“Azərbaycan Dəmir Yolları” QSC-də ölkə başçısının çıxışından irəli gələn məsələlərlə bağlı videokonfrans formatında geniştərkibli  iclas keçirilib.

İclasda Prezident İlham Əliyevin 06 avqust 2020-ci il tarixində koronavirusla mübarizə sahəsində görülən tədbirlər və sosial-iqtisadi vəziyyətlə bağlı keçirdiyi müşavirədə dövlət şirkətləri, o cümlədən QSC-nin fəaliyyəti barədə səsləndirdiyi fikirlərdən irəli gələn məsələlər müzakirə olunub.

Qeyd edilib ki, dövlət başçısının rəhbərliyi və dəstəyi ilə son illərdə nəqliyyat infrastrukturunun, o cümlədən dəmir yolu nəqliyyatı sisteminin beynəlxalq standartlara uyğun təkmilləşdirilməsini təmin etmək məqsədilə bir sıra mühüm qərarlar qəbul olunaraq ölkənin dəmir yolları şəbəkəsinin genişləndirilməsi, müasirləşdirilməsi və yenilənməsi istiqamətində intensiv işlər aparılıb, beynəlxalq və regional nəqliyyat dəhlizlərinin, həmçinin “Bakı-Tbilisi-Qars” və “Şimal-Cənub” layihələrinin reallaşması prosesində Azərbaycanın aktiv iştirakı təmin edilib.

“Asiya İnkişaf  Bankı” ilə instusional islahatlar sahəsində aparılmış əməkdaşlıq çərçivəsində fəaliyyətə əsaslanan korporativ və insan resursları idarəedilməsinin təkmilləşdirilməsi, rəqəmsal transformasiya istiqamətində layihələr, maliyyə sisteminin müasir tələblərə uyğun qurulması, borcların restrukturizasiyası və digər məsələlərlə  bağlı bir sıra işlər yerinə yetirilib.

“Azərbaycan Dəmir Yolları” QSC-nin sədri Cavid Qurbanov, dövlət başçısı İlham Əliyevin çıxışında səmərəliliklə bağlı qeyd edilən haqlı iradları iclasda səsləndirərək, bu istiqamətdə Cəmiyyətin fəaliyyətinin təkmilləşdirilməsinin, idarəetmə sistemində münasibətlərə yeni müstəvidə baxılması məqsədilə işlərin sürətləndirilməsinin vacibliyini vurğulayıb. 

“Azərbaycan Dəmir Yolları” QSC 2030” yeni strategiyasının hazırlaması üçün böyük təcrübəyə malik olan “McKinsey&Company” şirkəti ilə əməkdaşlığa başlanıldığı və bu istiqamətdə işlərin surətləndirildiyi bildirilib. 

İclasda COVID-19 pandemiyasının dünya dəmir yolları şəbəkəsinə, o cümlədən QSC-nin fəaliyyətinə təsirindən söhbət açılıb. Cəmiyyətin fəaliyyət istiqamətləri üzrə pandemiyanın yaratdığı çətin şəraitə baxmayaraq, ötən ilin birinci yarısı ilə müqayisədə yük daşımalarda artımın müşahidə olunduğu bildirilərək, ölkənin tranzit şəbəkəyə çevrilməsi istiqamətində səylərin bundan sonra daha sürətlə davam etdiriləcəyi vurğulanıb. 

Yekunda Prezidentin tapşırığı istiqamətində işləri sürətləndirmək, o cümlədən səmərəliliyin artırılması və xərclərin optimallaşdırılması məqsədilə təhlillərin aparılması ilə bağlı zəruri addımların atılması qərara alınıb.

Azərbaycan və Serbiya hökumət nümayəndələrinin iştirakı ilə görüş keçirilir.
Report xəbər verir ki, görüşdə Serbiya Respublikasının Baş Nazirinin müavini və Daxili İşlər naziri Neboyşa Stefanoviç, Azərbaycan tərəfindən Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev və Təhlükəsizlik Şurasının katibi Ramil Usubov iştirak edirlər.

Mühacir Qərbi Azərbaycan İrəvan Respublikasının adı İrəvan Türk Cümhuriyyəti olaraq dəyişdirilib.

Bu barədə Modern.az–a mühacir dövlətin təsisçisi, ermənişünas alim Qafar Çaxmaqlı məlumat verib. O, dövlətin adının dəyişdirilməsinin səbəblərini izah edib:

“Avqustun 8-də Sədarətin toplantısını keçirdik. Sədarət uzun müddət müzakirələrə səbəb olan Mühacir Qərbi Azərbaycan İrəvan Respublikasının adının dəyişdirilməsi ilə bağlı məsələ qoymuşdu. Biz bu məsələni bir neçə dəfə müzakirə etsək də qərar qəbul etməmişdik. Səs çoxluğu ilə İrəvan Türk Cümhuriyyəti adı ilə davam etməyə qərar verdik.

Biz beynəlxalq təşkilatlara müraciət edərkən Qərbi Azərbaycan İrəvan Respublikası olaraq müraciət edirdik. Qərbi Azərbaycan kəlməsi isə müəyyən dolaşıqlıq yaradırdı. Çünki Cənubi Azərbaycanın bir hissəsi Qərbi Azərbaycan ostanı adlanır. Paytaxtı Urmiya olan bölgədir.

İkinci tərəfdən biz bu fikirdəyik ki, Azərbaycan ərazisində ikinci erməni dövlətinin yaradılmasına imkan verməyəcəyik. Ölkə başçısı da dəfələrlə qeyd edib ki, Dağlıq Qarabağda ermənilər işğalçılıq fəaliyyəti göstəriblər, Azərbaycanın böyük hissəsini işğal altında saxlayırlar. Biz də Qərbi Azərbaycan adı ilə ortaya çıxsaq, anlaşılmazlıq yaranar, ermənilər bizə qarşı “ikinci Azərbaycan dövlətini qurmaq istəyirlər” deyə iftiralar ata bilərdilər. İrəvan Türk Cümhuriyyəti adının qəbul edilməsinin əsasları var. Çünki İrəvan Azərbaycanın tarixi torpaqlarından biri olmaqla yanaşı həm də xanlıqlar dövründə ayrıca bir xanlıq olub. Bunu əsas götürdükdə, xanlıqların əahlisi, ordusu, bayrağı, digər atributları var idi. Bu mənada həm də İrəvan kəlməsi Qərbi Azərbaycan kəlməsinin həm başqa şəkildə daşıyıcısı həm də bir az da qısaldılmış formasıdır. Qərbi Azərbaycanda yaşayan və sonradan qovulan insanların təxminən 4 milyona yaxın insanın hamısı – 99,9 faizi türklərdən ibarətdir. Qərbi azərbaycanlılar hər zaman türk adlandırıldığından bu dəyişikliyi uyğun gördük. Bu mənim iradəmlə səsverməyə qoyulan, qəbul edilmiş qərar oldu. Fərqli fikirlər səsləndirənlər də oldu. Təbii ki, onlara böyük sayğı ilə yanaşırıq. Səs çoxluğu ilə məsələ qəbul edildi”.

Dövlətin fəaliyyəti ilə bağlı məqamlara gəlincə, Qafar Çaxmaqlı qeyd edib ki, bu neçə istiqamətdə şaxələnir:

“Birinci istiqamət beynəlxalq təşkilatlarla işdir. İkinci istiqamət isə dövlət atributlarının formalaşdırılması olacaq. Üçüncü istiqamət departament şəklində formalaşdırdığımız dövlətin fəaliyyətidir. Bizdə 10 departamentin ayrı –ayrı sahələr üzrə fəaliyyəti davam edir. Artıq katibliyimiz, onun rəhbəri və üzvləri də formalaşdırılıb. Başqa sözlə desək, genel sekreterlik formalaşdırmışıq.

Hədəflərimizlə bağlı müəyyən işlər görməyə çalışırıq. Bunu isə ictimaiyyətə hər zaman açıqlayırıq. Bilgiləndirmə məqsədi ilə qurulmuş mərkəzimiz də fəaliyyətlərini davam etdirir.

Bizim ən əsas işlərimizdən biri əhalini siyahıya almaqdır. Saytımız hazırlanır, demək olar, tamam hazırdır. Saytda Qərbi Azərbaycan əhalisinin pasportlaşmasını həyata keçirəcəyik. Burada doğulan insanlar və övladları, qovulanlar, müxtəlif ölkələrdə yaşayan Qərbi Azərbaycan kökənli insanlar qeydiyyata alınacaq. Sonra parlament seçkiləri olacaq. Hökumət formalaşdırıldıqdan sonra baş nazir  və prezident seçiləcək. Bu istiqamətdə fəaliyyətimizi davam etdiririk”.

Azərbaycan Respublikasının Xarici İşlər naziri Ceyhun Bayramov Türkiyə Respublikasına rəsmi səfərə yola düşüb.
Bu barədə Azərbaycan XİN mətbuat xidməti idarəsindən məlumat verilib.

Səfər çərçivəsində Türkiyənin yüksək səviyyəli rəsmiləri ilə görüşlərin keçirilməsi nəzərdə tutulur.

Dövlətimizin başçısı A.Lukaşenkonu prezident seçkilərində inamlı qələbə qazanması münasibətilə təbrik edib, ona Belarus xalqının firavanlığı və ölkənin inkişafı naminə fəaliyyətində yeni-yeni uğurlar arzulayıb.

Belarus Prezidenti göstərilən diqqətə və təbrikə görə Prezident İlham Əliyevə minnətdarlığını bildirib.

Dövlət başçıları ölkələrimiz arasında strateji tərəfdaşlığa əsaslanan dostluq münasibətlərinin müxtəlif sahələrdə uğurla inkişaf etdiyini vurğulayaraq, əlaqələrimizin bundan sonra da genişlənəcəyinə əminlik ifadə ediblər.

Telefon söhbəti zamanı əməkdaşlığın müxtəlif sahələrinin perspektivləri ilə bağlı məsələlər müzakirə edilib.

Daxili işlər orqanlarında növbəti kadr dəyişikliyi həyata keçirilib.

Unikal.org xəbər verir ki, Daxili işlər naziri, general-polkovnik Vilayət Eyvazovun əmri ilə Binəqədi Rayon Polis İdarəsinin Dövlət Yol Polisi Şöbəsinin rəisi, polis mayoru Mərdan Əliyev tutduğu vəzifədən azad olunub. Nazirin digər əmri ilə M. Əliyev Baş Dövlət Yol Polisi İdarəsinin Avtomobillərin Texniki Müayinə Mərkəzinin rəisi vəzifəsinə təyin olunub.
Qeyd edək ki, bu vəzifəni Milli Məclisin deputatı Elman Məmmədovun oğlu Elşad Məmmədov tuturdu.

Avqustun 7-də Serbiya Prezidenti Aleksandr Vuçiç Prezident İlham Əliyevə telefonla zəng edib.

Bu barədə Azərbaycan Prezidentinin Mətbuat Xidməti məlumat yayıb.

Bildirilir ki, Aleksandr Vuçiç iyul ayında Ermənistan-Azərbaycan sərhədində Ermənistanın təxribatı nəticəsində baş vermiş hadisələr zamanı hərbi qulluqçularımızın həlak olması ilə əlaqədar başsağlığı verib. Eyni zamanda, Serbiya Prezidenti bu hərbi toqquşmalarda Ermənistan tərəfinin Serbiyada istehsal olunan silahlardan istifadə etməsindən təəssüf hissi keçirdiyini bildirib. O, bu vəziyyətin araşdırılması ilə bağlı yaxın vaxtlarda Azərbaycana Serbiyanın yüksəksəviyyəli nümayəndə heyətinin göndəriləcəyini qeyd edib. Aleksandr Vuçiç Azərbaycanla strateji tərəfdaşlığa əsaslanan dostluq münasibətlərini yüksək qiymətləndirdiyini vurğulayaraq bunun təsdiqi kimi, Azərbaycan Prezidentini Serbiyaya rəsmi səfərə dəvət edib.

Telefon zənginə görə minnətdarlığını bildirən Prezident İlham Əliyev qeyd edib ki, Ermənistan tərəfinin Azərbaycanın hərbi və mülki mövqelərini atəşə tutması zamanı Serbiya istehsalı olan hərbi sursatlardan istifadə etməsi faktı Azərbaycan cəmiyyəti tərəfindən narahatlıqla qəbul edilib və bu atəşin nəticəsində hərbi qulluqçularımız və o cümlədən mülki şəxsimiz həlak olub.

Dövlətimizin başçısı Serbiya Prezidentinin yuxarıda göstərilən faktın araşdırılması və əməkdaşlığın perspektivlərinin müzakirə edilməsi üçün yüksəksəviyyəli nümayəndə heyətinin göndərilməsi barədə qərarı ilə bağlı məmnunluğunu ifadə edib.

Telefon söhbəti zamanı tərəflər gələcəkdə ölkələrimiz arasında dostluq əlaqələrinə kölgə sala biləcək hərəkətlərə yol verilməməsi barədə qərara gəliblər.

Prezident İlham Əliyev Serbiyaya səfər ilə əlaqədar dəvətə görə minnətdarlığını bildirib.

Dövlət Təhlükəsizlik Xidməti (DTX) bir çox rayonlarda əməliyyat həyata keçirsə də, bəzi rayonlar bunlardan nəticə çıxarmayıb.
Qanunsuz əməllər rayonlarda davam edir.

Bunu deputat Fazil Mustafa Milli Məclisin iclasında çıxış edərkən deyib. F.Mustafa bildirib ki, qanunsuz əməllərini davam etdirən rayonlardan biri də Göyçay və digər rayonlardır:

“Dünən həmkarım Siyavuş Novruzov bildirdi ki, icra başçılarının səlahiyyətləri azdır, süpürgəçilərdən başqa heç kimə səlahiyyəti çatmır. Amma onu da unutmayaq ki, rayon icra hakimiyyətləri bir çox hallarda bələdiyyələri irəli verib öz qanunsuz işlərini həyata keçirirlər. Bəlkə elə ona görə, əgər onlara daha geniş səlahiyyət verilərsə, qanunları daha çox pozarlar. Onların səlahiyyətlərinin az olması, bəlkə də işin xeyrinədir”.

Milli Məclisin növbədənkənar sessiyasının növbəti plenar iclası başlayıb.
İclasa spiker Sahibə Qafarova sədrlik edir. İclasın gündəliyə 6 məsələ daxil edilib.
Müzakirəyə çıxarılan 6 məsələnin hamısı üçüncü oxunuşdur.

Beyrut şəhərində baş verən partlayışdan sonra Livan hökuməti ilə rəsmi İrəvanın zərər çəkmiş ermənilərin Qarabağa köçürülməsi ilə bağlı danışıqlara başlamasına dair yayılan xəbərlər rəsmi deyil. Lakin Livan bu məsələdə maraqlı olmasa da, Ermənistan bu yöndə təklif irəli sürə bilər.

Bu sözləri Axar.az-a açıqlamasında Qlobal və Regional Təhlükəsizlik Problemləri Mərkəzinin rəhbəri, politoloq Qabil Hüseynli Livanın paytaxtı Beyrut şəhərində baş verən dəhşətli partlayışdan sonra Livandan ermənilərin Qarabağ və ətraf rayonlara köçürülməsi ilə bağlı səslənən iddiaları şərh edərkən deyib.

Politoloq bildirib ki, bu gün Livanda 200 mindən çox erməni yaşayır:

“Ermənilər dünyanın bir çox ölkəsində yaşasa da, Livan onlar üçün çox önəmlidir. Çünki bu ölkə, xüsusilə də Beyrut limanı ermənilərin dünyaya açılan qapısı hesab edilir. Ermənilərin Livana gəlişi 19-cu əsrin sonlarına təsadüf edir. Bu ermənilər Osmanlı sultanı II Əbdülhəmidin dövründə mərkəzi hakimiyyətə vaxtaşırı üsyan etdikləri üçün Şərqi Anadoludan sürgün ediliblər. Sürgündən sonra ermənilər Yaxın Şərqin bir çox strateji nöqtəsini, eyni zamanda Livanın Beyrut limanını özləri üçün məskən seçiblər.

Dünyaca tanınan ASALA terror təşkilatının mərkəzi Beyrut şəhəridir. Təsadüfi deyil ki, Birinci Qarabağ müharibəsi vaxtı Livandan Dağlıq Qarabağa ASALA-nın çoxsaylı militan dəstələri köməyə gəlirdi”.

Politoloq bildirib ki, Beyrutda baş verən partlayışdan Ermənistan istifadə etməyə çalışacaq:

“Beyrutda partlayışdan ən çox zərər çəkənlər yerli ermənilərdir. Çünki bu ermənilərin bir çoxu liman ərazisində yaşayırdı və geniş biznes sahələri vardı. Partlayış zamanı evlərini, mülklərini itirən erməniləri rəsmi İrəvan sevə-sevə qarşılamağa hazırdır. Xüsusilə də bu ermənilər ilk növbədə işğal altındakı Dağlıq Qarabağa yerləşdirilə bilər. Məqsəd isə Dağlıq Qarabağda ermənilərin sayını artırmaqdır. Bildiyiniz kimi, orda hazırda 50-60 min erməni qalıb”.

Politoloqun sözlərinə görə, Livan ermənilərinin Dağlıq Qarabağa yerləşməsi ümumilikdə o qədər də asan məsələ deyil:

“Burda bir neçə səbəb var. Birincisi, Azərbaycanın müqaviməti, ikincisi, Dağlıq Qarabağın və ümumiyyətlə Ermənistanın iqtisadi baxımdan regional layihələrdən kənarda qalması, investisiya üçün əlverişsiz olmasıdır. Təsadüfü deyil ki, Ermənistanın özünə investisiya yatırılmır. Digər ən önəmli məsələ Ermənistanın okeanlara çıxışının olmamasıdır. Livan erməniləri liman şəhərində yaşayırlar və böyük ticari əlaqələri də bunun üzərindən qurublar. Onlar Ermənistanda ərik əkib, Rusiyada satmağa və yaxud turizmin çökdüyü bir vaxtda Dağlıq Qarabağ ermənilərinin yeganə ümid yeri olan turizmə sərmayə qoya bilməzlər. Nəzərə alsaq ki, Qarabağa turist cəlbi də mümkün deyil və Azərbaycan bu cəhdləri ciddi şəkildə bloklayır, onda Livan ermənilərinin Dağlıq Qarabağda yerləşməsi çətin görünür.

Amma bütün hallarda Azərbaycanın bu prosesi diqqətdə saxlaması vacibdir”.