 |
 |
Avropa Parlamentində “Ədalət və Demokratiya naminə Avropa Erməniləri Federasiyası” və “Tufenkian fondu” tərəfindən “Armenophobia” adlı konfrans keçirilib.
Baku.ws xəbər verir ki, İtaliyada iqtisadi hüquq təhsili alan, Avropa Parlamentində təcrübə proqramı keçən Azərbaycanlı tələbə Qasım İbrahimov həmin konfransda iştirak edib.
Həmyerlimiz tədbirin təşkilatçılarına sual ünvanlayıb və erməni siyasətçilər suala cavab verə bilməyiblər.
Sözügedən tədbirin videosu sosial şəbəkələrdə böyük marağa səbəb olub.
<iframe src="http://baku.ws/video2/v.php?v=1220250" width="640" height="360"></iframe>
Həmin videonu təqdim edirik:
Prezident İlham Əliyev Milli Televiziya və Radio Şurası üzvlərinin təyin edilməsi haqqında sərəncam imzalayıb.
Sərəncamda qeyd olunur ki, aşağıdakı şəxslər 6 il müddətinə Azərbaycan Respublikasının Milli Televiziya və Radio Şurasının üzvləri təyin edilsin:
Balakişiyev Bəxtiyar Qaraca oğlu
Əliyeva Telli Pənah qızı
Aprel hərbi uğurunun ildönümü, yaxınlaşan seçim anı; havaların istiləşməsi ilə “hərb, yoxsa sülh” dilemmasının “donu” açılır; Kremlin danışmanı: “Konfliktlə bağlı qərar qəbul eləmək zamanı çatıb...”
“Paşinyan indi sanki iki divar arasındadır. Bir yandan, daxili siyasətdəki ultra-millətçilikdən, - harada ki, Dağlıq Qarabağ məsələsi, Qarabağın statusu müzakirə edilmir, - istənilən kənara çıxma həmişə qəliz olub. Ermənistanda Qarabağ mövzusu ətrafında millətçi ritorika hakimiyyətdə qarabağlıların olması səbəbi ilə daim mühüm alət rolu oynayıb. Heç kim də məsələni daha ölçülü-biçil təqdim edə bilməyib”.
“Yeni Müsavat” xəbər verir ki, bu sözləri “Moskva-Baku” portalına Beynəlxalq Avrasiya Hərəkatının lideri, tanınmış politoloq, Kremlin danışmanlarından sayılan Aleksandr Duqin Dağlıq Qarabağa dair sülh danışıqları ətrafında son durumu şərh edərkən bildirib.
Onun sözlərinə görə, müasir Ermənistanda baş nazir Nikol Paşinyan bu məqamı ciddiyə almaya bilməz. “Onun hakimiyyətdə qalması xeyli dərəcədə ölkədəki populist millətçi ovqatdan asılı olacaq. Başqa yandan, geosiyasətdə ölkələrin daxili faktorlarını ən az nəzərə alırlar və bu faktorlar dominant olmur”, - deyə o qeyd edib.
ATƏT-in Minsk Qrupu həmsədrlərinin Nikol Paşinyanı pərt edən son bəyanatına toxunan Duqin deyib: “Həmsədrlər bəyan elədilər ki, Azərbaycan və Ermənistan rəhbərləri görüşə razılıq veriblər. Beləcə, Paşinyan heç bir ön şərt olmadan ikitərəfli formatda danışıqlara gedir. Bu da Qarabağ prosesində yaxşı dönüşdən xəbər verir. Mənim fikrimcə, Nikol Paşinyanı şeytanlaşdırmaq lazım deyil və onun sözünə yox, əməlinə fikir vermək lazımdır. Əgər o, həqiqətən də Azərbaycan prezidenti ilə görüşə razılıq veribsə, bu, o anlama gələcək ki, gerçəkdən də özünün ritorikasına rəğmən, problemin rasional həllinə doğru irəliləyir və ”Yol xəritəsi"n müzakirə eləməyə hazırdır. Bu, ümumiyyətlə, çox şeydən xəbər verir. Əgər o, danışıqlar prosesində məsul rəhbər kimi ölkəsi üçün fundamental geosiyasi proseslərdə rasional yanaşma ilə çıxış eləməsə, qəti olaraq populist nəzər-nöqtəsinə tapınsa və yerli millətçi ruhlu əhalinin istəyini təmin eləmək yolu tutsa, o zaman hakimiyyəti, sadəcə, itirəcək. Geosiyasi nöqteyi-nəzərincə, bu konfliktlə bağlı qərar qəbul eləmək zamanı çatıb".
Rusiyalı politoloqa görə, danışıqlara gəlməklə, Paşinyan rasional siyasətçi sifətini göstərmiş olacaq: “Rusiya üçün münaqişə tərəflərinin bir-biri ilə haqq-hesab çəkməsi yox, sülh əldə eləməsi vacibdir. Əgər Paşinyan rasional, məsuliyyətli mövqe sərgiləsə, o zaman bunu alqışlamaq, dəstəkləmək lazımdır. Azərbaycan və Ermənistan liderlərinin ictimai səviyyədə də, konstruktiv, pozitiv məcrada görüşünü hər vəchlə dəstəkləmək və hazırlamaq gərəkdir. Azərbaycan və erməni xalqlarına anlatmaq lazımdır ki, sülh mümkündür. Bəli, şərtlər çox qəlizdir, çox çətin situasiyadır, axı bu, ən mürəkkəb geosiyasi konfliktlərdən biridir, amma sülh mümkündür. Rusiyanın hələ Sərkisyan dönəmində irəli sürdüyü planın - 5 rayonun qaytarılması - istiqamətində hərəkət eləmək lazımdır. Görünür, özlərinin son bəyanatında Helsinki Yekun Aktından danışan MQ həmsədrləri də buna amid edirlər. Bunu insanlara izah eləmək, mövcud situasiyada nə dərəcədə mühüm olduğunu göstərmək lazımdır. Bu plan qarşıdakı görüşdə müzakirə olunmağa bilməz. Paşinyan artıq hakimiyyətdə möhkəmlənib və Rusiya ona xatırladır ki, onun sələfləri ilə konkret anlaşmalar var idi, Moskva Qarabağ probleminin həllində irəliləyiş tələb edir”.
Aleksandr Duqin sonda bildirib: “Moskva Azərbaycan və Ermənistanın, qardaş xalqların maraqları naminə hərəkət edir. Dağlıq Qarabağ münaqişəsi üzrə nizamlanmanı konkret pozitiv axarda irəli aparmağın zamanı yaxınlaşıb”.
*****
Amma Rusiya cəmi bir həftə öncə Kremlin rüsxəti ilə yaradıldığı doğurmayan və rəhbəri Dövlət Dumasının komitə sədrinin müavini Konstantin Zatulinin olduğu “Lazrev klubu”nun Moskva iclasına Qarabağdakı separatçı rejimin nümayəndəsini dəvət eləmişdi. “Dqr”in “iqtisadi inkişaf və infrastruktur naziri” Levon Qriqoryan orada çıxış da elədi və Azərbaycana qarşı hədyanlar səsləndirdi.
Bu xüsusda Rusiyanın Dağlıq Qarabağ ixtilafının həllində səmimi şəkildə maraqlı olduğunu söyləmək çətindir. Duqinin yalnız bu fikri ilə razılaşmaq olar ki, konfliktin həllində həqiqətən konkret “Yol xəritəsi”ni əsas götürüb irəliləyişə nail olmağın zamanı çatıb. Bunu indi həm də havaların istiləşməsi ilə “Hərb, yoxsa sülh” dilemmasının “donu”nun tədricən açılması diktə edir. Nədən ki, yaz-yay mövsümü hərb əməliyyatlar üçün ən əlverişli dövrü sayılır.
Azərbaycanın 2016-cı il aprel uğurlu hərbi kampaniyası da bu dönəmə təsadüf edib. Əfsuslar olsun ki, o vaxt Moskva məlum səbəbdən ordumuza daha böyük əraziləri azad eləməkdə əngəl oldu. Bu dəfə vəziyyət dəyişə, Qarabağın azadlığına hesablanmış və yarımçıq qalmış “Yol xəritəsi” davam etdirilə bilər...
*****
Yeri gəlmişkən, Azərbaycan ordusu ərazilərimizi güc yolu ilə azad eləmək üçün özünün hərbi və döyüş qabiliyyətini durmadan artırır. Belə ki, martın 11-də başlayan və hazırda davam edən 5 günlük genişmiqyaslı hərbi təlimlərin gedişində yeni alınan silah-sistemlərdən “Polonez” yaylım atəşli reaktiv sistemləri dünən uğurla sınaqdan keçirilib.
Belarusdan tədarük edilən həmin sistemlər ermənilərin çox öyündüyü “İsgəndər M” sistemlərinin analoqu sayılır. Bu üzdən KRTM üzvləri olan Belarus və Ermənistan arasında həmin silahlara görə yaranan qalmaqal hələ də davam edir. Ancaq bu, bizim problem deyil. Bizim problem məlum. 4 günlük uğurlu aprel kampaniyasının yaxınlaşan 3-cü ildönümü bu xüsusda yeni dönüş nöqtəsi ola bilər...
“Nə qədər müxtəlif ambisiya, müxtəlif maraqlar və hədəflər var, belə də olacaq”
Azərbaycan Dövlət Təhlükəsizlik Xidməti “Bəhreyn-Moskva” marşrutu üzrə uçuş edən Rusiya təyyarəsinin Bakıya təcili eniş etməsi ilə bağlı məlumat yayıb.
Məlumatda bildirilir ki, martın 11-də saat 14:15-də Azərbaycanın hava məkanından keçməklə “Bəhreyn-Moskva” marşrutu üzrə uçuş edən Rusiyanın “Uralskiye Avialinii” aviaşirkətinə məxsus “Aerobus 321” tipli təyyarədən Heydər Əliyev Beynəlxalq Hava Limanının dispetçer məntəqəsi ilə əlaqə saxlanılaraq, gövdəsində 222 sərnişinin və ekipaj üzvünün olduğu hava gəmisinin salonunda partlayıcı vasitə olmasına dair yazının aşkar edildiyi barədə məlumat verilib, təyyarə hava limanına məcburi eniş edib:
“Mövcud beynəlxalq və milli qanunvericiliyə uyğun olaraq, hadisə ilə əlaqədar kompleks təxirəsalınmaz prosedur tədbirlərə başlanılıb.
Prezident İlham Əliyevin göstərişi ilə yaradılmış Qərargahın sədri – Dövlət Təhlükəsizliyi Xidmətinin rəisi general-polkovnik Mədət Quliyev, Dövlət Sərhəd Xidmətinin rəisi general-polkovnik Elçin Quliyev, Dövlət Gömrük Komitəsinin sədri gömrük xidməti general-leytenantı Səfər Mehdiyev, “Azərbaycan Hava Yolları” QSC-nin prezidenti Cahangir Əsgərov və digər aidiyyəti dövlət orqanlarının məsul şəxsləri hava limanına gəliblər.
Müvafiq tədbirlər çərçivəsində hava gəmisinin sərnişinləri və ekipaj üzvləri çevik təxliyyə olunub, zəruri şəraitlə təmin edilib, psixoloji və digər yardıma ehtiyacı olanlara xüsusi diqqət göstərilib. Hüquq mühafizə orqanlarının mütəxəssislərindən ibarət əməliyyat-istintaq qrupu və xüsusi təyinatlı heyət tərəfindən texniki, kinoloji və digər vasitələrdən istifadə etməklə təyyarədə kompleks antiterror yoxlamaları aparılıb, hava gəmisinə baxış keçirilib, hadisənin səbəbi ilə əlaqədar hərtərəfli araşdırmalara başlanılıb. Nəticədə təyyarədə partlayıcı maddə və qurğuların olmadığı müəyyənləşdirilib, hadisənin səbəbi ilə bağlı əldə edilməsi təxirəsalınmaz olan məlumatlar toplanılaraq rəsmiləşdirilib.
Hazırda hava gəmisinin sərnişinləri və ekipaj üzvləri müvafiq qaydada yerləşdiriliblər. Təyyarənin ən qısa zamanda təyinat nöqtəsi üzrə uçuşu təmin ediləcək. Beynəlxalq Hava limanı ştat rejimində fəaliyyətini davam etdirir”.
“Dağlıq Qarabağ münaqişəsi yalnız sülh yolu ilə həll oluna bilər”.
“Report” “RİA Novosti”yə istinadən xəbər verir ki, bunu NATO baş katibinin Cənubi Qafqaz və Mərkəzi Asiya ölkələri üzrə xüsusi nümayəndəsi Ceyms Appaturay İrəvanda jurnalistlərə bildirib.
“Biz münaqişələrin həllinə cəlb olunmuruq, amma müttəfiqlərimiz və tərəfdaşlarımız regionda sülh olmasında maraqlıdır… NATO-nun rəyincə, bu münaqişə yalnız sülh yolu ilə həll oluna bilər, uğurlu hərbi variant yoxdur. Bu mövqeyi bütün tərəflərin nəzərinə çatdırıram”, – deyə o qeyd edib.
Ramil Məmmədli: “Bu, Ermənistana ciddi ismarışdır”; Emil Həsənli: “Azərbaycan dövləti hər zaman müharibəyə hazırdır”
Azərbaycan ordusu genişmiqyaslı təlimlərə başlayıb. Müdafiə Nazirliyinin mətbuat xidmətindən “Report”a verilən məlumata görə, təlimlər Azərbaycan prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən keçirilir.
Müdafiə naziri general-polkovnik Zakir Həsənovun rəhbərliyi altında keçirilən genişmiqyaslı təlimlər martın 11-dən 15-dək davam edəcək. Təlimlərə 10.000 nəfərədək şəxsi heyət, 500-dək tank, zirehli texnika, eləcə də avtomobil və xüsusi texnika, 300-dək müxtəlif çaplı raket və artilleriya qurğusu, reaktiv yaylım atəşi sistemi və minaatan, 20-dək müxtəlif təyinatlı ordu və cəbhə aviasiyası cəlb olunub.
Təlimlərdə qoşunlar hücum əməliyyatının hazırlanması, şərti düşmənə bir neçə istiqamətdə zərbə vurulması, onun müdafiəsinin yarılması və qruplaşmalarının darmadağın edilməsi, eləcə də düşmən ərazisinin dərinliyində yerləşən hərbi və strateji obyektlərə raket-artilleriya zərbələrinin endirilməsi tapşırıqlarını yerinə yetirir.
Eyni zamanda təlim mərkəzləri və ümumqoşun poliqonlarında müasir silah sistemləri və vasitələrinin tətbiqi ilə döyüş atışları, o cümlədən raket buraxılışları praktiki icra olunur.
Azərbaycan ordusunun uzunmüddətli təlimlərə start verməsi, xüsusilə təlimlərin aprel müharibəsinin üçilliyi ərəfəsinə təsadüf etməsi geniş müzakirələr doğurub. Hərbi ekspertlər bu təlimlərin belə geniş şəkildə keçirilməsinin səbəbləri ilə bağlı fərqli fikirlər səsləndirirlər. Əsas ehtimallardan biri ondan ibarətdir ki, Azərbaycan təcavüzkar Ermənistana növbəti mesajını ünvanlayır.
Hərbi-siyasi icmalçı Ramil Məmmədli Azərbaycan tərəfin müharibəyə hazırlaşdığını düşünür: “Azərbaycan ordusu 2019-cu ilin ilk irimiqyaslı hərbi təlimlərinə başlayıb. Təlimlərdə texnikaların təyinatlarına nəzər yetirdikdə Azərbaycan ordusunun hücuma hazırlaşdığı tam aydın olur. Müdafiə Nazirliyinin rəsmi açıqlamasından da bəlli olur ki, ordumuz təlimdə hücum əməliyyatının hazırlanmasını, düşmənə bir neçə istiqamətdə zərbə vurulmasını, onun müdafiə xəttinin yarılmasını, düşmən ərazisinin dərinliyindəki strateji obyektlərə raket-artilleriya zərbələrinin endirilməsini məşq edəcək. Ümumiyyətlə, Azərbaycan ordusu arsenalına daxil etdiyi silahların texniki xarakteristikası da hücum xarakterlidr. Son illərdə ordunun arsenalına daxil edilən texnikalar isə bu məqamı xüsusilə təsdiqləyir. Demək, Azərbaycan ordusu müharibəyə hazırlaşır. Bu, əslində təbiidir, çünki növbəti vətən müharibəsində Azərbaycan hücum edən tərəf olacaq. Ona görə də ordumuz hücum taktikasını təkmilləşdirir. Elə bu məqam Ermənistana ciddi ismarışdır. Rəsmi Bakı açıq şəkildə hücum etmək niyyətini gizlətmir və bunu Müdafiə Nazirliyinin dilindən rəsmi şəkildə bəyan edir. Müharibənin qaçılmaz olduğunu ermənilər də yaxşı anlayır, amma heç bir erməni Azərbaycan ərazilərini geri qaytarmaq məsuliyyətini öz üzərinə götürmək istəmir. Belə bir vəziyyətdə – ermənilərin ciddi olaraq danışıqlardan yayındığı dövrdə Azərbaycan ordusunun hücum xarakterli hərbi təlimlərə başlamasına da ötəri baxmaq olmaz. Bu, Azərbaycanın Ermənistana bəyan etdiyi açıq mövqeyidir. Düşünürəm ki, vəziyyəti ancaq Ermənistanın danışıqlar masasına oturması və kompromisə getməsini bəyan etməsi yumşalda bilər. Əks təqdirdə, növbəti aprel əməliyyatı qaçılmaz ola bilər”.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri Emil Həsənli “Yeni Müsavat”a bildirdi ki, Azərbaycan ordusunun döyüş hazırlığı hər zaman nəzərə alınır: “Təlimlər müharibə üçün çox vacibdir, xüsusilə müharibə vəziyyətində olan ölkə üçün… Bu təlimlər şübhəsiz ki, həm də mesaj xarakteri daşıyır. Azərbaycan ordusu istənilən vəziyyətdə əməliyyat keçirmək üçün bu cür təlimləri mütəmadi keçirir. İstənilən situasiyaya uyğun ordumuz əməliyyat keçirməyə qadirdir. Hər kəsi Qarabağ məsələsi maraqlandırır və əmin olun ki, silahlı qüvvələrimiz hər an çox qısa zamanda torpaqlarımızı azad etmək gücündədir, hansı fəslin olmasından asılı olmayaraq. 3 il öncəki aprel döyüşləri də göstərdi ki, Azərbaycan ordusunun bu potensialı var. Eyni zamanda yeni silahlar alırıq. Təlimlərdə bu silahlar da sınaqdan keçirilir. Heç kəsə sirr deyil ki, Azərbaycan dünyanın ən qabaqcıl ölkələrindən ən müasir silahlar alır. Eyni zamanda, özümüz də silahlar istehsal edirik. Azərbaycan dövləti hər zaman müharibəyə hazırdır. Ermənistan bu cür təlimlər keçirə bilməz. Çünki təlimlər keçirmək üçün gərək dövlətin güclü iqtisadiyyatı olsun. Eyni zamanda peşəkar nizami orduya da böyük ehtiyac var. Bunların heç biri Ermənistanda yoxdur”.
Prezident İlham Əliyevin imzaladığı sərəncamla Elçin Babayev Bakı Dövlət Unversitetinin rektoru təyin edilib.
Elçin Babayev fizika-riyaziyyat elmləri üzrə fəlsəfə doktoru, dosentdir. O, daha əvvəl Azərbaycan Respublikasının Prezidenti yanında Elmin İnkişafı Fondunun icraçı direktoru, AMEA N.Tusi adına Şamaxı Astrofizika Rəsədxanasının (ŞAR) elmi işlər direktor müavini, “ŞAR Kosmik plazma və Heliogeofiziki problemlər” şöbəsi şöbəsinin rəhbəri vəzifələrini tutub.
Qeyd edək ki, E.Babayev 1965-ci ildə Naxçıvan şəhərində anadan olub.
Pedaqoji fəaliyyəti
Azərbaycan Dövlət Pedaqoji Universiteti (1996-1997);
Bakı Dövlət Universiteti (1998-1999);
Əmək və Sosial Münasibətlər Akademiyası (1996-1999)
289 nömrəli məktəb – “Zəngi” liseyi (1995-2009) – Azərbaycan Respublikasının Prezidenti yanında Dövlət İdarəçilik Akademiyası, Rəhbər Dövlət İdarəşiliyi Kadrlarının İxtisasının Artırılması İnstitutu, Rəhbər kadrların fasiləsiz təhsil mərkəzinin qısamüddətli ixtisasartırma kursları (2013-2016)
Ordumuzun bu gün başlayan genişmiqyaslı təlimlərində baş hədəf; Azərbaycan sülh prosesini torpedalayan düşmənlə güc dilində danışığa keçir – İrəvanda həyəcan…
Bu gün – martın 11-dən etibarən 15-dək müdafiə naziri, general-polkovnik Zakir Həsənovun rəhbərliyi altında Azərbaycan Silahlı Qüvvələrinin genişmiqyaslı təlimi başlayır. Nazirlikdən verilən məlumata görə, təlimlərə 10 min nəfərədək şəxsi heyət, 500-dək tank, zirehli texnika, eləcə də avtomobil və xüsusi texnika, 300-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 20-dək müxtəlif təyinatlı ordu və cəbhə aviasiyası cəlb olunacaq.
Təlimlərdə qoşunlar hücum əməliyyatının hazırlanması, şərti düşmənə bir neçə istiqamətdə zərbə vurulması, onun müdafiəsinin yarılması və qruplaşmalarının darmadağın edilməsi, eləcə də düşmən ərazisinin dərinliyində yerləşən hərbi və strateji obyektlərə raket-artilleriya zərbələrinin endirilməsi tapşırıqlarını yerinə yetirəcək. Eyni zamanda, təlim mərkəzləri və ümumqoşun poliqonlarında müasir silah sistemləri və vasitələrinin tətbiqi ilə döyüş atışları, o cümlədən raket buraxılışları praktiki icra olunacaq.
*****
Göründüyü kimi, bu, sırf hücum taktikasına hesablanmış təlimdir və şübhə yox ki, son günlər Qarabağla bağlı radikal mövqe sərgiləyən, konstruktiv danışıqlarla bir araya sığmayan və nizamlama prosesini iflic edən bəyanatlar səsləndirən işğalçı ölkə rəhbərliyinə ayıldıcı təsir eləmək niyyəti güdür. O səbəbə budəfəki təlimlər Azərbaycanın hərbi gücünün bir daha düşmənə praktik nümayişi baxımından böyük önəm daşıyır.
Təlimlər həm də rəsmi Bakının Ermənistanda hakimiyyət dəyişikliyindən sonra ilk dəfə Paşinyan hökumətinə sərt ismarışlar göndərməsi və xəbərdarlıq eləməsindən dərhal sonraya təsadüf eləməsi ilə diqqət çəkir. Belə ki, ötən həftə ATƏT sədri ilə Bakıdakı görüş zamanı Azərbaycan prezident İlham Əliyev Qarabağa dair sülh prosesinin pozulmasına görə bütün məsuliyyəti İrəvanın üzərinə qoyub. Ardınca Avropa Birliyinin Cənubi Qafqaz üzrə xüsusi nümayəndəsini qəbul edən zaman rəsmi Bakı mövqeyini bir daha xatırladıb və Ermənistan rəhbərliyinin danışıqların formatını dəyişdirməklə bağlı cəhdlərinə birdəfəlik nöqtə qoyub. “Ermənistan-Azərbaycan Dağlıq Qarabağ münaqişəsi beynəlxalq hüququn norma və prinsipləri əsasında, BMT Təhlükəsizlik Şurasının müvafiq qətnamələrinə uyğun olaraq Azərbaycanın ərazi bütövlüyü çərçivəsində həll edilməlidir və danışıqların formatı dəyişdirilə bilməz”, – Azərbaycan prezidenti bildirib.
Azərbaycanın münaqişənin tezliklə ədalətli həllində ən maraqlı tərəf olduğunu deyən İlham Əliyev işğal olunmuş ərazilərin azad edilməsinin danışıqlar prosesinin həmişə vacib komponenti olduğunu vurğulayıb. O, həmçinin Ermənistan tərəfinin ziddiyyətli açıqlamaların qəbuledilməz olduğunu və danışıqlar prosesinə əngəl yaratdığını qeyd edərək, beynəlxalq ictimaiyyətin bunu ciddi şəkildə nəzərə almasının və Ermənistana ünvanlı bəyanatların çatdırılmasının vacibliyini qeyd edib.
Azərbaycanın xarici işlər naziri Elmar Məmmədyarov da keçən həftə düşmən tərəfə analoji xəbərdarlıqla çıxış edib. ATƏT sədrindən xahiş edib ki, İrəvana Bakıdan belə bir ismarış aparsın: “Biz indi xalqı sülhə hazırlayaq, yoxsa müharibəyə?”
Bunlar rəsmi Bakının Paşinyan iqtidarına müharibə xəbərdarlığıdır. Azərbaycan Ordusunun bu gün yüzlərlə hərbi texnika, aviasiya maşınlarının cəlb olunduğu genişmiqyaslı təlimə başlamasını həmin xəbərdarlığın məntiqi davamı sayılmalıdır. Hərbi ekspertlər isə təlim adı ilə Azərbaycanın cəbhə xəttinə əlavə qüvvələr cəmləşdirmək niyyəti güddüyünə əmindirlər. Yəni hərbi təlimlər günün birində hərbi əməliyyatlara da keçə bilər.
*****
Azərbaycan, təbii ki, öz sərhədləri daxilində silahlı qüvvələrinin yerini dəyişmək və ya ən əsası, işğal altındakı ərazilərinə yaxın yerlərdə böyük hərbi qüvvə cəmləmək kimi müstəsna hüquqa malikdir. Bu hüququ ona BMT Təhlükəsizlik Şurasının Qarabağa dair 4 məlum qətnaməsi, habelə Avropa Şurasının (AŞ PA), Avropa Parlamentenin, NATO Parlament Assambleyasının, İslam Əməkdaşlıq Təşkilatının və Qoşulmama Hərəkatının ərazi bütövlüyümüzü dəstəkləyən sənəd-qərarları verir.
Ermənistanın da təsdiqlədiyi BMT Nizamnaməsi isə hər bir ölkəyə öz ərazi bütövlüyünü bərpa eləmək üçün istənilən yola əl atmaq, o sırada antiterror əməliyyatları keçirmək haqqı tanıyır. Azərbaycan da özünün hərbi və döyüş potensialını artırmaq üçün gərəkəni edir, yeni və müasir silahlar, döyüş sistemləri əldə edir, öz hərbi-sənaye kompleksini yaradır və gücləndirir, vaxtaşırı həm fərdi şəkildə, həm də qardaş Türkiyə ilə birgə hərbi təlimlər, hərbi paradlar həyata keçirir. Ən əsası, Bakı torpaqlarını işğaldan qurtarmaq üçün əlverişli siyasi şərtlər fonunda qəfil hücum taktikasını cilalamaqdadır.
Diqqət çəkən həm də odur ki, Azərbaycan son illər özünün maliyyə potensialı hesabına qabaqcıl Qərb dövlətləri (ABŞ, Fransa) ilə də hərbi-texniki əməkdaşlığı gücləndirmək kursu götürüb. Bu da İrəvanda haqlı olaraq həyəcan və təlaşı artırıb…
*****
“ABŞ keçən ilin dekabrında Azərbaycana xeyli miqdarda, ümumi dəyəri 109 milyon dollar olan aviasiya-kosmik məhsullar ixrac edib. Bu məlumat ötən il üçün ABŞ-Azərbaycan ticarət statistikasında əksini tapıb. Mənbənin bildirdiyinə görə, Azərbaycan ABŞ-dan təyyarələr, kosmik texnologiyalar və peyklər alıb. Əlamətdardır ki, 2017-ci ildə ixracla bağlı belə bir maddə, sadəcə, mövcud olmayıb”.
“Yeni Müsavat” xəbər verir ki, bu barədə “Spitnik Armenii” portalı yazıb. Portal bununla bağlı erməni politoloq-amerikaşünas Suren Sərksiyanın mövqeyini öyrənib. Erməni ekspert deyib: “Hərçənd bu məhsullar formal olaraq mülki təyinatlıdır, gələcəkdə Bakının ABŞ-dan ikili təyinatlı texnologiyalar alacağını istisna eləmək olmaz. Nümunə üçün uzağa getməyə lüzum yox. Keçən il Azərbaycan ABŞ-dan ”Bell -412″ mülki vertolyotlar almışdı. Ancaq Bakı onları hərbi vertolyotlar kimi təzədən quraraq ordunun öhdəsinə verdi. Bütövlükdə son illər ABŞ kosmosun mənimsənilməsində Azərbaycanın əsas tərəfdaşına çevrilir. Azərbaycan ABŞ və Fransa ilə birgə bu yöndə bir sıra layihələr həyata keçirir. Son bir ildə Bakı orbitə bir neçə peyk buraxıb. Lazım gələrsə, bu peyklər Ermənistan əleyhinə istifadə oluna bilər. Rəsmi İrəvan belə şərtlər fonunda praktik olaraq, ABŞ-la Azərbaycanın aviasiya və kosmos sahəsində əməkdaşlığına mane olmaq gücündə deyil. Bundan ötrü bizim resurs və imkanlarımız olduqca azdır”.
“Yeni Müsavat” yada salır ki, ötən il dekabrın əvvəlində Bakıda səfərdə olan ABŞ müdafiə naziri müavininin köməkçisi Laura Kuper Azərbaycanın siyasi və hərbi rəhbərliyi ilə görüş zamanı Vaşinqtonun iki ölkə arasında hərbi əməkdaşlığı genişləndirməyə hazır olduğunu qeyd etmişdi. Maraqlıdır ki, ölkəmizə 109 milyon dollar həcmində ABŞ istehsalı olan aviasiya-kosmik məhsullar da məhz həmin ayda idxal edilib…
Qarabağ münaqişəsinin danışıqlar yolu ilə tənzimlənməsi istiqamətində masada yeni saziş olsa da, hələlik o sənəd açıqlanmır.
Bunu rusiyalı politoloq, Yaxın Şərq və Qafqaz problemləri üzrə ekspert Stanislav Tarasov erməni mediasına açıqlamasında deyib.
Onun sözlərinə görə, son aylarda Azərbaycan və Ermənistan liderləri və XİN rəhbərləri arasında davamlı görüşülərin keçirilməsi ortada hansısa işlək bir sənədin olduğundan xəbər verir:
“Lakin bu sənədin mahiyyəti barədə həlilik hər hansı açıqlama verilmir”.
Politoloq qeyd edib ki, Paşinyan hakimiyyətə gəldiyi qısa müddətdə 3 dəfə Azərbaycan prezidenti İlham Əliyevlə görüşüb, bundan əlavə olaraq XİN başçıları arasında davamlı görüşlər keçirilir:
“Bütün bunlar ortada hansıa sənədin olduğundan xəbər verir. Ancaq tərəflər sənəddə əksini tapan maddələr üzrə razılığa gələ bilmirlər. Azərbaycanın münaqişə ilə bağlı mövqeyi dəyişməzdir. Paşinyan isə hansı həddədək kompromisə gedib, mövqeyni açıqlamaqdan qorxur və siyasi iradə nümayiş etdirərək ortaya konkret mövqe qoya bilmir. Ermənistanın bu hərəkətindən sonra yeni sənəd üzərindəki işlər pozlub. Nəticədə danışıqlar prosesi yenidən dalana dirənmiş vəziyyətə düşüb. Ona görə də ATƏT MQ həmsədrləri danışıqlarda təşəbbüsü yenidən ələ alaraq tərəflər arasında gərginliyin yaranmasının qarşısını almağa çalışırlar”.