 |
 |
Daxili İşlər Nazirliyinin (DİN) Daxili Təhqiqatlar İdarəsinin rəisi, polis general-mayoru Sahib Mirzəyev vəzifəsindən azad olunub.
Bununla bağlı Daxili İşlər naziri Vilayət Eyvazov əmr imzalayıb.
Əmrə əsasən, S.Mirzəyev xidmətdə olmanın son yaş həddi ilə əlaqədar təqaüdə göndərilib.
DİN-in Mətbuat Xidmətindən “Report”a faktı təsdiqləyib.
Xəbər verdiyimiz kimi, Dövlət Təhlükəsizlik Xidmətinin iyulun 3-də XİN-də keçirdiyi əməliyyat nəticəsində qurumun üç vəzifəli şəxsi həbs olunub.
Unikal.org-a açıqlama verən Xarici İşlər naziri Elmar Məmmədyarov baş verənlərə təəssüfləndiyini bildirib:
“Bu haqda danışmaq istəmirəm, çünki istintaq sirridir. Mənim açıqlamam istintaqın gedişinə təsir edə bilər. Həbslərə gəlincə, çox təəssüflənirəm. İstefa verəcəyimlə bağlı deyilənlərə şərh vermək fikrim yoxdur”.
Daxili İşlər Nazirliyində kadr dəyişikliyi olub.
Bu barədə nazir, general-polkovnik Vilayət Eyvazov əmr imzalayıb.
Əmrə əsasən, Xocalı Rayon Polis Şöbəsinə rəisi, polis polkovniki Eldar Bağırov xidmətdə olmanın son yaş həddi ilə bağlı təqaüdə göndərilib.
Hələlik onun yerinə təyinat yoxdur.
Son günlər ölkə mətbuatında, sosial şəbəkələrdə Prezident Administrasiyasının sabiq rəhbəri, hazırda isə AMEA-nın prezidenti vəzifəsində çalışan akademik Ramiz Mehdiyevin ünvanına kəskin ittihamlar səngimir.
Hələ sovet dövründən Azərbaycan Kommunist Partiyası Mərkəzi Komitəsinin fəallarından biri olan R. Mehdiyevin siyasi fəaliyyəti, şəxsiyyəti barədə məlumatlı olan respublikamızın 1-ci Prezidenti Ayaz Mütəllibov Moderator.az-a açıqlamasında müstəqil dövlət aparatında ən mühum vəzifələrdən birini tutmuş şəxs haqda mənfi fikirlər səslənməsindən təəssüf hissi keçirdiyini ifadə edib.
“Təbii ki, ölkəmiz, dövlətimiz üçün ürəkaçan hal deyil. Öncə onu deyim ki, Ramiz Mehdiyev Heydər Əliyevə də, İlham Əliyevə də, eləcə də xalqa minnətdar olmalıdır ki, uzun illər bu cür bir yüksək vəzifədə çalışıb. Təxminən 25 il ərzində, iki Prezident dövründə dövlətdə ən yüksək etimada malik vəzifələrdən birini tutmuş R. Mehdiyevin siyasi fəaliyyəti haqqında bu gün xoşagəlməz fikirlər səsləndirilməsi gözlənilməz və çox təəssüfləndiricidir. Halbuki, o, fəaliyyəti və əməlləri ilə özünün iddia etdiyi kimi, sədaqətlə xidmət etdiyi hakimiyyətdəki digər vəzifə sahibləri üçün də nümunə olmalı, xalq və dövlət naminə sidqi-ürəkdən çalışmalı idi. Amma Ramiz Mehdiyev tərəfindən belə yüksək etimadın doğrulmamasından bəhs edən bu cür ictimai motivasiya çox təəssüf doğurur. Çünki söhbət yalnız hakimiyyətin nüfuzundan deyil, bütövlükdə dövlətin nüfuzundan gedir…” – deyə sabiq dövlət başçısı bildirib. /Modern.az /
Azərbaycan Avtomobil Yolları Dövlət Agentliyinin (AAYDA) Nizamnaməsinə dəyişiklik edilib.
Bununla bağlı Prezident İlham Əliyev müvafiq fərman imzalayıb.
Bununla Prezidentin 2017-ci il 19 dekabr tarixli 1748 nömrəli fərmanı dəyişdirilib.
Yeni fərmana əsasən, Nizamnamənin 3.1.22-ci yarımbəndi ləğv edilib.
Nizamnamənin 3-cü maddəsi AAYDA-nın hüquq və vəzifələrini özündə ehtiva edir.
Sözügedən yarımbənddə isə göstərilirdi ki, Agentlik avtomobil yollarının, habelə körpülərin, tunellərin, digər yol qurğularının layihələndirilməsi, tikilməsi, idarə olunması, saxlanılması, qorunması, cari, orta və əsaslı təmiri, yenidən qurulması işlərinin yerinə yetirilməsi üçün lisenziya tələb olunduqda, həmin işləri lisenziya alınmadan yerinə yetirir.
Prezidentin fərmanı ilə isə Agentlik bundan sonra həmin səlahiyyətə malik olmayacaq.
Daxili İşlər orqanlarında kadr dəyişikliyi olub.
Bu barədə nazir, general-polkovnik Vilayət Eyvazov əmr imzalayıb.
Əmrə əsasən, polis kapitanı İsgəndərov Fərid Vulqar oğlu DİN-in Nəqliyyatda Baş Polis İdarəsinin Dəmiryol Nəqliyyatında Polis İdarəsinin Gəncə xətt Polis Şöbəsinin əməliyyat işləri üzrə müavini vəzifəsinə təyinat alıb.
O, bundan əvvəl Gəncə Şəhər Baş Polis İdarəsinin müstəntiqi olub. (oxu.az)
Xəbər verdiyimiz kimi, general-leytenant Nizam Osmanov Müdafiə nazirinin maddi-texniki təminat üzrə müavini – Maddi-Texniki Təminat Baş İdarəsinin rəisi vəzifələrinin müvəqqəti icrasına başlayıb.
Bu təyinata qədər Nizam Osmanov Azərbaycan Respublikası Silahlı Qüvvələrinin Baş Qərargah rəisinin müavini – Döyüş Hazırlığı və Hərbi Təhsil Baş İdarəsinin rəisi vəzifəsində xidmət edirdi.
Qeyd edək ki, general-leytenant Nizam Osmanov 2004-cü ildən 2013-cü ilə qədər I Ordu Korpusunun komandiri vəzifəsində xidmət edib.
2015-ci ilin yanvarında general-leytenant Nizam Osmanov Müdafiə Nazirliyində Baş İdarə rəisi vəzifəsinə təyin olunmuşdu. (modern.az)
Prezident İlham Əliyevin sərəncamı ilə general-leytenant Fuad Məmmədov Müdafiə nazirinin maddi-texniki təminat üzrə müavini – Maddi-Texniki Təminat Baş İdarəsinin rəisi vəzifəsindən azad edilib.
Bu bağlı Müdafiə Nazirliyi məlumat yayıb.
General-leytenant F.Məmmədov Müdafiə nazirinin əmri ilə nazirlikdə yeni vəzifəyə təyin edilib.
General-leytenant Nizam Osmanov Müdafiə nazirinin maddi-texniki təminat üzrə müavini – Maddi-Texniki Təminat Baş İdarəsinin rəisi vəzifələrinin müvəqqəti icrasına buraxılıb.
Ermənistanda pandemiya ilə dərinləşən iqtisadi tənəzzül fonunda siyasi (konstitusion) böhran da günü-gündən böyüməkdədir. Paralel surətdə ölkədə anti-Rusiya ovqatı heç vaxt olmadığı qədər güclənməkdədir. Baş nazir Nikol Paşinyan narazı cəmiyyətin diqqətini əsas problemlərdən yayındırmaq üçün ən müxtəlif variantlara baş vurmaq xətti götürüb, hətta yeri gələndə konstitusiyanı belə tapdamaqdan çəkinmir.
“Heç kimə sirr deyil ki, Ermənistanın sosial-iqtisadi vəziyyəti kritikdir, əslində bu, artıq tamamilə bonkrot olmuş bir dövlətdir”. Rusiyalı politoloq Vitali Arkovun hər hansı inkişaf perspektivi olmayan Ermənistana aid bu qiymətləndirməsi ilə razılaşmamaq qeyri- mümkündür.
Mövcud acı gerçəyi sözsüz ki, Nikol Paşinyan da anlayır. Odur ki, nə qədər gec deyil, öz hakimiyyət dayaqlarını möhkəmləndirməyə çalışır. Parlamentdə qəbul edilən və ciddi qalmaqla səbəb olan son konstitusiya dəyişiklikləri buna bariz sübutdur.
*****
Məlumat üçün bildirək ki, bu il aprelin 5-ə Ermənistanda “Əsas Qanun”a dəyişikliklərin edilməsi və 2015-ci ildəki konstitusiya islahatına qədər təyin edilmiş Konstitusiya Məhkəməsi sədrinin və üzvlərinin səlahiyyətlərinin dayandırılmasını nəzərdə tutan referendum planlaşdırılmışdı. Ancaq koronavirusa görə ölkədə fövqəladə vəziyyət elan edildiyindən referendum baş tutmadı. Ardınca, iyunun əvvəlində Paşinyanın tərəfdarlarının konstitusion üstünlükdə olduğu (89+1) Ermənistan parlamenti konstitusiyaya dəyişikliklərlə bağlı referendumu ləğv etmək hüququ verən qanun qəbul etdi. Referendum ləğv olundu və iyunun sonunda parlament konstitusiyaya düzəlişlər etdi. Dəyişikliklərə əsasən, Konstitusiya Məhkəməsinin sədri Grayr Tovmasyan vəzifəsini itirdi, hərçənd o, hakim olmaqda davam edir.
Xatırladaq ki, Tovmasyan Paşinyanın siyasi kursuna müxalif mövqedə olan, Serj Sərkisyan rejiminə yaxınlığı ilə tanınan şəxsdir. Konstitusiya Məhkəməsinin (KS) yeni tərkibi isə Nikol Paşinyana hər şeydən öncə opponentlərə qarşı sərt tədbirlərə hüquqi don geydirmək üçün lazımdır. Söhbət xüsusən də az öncə fantastik məbləğdə girov müqabilində (4 milyon dollar) azadlığa buraxılan eks-prezident, “Qarabağ klanı”nın ən odioz üzvü Robert Köçəryandan gedir.
Bu və digər səbəblərdən baş verənlər Ermənistanın müxalif və ictimai kəsimində konstitusiya çevrilişi, hakimiyyətin bir nəfərin əlində cəmləşməsi kimi qiymətləndirilir. Əslində də belədir. Özünü demokrat sayan “inqilabçı” baş nazir Ermənistanda faktiki surətdə əvvəlki rejimlərdən ciddi fərqlənməyən sərt idarəçilik bərqərar eləmək yolunu tutub.
Ancaq məsələ ondadır ki, Paşinyanın sələfləri də vaxtilə oxşar yolla getmiş, öz hakimiyyət maraqları naminə konstitusiyaya qeyri-legitim yollarla düzəlişlər etdirə bilmişdilər. Son olaraq Sərkisyan konstitusiyanı özünə uyğunlaşdırmağa çalışsa da (prezidentli üsul-idarədən parlamentli idarəçiliyə keçid), bu, ona müyəssər olmadı. İnqilab baş verməsi nəticəsində Serj Sərkisyan öz hakimiyyətinin ömrünü uzada bilmədi, yeni baş nazir postunu Nikol Paşinyan ələ keçirdi.
Bu xüsusda Azərbaycan prezidenti İlham Əliyevin iki gün öncə yerli telekanallara müsahibəsində söylədiyi bir fikir yerinə düşür: “Son iki il ərzində Ermənistanda diktatura rejimi formalaşıb. Xunta getdi, diktatura gəldi. Ermənistanda insan haqları kobudcasına pozulur, jurnalistlər həbs olunur. Bir jurnalist həbsxanada aclıq elan etmiş və aclıqdan vəfat etmişdir. Ermənistanda konstitusiya kobudcasına pozulur və konstitusiyaya qanunsuz dəyişikliklər edilir. Halbuki bu dəyişikliklər ancaq referendumla edilə bilərdi. Siyasi opponentlər təqib edilir, siyasi partiya rəhbərlərinin deputat toxunulmazlığı götürülür, onlar hədələnir, onların qohumlarına qarşı cinayət işləri açılır, hakimiyyət zəbt edilib, hakimiyyət bölgüsü tamamilə mövcud deyil. Baş nazir həm hakimdir, həm prokurordur, həm icra orqanının rəhbəridir, həm də sanki parlamentin sədridir. Qanunvericilik, məhkəmə-hüquq və idarəetmə mexanizmi bir adamın əlində cəmlənib və Ermənistanda diktatura artıq formalaşıb”.
*****
Düşmən ölkədəki hüquq müdafiəçiləri də vəziyyətdən narazılıqlarını açıq şəkildə bildirməyə başlayıblar.
“Ermənistanda indiyədək keçirilən konstitusiya dəyişiklikləri üzrə referendumların nəticələrinin heç biri mənim etibarımı qazanmayıb. Eynilə hazırkı hökumətin maraqlarına uyğunlaşdırılan son dəyişikliklərə də ciddi şübhələrim var”.
“Yeni Müsavat”ın məlumatına görə, bunu Ermənistanın ilk ombudsmanı, hüquq müdafiəçisi Larisa Allahverdiyan yerli mediaya açıqlamasında söyləyib.
Onun sözlərinə görə, 1995-ci ildəki ən utancverici referendum da daxil, Ermənistanda reallaşan hər üç konstitusiya referendumunun nəticələri etibarlılıq baxımından həmişə ictimai şübhələr doğurub. “Eləcə də 2015-ci il konstitusiyası bir çox kobud nöqsanlara malikdir. Bu konstitusiya keçmiş hakimiyyət (Serj Sərkisyan rejimi - YM) üçün yaradıldı, amma bu gün onun tamamilə fərqli bir hakimiyyət (Paşinyan iqtidarı - YM) tərəfindən mükəmməl istifadə olunduğunu görürük”, - deyə eks-ombudsman qeyd edib.
Fikrinə davam edən erməni hüquq müdafiəçisi deyib: “Yeni hökumətin proqramı, hansı ilə ki, o irəliləyir, mənəvi prinsiplərə əsaslanan dəyər sisteminə tamamilə ziddir. Çünki istənilən konstitusiya hüquqa, qanuna və cəmiyyətə söykənməlidir. Uyğunsuzluq da elə bundadır. Yəni yeni konstitusiya hakim siyasi qüvvənin maraqlarına uğun yaradılmır ki? Məndə əsaslı şübhə var ki, məhz belə olacaq. Bizdə hüquqa və qanunu hərfinə əsaslanan konstitusiya, deyəsən, heç vaxt olmayacaq. Yalnızca hakimiyyətdəki növbəti siyasi qüvvənin konkret maraqlarına uyğunlaşdırılan Əsas Qanun olacaq”.
Beləcə, erməni hüquq müdafiəçisi - sabiq ombudsman da etiraf edir ki, Ermənistan konstitusiyası de-fakto salfet kağızına çevrilib. Ancaq bu, əlbəttə ki, Azərbaycanın problemi deyil. Əksinə, müharibə vəziyyətində olduğumuz düşmən ölkədə daxili siyasi didişmələr və iqtisadi böhran nə qədər dərin olsa, bir o qədər bizim maraqlarımıza cavab verir. Çünki bu çəkişmələr işğalçını daha da taqətdən salır, Qarabağ cəbhəsində onun sayıqlığını azaldır, bütövlükdə onun tam iflasını yaxınlaşdırır...
“Yeni Müsavat”
.jpg)
Azərbaycanın Müdafiə Sənayesi nazirinə yeni müavin təyin edilib.
Bununla bağlı müvafiq sərəncam imzalanıb.
Sərəncama əsasən, Mehman Baxışov Müdafiə Sənayesi nazirinin müavini təyin olunub.
Qeyd edək ki, Mehman Abbas oğlu Baxışov 1959-cu il iyul ayının 28-də Abşeron rayonunun Altı-Agac kəndində anadan olub.
1981-ci ildə Xəzər Ali Hərbi Dənizçilik Məktəbini mühəndis-texnoloq ixtisası üzrə bitirib.
1981-ci ilin iyul ayından 1985-ci ilin avqust ayına qədər SSRİ Hərbi Dəniz Donanmasının Mərkəzi Kimya Anbarında saxlama şöbəsinin rəisi işləyib.
1985-ci ilin avqust ayından SSRİ Müdafiə Nazirliyinin Hərbi Nümayəndəliyində kiçik nümayəndə işləyib.
1990-cı ilin noyabr ayından SSRİ Müdafiə Nazirliyinin Baş Hərbi nümayəndəliyinin rəisi işləyib.
1992-ci ilin aprel ayından Azərbaycan Respublikası Müdafiə Nazirliyində Silah və Hərbi Texnika İdarəsində qərargah rəisinin müavini işləyib.
1992-ci ilin may ayından 1994-cü ilin yanvar ayına qədər Müdafiə Sənayesi İdarəsində Hərbi nümayəndəliklər şöbəsinin rəisi işləyib
1994-cü ilin yanvar ayından 2019-cu ilin oktyabr ayınadək Azərbaycan Respublikası Müdafiə Nazirliyinin Müdafiə Sənayesi İdarəsinin rəisi vəzifəsində xidmət edib.
2019-cu ilin oktyabr ayından Azərbaycan Respublikasının Prezidentinin Sərəncamı ilə ehtiyata buraxılıb.
2019-cu ilin noyabr ayından Azərbaycan Respublikası Müdafiə Sənayesi nazirinin (hərbi-texniki əməkdaşlıq üzrə) müşaviri təyin edilib.
Azərbaycan Respublikası Prezidentinin 7 iyul 2020-ci il tarixli Sərəncamı ilə Azərbaycan Respublikasının Müdafiə Sənayesi nazirinin müavini təyin edilib.
Azərbaycan Respublikası Prezidentinin 25 iyun 2008-ci il tarixli Sərəncamı ilə "Hərbi xidmətlərə görə" medalı ilə təltif edilib.
Azərbaycan Respublikası Prezidentinin 25 iyun 2013-ci Sərəncamı ilə General-mayor hərbi rütbəsi verilib.
Xatırladaq ki, Müdafiə Sənayesi naziri Mədət Quliyevdir. (report.az)
