 |
 |
Məlum olduğu kimi, bu ilin iyun ayının 23-də Türkiyənin ən böyük şəhəri və iqtisadi mərkəzi sayılan İstanbulda bələdiyyə seçkiləri keçiriləcək.
Xatırladaq ki, bu il mart ayının 31-də keçirilən seçkilərdə öncə Cümhuriyyət Xalq Partiyasının namizədi Əkrəm İmamoğlunun qələbə çaldığı bildirilsə də, sonradan Ali Seçki Komissiyası nəticələri ləğv edərək yeni seçkilərin keçirilməsinə qərar verib.
Hazırda Türkiyənin bütün diqqəti bu həftənin bazar günündə, iyunun 16-da iki namizəd arasında baş tutması planlanan debata yönəlib. Türkiyə tarixində siyasi rəqiblər arasında debatlar az keçirilir. 2002-ci ildə Türkiyənin həmin vaxt Aydın Doğana mənsub “Kanal D” kanalında CXP sədri Dəniz Baykal və indiki prezident Tayyip Ərdoğan arasında canlı debat təşkil olumuşdu. Həmin vaxt iki siyasətçinin deyişməsini məşhur teleaparıcı Uğur Dündar idarə etmişdi.
Elə hakim parityanın namizədi Binali Yıldırm da Uğur Dündaırn bu məsələdə daha təcrübəli olduğunu dilə gətirərək yenidən moderator rolunun ona həvalə olunmasını istəyib. Lakin buna əvvəlcə böyük məmnuniyyətlə razılıq verən U.Dündar sonradan nədənsə imtina edib. Ədalət və İnkişaf Partiyasının nümayəndələri və sağ mərkəzçi media Dündarı yaxın olduğu CXP-nin təzyiqi ilə geri addım atmaqda suçlayıb. Tanınmış teleaparıcının buna tutarlı səbəb göstərməməsi ona qarşı ittihamları daha da şiddətləndirib.
Uğur Dündarın yerinə isə moderator olaraq İsmayıl Küçükkaya keçəcək. İ.Küçükkaya da sol kəsimə yaxın jurnalist sayılır. Türkiyədə bununla Binali Yıldırımın “deplasman hamlesi” həyata keçirdiyi, yəni rəqibin meydanında oynamaqdan qorxmadığını göstərmək üçün onun namizədliyini önə sürdüyü deyilir.
Binali Yıldırım bunu bu gün İSTOÇ, yəni İstanbul Ticarət mərkəzində keçirdiyi görüşdə də dilə gətirib. Orada vətəndaşlardan biri “Başqanım İsmayıl Küçükkaya da CHP tərəfdarıdır” sözlərinə keçmiş baş nazir “Kim olursa-olsun, vız gəlir. Heç kim hər hansı bəhanənin arxasına sığınmasın”,-deyə reaksiya verib.
Hakim parityanın namizədi üstüörtülü olaraq rəqibini separatçı Xalqların Demokratik Partiyası və FETÖ təşkilatı ilə əməkdaşlıq etməkdə suçlayıb.
Əkrəm İmamoğlu isə jurnalistlər qarşısında proqram xarakterli çıxış edib.
CXP namizədi rəqibini və onun təmsil etdiyi partiyanı israfçılıqda günahlandırıb və onları İstanbulun pullarını qeyri-qanuni olaraq başqa yerlərə (məsələn, dini vəqflərə) axıtmaqda ittiham edib. Bundan əlavə, Əkrəm İmamoğlu iqtidar partiyasını onun proqramını kopyalamaqda suçlayıb.
İmamoğlunun əsas vədləri İstanbulda təhsil alan tələbə heyəti ilə bağlı olub. CXP namizədi hətta ehtiyacı olan tələbələrə 400 türk lirası məbləğində təqaüd verə biləcəklərini söyləyib.
Bundan başqa, Əkrəm İmamoğlu 20-ə yaxın tələbə yataqxanası tikəcəklərini vəd edib.
Müxalif siyasətçinin gənclərlə bağlı proqramını onun əsas seçicilərinin gənc kəsim olması ilə əlaqələndirən çoxdur.
Amma eyni vədləri iqtidarın namizədi Binali Yıldırm tərəfindən də eşitmək mümkündür.
Bu səbəbədən qarşıdan gələn debatlarda namizədlərin danışıq və inandırma qabiliyyəti həlledici rol oynayacaq.
Şimali Koreya prezidenti Kim Çen In-ın yaxın çevrəsindəki əsgər və bürokratlara yönəlmiş qəddar cəzalar tətbiq etməsi ilə bağlı iddialara bir yenisi daha əlavə olunub. İngilis mediasında yer alan iddialara görə, Cənubi Koreya lideri son olaraq ağlasığmaz bir ölüm əmri verərək, edam gerçəkləşdirib. Musavat.com xəbər verir ki, onun adı hələlik açıqlanmayan bir general üçün film səhnələrindən geri qalmayan, qan donduran bir ölüm şəkli seçdiyi iddia edilib.
Kim Çen In-ın bundan öncəki illərdə çox sayda qeyri-adi ölüm əmri və edama adının qarışdığı bilinir. Şimali Koreya pezidentinin təlimatı ilə Milli Təhlükəsizlik nazirinin müavini alov aparatı ilə yandırılaraq öldürülmüşdü. İllər öncə Şimali Koreya qəzetində xəbər verilmişdi ki, Kim dövlətin ali idarəetməsində olan 11 bürokratı hərbi məhkəməyə çıxararaq, ölüm cəzasına məhkum etdirib. Qəzetin xəbərinə görə, ölüm cəzalarının həyata keçirilməsində qeyri-insani üsullar da tətbiq edilmişdi.
Bundan öncə isə Kim Çen In-a qarşı çevriliş hazırlığı içində olduğu iddia edilən müdafiə naziri Kim Çolu da edam etdirmişdi. Kim Conqun əhvalına uyğun olaraq, bəzi məsələlərlə bağlı cəza verməsi geniş yayılıb. İllər öncə Kim Yonq Unun oturuşunu bəyənmədiyi üçün baş nazir köməkçisini edam etdirdiyi bildirilmişdi.
Son olaraq ortaya atılan iddia isə insanı heyrətləndirən xarakterdədir. İngilis mediasında yer alan xəbərə görə, adı hələlik açıqlanmayan bir general üçün içi pirana (Şimali Amerikada çaylarda yaşayan, kiçik, amma yırtıcı balıqlar) dolu bir su tankı hazırladıb və generalı da içinə ataraq vəhşicəsinə öldürüb. Öldürülən generalın Kim Çen In-a qarşı çevriliş hazırlığı içində olduğu iddia edilib. İçi pirana dolu tankın Kim Çen In-ın Ryonqsonq Sarayında olduğu bildirilir. Bundan başqa, generalın pirana dolu su tankına atlımadan öncə də müxtəlif növ işgəncələrə məruz qaldığı bildirilir.
Generalın ölümünün vəhşi balıqlar tərəfindən, yaxud daha öncə gerçəkləşdirilməsi haqqında konkret bir məlumat olmadığı deyilir. İddialara görə, Kim Çen In-ın 1977-ci il istehsalı olan Ceyms Bond filmindəki bir səhnədən təsirlənərək bu şəkildə ölüm tankı hazırlatdırıb.
Ümumiyyətlə, Kim Çen In-ın həyatında bəzi ilginc nöqtələr var və bu özəlliklərinə görə də qeyri-adi biri olaraq məşhurlaşıb. Məsələn, Kim Çen In 8 yaşına gələndən sonra atası ona bir general geyimi hədiyyə etdi və bundan sonra da bütün gerçək generallar onun qarşısında əyilməyə başladılar.
1996-2000-ci illərdə İsveçrədə sanki bir Koreya diplomatının oğluymuş kimi həqiqi kimliyi saxlanaraq oxuduldu. İllər sonra Şimali Koreyanın paytaxtı Pxenyana qayıdanda isə ‘Kim İl-sung’ adlı Hərbi Universitetdən 2006-cı ildə məzun oldu. İki il sonra əmisi ilə arasında dava çıxdı və əmisi uzaqlaşdırıldı. İddialara görə, əmisinin 20 uşağı vardə və hamısı da öldürülmüşdü.
Kimin vətənə xəyanət ittihamı ilə cinayət işi açılan əmisi və 5 köməkçisini, 3 gün boyunca ac saxlanaraq, 120 itə yem etdiyi də deyilirdi. Kim Çen In gücü əlinə alan kimi 140-a qədər təcrübəli insanı da öldürmüşdü.
Moldova Prezidenti İqor Dodon beynəlxalq ictimaiyyətindən hakimiyyətin ötürülməsi məsələsində vasitəçilik etməyi xahiş edib.
APA-nın “RİA Novosti” agentliyinə istinadən verdiyi məlumata görə, İ. Dodon bildirib ki, Demokrat Partiyası hakimiyyəti dinc yolla təhvil verməyə hazırlaşmır.
Moldova Prezidenti “Facebook” sosial şəbəkəsindəki səhifəsində yazıb ki, Demokrat Partiyası hakimiyyəti parlament çoxluğuna və qanunu hakimiyyətə təhvil vermək istəmədiyi üçün başqa çıxış yolu yoxdur: “Bu vəziyyətdə bizim beynəlxalq ictimaiyyətdən hakimiyyətin dinc yolla ötürülməsində vasitəçilik etməsini istəməyimizdən başqa çıxış yolu yoxdur. Ya da Moldova xalqını birləşməyə və dinc aksiyalara çağırmalıyıq. Parlamentin qərarı və yeni hökumət vətəndaşların əksəriyyəti tərəfindən dəstəklənir, Qərb və Şərqdəki tərəfdaşlarımız tərəfindən tanınıb. Biz, daxili və xarici siyasətə müxtəlif baxışları olan Moldova vətəndaşları ümumi məqsəd ətrafında – Moldovanı kriminal və diktator rejimindən azad etmək üçün birləşməliyik. Proses artıq başlayıb və geri yol yoxdur. Sona qədər getmək lazımdır. Biz yolumuzdan dönməyəcəyik”.
Ölkədə vəziyyətin dəyişdiyini vurğulayan İ. Dodon Demokrat Partiyasının insanların aksiyalarda iştirak etməməsi barədə çağırışına məhəl qoymamağa da çağırıb.
İ. Dodon Konstitusiya Məhkəməsinin Moldova Prezidenti səlahiyyətlərini baş nazir Pavel Filipə həvalə etməsi barədə qərarını isə hakimiyyəti mənimsəməyə yönələn addım kimi qiymətləndirib.
Qeyd edək ki, şənbə günü rusiyayönümlü Sosialist Partiyası və avropayönümlü ACUM bloku parlament çoxluğunu formalaşdırıb və 3 aydan sonra yeni hökumətin qurulduğu elan edilib. Ancaq Konstitusiya Məhkəməsi parlamentin bu qərarını qanunsuz elan edib. Parlament isə Demokrat Partiyasının məhkəmə yolu ilə hakimiyyəti mənimsəməyə cəhd etdiyini bəyan edib.
Xatırladaq ki, fevralın 24-də Moldovada keçirilən parlament seçkilərindən sonra heç bir partiya parlament çoxluğu qazanmayıb. Bu səbəbdən də hökumətin qurulması üçün parlamentdə koalisiya formalaşdırmaq zərurəti yaranıb. Moldovanın Konstitusiya Məhkəməsinin qərarına əsasən, deputatlar iyunun 7-dək hökuməti formalaşdıra bilməsələr, prezident parlamenti buraxmalı idi. Moldova Prezidenti İqor Dodon isə iyunun 10-dək parlamenti buraxmayacağını bəyan etmişdi.
Bu günə qədər də Misir piramidalarının necə tikilməsi barədə mübahisələr davam edir.
Bu gün oxucularına piramidaların inşasında səsdən istifadə edilməsi barədə kiçik araşdırma yazını təqdim edir.
Qədim mənbələrdə, əsasən də Çin mənbələrində bildirilir ki, o dövrdə dünyanın digər xalqları kimi qədim misirlilər də səsdən istifadə ediblər. Bununla belə, müasir dəsrliklərdə bu barədə bir cümlə də yoxdur. Dərsliklərdə yazılır ki, piramidalar çoxsaylı qul, daş bloklar, kəndirlər və bəsit texnologiyadan istifadə edilib. Ola bilər ki, səsin köməyi ilə möcüzələr yaratmağın mümkün olduğu barədə dəqiq məlumatlar olmadığı üçün belə yazılır.
Amma ötən əsrin 30-cu illərində Tibetdə İsveçdən olan avia mühəndis Henri Kyelson səs levitasiyasını müşahidə edib. O, Tibet rahiblərinin truba və baraban, eyni zamanda xor ifası ilə 2 metr diametri olan daşları 400 metr hündürlüyə qaldırmalarını təfərrüatı ilə yazıb. Maraqlıdır ki, təfərrüatda rəqəmlər, “Pİ” işarəsi və digər həndəsi məsələlər yer alıb. Henri Kyelson digər qədim sivilizasiyaların da səs levitasiyasından istifadə etdiklərini bildirir. Məsələn, məbəd inşasında böyük nəaliyyətləri olan maya hinduları təkəri tanımırdılar, çünki bu onlara lazım deyildi...
Şimali Koreya Prezidenti Kim Çen Inın kiçik bacısı Kim Yo Çen 52 gün sonra ictimaiyyət qarşısına çıxıb.
“Qafqazinfo”nun “İnterfaks”a istinadən verdiyi xəbərə görə, o, iyunun 3-də qardaşı və digər yüksək rütbəli şəxslərlə birlikdə “1 may” stadionunda gimnastların çıxışlarını izləyib.
Qeyd edək ki, onun da bu ilin fevralında Vyetnamın Hanoy şəhərində ABŞ-la baş tutan zirvə görüşünün uğursuzluğuna görə cəzalandırılan yüksək vəzifəli məmurlar arasında olduğu deyilirdi. O, sonuncu dəfə aprelin əvvəlində qardaşının iştirakı ilə keçirilən Ali Milli Məclisin iclasında iştirak edib. Aprelin sonlarında Rusiya Prezidenti Vladimir Putinlə Vladivostokda baş tutan görüşdə görünməyib. Halbuki, o, həmin günə qədər Kim Çen Inı bütün rəsmi görüşlərində müşayiət edib.
Xatırladaq ki, Hanoyda ABŞ prezidenti Donald Trampla Şimali Koreya lideri Kim Çen In arasında baş tutmuş ikinci sammitdən sonra KXDR-in ABŞ məsələləri üzrə xüsusi nümayəndəsi Kim Hyok Çxol daxil olmaqla 5 diplomat edam olunub. Həmin şəxslər sözügedən zirvə görüşünün hazırlıqlarına cavabdeh olublar. Onlar sammitin uğursuzluqla yekunlaşmasına və rəsmi Vaşinqton adına casusluq etdiklərinə görə Mirim Hava Limanında edam ediliblər.
Bundan başqa, sammit öncəsində ABŞ dövlət katibi Mayk Pompeo ilə danışıqlar aparan Kim Yonq Çxol adlı yüksək vəzifəli şəxs və zirvə zamanı tərcüməçilik edən Sin Hye Yonq Çin sərhədi yaxınlığındakı ağır islah əmək işləri düşərgəsinə göndərilib.
İstanbul bələdiyyə sədri seçkilərinə 20 gündən də qaldı. Hazırda hər iki namizəd və eləcə də mənsub olduqları partiyalar Türkiyənin və regionun ən böyük şəhərinin qarşıdakı 5 ildə idarə edəcək şəxsin müəyyən olunması üçün kampaniya aparır.
Xatırladaq ki, martın 31-də keçirilən bələdiyyə seçkilərində CHP-nin namizədi Əkrəm İmamoğlu qalib gəlib. Ancaq hakim partiyanın etirazlarından sonra İstanbulun 39 rayonunun bəzilərində səslərin hamısı, bəzilərində isə etibarsız bülletenlər yenidən sayılıb. Bundan sonra nəticə dəyişməsə də, iki namizəd arasındakı səs fərqi 13 minə enib.
Aprelin 17-də İstanbul seçki qurumu İmamoğlunun qələbəsini elan edib və sədr vəsiqəsini təqdim edib. Ancaq AKP-nin və MHP-nin şikayətlərindən sonra mayın 6-da Yüksək Seçki Qurumu 23 iyunda İstanbul bələdiyyəsi sədri postuna təkrar seçkilər elan edib.
Qeyd edək ki, İstanbulda keçirilən təkrar seçkilər yalnız bir şəhərin deyil, bütöv ölkənin əsas siyasi hadisəsinə çevrilib. İmamoğlu8nun reytinqi yüksəlib və hazırda onun media və sosial şəbəkədəki reytinqi xeyli yüksəkdir.
Hakim AKP də İstanbul seçkilərinə böyük önəm verir, prezident özü də vaxtaşırı İstanbula gələrək seçki mitinq keçirir. Daxili işlər naziri və digər hökumət üzvləri zaman-zaman ölkənin ən böyük şəhərinə gedərək AKP namizədi Binəli Yıldırıma dəstək olurlar.
Təbii ki, İstanbul seçkilərinin taleyini iyunun 23-də səsvermə hüququ olan 10 milyondan çox İstanbul sakininin səsi həll edəcək. ancaq İstanbul seçkilərinə həddən artıq böyük marağın olması davamlı olaraq sosial sorğuların keçirilməsi ilə müşayiət olunur.
Ötən həftə İstanbul seçkiləri ilə bağlı mətbuata açıqlama verən “A&G” şirkətinin prezidenti Adil Gür bildirib ki, YSK-nın İstanbul seçkilərinin nəticələrini ləğv etməsindən sonra İmamoğluna münasibət müsbətə doğru dəyişib. Gür bildirib ki, YSK-nın İstanbul qərarından sonra 3 ayrıca sorğu keçiriblər. Onun sözlərinə görə, səsvermədə iştirak edənlərin 25 faizi YSK-nın qərarının səbəbini anlamayıb. 31 mart seçkilərində İstanbulda ümumi seçicilərin 1,7 milyon nəfərinin səsverməyə getmədiyini qeyd edən Adil Gür ümumi olaraq bütün partiyalardan olan 300 min nəfərin 23 iyun seçkilərinə qatılacağını düşünür.
“MAK Danışmanlık” Araşdırma Şirkətinin keçirdiyi sorğuda iştirak edənlərin 47 faizi YSK-nın İstanbul seçkilərinin nəticələrini ləğv etməsi qərarını haqsız hesab edib. 43 faiz seçici isə YSK-nın qərarını dəstəkləyib. Maraqlıdır ki, sorğuya qatılan iştirakçıların 79 faizi 31 mart seçkilərində səs verdiyi namizədə yenidən səs verəcəyini deyib. Yalnız 13 faiz başqa namizədə səs verəcəyini deyib.
“MAK danışmalık” şirkətinin 15-20 may tarixlərində 11 min nəfər arasında keçirdiyi sorğunun nəticələrinə əsasən iki namizəd arasında 2 faiz səs fərqi var. Belə ki. sorğuda iştirak edənlərin 50, 3 faizi İmamoğlu, 48,2 faizi isə Yıldırım deyib. Səadət Partiyasının namziədi Necdet Gökçınara isə 0,75 faiz seçici dəstək verib.
“KONSENSUS” Araşdırma Şirkətinin keçirdiyi və iki gün əvvəl açıqlanan nəticələrə əsasən Əkrəm İmamoğlu AKP-nin namizədi Binəli Yıldırımdan 2,1 faiz öndədir. Belə ki, şirkətin 1040 nəfər respondent arasında keçirdiyi sorğunun nəticələrinə əsasən iştirakçıların 50,2 faizi İmamoğlu, 48,1 faizi isə Yıldırımı dəstəklədiyini deyib. Bu da iki namizəd arasında səs fərqinin 180 min olacağını göstərir. Xatırladaq ki, 31 mart seçkilərinin nəticələrinə əsasən iki namizəd arasında səs fərqi 13 min idi.
“Optimar” Araşdırma Mərkəzinin keçirdiyi sorğunun nəticələrinə əsasən CHP namizədi AKP namizədini 4 faiz qabaqlayır. Ancaq şirkətin rəhbəri Hilmi Daşdemir detallı məlumatı bu həftə açıqlayacaqlarını deyib.
“PİAR” Araşdırma Şirkəti də keçirdiyi sorğunun nəticələrini açıqlamayıb. Ancaq şirkət nəticələrin İmamoğlunun xeyrinə olduğunu bildirib.
Ancaq seçkilərə 3 həftəyə yaxın vaxt qalıb. Bu isə seçki kampaniyasında az müddət deyil. Üstəlik aydın məsələdir ki, seçkilərin israrla yenilənməsini istəyən hakim partiyanın öz səbəbləri və ümidləri var. Güman etmək olar ki, AKP rəhbərliyi məhz bu amillərə görə təkrar seçkilərdə iştirak üçün israr edib. Məsələ ondadır ki, İstanbul bələdiyyəsi bir qayda olaraq hakim partiyanın nəzarətində olub. İstanbul Türkiyə iqtisadiyyatının “bel sütunu”, turizm, ticarət və sənaye mərkəzi olmaqla yanaşı həm də bu şəhərə rəhbərlik psixoloji anlam daşıyır. Bu isə o deməkdir ki, təkrar seçki xeyli gərgin keçəcək.
musavat.com
Rəsmi Moskva Yaxın Şərqdə müharibə təhlüksindən ehtiyat edir
Bizimyol.info xəbər verir ki, Rusiya İrana S-400 (“Triumf” Zenit- Raket Kompleksini satmaqdan boyun qaçırıb. Rəsmi Moskva Yaxın Şərqdə gərginliyin artması səbəbindən belə bir qərar qəbul edib. Bu haqda lenta.ru saytı yazıb.
Məlumdur ki, ABŞ İrana siqnal olaraq öz Silahlı Qüvvələrinin Mərkəzi Komandanlığının əməliyyat məsuliyyəti zonasına Abraham Lincoln təyyarədaşıyan gəmisi başda olmaqla hərbi gəmilər qrupu və eləcə də, bombardmançı təyyarələr qrupu göndərib.
Mayın 17-də məlum olub ki, iki ABŞ Hərbi Dəniz Qüvvələrinin iki minadaşıyan eskadrası Fars körfəzinə daxil olub, bu ərəfədə – mayın 15-də İrakdakı amerikan qoşunları ən yüksək hərbi hazırlıq səviyyəsinə gətirilib; buna səbəb İran tərəfindən İraqdakı Amerika qüvvələrinə hücum təhlükəsini önləmək olub. Elə həmin gün ABŞ Prezidenti Donald Tramp İrana arşı müharibə etmək istəmədiyi haqda bəyanat verib.
S-400 (“Triumf”) – Rusiyanın uzaq və orta mənzilli zenit-raket sistemidir. Bu zenit-raket kompleksi hava-kosmik hücumun bütün müasir və perspektivli vasitələrinin məhv edilməsi üşün nəzərdə tutulmuş silah növüdür. S-400 (“Triumf”) Rusiya Federasiyasının Silahlı Qüvvəərinin ixtiyarına 2007-ci ildə verilib.
Şərh: Rusiya Federasiyası Amerika Birləşmiş Ştatlarının İran İslam Respublikasına qarşı bütün mümkün məcbuetmə, o cümlədən, hərbi müdaxilə vasitələrindən istifadə edə biləcəyini düşünür. ABŞ İranla nüvə sazişindən çxdıqdan və İslam Rrespublikası uranın zənginləşdirilmısinə davam etməyə başladıqdan sonra belə bir təhlükə daha da artdı. Prezident Obama dövründə imzalanan sazişi indiki Prezident Donald Tramp pozarkən İranın imzalanmış sövdələşmələrə əməl etmədiyini əsas gətirdi. Xüsusilə, Administrasiyanın “qırğı”larından sayılan Con Boltonun Milli Təhlükəsizlik Üzrə Köməkçi təyin olunmasından sonra ABŞ-ın İrana qarşı sərt xətti daha da gücləndi. Bu ayın ortalarında ABŞ Administrasiyası İrana qarşı 120 minlik qoşun qrupu göndərmək qərarına gəldi. Zamanında İraqa da bu qədər qüvvə göndərilməsi faktını xatırladan ekspertlər ABŞ-ın İrana hərbi müdaxiləsinin bu dəfə qaçılmaz olacağını düşünürlər. Bu ehtimalları bir çox ölkələrin ABŞ-ın sanksiyaları altına düşməkdən ehtiyat edərək İranla məsafə saxlamaq qərar vermələri də artırır.
Rusiyanın İrana S-400 (“Triumf”) ZRK satmaqdan imtina etməsi bu ölkənin məğlub olacağı təqdirdə sistemin ABŞın əlinə keçə biləcəyi və buna qarşı adekvat müqavimət sistemi yaradacağı qorxusundan da qaynaqlana bilər. Bundan başqa Çin başda olmaqla bir sıra dövlətlər bu arada İrandan neft idxalını ya məhdudlaşdırıb, ya da tamamilı dayandırıb. Böyük ehtimalla, bir yandan İranı indiki çətin durumunda neft-qaz satış qiymətlərinə və kvotalarına yenidən baxmaq zorunda buraxmaq istəyi ilə yanaşı bu dövlətlər mümkün müharibəni önləmək üçün Tehranın müəyyən güzəştlərə sövq edilməsidir. Rusiyanın da qərarının motivasiyası burdan gəlir; İranla ABŞ arasında müharibə başlayacağı təqdirdə İran qaçqınları Cənubi Qafqaz və Mərkəzi Asiya ölkələrindən keçməklə Rusiyaya axışacaqlar. Bu, Rusiya üçün çox böyük problemlər yarada bilər.
Adətən, əkiz övladların dünyaya gəlişi böyük sevinclə qarşılanır və əgər valideynlərdən biri hökumət başçısı, digəri isə tanınmış ictimai fiqurdursa, o zaman, bi qayda olaraq, körpələrin fotoları mətbuat səhifələrini doldurur.
Lakin Vladimir Putinin idarə etdiyi Rusiyada, belə görünür, vəziyyət fəqrlidir: ölkədə Putinin şəxsi həyatının mediada müzakirəsi qadağandır.
Artıq bir müddətdir, Moskvada Rusiya liderinin 36 yaşlı sevgilisi, gimnastika üzrə Olimpiya çempionu Alina Kabayevanın bu ayın əvvəli Moksvada dünyaya əkiz körpələr gətirdiyi haqda şayiələr dolaşır.
Putin və “gizli birinci xanım” ləqəbi almış Kabayeva haqda şayiələr ilk dəfə 2008-ci ildə – Kabayevanın İsveçrədə, deyilənə görə, İtaliyanın keçmiş baş naziri Silvio Berluskinin məsləhət gördüyü özəl klinikada dünyaya övlad gətirdiyi zaman dolaşmağa başlamışdı.
Kreml o vaxt da, indi olduğu kimi, Kabayevanın doğuşu haqda məlumatları gizlətməyə çalışırdı. Özəl həyatını məxfi saxlayan Putin (bu, onun Dövlət Təhlükəsizlik Komitəsi –KQB-də işlədiyi vaxtlar yaranan bir vərdiş ola bilər) Kabayeva ilə münasibətləri olduğunu uzun vaxtdır inkar edir.
Mümkün romantik münasibətlər haqda bir dəfə sualı cavablandırarkın Putin deyib: “Mən həmişə xəstə burunları və erotik fantaziyaları ilə insanların şəxsi həyatına qarışan adamlar haqda mənfi fikirdə olmuşam.”
Putin 2013-cü ildə həyat yoldaşı Lyudmila Şkrebnevadan boşandığını elan etmişdi. Onların bu 30 illik evlilikdən iki qızları var. Putin “Aeroflot” hava yollarının keçmiş bələdçisi və rus dili müəllimi olmuş həyat yoldaşından ayrıldığını Kremldə balet tamaşasının fasiləsi zamanı ictimaiyyətə açıqlayaraq, bunun qarşılıqlı razılaşma əsasında əldə edilmiş qərar olduğunu demişdi.
Putinlə boşandıqdan sonra Lyudmila Şkrebneva yenidən ailə qurub və ictimaiyyət arasında az-az görünür.
Rusiya kütləvi informasiya vasitələrindəki mənbələrə əsasən, Kreml bu dəfə də əkizlərin doğulması haqda xəbərlərə operativ şəkildə reaksiya verərək, Putinin şəxsi həyatı haqda məlumatlar verən qəzet və xəbər saytlarına münasibətdə qəti mövqeyini bir daha nümayiş etdirib. 2016-cı ildə Rusiyanın RBK telekanalının üç redaktoru Putinin sərvəti haqda materiallara görə işdən çıxarılıb.
İlk dəfə Rusiya liderinin yaxın çevrəsinə daxil olan oliqarx Arkadi Rotenberqin sahibi olduğu “Moskovskiy Komsomolets” veb saytı Alina Kabayevanın əkizləri dünyaya gətirdiyi haqda məlumat verib. Lakin material dərhal səhifədən çıxarılıb. Rusiya rəsmiləri bununla bağlı şərh verməkdən imtina edir.
Lakin bundan sonra Kabayeva haqda digər xəbər səhifələrində də məlumatlar verilməyə başlayıb. Bunlardan biri “dni.ru” saytında “Əkizləri olmuş Kabayeva yox olub” başlığı altında çıxan məqalədir.
Putinin yaxın çevrəsinə aid olan daha bir oliqarx-Aleksandr Karmanova məxsus “Dom2Life” şoubiznes veb saytında Kabayeva haqda ilk dəfə məlumat onun mayın 12-də 36 yaşının tamam olduğu gün verilib.
Rusiyada araşdırmaçı jurnalist Sergey Kanevə əsasən, Kabayeva əkiz oğlanları Kulakov adına klinikada qeysər kəsiyi cərrahiyyə əməliyyatı vasitəsilə dünyaya gətirib. Kabayeva üçün klinikada əvvəlcədən bir mərtəbənin hazırlandığı deyilir. Britaniyanın “Daily Mail” qəzetinə müsahibə verən Kanev deyib ki, əməliyyat italiyalı həkimin iştirakı ilə keçib.
Alina Kabayeva böyük idmandan getdikdən sonra model kimi çalışıb və 2014-cü ilə qədər Rusiya parlamentinin qanunuvericisi olub. O, hazırda Milli Media Qrupunun rəhbəridir.
Kabayeva haqqında xəbərlərin belə gizli saxlanması Rusiyada mətbuat azadlığının daha məhdudlaşdırıldığı və Kremlin xəbərlərin təqdimatına nəzarətini gücləndirdiyi vaxta təsadüf edir.
Bu ayın gündəlik “Kommersant” qəzetinin ondan çox jurnalisti tanınmış muxbirlər İvan Afronov və Maksim İvanovun işdən çıxarılmasına etiraz olaraq qəzetdə fəaliyyətlərini dayandırdıqlarını elan edib. Jurnalistlər Afronov və İvanovun müəllifləri olduğu məqalənin Kreml tərəfindən bəyənilmədiyini bildirib.
Qəzetin sahibi Putinlə yaxın əlaqələrə malik milyarder oliqarx Alişer Usmanovdur.
Mart ayında “Kommersant” qəzetinin daha bir jurnalisti Mariya Karpenko Sank Peterburqda siyasi hadisələrlə bağlı məqalələrinə görə işdən çıxarılıb.
Müstəqil “The Bell” xəbər agentliyinə əsasən, “Kommersant” digər rəqib media qurumları arasında Kremldən müstəqilliyini saxlaya bilsə də, siyasi mövzularda senzuraya məruz qalırdı, lakin jurnalistliərin kütləvi şəkildə qəzeti tərk etməsi bu müstəqilliyi sul altına altına almış olur.
Rusiya jurnalistləri hökumətin xəbər redaksiyalarının müstəqilliyini daha da çox məhdudlaşdırmağa çalışacağından ehtiyat edir. Mart ayında Putin “saxta xəbərlər”in yayılması və “hökumətə hörmətsizlik” haqda qanunlara imza atıb. Bu qanunları pozanlara qarşı cərimələr və həbs cəzaları tətbiq ediləcək. Müşahidəçilər qanunların qeyri-məyyən yazılışının azad mətbuatın bundan sonra daha da çox sıxışdırılması üçün istifadə edilə biləcəyi ilə bağlı xəbərdarlıq edirlər.
Amerikanın Səsi
ABŞ sanksiyaları İranda 7 uşağı öldürdü…
İsveç şirkəti sanksiyalara görə tibbi ləvazimatların ixracını dayandırdığından 300-dək azyaşlı da ölə bilər…
ABŞ-ın tətbiq etdiyi birtərəfli sanksiyalar səbəbindən İranda epidermoliz xəstəliyindən əziyyət çəkən 7 uşaq vəfat edib.
Bu haqda yerli “Mehr” agentliyinə istinadla məlumat yayıb. Sanksiyalar səbəbindən tibbi ləvazimatların ölkəyə çatdırılmasında çatışmazlıq yaranıb. Buna görə də bullyoz epidermoliz xəstəliyindən əziyyət çəkən 7 azyaşlı həlak olub, 300-ə yaxın uşaq isə ölüm təhlükəsi altındadır.
Əvvəllər İran hökuməti bəhs edilən xəstəlik zamanı yaranan yaraların müalicəsində istifadə olan xususi örtükləri İsveçdən idxal edir və xəstə uşaqların ailələrinə pulsuz olaraq çatdırırdı. Lakin ABŞ ikinci dəfə sanksiyaları tətbiq etdikdən sonra İsveç şirkəti epidermoliz xəstəliyindən əziyyət çəkən uşaqlar üçün xüsusi materialların ixracını dayandırıb. Odur ki, həmin xəstəlikdən əziyyət çəkən uşaqların vəziyyəti gündən-günə pisləşməkdədir.
Xatırladaq ki, ABŞ rəhbərliyi 2018-ci ilin mayında birtərəfli qaydada 2015-ci ildə İranla BMT Təhlükəsizlik Şurasının beş daimi üzvü və Almaniya arasında imzalanmış nüvə razılaşmasından geri çəkilib və İrana qarşı sanksiyaları bərpa edib. Vaşinqton administrasiyası sanksiyaların əczaçılıq və qida sənayesi məhsullarına tətbiq edilmədiyini iddia edir. Amma İran bank sektorundakı sanksiyalar və dollara məhdudiyyətlər səbəbindən tibb materiallarının tədarükü ilə bağlı problemlər yaşamaqda davam edir.
Moderator.az
Türkiyə prezidenti Rəcəb Tayyib Ərdoğanla ABŞ prezidenti Donald Tramp arasında telefon danışığı olub.
ONA-nın Türkiyə bürosunun məlumatına görə, hər iki ölkə prezidenti öz aralarında ABŞ, Türkiyə, eləcə də regional məsələlər barəsində fikir mübadiləsi aparıb.
Rəcəb Tayyib Ərdoğan Türkiyənin milli təhlükəsiziyi üçün Rusiyadan alınan “S-400” havadan müdafiə sistemi mövzusu ilə bağlı ortaq işçi qrupunun yaradılması təklifini yenidən irəli sürüb.
Söhbətdə polad sektoruna tətbiq olunan əlavə verginin aradan qaldırılmasına dair razılıq ifadə olunub, bu qərarın 75 milyard dollarlıq qarşılıqlı ticarət əlaqəsinə fayda verəcəyi bildirilib.
Qeyd edək ki, iki lider Yaponiyada keçirilən “G-20” zirvə toplantısında görüşəcəkləri barədə razılıq əldə etmişlər.