Kult.az Novruz nemətlərinin mistik mənalarını təqdim edir.

Yumurta - Novruzun əsas simvollarından biridir və masada həmişə boyanmış formada olmamlıdır. Çünki yumurtanın daxilində olan ağ maye nütfənin (insanın yenidən doğuluşu), sarı rəng isə irqin, yəni, fərqli yaradılışın simvoludur. Üst qabığı isə səma və kosmik tağın simvoludur. Tezliklə canlanmalı, dünyaya gəlməli olan təbiətin alleqoriyası kimi xarakterizə edilir.

Səməni - təzə yetişmiş buğda cücərtilərindən hazırlanan səməni yaşıllığın və təbiətin dirilməsinin simvoludur. Qədim zamanlarda səməninin yaxşı bitməsini, ilin məhsuldar olacağına işarə hesab edirdilər. Əks halda isə qıt olacağına nişanədir.

Qovurğa - ilaxır çərşənbədə qovurmalıq buğdadan qovrulur. Qovurğa bərəkət simvolu kimi xarakterizə olunur. Zövqə görə qovurğaya küncüt, qoz, boranı tumu, düyü əlavə edilə bilər. Xonçaya eyni zamanda qoz, fındıq da qoyulur.

Çərəzlər - süfrəyə əlavə edilən müxtəlif növ çərəzlər isə enerji və gücün rəmzi kimi hesab edilir.

Paxlava - ulduz və odun simvolu kimi başa düşülür. Paxlavanın ortasına qoyulmuş fındıq dənəsi torpağa işarədir, torpaqdan yaranmanı ifadə edir. Ümumiyyətlə, Novruz şirniyyatları əcdadlarımızın astral təsəvvürləri ilə bağlıdır. Paxlava ulduz simvoludur və alimlərə görə rombu xatırladır. Romb həyat ağacının mərkəzi elementidir və ana bətninə işarədir. Mərkəzinə yerləşdirilən fındıq, qoz içi isə ana bətnində olan uşağa işarədir.

Şəkərbura - Ayın simvolu kimi qəbul edilib. Şəkərburanın kənarındakı və üzərindəki naxışları isə ayın şüalarını xatırlatdığı qeyd olunur.