünü reallaşdıra bildi.
Ölkənin milli təhlükəsizliyinin keşiyində dayanan zabit və şəxsi heyətə, bu adsız və iddiasız qəhrəmanlara şükranlıqlarımızı bildirməklə, həm də onları təbrik edirik.
Vilayət Eyvazov: Prezident Ramil Usubovun DİN-dəki üslubunu davam etdirmək qərarı verdi
Ramil Usubovdan sonrakı dönəmdə polis naziri ola biləcəklər arasında Vilayət Eyvazovun adı ön sırada çəkilirdi. Lakin başqaları da vardı və iddiaçıların sayı heç də 1 rəqəmi ilə ölçülə bilməz…
Vilayət Eyvazov o zaman iqtidarı əlində silah qorudu: lakin bütün əski foto və videolardan da göründüyü kimi, o silah xalqa tuşlanmadı, mərmilər havaya atıldı, lakin havayı atılmadı…
İlham Əliyev iqtidarını sevməyənlər Vilayət Eyvazovu da sevmirlər. O, Azərbaycan dövlətinin ən həssas məqamında siyasi səhnəyə çıxıb, qətiyyət və güc göstərib, mövqeyini ortaya qoyub. Vilayət Eyvazov İlham Əliyevin və indi davam edən iqtidarın uğrunda döyüşüb, meydanda geri çəkilməyib. O və onun kimilər olmasa idi, 2003-cü ildə vəziyyət tamamilə başqa cür inkişaf edərdi; biz zamanında “səngərin” o tayından da siyasi səhnəyə baxmışıq, mənzərə və kimin kim olduğunu tam bilirik! O zamankı siyasi komanda, İlham Əliyev başda olmaqla, qətiyyət və iradə göstərdi. Lakin meydandakı polis gücü də bu qətiyyəti lazım olan qədər təmsil edə bildi.
Vilayət Eyvazov o zaman iqtidarı əlində silah qorudu: lakin bütün əski foto və videolardan da göründüyü kimi, o silah xalqa tuşlanmadı, mərmilər havaya atıldı, lakin havayı atılmadı…
Bəziləri daxili işlər naziri Vilayət Eyvazovun 2003-cü ildəki o fotosunu yeri gəldi-gəlmədi, ona qarşı qara piar kimi istifadə edir. Lakin dünyanın çox üzünü görmüş, dövlət və iqtidar çevrilişlərini yaşamış bir jurnalist kimi deyə bilərik ki, əslində bu foto bir polis kimi Vilayət Eyvazov üçün vizit-kartdır.
Unutmayaq ki, zamanında Elçibəy hakimiyyəti Usubov kimi polis naziri, Eyvazov kimi polis komandanı olmadı deyə, Surət Hüseynovun başıpozuq dəstəsinə məğlub oldu.
Yeni nazir Vilayət Eyvazov məhz şəxsi və peşəkar keyfiyyətlərinə görə ölkə prezidenti İlham Əliyev tərəfindən fərq edilib, vəzifə pillələrində hər zaman qabağa çəkilib. İndi ona növbəti etimad göstərilib. Onunla bərabər, həm də əfsanəvi nazir Ramil Usubovun xəttinə. Xətt də bəllidir: Azərbaycan polisi ölkəni və dövləti nəyin bahasına olur-olsun, qoruyacaq, bu istiqamətdə güc işlətməkdən belə çəkinməyəcək. Lakin stabillik naminə, Azərbaycan naminə güc olsun, amma xaos olmasın, qarşıdurma və ölümlər, insan dramları yaşanmasın…
Bildiyimiz həm də odur ki, DİN-də hər şey yerində saymayacaq: Vilayət Eyvazov polis sistemində yüksək intellektə və reformaçı təfəkkürə malik generallardandır. Ona Azərbaycan polisini ən müasir standartlara uyğunlaşdırmaq, modernləşdirmək kimi vəzifələr tapşırılıb və əzmkarlığı və inadı cənab Eyvazova bu sahədə lazım olacaq.
Mədət Quliyev: cana yatımlı, təvazökar, islahatçı və əlçatan bir DTX rəisi
Prezidentin Mədət Quliyevlə bağlı sərəncamı da maraqla şərh olunmaqdadır. Onun DTX-dən Müdafiə Sənayesi Nazirliyinə rəhbər təyinatı neçə gündür müzakirə olunur. O, Eldar Mahmudovun cinayətkar dəstəsinin canavara, qorxunc obraza döndərdiyi MTN-i olduqca ağır miras kimi qəbul etdi, həmin obrazı insaniləşdirdi, milliləşdirdi. Dövlət Təhlükəsizliyi Xidmətinə rəis gətirilən Mədət Quliyev özünün xarakterik göstəriciləri sayəsində cəmiyyətə göstərdi ki, heç də bütün təhlükəsizlik generalları Çovdarov, Mahmudov kimi amansız olmurlar! Sadə, cana yatımlı, təvazökar, islahatçı və əlçatan bir DTX rəisi tanıdı Azərbaycan ictimaiyyəti. O, kimlərinsə evini yıxmadı, pulunu yağmalamadı, günahsız adamların başına torba keçirdib, zirzəmilərə salmadı. Mədət Quliyevin təhlükəsizlik xidmətindəki dövrü keçid dövrü sayıla bilər: O, ağır “xəstəni reanimasiyadan palataya” çıxarmağı bacardı. İndi rahatlıqla başqa, çox ağır bir sahəyə transfer oluna bilər.
Formal və real olaraq onun vəzifəsi yüksəldilib: Prezident onu rəis statusundan azad edib, nazir statusuna gətirib. Lakin getdiyi sahə də təxminən MTN kimi çətin və problemlidir.
M.Quliyev nazir təyin edildikdən 1 gün sonra “Yeni Müsavat”a eksklüziv açıqlamasında demişdi: “Biz əsgərlərik. Dövlət başçımız uğurla, qətiyyətlə, mətinliklə dövlətimizi irəli aparır və dövlətimiz inkişaf edir. Biz də dövlətimizin başçısının ətrafında daha da sıx birləşərək, Azərbaycanın daha da qüdrətlənməsi və daimi zəfərləri naminə bundan sonra da bütün qüvvəmizlə və fədakarlıqla çalışacağıq, xidmət edəcəyik”.
Bəli, onun əsgərliyi indi də müdafiə sənayesi naziri kimi davam edir.
Mərhum Yavər Camalovdan miras qalan Müdafiə Sənayesi Nazirliyi çox güman ki, Mədət Quliyevin ora gəlişindən sonra xeyli dəyişəcək. Necə ki, M.Quliyev bundan əvvəl Penitensiar Xidmətdə və DTX-də ciddi dəyişikliklər etmişdi…
****
Prezident İlham Əliyev istəyir ki…
Bu yazımızla istədik ki, Prezident İlham Əliyevin son addımlarına dair bəzi düşüncələrimizi oxucularımız və tarixlə bölüşək.
Prezidentin son sərəncamlarının daha bir fəlsəfəsi də var: o, kimsəni cəzalandırmadan böyük bir siyasi tənlik həll etdi:Prezident Administrasiyası güclü və təcrübəli bir idarəedici – Dövlət Təhlükəsizlik Şurasının katibini qazandı; DİN sistemi həm yeniləndi, həm gücləndi, həm də 25 illik xəttini qorudu; Dövlət təhlükəsizliyi sistemi çoxdan gözlədiyi peşəkar idarəedicisinə qovuşdu, həm də ədalət bərpa olundu; Müdafiə sənayemiz yorulmaz və novator nazir əldə etdi…
Azərbaycan rəhbəri ölkəsinin və xalqının ətrafda cərəyan edən xaos və qarşıdurmalardan qorunması, sərhədləri içərisində firavan, rahat yaşaması üçün bəzi addımlar atır. Yaxın Şərq ölkələrindən tutmuş, Güney Qafqaza kimi, hər yer qaynayır, çox yerlər də destabilizasiya ocağı olmaq ərəfəsindədir. Qonşu və dost Gürcüstanda baş verənlərin, Qazaxıstanda, Moldovada, Ermənistanın sərhədləri içərisində cərəyan edənlərin fonunda Azərbaycan bir sabitlik adasıdır.
Sabitlik bizim ən böyük nemətimiz və gələcəyə gedən yolumuzdur!
Azər AYXAN,
“Yeni Müsavat” qəzeti baş redaktorunun 1-ci müavini