Əməkdar artist Zaur Əmiraslanova vəzifə verilib.

Axşam.az məlumatına görə, o, Azərbaycan Dövlət Televiziya və Radio Qapalı Səhmdar Cəmiyyətinin Dövlət Səsyazma Studiyasının rəhbəri təyin edilib.

Sənətçi bu vəzifəyə AzTV-nin rəhbəri Rövşən Məmmədovun müvafiq əmri ilə təyin olunub.

Z.Əmiraslanov artıq ötən gün yeni rəhbər kimi kollektivə təqdim edilib.

Jurnalist Cavanşir Cahangirov vəfat edib.

"Ölkə.Az" xəbər verir ki, bu barədə APA-ya onun oğlu Cavid Cahangirov məlumat verib. Onun sözlərinə görə, uzun müddət xəstəlikdən əziyyət çəkən atası bu gün səhər saatlarında 1 saylı Şəhər Klinik Xəstəxanada vəfat edib.

Cavanşir Muradxan oğlu Cahangirov 30 oktyabrda 1955-ci ildə Bakıda anadan olub. 1962-1972-ci illərdə Bakıdakı 172 saylı orta məktəbdə təhsil alıb. 1982-ci ildə Bakı Dövlət Universitetinin jurnalistika fakültəsini bitirib. 1983-cü ildə Azərbaycan Dövlət Televiziya və Radio Verilişləri Komitəsində kiçik redaktor kimi fəaliyyətə başlayıb. 1986-1992-ci illərdə «Gənclik» redaksiyasında baş redaktor olub. 2009-cu ildən 2015-ci ilə kimi "Azərbaycan Televiziya və Radio Verilişləri" Qapalı Səhmdar Cəmiyyətinin sədr müavini vəzifəsində çalışıb. Hazırda isə Azərbaycan Radiosunun proqram direktorunun müavini və Teleradio Akademiyasının müəllimi vəzifələrində çalışırdı.

"Ölkə.Az" bu həftədən etibarən yeni rubrikaya start verir. "Şoumız" adlanan bu rubrikada həftə ərzində şou biznes aləmində baş verən əsas hadisələrdən Vüsalə Balayevanın təqdimatında xəbərdar olacaqsınız.

Elə həftə yeni başlamışdı ki, prodüser-aparıcı Toliklə şairə-aparıcı Nazilə Səfərli arasında baş verən qalmaqal günə damğa vurdu. Deməli, Tolik şairənin ad gününü özünəməxsus təbrik edib. O, N.Səfərlinin estetik əməliyyatlardan əvvəl çəkilən fotosunu öz “İnstagram” səhifəsində paylaşaraq, bu sözləri qeyd edib.



“Dedim ad gününü təbrik edim, çünki sən həyatda ən gözəlinə Allah tərəfindən deyil, həkimlər tərəfindən layiq olmusan! Eltondan da ayrı düşmə, hər zaman yanında ol! Bəlkə arzuların çin olar! Özü də ay yazıq qadın, Elton səni seçsəydi, dünən verilişində olardı. Yalandan deməzdin ki, guya Eltona təcili tibbi yardım gəlib”- deyə qeyd edib. Prodüser şairəni uzun müddət çalışdığı müğənni Elton Hüseynəliyevlə iş birliyinə son qoymaqda günahlandırıb.

Nazilə Səfərli isə öz növbəsində Tolikin tənqidlərinə yüngül cavab verməyə üstünlük verib. O, açıqlamasında “Mənim çox xoşuma gəldi. Hamı eyni təbrik etsə, maraqlı olmaz axı. Mən “blatnoy qızam”. “Blatnoy qızları”da belə ekstrim təbrik edərlər” - deyərək qalmaqala son qoyub. Bu yerdə bizə də şairənin səbrinə, təmkininə əhsən demək qalır.

Lakin bu həftə Nazilə Səfərli başqa qalmaqalla da yadda qalıb. Belə ki, o, əvvəl rəqqasə Fatimə Fətəliyevaya, daha sonra isə müğənni Könül Kərimovaya "söz atıb".

“Adama gülməli gəlir, qadın bacarıb bir dəfə ərdə otura bilməyib, ikinci dəfə ərə gedib, onda da alınmayıb, üçüncü dəfə ərə gedib. İndi gəlib gəlinlərə deyir ki, illərdir gəlinlərimizə,qızlarımıza xeyir-dua verirəm. Ay bala, sənin özünə vaxtında dua verilməyib, sən kimə dua verirsən?”- deyə xanım aparıcı bildirib.

Xınayaxdı mərasimlərinin təşkili işində rəqib olan bu iki xanımın arasından uzun müddət əvvəl qara pişik keçib.



Fatimə isə öz növbəsində “Azərbaycan dili” fənnindən Səfərliyə dərs keçib: "Heç bir leksik mənası olmayan insanlar özlərini əsas nitq hissəsi kimi aparır. Daha demirlər ki, işimin arxasınca düşüb cümlə üzvü olmaqla deyil, onsuz da hamı sənin qoşma olduğunu bilir”.

Ancaq bilmirəm Fatimə bunu özü yazıb, yoxsa kimsə kömək edib. Keçək N.Səfərlinin müğənni Könül Kərimovaya dediyi sözlərə. Şairə iddia edir ki, ifaçı onun sözlərinə yazılan mahnını ifa etdikdən sonra, villa alıb. “Mənim "Qardaş bu ceyranı hardan almısan" mahnımla Könül Kərimova özünə villa aldı, aşıq Samirə maşınını dəyişdi”- deyə aparıcısı olduğu verilişdə deyib.



Könül Kərimova isə villada 15 ildi yaşadığını bildirib. “Mən düşünürəm ki, Nazilə zarafat edib. Bu doğru ola bilməz. Çünki mən bu villada 15 ildir yaşayıram, amma Nazilənin mahnısını 2 ildir oxuyuram. Məgər mahnıya görə villa alırlar?”- ifaçı bu sözlərlə şairəyə cavab verib. Nə deyək, Allah mehriban etsin!

Keçək həftənin maqazin gündəmini güclü zəlzələ kimi silkələyən müğənnilər İlahə Fəda və Tacir Şahmalıoğlu arasında baş verən qalmaqala. Tacir Şahmalıoğlu efirdə İlahə Fədanın onun sosial şəbəkədə oğlunu çimizdirərkən hamamdan yayımladığı videosunu tənqid etməsindən danışarkən əsəbləşib.



“ Bu qadın xalq üçün nə edib ki, efirə çıxıb kimlərinsə tərbiyəsindən, əqidəsindən danışır. Ona bu ixtiyarı kim verib. Rövşanə xanımın verilişində çıxıb ağzına gələni danışıb. Elə bir qəbahət iş görməmişəm. Oğlumdur, 48 dərəcə istidə maykayla girib uşağı çimizdirmişəm. Burda nə var ki? Mən 10 milyon xalqın qarşısında özümü subut emişəm. Amma sən kimsən bilinmir və sənin kimliyini də sübut edə bilərəm. Amma çox heyif ki, ortada Fədayə xanım var”- deyə canlı efirdə İlahəni ağ yuyub, qara sərib.

Müğənni isə tənbəllik etməyib, canlı efirə qoşularaq Tacirə cavab verib - “Mən çox qısa cavab verəcəm. İt hürər, karvan keçər. Bu qədər”. Bu sözlərdən sonra Şahmalıoğlu daha da hiddətlənib. O, İ.Fədanı hədələməkdən də çəkinməyib. “Mən kişiyəm, yeri gəlsə onun başına oyun açaram. Amma ortada Fədayə və anası var. Mənim kişiliyimə yaraşmaz”.

Burada artıq bizə söz düşməz. Hər şey göz önündədir.

İlahə Fəda isə açıqlamasında sözünün üzərində qaldığını deyib. “Mən ümumiyyətlə Taciri adam yerinə qoymuram ki, onun dediyi hər hansı bir sözə fikir bildirim. Mən səhər canlı yayımda da dedim, konkret fikrimi bildirdim - “İt hürər, karvan keçər”. Bundan başqa o, bacısı Fədayə Laçının Tacirlə birgə toylarda iştirak etməsinə də münasibət bildirib. “Onları məclisə bir yerdə dəvət edirlər. Axı, o, kimdir ki, Fədayə ona görə, qazancından imtina etsin? Sadəcə, mən deyə bilərəm ki, o insanın bacımın həyatında mənfi rolu olduğuna görə, mənim o insanla ürəyim barışmır və mən də bunu açıq şəkildə hər yerdə deyirəm”. Bununla da Fədayə xanım T. Şahmalıoğlu ilə bağlı fikirlərinə son qoyub. Nə deyək, burda heyfsilənməyə dəyər. Çünki Tacir Şahmalıoğlu həqiqətən də bu sənətə öz səsi, istedadı ilə gəlib. Böyük kütlə tərəfindən sevilib. Ancaq hazırda ifaçının sənətdə qalmaqalla qalmağa üstünlük verməsi diqqətdən yayınmır.



Həftənin son qalmaqalı isə “pişik” ləqəbli Günel Ələkbərova və aparıcı Zaur Kamal arasında baş verib. Aralarında deyəndə ki, səhv başa düşməyin, sadəcə müğənni aparıcını sərt şəkildə tənqid edib. Zaur isə Günelə heç bir reaksiya verməyib. O, aparıcını qonaqlarını təhqir etməkdə günahlandırıb.

“Zaur müğənnini çağırır, canlı efirdə onu alçaldır. Sən aparıcısan, verilişini aparmalısan. İnsan ilk növbədə özünü doğru, düzgün aparmalıdır ki, sonra da proqram aparsın. Çünki veriliş aparmaq bir məsuliyyətdir”. Deyir bu şousuz biznes var ha, (daha doğrusu toy-biznes) o çox qəliz məsələdir. Ən yaxşısı başımızı salaq aşağı sakitcə işimizi görək. Yoxsa bu baş bizi çox uzaqlara aparar.

 

Azərbaycan Xalq şairi Vaqif Səmədoğlunun anadan olmasının 80-ci ildönümü ilə əlaqədar Ankarada yubiley tədbiri keçiriləcək.

 “AzərTac” xəbər verir ki, fevralın 5-də Beynəlxalq Türk Mədəniyyəti Təşkilatının (TÜRKSOY) qərargahında reallaşacaq tədbirdə rəsmi şəxslər, elm və mədəniyyət adamları, vaqifsevərlər iştirak edəcəklər.

Tanınmış şair-dramaturqun həyat və yaradıcılığı barədə iştirakçılara geniş məlumat veriləcək, sonra ədəbi-musiqili proqram olacaq.

Ölkəmizdən də geniş tərkibli heyətin yubiley mərasiminə qatılacağı nəzərdə tutulur.

Yersiz və əsassız qadağalara tuş gəlirəm. Çoxları deyir ki, belələri niyə efirə çıxır? Bunlar niyə oxuyur? Bunlar niyə üzdədir? Bunlara kim qulaq asır? Hardadır o dedikləri milyon baxışlar? Bunlar hamısı saxtadır, yalandır. Amma repertuarıma nəzər salsaq, görərik ki, nə mahnılarımın sözlərində, nə melodiyalarında, nə də ki çəkdirdiyim kliplərdə bayağılıq və bəsitlik var.

Bu sözləri müğənni Damla “ATV Maqazin 10larla” proqramının “33 sual” rubrikasinda deyib.  

Sənətçinin “İkinci dəfə ərə getmək planınız var?” sualına reaksiyası belə olub:  

“Allah nə yazıbsa, o da olacaq. Bu dəqiqə deyim ki, namizəd var və mən ərə gedirəm, belə bir şey yoxdur. Hər qadın kimi həyatımda sevgi olmasını mən də istəyərəm. Amma qısa müddətli, əyləncəli, zamanı boşa xərclənən münasibətlərdən qaçıram. Çünki duyğularım və hisslərim mənim üçün çox qiymətli və dəyərlidir. Hər dəfə onu alıb, sata bilmərəm”.  

Daha sonra Damla illər öncə Nadir Qafarzadə və Xalq artisti Tünzalə Ağayevanın onun barəsində söylədikləri tənqid dolu fikirlərə münasibət bildirib:  

“İstər bizdən yaşca böyük sənətkar olsun, istər bu sahədə illərlə çalışanlar olsun, çox istərdim ki, yeni gələn ifaçılara müraciət formalarında bir az etika qaydalarına riayət etsinlər. Bu gün mən gəncəm, hər hansısa bir Xalq artisti əl sallayaraq, kəskin formada və sərt şəkildə məni tənqid yox, təhqir edirsə, mən də illər sonra səhnəyə gələn yeni ifaçılara eyni reaksiyanı verəcəm. Bunu mən zamanında Xalq artistlərindən belə görmüşəm. Zamanında məni təhqir ediblərsə, mən də yeni gələn ifaçılara bu cür münasibət göstərməliyəm. Bizi təhqir edib ələ salmaq, yaradıcılığımızı gülüş obyektinə çevirmək doğru deyil. Tünzalə Ağayeva pedaqoqdur. Həm də gözəl bəstəkardır. O xanım barəmdə daha gözəl çıxış edə bilərdi”.  

Damla sözügedən proqramda“Azərbaycanda “Meqastar” yoxdur” deyərək, iddialı fikirlər səsləndirib. O, bu mövzuda fikirlərini belə ifadə edib:  

“Azərbaycanda dünya ulduzu yoxdur. Yalandan yekə-yekə danışmayaq. Bizim bütün dünyada tanınan bir sənətçimiz yoxdur. Kişi sənətçilərin canında tənbəllik var. “Meqastar” deyə biləcəyim Azərbaycanda kişi müğənnisi yoxdur”.  

"Bu sözləri "Kult.az"a Xalq artisti Afaq Bəşirqızı Feysbukda adına açılan saxta profil və oradan edilən paylaşımlar barədə danışarkən deyib.

A.Bəşirqızı bildirib ki, saxta səhifənin açılmasından xəbərsizdir:

“Mənim xəbərim yoxdur, indi sizdən eşidirəm. Hansısa deputatlığa namizədlə bağlı paylaşım da etməmişəm və heç vaxt belə şeylərə qatılmıram, bu kimi şeylərdə iştirak etmirəm. Səhifəni kim açıb, daha sonra kim silib, məlumatsızam”.

Xalq artisti bildirib ki, iki ilə yaxındır açdığı şəxsi səhifəsindən başqa sosial şəbəkədə heç bir səhifəsi yoxdur:

“Mənim Feysbuk şəxsi və rəsmi səhifəm “Afaq Bəşirqızı”dır. İki ilə yaxındır ki, o səhifəni açmışam və ondan başqa səhifəm yoxdur. Şəxsi səhifəmdə heç vaxt hansısa deputatla bağlı paylaşım etməmişəm, məlumat paylaşmamışam. O səhifə mənə aid olduğu üçün paylaşımlar da mənə aiddir. Ümumiyyətlə, hansısa deputata vəkillik etmək, onu tərifləmək kimi şeylərdən uzağam”.

A.Bəşirqızı deputatlığa namizədlərdən ona dəstək olmaq üçün müraciət edənlərin olduğunu da bildirib:

“Mənə gələn bu kimi təklifləri hər dəfə rədd etmişəm. Mənə elə gəlir ki, millət vəkili özünü xalqın qarşısında doğrultmalıdır. Millət vəkilliyinə iddialı olan şəxsin kiminsə tərifinə ehtiyacı olmamalıdır. Əgər ehtiyac olsaydı, mən onlarla bağlı nə isə söz deyərdim. Ancaq o adamlar özləri buna ehtiyac duymayıblar, özlərinə və xalqın onlara olan etimadına inanırlar”.

Bəşirqızı əlavə edib ki, növbəti dəfə onun adından bu kimi səhifə açan şəxslərə qarşı daha sərt addım atacaq:

“Mənim adımdan bu kimi saxta səhifə yaradan şəxslərə səslənərək bildirirəm ki, özlərini yığışdırsınlar. Əgər belə bir hal təkrarlansa, mən o adamın tapılması ilə bağlı müvafiq addım atacaq və o şəxsə qarşı olduqca sərt addımlar atacağam”.

Xatırladaq ki, Xalq artisti Afaq Bəşirqızının adından saxta profil açılıb. “Qusi.aliyev.545” nikindən açılan Feysbuk səhifəsində Afaq Bəşirqızının adından deputatlığa namizəd Əziz Ələkbərlinin təbliğat videosu paylaşılıb və onu dəstəkləmək üçün çağırış edilib.

“Koronavirusla bağlı hərə bir söz deyib, milləti dəli etməsin. Hələlik Azərbaycanda virus yoxdur”.

Bu sözləri Oxu.Az-a Azərbaycan Tibb Universitetinin (ATU) dosenti, tibb elmləri üzrə fəlsəfə doktoru Rəşid Mahmudov koronavirusla bağlı son günlər mediada yayılan müxtəlif məlumatlara münasibət bildirərkən deyib.

R.Mahmudov deyib ki, istənilən halda insanlar maksimum dərəcədə ehtiyatlı olmalıdırlar:

“Bu gün Azərbaycanda koronavirus yoxdur. İnsanları təlaşlandırmasınlar. Bu virus Çinin bir sıra əyalətlərində yayılıb. Koronavirus, əsasən, balıqda, ət məhsullarında olur. Çindən başqa ölkələrə, eləcə də, Azərbaycana heç kim buraxılmamalıdır. Onsuz da karantin elan edilib, ciddi nəzarət var.

Çindən ölkəyə gələn şəxsləri 3-4 gün saxlayıb, həkim müayinəsindən keçirirlər. Hər hansı iltihab prosesi, qızdırma, öksürək kimi simptomlar aşkarlanmırsa, onları insanlarla eyni mühitə buraxmaq olar”.

R.Mahmudov Çindən idxal edilən məhsulların risk faktoru kim virus daşıyıcısı ola biləcəyini də qeyd edib:

“Əlbəttə ki, bu ərəfələrdə Çindən heç nə almaq lazım deyil. Virus Çinin bütün əyalətlərinə yayılmasa da, risklidir. Hansı ərazidə virus aşkarlanıbsa, o ərazilərdən və ya yaxınlığından sifarişlərin ölkəyə girişinə icazə vermək olmaz. Bunu da aidiyyəti qurumlar nəzarətdə saxlayır. Bu virus insandan insana hava yolu ilə yoluxur”.

Koronavirus əleyhinə vaksin hazırlanmasının asan olmadığını deyən R.Mahmudov buna ən azı üç ay vaxt lazım olduğunu deyib:

“Vaksin hazırlamaq asan deyil. Bunun üçün virusun üzərində laboratoriyada müəyyən prosedurlar aparılmalıdır. Vaksinin hazırlanmasına ən azı üç ay vaxt lazımdır. Çində olan tələbələrimiz də, virusa yoluxmaq istəməyən insanlar da ünsiyyətdən maksimum çəkinməlidirlər. Mümkün qədər evdən çıxmasınlar”.

Daxili İşlər Nazirliyinin (DİN) əməkdaşı, polis leytenantı Tural Sofuyev nümunəvi addım atıb.

Bu barədə sosila mediada məlumat yayılıb. Qeyd edilib ki, DİN əməkdaşı yanvarın 19-da 1 yaşlı oğlu Məhəmmədə kiçik toy edib. Polis leytenantı toya “Ümid evi” körpələr evində məskunlaşmış 4 azyaşlını – Mərhəmət, Hacı, Novruz və Yusifi dəvət edib. Balaca qonaqlara da öz oğlu ilə birlikdə toy qiyafəsi geyindirib və bəylik kürsüsünə əyləşdirib. Körpələr evinin sakinlərini öz övladlarından fərqləndirməyən leytenant və mərasimin digər qonaqları uşaqları rəqsə dəvət edib, diqqət, qayğı göstəriblər.

Polis əməkdaşı həmin kimsəsiz körpələrin də sünnət xərclərini öz üzərinə götürüb. Onlar bu həftənin cümə axşamı günü “Topçubaşov” adına xəstəxanada sünnət əməliyyatı ediləcəklər.

Qeyd edək ki, Tural Sofuyevin bir qızı, bir oğlu var. (redaktor.az)