Adam öldürməyə cəhddə görə həbs edilən şəxs hakim qarşısına çıxarılıb.

Musavat.com xəbər verir ki, Bakı Ağır Cinayətlər Məhkəməsində Əlyar Osmanovun cinayət işi üzrə məhkəmə iclası keçirilib.

Hakim Mirzə Xankişiyevin sədrliyi ilə keçirilən məhkəmədə zərərçəkmiş Xaliq Kələntərov ifadə verib.

O deyib ki, Əlyarla münasibətləri yaxşı olub. Hadisə baş verən gün isə içkili olduqlarını söyləyib. Kələntərov hadisənin anlaşılmazlıqdan baş verdiyini deyib: "İçkili idik. Səbəb yoxdur. Sadəcə bir-birimizi başa düşməmişik. Heç bir şikayətim yoxdur".

Suallara cavab verən Kələntərov onu bıçaqlayan şəxslə daha əvvəl mübahisə və dava etmədiyini deyib. Kələntərov indi içkini tərgitdiyini deyib.

Məhkəmədə məlum olub ki, hadisədən əvvəl Kələntərov manqandan yanar kösöv götürərək Əlyarın arxasınca qaçıb. Buna səbəb isə aralarında yaranmış mübahisə olub.

Belə ki, daha əvvəl həbsxana həyatı yaşayan Kələntərov tanışı Əlyara irad bildirib ki, həbsdə olanda onun yanına niyə gəlməyib və həbsdən çıxandan sonra niyə ona salam verməyib. Mübahisə bununla başlayıb.

Kələntərov bu qeyd edilənləri təsdiqləyib və bildirib ki, içkili olub.

Məhkəmə iclası sentyabrın 19-da davam etdiriləcək.

Hadisə bu il martın 7-də Binəqədidə baş verib. Çoxsaylı bıçaq yarası alan 1980-ci il təvəllüdlü Kələntərov Xaliq Yusif oğlu Kliniki Tibbi Mərkəzə çatdırılıb.

5 bıçaq yarası alan Kələntərovun həyatını xilas etmək mümkün olub.

Binəqədi Rayon Polis İdarəsinin 7-ci Polis Bölməsi əməkdaşları cinayəti törətməkdə şübhəli bilinən 1976-cı il təvəllüdlü Osmanov Əlyar Əskər oğlunu saxlayıb. 

Məlum olub ki, bıçaqlanan Kələntərov Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə məhkumluq həyatı yaşayıb.

Qeyd edək ki, Əlyar Osmanov Cinayət Məcəlləsinin 29.120.1-ci (qəsdən adam öldürməyə cəhd) maddəsi ilə ittiham edilir.