 |
 |
Azərbaycan Respublikasının Prezidenti İlham Əliyev martın 3-də Qazax Rayon Mərkəzi Xəstəxanasının açılışında iştirak edib.
Dövlətimizin başçısı xəstəxananın rəmzi açılışını bildirən lenti kəsdi.
Səhiyyə islahatlarının mühüm istiqaməti olan tibb müəssisələri şəbəkəsinin və strukturunun təkmilləşdirilməsi sahəsində son illərdə görülən işlər göz qabağındadır. Əhalinin sağlamlığının qorunmasında və tibbi xidmətin keyfiyyətinin yaxşılaşdırılmasında səhiyyənin prioritet sahələri üzrə qəbul olunan Dövlət proqramları müstəsna rol oynayıb. Bu proqramlar dövlət tərəfindən maliyyələşdirilib və ölkə üzrə bütün tibb müəssisələrinin yenidən qurulmasını əhatə edib.
Prezident İlham Əliyevin təşəbbüsü ilə reallaşdırılan sosialyönümlü siyasətin mühüm tərkib hissəsi kimi ölkədəki tibb ocaqlarında xidmətin pulsuz həyata keçirilməsi, əhalinin icbari tibbi sığortasının təşkil olunması və icrası uğurla davam edir. Ölkədəki səhiyyə islahatlarının əsas qayəsi həm də aztəminatlı və ağır xəstəliklərdən əziyyət çəkən insanların pulsuz dərmanlarla təmin olunmasına və müalicəsinə yönəlib.
Dövlətimizin başçısına məlumat verildi ki, Qazax Rayon Mərkəzi Xəstəxanasının binası 1969-cu ildə yataqxana kimi istifadəyə verilmişdi və uzun illər təmir işlərinin aparılmaması səbəbindən bina yararsız vəziyyətə düşmüşdü. Yeni xəstəxana binası üçün 2013-cü ildən başlayan tikinti işləri ötən ilin sentyabrında yekunlaşıb. Üç hektarlıq ərazidə 145 çarpayılıq müasir tibb müəssisəsi inşa olunub. Xaricdə istehsal olunan avadanlıqla təchiz edilən xəstəxana binasının ümumi sahəsi 22 min kvadratmetrdir. Burada doğum, terapiya, cərrahiyyə, uşaq xəstəlikləri, anesteziologiya-reanimasiya, poliklinika, şüa-diaqnostika, hemodializ və digər şöbələr fəaliyyət göstərəcək. Xəstəxana binasında qəbul, laboratoriya, təcili tibbi yardım şöbələri və Məhkəmə Tibbi Ekspertiza və Patoloji Anatomiya Birliyi ilə yanaşı, yoluxucu xəstəliklər korpusu, Gigiyena və Epidemiologiya Mərkəzi də fəaliyyət göstərəcək.
Prezident İlham Əliyevə icbari tibbi sığortanın tətbiqi ilə bağlı dövlət xəstəxanalarında tibbi fəaliyyətin təşkilindəki əsas dəyişikliklər barədə məlumat verildi. Bildirildi ki, təcili və təxirəsalınmaz tibbi yardım bölməsi həftənin 7 günü 24 saat fəaliyyət göstərərək müraciət edən xəstələrin çeşidlənməsini, stasionar şöbələrə yerləşdirilməmişdən əvvəl həkim nəzarəti altında müayinə və müalicələrinin həyata keçirilməsini təmin edir. Xəstələr bu bölmənin fəaliyyəti nəticəsində müşahidə altında saxlanılır, hər şey qaydasında olarsa, ambulator müalicə üçün evə yazılır, nəticədə stasionar şöbələrə düşən yükün həcmi kəskin azalır. Steril şəraitin təmin edilməsi üçün laboratoriya şöbələri xəstələrin birbaşa daxil ola biləcəyi ərazilərdən kənarda yerləşdirilib, qan və digər nümunələrin alınması üçün xüsusi otaqlar yaradılıb, zəruri avadanlıqla təmin edilib. Ambulator tibbi xidmətin göstərilməsi üçün xəstəxana binalarının birinci mərtəbələrində poliklinikalar yaradılıb. Bütün həkimlər ambulator xəstə qəbulunu poliklinikalarda həyata keçirirlər.
“Mənə verilən məlumata görə, son vaxtlar apteklərdə maskaların çatışmazlığı müşayiət olunur. Buna heç cür izahat tapmaq mümkün deyil. Çünki bizim kifayət qədər maska ehtiyatlarımız var. Görünür ki, hansısa möhtəkirlər bu vəziyyətdən istifadə edərək öz qanunsuz gəlirlərini artırmaq istəyirlər”.
Bu fikirləri Prezident İlham Əliyev Goranboy Rayon Mərkəzi Xəstəxanasının kolllektivi ilə görüşdə çıxışı zamanı bildirib:
“Bütün hüquq mühafizə orqanlarına tapşırıq verilib ki, əgər belə hallar aşkar olunarsa, bu hallara yol verən vətəndaşlara qarşı ən ciddi cəza tədbirləri tətbiq ediləcəkdir. Çünki indiki şəraitdən istifadə edərək, öz tamahını təmin etmək üçün bəd əməllərə üz tutan ünsürlərə qarşı ancaq çox ciddi cəza tədbirləri tətbiq edilməlidir.
Ona görə bir daha Azərbaycan ictimaiyyətini əmin etmək istəyirəm ki, Azərbaycan hökuməti bütün lazımi tədbirləri görür. Bu günə olan mənzərəyə görə, narahatlığa heç bir ciddi əsas yoxdur. Karantində qalan vətəndaşların mütləq əksəriyyətində hələ ki, heç bir xəstəlik əlaməti aşkarlanmayıb. Əgər onların sağlamlığı normal olarsa, lazımi müddətdən sonra evlərinə buraxılacaqlar. Hesab edirəm ki, bu günə qədər bu məlumat kifayətdir. Eyni zamanda göstəriş verilib ki, bu məsələ ilə bilavasitə məşğul olan bütün səhiyyə orqanlarının nümayəndələri – Səhiyyə Nazirliyi və İcbari Tibbi Sığorta Agentliyi müntəzəm olaraq vətəndaşları məlumatlandırsınlar”.
Mənə verilən məlumata görə, son vaxtlar apteklərdə maskaların çatışmazlığı müşayiət olunur. Buna heç cür izahat tapmaq mümkün deyil. Çünki bizim kifayət qədər maska ehtiyatlarımız var. Görünür ki, hansısa möhtəkirlər bu vəziyyətdən istifadə edərək öz qanunsuz gəlirlərini artırmaq istəyirlər”.Bu fikirləri Prezident İlham Əliyev Goranboy Rayon Mərkəzi Xəstəxanasının kolllektivi ilə görüşdə çıxışı zamanı bildirib:
“Bütün hüquq mühafizə orqanlarına tapşırıq verilib ki, əgər belə hallar aşkar olunarsa, bu hallara yol verən vətəndaşlara qarşı ən ciddi cəza tədbirləri tətbiq ediləcəkdir. Çünki indiki şəraitdən istifadə edərək, öz tamahını təmin etmək üçün bəd əməllərə üz tutan ünsürlərə qarşı ancaq çox ciddi cəza tədbirləri tətbiq edilməlidir.
Ona görə bir daha Azərbaycan ictimaiyyətini əmin etmək istəyirəm ki, Azərbaycan hökuməti bütün lazımi tədbirləri görür. Bu günə olan mənzərəyə görə, narahatlığa heç bir ciddi əsas yoxdur. Karantində qalan vətəndaşların mütləq əksəriyyətində hələ ki, heç bir xəstəlik əlaməti aşkarlanmayıb. Əgər onların sağlamlığı normal olarsa, lazımi müddətdən sonra evlərinə buraxılacaqlar. Hesab edirəm ki, bu günə qədər bu məlumat kifayətdir. Eyni zamanda göstəriş verilib ki, bu məsələ ilə bilavasitə məşğul olan bütün səhiyyə orqanlarının nümayəndələri – Səhiyyə Nazirliyi və İcbari Tibbi Sığorta Agentliyi müntəzəm olaraq vətəndaşları məlumatlandırsınlar”.
Xəbər verdiyimiz kimi, dünən Nazirlər Kabineti ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 3-dən 9-dək (ilk tədris günü mart ayının 10-u müəyyən edilir) bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına dair qərar qəbul edib.
Bəs tətil günləri tədris müddətində necə əvəz olunacaq? Bununla bağlı “Yeni Sabah”a açıqlama verən təhsil üzrə ekspert Kamran Əsədov bildirib ki, tətil müddəti 15 günü keçərsə, iyun ayının 14-dən sonra dərslər uzadıla bilər:
“Biz ilk növbədə diqqət yetirməliyik ki, Nazirlər Kabineti tətilə hansı səbəblərlə bağlı qərar verib. Nazirlər Kabinetinin qərarında göstərilir ki, məktəblər ona görə tətil edir ki, orada dezinfeksiya və digər texniki işlər görülsün. Çünki şagirdlərin aktiv hərəkəti zamanı bunu həyata keçirmək mümkün deyildi. Narahatlıq doğuran məqam odur ki, bütün resurslar sərf edilsə də, bu günə kimi çox az sayda məktəbdə dezinfeksiya işləri aparılıb. Konkret olaraq, ölkədə 4447 orta ümumtəhsil məktəbi mövcuddur, yalnız 140-da dezinfeksiya işləri aparılıb. Bu çox aşağı nəticədir”.
Ekspert həmçinin dərs ilinin uzadılacağıyla bağlı iddialara da münasibət bildirib:
“Bilirsiniz ki, ölkədə ilk virusa yoluxmayla bağlı məsələyə 14 gündən sonra aydınlıq gətiriləcək. Virusun ağırlıq səviyyəsi və əhatə dairəsi müəyyən edildikdən sonra tətil müddətinin artırılıb-artırılmaması müzakirə predmeti ola bilər. Məktəblərdə 150 min müəllim, 1,5 milyon şagird var. Burada hansısa virus və ya yoluxma halı müşahidə olunmayıb. Bu o demək deyil ki, olmayacaq. Buna bir neçə xəstəlik – qrip, malyariya və s. də təkan verə bilər. Ümumilikdə isə tətil müddətinin uzadılması gözlənilən deyil. Baş Nazirin dünənki qərarında tətil müddətinin yerinin dəyişdirilməsi qeyd olunmamışdı. Təhsil haqqında qanunda göstərilir ki, hər hansısa bir fövqəladə hal olarsa, müharibə şəraiti, yoluxucu xəstəliklər və s. təhsil müddətinin yeri dəyişdirilə bilər, dəyişdirilməyə də bilər. Onsuz da mart ayında 15 gün qeyri-iş günü idi. Martın 2-də uşaqlar məktəbə getmişdilər. Burada yalnız uşaqların getmədiyi günlərin sayı dörd gün olacaq. Əvəzedilmə elə olacaq ki, növbəti ayda, yəni aprel ayında boşluqlar tamamlanacaq. Aprel ayında heç bir qeyri-iş günü yoxdur və məktəblərimizin 85%-i 5 günlük sistemlə işləyir. Belə məktəblərdə şənbə və bazar həmin keçirilməyən dörd günü əvəz edə bilər. İkinci üsul isə bu dörd dərs gününü hər həftədə dərsləri birləşdirməklə pedaqoji standartlardan istifadə etmək mümkündür. Əgər tətil müddəti 15 günü aşmasa heç bir halda iyun ayının 14-dən sonra dərs salına bilməz. Amma 15 günü aşarsa, onu əvəz etmək mümkün olmayacaq və iyun ayında dərs müddəti uzadılacaq”.
Beynəlxalq təcrübəyə uyğun olaraq koronavirus infeksiyalarının laborator diaqnostikası üçün xüsusi dövlət tibb müəssisələri müəyyənləşdirilib. Xüsusi ayrılmış tibb müəssisələrindəki laboratoriyalar Ümumdünya Səhiyyə Təşkilatının (ÜST) müəyyən etdiyi bütün biotəhlükəsizlik və digər keyfiyyət standartlarına tam uyğun qurulub, analizlər yüksək ixtisaslı kadrlar tərəfindən icra olunur, test nəticələrinin düzgünlüyünə xüsusi proqramlarla nəzarət edilir.
Digər dövlət və qeyri-dövlət tibb müəssisələrində koronavirusun təyini məqsədilə laborator analizlərin aparılması qəti qadağandır! Bu tələbi pozan bütün tibb müəssisələrinə qarşı qanunvericiliyə uyğun olaraq müvafiq tədbirlər görüləcəkdir.
Son vaxtlar vətəndaşlarımızda koronavirus infeksiyalarının laborator diaqnostikasına dair bəzi suallar yaranıb. Nazirlər Kabineti yanında operativ qərargah bildirir ki, koronavirus infeksiyalarının vaxtında aşkar olunması üçün hazırda xəstəliyin geniş yayıldığı bölgədən gələn, yaxud həmin bölgədən gələnlə, eləcə də xəstəliyi təsdiq olunmuş şəxslə təmasda olan şəxslərdən analiz nümunələrinin götürülməsi vacibdir. Hazırda xüsusi ayrılmış dövlət tibb müəssisələrindəki laboratoriyalarda ÜST-ün protokoluna əsasən, sözügedən şəxslərin tibbi müayinələri dövlət büdcəsi hesabına həyata keçirilir.
Həmin şəxslər özlərində respirator xəstəlik əlamətləri (qızdırma, halsızlıq, öskürək, ürəkbulanma, nəfəs darlığı) hiss etdikləri halda dərhal 103 (Bakı daxili) və ya 113 (Bakıdan kənar) Təcili yardım nömrələrinə zəng edə və həkim müayinəsindən keçə bilərlər. (publika.az)
Vüqar Hüseynov: “Narazı olanlar bilsinlər ki, müasir laboratoriyalar qurulsa, bu, onların işini asanlaşdıracaq, xərclərini azaldacaq”
Xəbər verdiyimiz kimi, Kənd Təsərrüfatı Nazirliyi (KTN) İsmayıllı rayonunun Lahıc qəsəbəsində 10 min arı ailəsindən ibarət arıçılıq kompleksi təşkil edəcək. Bu layihə bir çox iqtisadçı və arıçı üçün ağlabatan gəlmir. Onların fikrincə, yeni arıçılıq kompleksi bu sahə üzrə özəl sektorun inkişafı üçün imkanlardan çox maneələr yaradacaq. Başqa sözlə, dövlət qurumunun bizneslə məşğul olması nə qədər doğru olacaq?
KTN-in mətbuat xidmətinin rəhbəri Vüqar Hüseynov AYNA-ya deyib ki, İsmayıllı rayonunun təbii iqlim şəraiti arıçılığın inkişaf etdirilməsi üçün əlverişlidir: “Bu gün o bölgədə çoxsaylı arıçılar fəaliyyət göstərir, İsmayıllı, xüsusilə də Lahıc balı yüksək keyfiyyət göstəriciləri ilə seçilir. Bunu hər bir arıçı təsdiqləyə bilər”.
Məlumat üçün deyək ki, kompleksdə 10 min arı ailəsinin yerləşdirilməsi düşünülür. Bir qrup arıçı bu kompleksin fərdi sahibkarları çökdürəcəyini iddia edir və bunu dövlət inhisarçılıq adlandırır. V.Hüseynov isə deyib ki, belə bir kompleksin yaradılması dövlət qurumunun sahibkarlıqla məşğul olması demək deyil: “Bu gün Azərbaycanda minlərlə arıçı var və hamısı satış məqsədilə arıçılıq məhsulları istehsal edir, yəni həm də sahibkarlıqla məşğuldur. Ölkədə hər il dövlət tərəfindən arıçılıq məhsullarının satış yarmarkası keçirilir, arıçılığın inkişafı üçün subsidiyalar ayrılır, hər arıçıya təsərrüfatında olan hər arı ailəsinə görə 10 manat subsidiya verilir. Bu amillər arıçılara yaradılan şəraitdən xəbər vermirmi? Yaradılan kompleks biznes strukturu deyil, burada damazlıq-seleksiya işlərinin aparılması, süni mayalanmanın təşkili nəzərdə tutulur. Kompleksdə eyni zamanda xüsusi laboratoriyalar, Tədris Mərkəzi də fəaliyyət göstərəcək”.
Nazirlik rəsmisinin sözlərinə görə, yeni kompleksdə damazlıq arılar yetişdiriləcək: “Bəzi ixtisaslaşmış arıçılar ölkəyə xaricdən damazlıq arılar gətirirlər, bazarda qeyri-rəsmi monopolist mövqeyə malikdirlər, qiymətləri diktə edirlər. Eyni məsələni arı pətəklərinin hazırlanmasına da şamil etmək olar. Kompleksdə hazırlanan pətəklər həm müasir tələblərə uyğun olacaq, həm də qiyməti ucuz olacaq”.
KTN sözçüsü düşünür ki, kompleksin inşası xaricdən arı yemi gətirib, yerli arıçılara “od qiymətinə” satanların bazarını öldürəcək: “Bu günədək arıçılıq məhsullarının analizi ilə bağlı əksər arıçılar xarici ölkələrə üz tutublar. Amma indi bunu özümüz edəcəyik. Eyni zamanda, müasir təlim mərkəzinin olması orada arıçılara müasir təlimlərin keçirilməsinə imkan verəcək. Halbuki indi bu təlimləri arıçılar öz təşəbbüsləri və maddi imkanları hesabına edirlər”.
“Hazırda nazirlik arıçılara subsidiya verir, onlar üçün yarmarka keçirir ki, balın qiymətini aşağı salsınlar. Başqa sözlə, dövlət arı məhsullarının istehsalı xərclərinin bir qismini öz üzərinə götürür, amma arıçıların böyük əksəriyyəti alverçidir, 30 manatdan aşağı bal satmırlar. Halbuki, eyni keyfiyyətdə bal İranda, Rusiyada, Türkiyədə 3 dəfədən də aşağı qiymətədir. Biz arıçılara deyirik ki, məhsullarınızı qablaşdırın, brendləşdirin, markalar yaradın ki, xaricə məhsul ixrac edə biləsiniz. Amma etmirlər”, – V.Hüseynov vurğulayıb.
“Kompleksin yaradılmasından narazı olanlar bilsin ki, müasir laboratoriyalar qurulsa, bu, onların işini asanlaşdıracaq, xərclərini azaldacaq. Həm də laboratoriyalar təkcə balın keyfiyyətini müəyyən etmək üçün qurulmur axı. Burada arı xəstəlikləri, başqa müayinələrin aparılması kimi məsələlər həyata keçiriləcək. Bir də bazara 10 min yeni arı ailəsinin gəlməsi alverçilərin süni qiymət artımın qarşısını alacaq”, – o, əlavə edib.
Masallı Rayon İcra Hakimiyyəti başçısının birinci müavini Nadir Abıyev işdən azad edilib.
Məlumata görə, icra başçısı Şahin Məmmədov ötən gün bu barədə əmr imzalayıb.
N.Abıyev xidmətdə olmanın yaş həddi ilə əlaqədar işdən azad olunub.
Qeyd edək ki, N.Abıyev Daşkəsənin icra başçısı Əhəd Abıyevin qardaşıdır.
“Qafqazinfo” məsələ ilə bağlı N.Abıyevlə də əlaqə saxlayıb. O, bu məsələ barəsində narahat edilməməsini xahiş edib.
Ötən gün Nazirlər Kabinetinin operativ qərargahı bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına dair qərar qəbul edib.
Nəticədə koronavirusa yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi, ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 9-dək (ilk tədris günü mart ayının 10-u müəyyən edilir) bütün təhsil müəssisələrində tədris, təlim-tərbiyə prosesinin dayandırılıb.
Qarşıdan Novruz bayramı gəlir və bununla əlaqədar paytaxtın bir sıra yerlərində kütləvi tədbirlər keçiriləcək. Bu isə öz növbəsində narahatlığı bir az da artırır. Nəzərə alaq ki, martın 16-dək teatr tamaşaları da təxirə salınıb.
Maraqlıdır, bayramla əlaqədar şəhərdə planlaşdırılan kütləvi tədbirlər də təxirə salına bilər? Ümumiyyətlə, bununla bağlı müzakirə aparılırmı?
Bakı şəhər İcra Hakimiyyətinin şöbə müdirinin müavini İsrafil Kərimov Cebhe.info-ya açıqlamasında bildirib ki, hazırda bununla bağlı heç bir müzakirə aparılmır: “Müzakirələr aparılmayıb, yenilik olsa, xəbərdar edərik”.
Prezident İlham Əliyevin 13 fevral 2020-ci il tarixli Sərəncamı ilə təsdiq edilmiş “Məşğulluq Strategiyasının həyata keçirilməsinə dair 2020–2025-ci illər üçün Tədbirlər Planı” növbəti beş ildə məşğulluq sahəsində mühüm irəliləyişlərə imkan yaradır.
Əmək və Əhalinin Sosial Müdafiəsi Nazirliyindən verilən məlumata görə, Tədbirlər Planına əsasən, əmək bazarının tənzimlənməsi istiqamətində hüquqi aktlarda dəyişikliklər edilməsinə, layiqli əməyin təmin olunması və qeyri-formal məşğulluğun qarşısının alınması məqsədilə minimum əməkhaqqının mərhələlərlə artırılmasına dair təkliflər hazırlanacaq.
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin yerli qurumlarında və “DOST” mərkəzlərində müasir standartlara cavab verən yeni məşğulluq xidmətləri modeli formalaşdırılacaq. Nazirliyin “Məşğulluq” altsistemi inkişaf etdiriləcək, sosial müdafiəyə xüsusi ehtiyacı olan və işə düzəlməkdə çətinlik çəkən şəxslərin aktiv məşğulluq tədbirlərinə cəlb edilməsi işi gücləndiriləcək. İşsiz və işaxtaran şəxslər üçün regional peşə təhsili mərkəzləri, həmçinin əlilliyi olan şəxslər üçün peşə-əmək reabilitasiya mərkəzləri şəbəkəsi genişləndiriləcək.
2020–2025-ci illər üçün nəzərdə tutulan tədbirlər sırasına qeyri-formal məşğulluğun qarşısının alınmasına yönəldilmiş kompleks tədbirlərin həyata keçirilməsi, iş yerlərində əmək şəraitinin yaxşılaşdırılması, əməyin mühafizəsi və texniki təhlükəsizlik tələblərinə riayət olunmasına dövlət nəzarətinin gücləndirilməsi də daxildir.
Eləcə də həmin dövr ərzində əlilliyi olan şəxslər üçün inklüziv əmək şəraitinin yaradılması məqsədilə müvafiq təkliflərin hazırlanması, işə düzəlmədə vasitəçilik edən hüquqi şəxslərin vahid reyestrinin yaradılması, əcnəbilərə və vətəndaşlığı olmayan şəxslərə iş icazələri verilməsi sisteminin tam elektronlaşdırılması, Mərkəzləşdirilmiş Karyera Portalının yaradılması təmin olunacaq.
İşəgötürənlərlə məşğulluq orqanları arasında əlaqə mexanizminin təkmilləşdirilməsi, bu orqanların fəaliyyətinin nəticəəsaslı keyfiyyət göstəricilərinin hazırlanması və tətbiqi də tədbirlər sırasında yer alır.
Özünüməşğulluğa cəlb edilmiş və biznes planlarını uğurla icra edən iştirakçıların “ABAD” mərkəzlərinin və KOB evlərinin xidmətlərinə istiqamətləndirilməsi üçün təkliflər hazırlanacaq. Haqqı ödənilən ictimai işlərin əhatə dairəsinin genişləndirilməsi və təşkili mexanizminin təkmilləşdirilməsi, səmərəliliyinin artırılması təmin olunacaq. (baku.ws)
“29 fevral tarixdən Azərbaycanla İran arasındakı sərhəddin bağlandığı bildirilib. Amma görünür ki bu məhdudlaşma yalnız vətəndaşlar üçün şamil olunub. Yük maşınları, TIR-lar eyni qaydada hərəkəti davam etdirir”.
Bunu ekspert Osman Gündüz deyib. O, düşünür ki bu, görülən tədbirlərin əhəmiyyətini azaltmaqla bərabər, sui-istifadə hallarına geniş imkanlar yaradacaq.
“Güman ki, başqa ölkələrin də yük maşınları Azərbaycan ərazisindən istifadə etməklə İrana keçməyə çalışacaqlar .
Artıq hər iki istiqamətdə uzun TIR növbələrinin də yarandığı bildirirlir.
Fikrimcə adı çəkilən məhdudlaşma qərarının bütövlükdə, bütün vasitələrlə gediş-gəlişə şamil edilməsi doğru olardı.
DGK-nın inzibati binasındakı böyük monitorlarda sərhəd buraxılış məntəqəlindəki real vəziyyət real vaxt rejimində görsənir.
Fikrimcə DGK –nın yaranmış situasiya ilə əlaqəli ölkənin sərhəd buraxılış məntəqələrindəki vəziyyət haqqında daha ətraflı məlumatlar verməsi faydalı olardı”. /Yenisabah/
ABŞ birjaları 2008-ci ildəki böhrandan bəri ən ağır günlərini yaşayır.
Turkustan.info xarici KİV-lərə istinadən xəbər verir ki, böhranın yaşanmasına səbəb koronavirusla bağlı yaranmış vəziyyətdir. Məlumata görə, koronavirus səbəbiylə iş adamlarının investisiya yatırmaqda tərəddüd etməsi birjalara təsirsiz ötüşmür. İqtisadçıların sözlərinə görə, böhran təkcə ABŞ birjalarına deyil, dünya birjalarına da təsir göstərir.
Dünya ölkələri arasında ticarət əlaqələrinin dayanması böhranı daha da dərinləşdirəcək. İqtisadçılar qarşıdakı günlərdə “Böyük iqtisadi böhran”ın baş verəcəyini proqnozlaşdırır.