 |
 |
Bu gün Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Ekologiya və Təbii Sərvətlər Nazirliyinin Milli Hidrometeorologiya Departamentindən verilən məlumata görə, gecə bəzi yerlərdə yağış yağacağı ehtimalı var. Arabir güclənən şimal-qərb küləyi əsəcək.
Havanın temperaturu gecə 18-21° isti, gündüz 23-26° isti, Bakıda gecə 19-21° isti, gündüz 23-25° isti təşkil edəcək.
Atmosfer təzyiqi 758 mm civə sütunundan 763 mm civə sütununa yüksələcək. Nisbi rütubət gecə 70-80%, gündüz 50-55% olacaq.
Azərbaycanın rayonlarında hava əsasən yağmursuz olacaq. Lakin gecə və axşam bəzi dağlıq və dağətəyi rayonlarda şimşək çaxacağı, yağış yağacağı gözlənilir. Ayrı-ayrı yerlərdə leysan xarakterli olacağı, dolu düşəcəyi ehtimalı var. Gecə və səhər bəzi yerlərdə duman. Qərb küləyi ayrı-ayrı yerlərdə arabir güclənəcək.
Havanın temperaturu gecə 15-20° isti, gündüz 26-31° isti, dağlarda gecə 10-15° isti, gündüz 18-23° isti təşkil edəcək.
Sumqayıt şəhərinin sabiq icra başçısı vəfat edib.
ONA xəbər verir ki, Sumqayıt şəhər İcra Hakimiyyətinin sabiq icra başçısı Təvəkkül Yaqub oğlu Məmmədov 79 yaşında dünyasını dəyişib. T.Məmmədov uzun sürən xəstəlikdən sonra bu gün vəfat edib.
Qeyd edək ki, T.Məmmədov 1981-ci ildə Sumqayıt şəhər İcraiyyə Komitəsinin sədrinin birinci müavini vəzifəsinə irəli çəkilib. 1982-ci ilin iyun ayında İcraiyyə Komitəsinin sədri seçilib. Bu vəzifədə 1988-ci ilədək çalışıb. Sonra 3 saylı evtikmə kombinatının və Məişət kimyası zavodunun direktoru olub. 1995-ci ildən 2000-ci ilə kimi “Azərkimya” Dövlət Şirkətinin birinci vitse-prezidenti işləyib. Dəfələrlə Sumqayıt şəhər sovetinin və Ali Sovetin deputatı olub.
2000-2003-cü illərdə isə Sumqayıt şəhər İcra Hakimiyyətinin başçısı işləyib.
3 gün əvvəl Bakıda törədilmiş dəhşətli qəttlə bağlı bəzi məqamlar üzə çıxıb.
Publika.az xəbər verir ki, Nəsimi rayonu ərazisində binanın zirzəmisindən meyiti tapılan 30 yaşlı Orxan Əliyevin namus üstündə öldürüldüyü məlum olub.
Araşdırmalar zamanı məlum olub ki, hadisəni törədən 42 yaşlı Mehrac Qəhrəmanov bir neçə gün əvvəl həbsxanadan çıxıb. Əvvəllər də bir neçə dəfə məhkumluğu olan Mehrac azadlığa çıxandan sonra bacısının hərəkətlərindən şübhələnib. O, bacısının telefonunda Orxanla yazışmalarını tapıb və onu axtarmağa başlayıb. Bakının mərkəzində Orxanla görüşən Mehrac onunla dalaşıb və döyərək xəsarətlər yetirib. Bacısının sevgilisini öldürən şəxs onun meyitini Nəsimi bazarı kimi tanınan ticarət mərkəzinin yaxınlığındakı binalardan birinin zirzəmisinə ataraq uzaqlaşıb.
Artıq hadisəni törədən şəxs tutulub, faktla bağlı araşdırmalar davam etdirilir.
Sabirabad rayonunda yanğın hadisəsi baş verib.
Fövqəladə Hallar Nazirliyindən Milli.Az-a verilən məlumata görə, bir dam altında tikilmiş, hər birinin sahəsi 30 m² olan 2 mağaza və çay evinin lambirindən ibarət tavanı 90 m² sahədə yanıb.
Hər iki mağazanın, çay evinin qalan hissəsi və bitişik digər tikililər yanğından mühafizə olunub.
Baş vermiş hadisə yanğından mühafizə bölmələri tərəfindən söndürülüb.
Mingəçevirdə piyada ölümü ilə nəticələnən yol-nəqliyyat hadisəsi baş verib.
Milli.Az oxu.az-a istinadən bildirir ki, hadisə şəhərin Təbriz küçəsində qeydə alınıb.
Belə ki, 1994-cü il təvəllüdlü Hidanlı Anar Ağasəf oğlu idarə etdiyi "Mercedes Benz 210 D" mikroavtobus markalı, 45-BL-199 dövlət qeydiyyat nişanlı, 4 saylı şəhərlərarası sərnişin avtobusu ilə yolun qarşı tərəfinə keçmək istəyən piyada, 1954-cü il təvəllüdlü İsmayılova Şölə Qafar qızını vurub.
Piyada dərhal Mingəçevir şəhər Mərkəzi Xəstəxanasına aparılsa da, aldığı bədən xəsarətlərindən orada dünyasını dəyişib.
Meyit xarici və daxili müayinə üçün ekspertizaya göndərilib.
Faktla bağlı cinayət işi başlanıb, istintaq aparılır.
Ötən gün Bakıda doğuş zamanı növbəti ölüm faktı qeydə alınıb.
Milli.Az xəbər verir ki, bu haqda oxu.az-a Pirallahı rayon hüquq mühafizə orqanlarından məlumat verilib.
Belə ki, mayın 24-də 11:00 radələrində 10 saylı şəhər kliniki xəstəxanasında qeysəriyyə əməliyyatı zamanı 34 yaşlı Qala sakini Əsgərova Samirə Yusif qızı dünyasını dəyişib.
Qadının qan itkisindən vəfat etdiyi deyilir. Hazırda faktla bağlı rayon prokurorluğunda araşdırma aparılır.
Qeyd edək ki, Səhiyyə Nazirliyinin məlumatına görə, 2018-ci il ərzində ölkədə doğuş zamanı 17 qadın vəfat edib. 2017-ci ildə isə ölüm sayı 21 olub.
Binəqədi rayonunda üzərində zorakılıq əlamətləri olan kişi meyiti tapılıb.
“Qafqazinfo”ya daxil olan məlumata görə, ilkin araşdırma zamanı həmin şəxsin 1972-ci il təvəllüdlü Naxçıvan MR, Şərur rayonu, Danzik kənd sakini Sadıqov Zahid Yaqub oğlu olduğu müəyyənləşib. Onun Binəqədi rayonu, Ə.Nəvai küçəsində yerləşən 9 saylı yataqxananın qarşısındakı kafedə tapılmış meyitinin üzərində zorakı xəsarətlər müşahidə olunub.
Məlumat əsasında hadisə yerinə baxış keçirilib, fotoşəkillər çəkilib, mərhumun meyiti müayinə olunması üçün Məhkəmə-Tibbi Ekspertiza və Patoloji Anatomiya (MTE və PA) ETT Birliyinin Binəqədi rayon şöbəsinə göndərilib.
Faktla bağlı araşdırma aparılır.
Bakıda özünü körpüdən atmaq istəyən şəxs xilas edilib.
Fövqəladə Hallar Nazirliyinin saytı verdiyi xəbərə görə, nazirliyin “112” qaynar telefon xəttinə Bakı şəhərinin Sabunçu rayonunda 1 nəfərin körpünün üzərinə çıxaraq intihar etmək istəyini nümayiş etdirməsi barədə məlumat daxil olub.
Xüsusi Riskli Xilasetmə Xidmətinin müvafiq xilasetmə qüvvələri dərhal hadisə yerinə cəlb olunub. Vətəndaşla aparılan psixoloji söhbətlər nəticəsində o, özünə qəsd etmək fikrindən daşınıb.
Salyanda 2 nəfərin xəsarət alması ilə nəticələnən yol qəzası baş verib.
Milli.Az oxu.az-a istinadən xəbər verir ki, hadisə bu gün səhər saatlarında Ələt-Astara magistral yolunun 45-ci kilometrliyində rayonun Çuxanlı kəndi ərazisindən keçən hissəsində qeydə alınıb. Belə ki, Bakının Xırdalan qəsəbə sakini, 1966-cı il təvəllüdlü Allahverdiyev Məhərrəm Kamil oğlu idarə etdiyi "VAZ-2106" markalı avtombillə Astara istiqamətində hərəkətdə olarkən qəfil idarəetməni itirib, nəticədə avtomobil aşıb.
Hadisə zamanı müxtəlif dərəcəli bədən xəsarətləri alan sürücü və onun həyat yoldaşı, 1966-cı il təvəllüdlü Allahverdiyeva Sarıtel Məhərrəm qızı Salyan Mərkəzi Rayon Xəstəxanasına çatdırılıblar.
Faktla bağlı araşdırma aparılır.
Bakıda kafedə qətl hadisəsi törədilib.
Milli.Az Trend-ə istinadən xəbər verir ki, hadisə paytaxtın Binəqədi rayonundakı 9 saylı yataqxananın qarşısındakı kafedə baş verib.
Həmin kafenin icarədarı, Naxçıvan Muxtar Respublikasının Şərur rayonunun Danzik kəndində anadan olmuş, 1972-ci il təvəllüdlü Sadıqov Zahid Yaqub oğlunun üzərində xəsarətlər olan meyiti kafedə aşkar edilib.
Faktla bağlı Binəqədi Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb.
Keçirilən əməliyyat-axtarış tədbirləri nəticəsində qətl hadisəsini törətməkdə şübhəli bilinən 1998-ci il təvəllüdlü Hüseynov Əmrah Xəyal oğlu şübhəli şəxs qismində tutularaq istintaqa cəlb edilib.
Məlumata görə, Ə. Hüseynov hadisədən əvvəl kafedə Z.Sadıqovla yemək yeyib. Sərxoş vəziyyətdə olan tanışlar arasında mübahisə yaranıb və nəticədə Ə.Hüseynov kafenin icarədarını qətlə yetirib.