O bildirib ki, bu baxımdan, Azərbaycan-Qazaxıstan münasibətlərinin qısa zaman kəsiyində strateji tərəfdaşlıqdan strateji müttəfiqliyə yüksəldilməsi, iki ölkə arasında bütün sahələr üzrə münasibətlərin dərinləşməsinə xidmət edən 150-yə yaxın sənədin imzalanması, nəqliyyat-kommunikasiya, enerji sektoru və digər sahələr üzrə əlaqələrin getdikcə daha da dərinləşməsi təsadüfi deyil: "Azərbaycan-Qazaxıstan münasibətlərində nəzərə çarpan ən önəmli məqamlardan biri də iki ölkə arasında daha öncə imzalanmış sənədlərdən irəli gələn vəzifələrin sürətlə həyata keçirilməsidir. İki ölkə arasındakı əlaqələrin inkişafı “Orta Dəhliz”in potensialının tam üzə çıxarılması baxımından da mühüm əhəmiyyətə malikdir və hər iki ölkənin beynəlxalq nəqliyyat marşrutlarının diversifikasiyası istiqamətdə həyata keçirdikləri siyasət, mahiyyət etibarilə bir-birini tamamlayır, qarşılıqlı və regional əməkdaşlığın inkişafı üçün yeni prioritetlər müəyyənləşdirir.
Azərbaycan Qazaxıstan üçün Avropaya, Qazaxıstan isə ölkəmiz üçün Mərkəzi Asiyaya açılan qapıdır. Hər iki ölkə Avrasiyanın iki mühüm, geostrateji əhəmiyyət daşıyan regionu arasında körpü funksiyasını yerinə yetirirlər və məhz bu baxımdan da Azərbaycan-Qazaxıstan münasibətlərinin səviyyəsi, həm də Cənubi Qafqaz-Mərkəzi Asiya regionlarında qarşılıqlı faydalı əməkdaşlığın inkişafına, davamlı təhlükəsizliyin təmin olunmasına, sabitliyin qorunmasına mühüm təsir göstərən amil kimi qiymətləndirilməlidir".
Onun sözlərinə görə, Qazaxıstan Prezidenti Kasım-Jomart Tokayevin Azərbaycana səfəri çərçivəsində mətbuat üçün bəyanatında bir daha ölkəmizin öz ərazi bütövlüyünü bərpa etməsinə diqqət çəkməsi, Azərbaycanın Prezident İlham Əliyevin rəhbərliyi ilə tarixi Qələbə əldə etdiyini vurğulaması, Qazaxıstan xalqının bundan böyük sevinc hissi keçirdiyini bildirməsi, xalqlarımız və dövlətlərimiz arasındakı dostluq, qardaşlıq bağlarının nə qədər möhkəm olduğunun göstəricisidir: "Prezident Kasım-Jomart Tokayevin səfəri çərçivəsində Azərbaycan və Qazaxıstan arasında imzalanan sənədlərin hər iki ölkə üçün mühüm əhəmiyyət kəsb edən strateji sahələri əhatə etməsi, qarşılıqlı münasibətlərin davamlı və intensiv şəkildə inkişafı üçün yüksək siyasi iradə nümayiş etdirildiyindən xəbər verir.
Bu xüsusda Qazaxıstan neftinin alqı-satqısı sahəsində strateji əməkdaşlıq haqqında Memorandumun və Qazaxıstan neftinin Azərbaycan Respublikası ərazisindən tranzit edilən həcmlərinin mərhələli artırılması haqqında Sazişin imzalanmasının mühüm əhəmiyyət kəsb etdiyini qeyd etmək istəyirəm. Bu, Bakı-Tbilisi-Ceyhan və Bakı-Supsa neft kəmərlərinin tranzit potensialının artırılması, eləcə də enerji mənbələrinin və marşrutlarının diversifikasiyası baxımından hər iki ölkə üçün böyük önəm kəsb edir.
Prezident İlham Əliyevin qeyd etdiyi kimi, Azərbaycan-Qazaxıstan münasibətlərinin dinamikası dövlət başçılarının qarşılıqlı səfərlərinin xronologiyasından da aydın görünür. Son ilyarım ərzində Azərbaycan Prezidenti Qazaxıstana dörd dəfə səfər edib, Qazaxıstan Prezidenti isə bu dövr ərzində üç dəfə ölkəmizə gəlib. Qənaətimə görə, iki ölkə arasındakı dostluq və qardaşlıq münasibətlərinin ən bariz göstəricisi dövlət başçılarının qarşılıqlı səfərləri və münasibətləridir. Şübhəsiz ki, Qazaxıstan Prezidentinin ölkəmizə budəfəki səfəri, ölkələrimiz arasındakı münasibətlərin dinamikasını daha da artıracaq".