Bakı ilə sülh müqaviləsinin imzalanması və diplomatik münasibətlərin bərpası Ermənistan üçün yeganə ağıllı variantdır. Regionun inkişafı və iki qonşu ölkənin gələcək nəsilləri naminə, sabitliyin qorunması üçün bu çox vacibdir.

Bu barədə Axar.az-a açıqlamasında PolitRUS ekspert-analitik şəbəkəsinin rəhbəri, rusiyalı ekspert Vitali Arkov bildirib.

Onun sözlərinə görə, Azərbaycan rəhbərliyi məhz elə buna can atır: bu günlərdə Azərbaycan lideri İlham Əliyev sülh müqaviləsinin imzalanmasının, sərhədlərin delimitasiya və demarkasiya edilməsinin vacibliyini qeyd edib.

“Azərbaycanın elə özü də KTMT-yə maraq göstərir və bütövlükdə təşkilatla və onun ayrı-ayrı üzvləri ilə fəal əməkdaşlıq edir. Xüsusilə, Bakı beynəlxalq hərbi oyunlarda iştirak edir və bu ölkənin kursantları Rusiyanın hərbi universitetlərində təhsil almağa göndərilir. Qeyd edim ki, məhz Azərbaycan üçün KTMT-də “müşahidəçi” və “tərəfdaş” kimi qarşılıqlı fəaliyyət formatları işlənib hazırlanmışdır.

Məlum səbəblərdən bu məsələləri əvvəllər Ermənistan tərəfi hər vasitə ilə bloklayırdı. Amma İrəvanın KTMT-yə qarşı açıq “qayda pozuntuları” və təşkilatın digər ölkələrinin qınağına səbəb olan müəyyən hərəkətlərindən sonra Ermənistanın istəkləri əvvəlki çəkisini itirib”, - deyə müsahibimiz qeyd edib.

Ekspert hesab edir ki, Azərbaycan-KTMT münasibətlərinin inkişafı məhz Bakının müşahidəçi/tərəfdaş statusu alması vasitəsilə məntiqli şəkildə həyata keçiriləcək.

“Bundan başqa, mən istisna etmirəm ki, bu (KTMT-yə üzvlük), eləcə də Azərbaycanın Avrasiya İqtisadi İttifaqına qoşulması 10 noyabr 2020-ci il tarixli üçtərəfli bəyanatın şifahi “bəndlər”indən biri də ola bilər”, - deyə Arkov bildirib.