Göygöl Milli Parkı Azərbaycan Respublikası Prezidentinin 01 aprel 2008-ci il tarixdə imzaladığı Sərəncam əsasında yaradılmışdır və bu parkın ərazisi təqribən 6739 hektar sahəni əhatə edir. Bundan əlavə, bu park Göygöl Dövlət Təbiət Qoruğunun bazasında, həmçinin ona bitişik meşə və dövlət torpaqlarının ərazisində yerləşir. Parkın heyvanlar aləmi bir çox vəhşi məməli və quş növlərindən ibarətdir ki, bunlardan nəcib Qafqaz maralı, ayı, təkə, cüyür, porsuq, meşə pişiyi, samur, vaşaq, dovşan, dələ, quşlardan Xəzər uları, qara kərkəs, kəklik və s. göstərmək olar. Göygöl Milli Parkının əsas hissəsi zəngin bitki örtüyünə malikdir. Burada dağ-meşə, dağ-bozqır, subalp və alp dağ-çəmən bitki ekosistemləri yayılmışdır. 1100–2200 m hündürlükləri əhatə edən dağ meşələri çox zəngin bitki örtüklü olub, 80-a qədər ağac və kol növünə malikdir. Meşələrin əsas hissəsini kiçik yarpaq ağaclardan şərq fıstığı, şərq palıdı, Qafqaz vələsi, tozağacı, adi göyrüş, itiyarpaqlı ağcaqayın, cökə, iynəyarpaqlı ağaclardan qarmaqvari şam təşkil edir. Kol bitkilərindən zoğal, zirinc, itburnu, əzgil, gərməşov, böyürtkən və s. yayılmışdır. Ot bitkilərindən Qafqaz bənövşəsi, alp dişəsi, steven zəncirotu, xırdaçiçəkli ziboldiya, zəngçiçəyi, çobanyastığı, şırımlı topal, ağbığ, qırtıc və göstərmək olar.
Bəli, bütün bunlar onu göstərir ki, Göygöl Milli Parkı ölkəmiz üçün olduqca əhəmiyyətə malik olan parklardan biridir. Buna baxmayaraq, hazırda bu parkın ərazisindən şəxsi məqsədləri üçün istifadə edən elə şəxslər var ki, onların əməllərini gördükcə, sanki şoka düşməli oluruq. Bir anlığa diqqət yetirək ki, parkın ərazisində çoxsaylı ictimai-iaşə obyektləri, insanların asudə vaxtlarında istirahət etmələri üçün bir çox avadanlıqlar, hətta parkın bir hissəsindən digər hissəsinə hərəkət edən nəqliyyat vasitələri və s. var. Diqqət yetirək ki, bu gün Göygöl Milli Parkının ərazisində fəaliyyət göstərən ictimai-iaşə obyektlərində karantin qaydalarının tələblərinə əməl olunmur. Yəni, kafe və restoranlarda çalışan şəxslər, həmin ünvanlara təşrif buyuran müştərilər heç bir halda maska taxmrlar, digər qoruyucu vasitələrdən istifadə etmirlər. Baxmayaraq ki, ötən ilin əvvəlindən başlayaraq indiyə kimi bütövlükdə bəşəriyyəti, eyni zamanda ölkəmizi olmazın problemlərlə üz-üzə qoyan koronovirus (COVİD-19) infeksiyasına qarşı mübarizə tədbirləri gücləndirilsə də, Göygöl Milli Parkına rəhbərlik edən və digər şəxslərin günahı ucbatından, parkın ərazisində karantin qaydalarının tələblərinə əməl olunmur. Bu da o deməkdir ki, bu parkın rəhbəri və müəyyən problemlərin əmələ gəlməsinə cavabdehlik daşıyan digər şəxslər, koronovirus (COVİD-19) infeksiyasına qarşı mübarizə tədbirləri gücləndirilməsi istiqamətində ölkə rəhbəri cənab İlham Əliyevin çağırışını və Operativ Qərərgahın tələblərini heç bir halda “priznavat” etmirlər.
Redaksiyamıza çatdırılan başqa bir məlumatalara görə, parkın ərazisində fəaliyyət göstərən ictimai-iaşə obyektlərində çalışan şəxslərlə, rəhbərlik arasında heç bir əmək müqaviləsi bağlanmır, işçilərin sağlamlıq durumlarının göstəricisi haqda həkim arayışı yoxdur. Hətta, aidiyyatı dövlət qurumlarının günahı ucbatından, Göygöl Milli Parkı ərazisində fəaliyyət göstərən ictimai-iaşə obyektlərdə qiymətlər “od tutub yanır”. Adicə bir məqama diqqət yetirək ki, parkın bir hissəsindən digər hissəsinə, təqribən 200 metrlik əraziyə hərəkət edən nəqliyyat vasitələrinə minmək üçün hər kəs 5 AZN pul ödəməli olur. Əslində, bu birbaşa soygunçuluq, bənzəri olmayan formada “cibə girməkdir”. Söylənilənlərə görə, bəzi şəxslər Göygöl Milli Parkının rəhbərliyi ilə müəyyən işbirliyinə girir və parkın ərazisində ov ovlayırlar. Diqqət yetirmək lazımdır ki, həmin şəxslərin ovladıqları bəzi çöl quşları və çöl heyvanları qırmızı kitaba düşsə də, onlar buna heç bir halda əhəmiyyət vermirlər. Bu yöndə baş alıb gedənləri təhlil etməklə belə bir qənaətə gəlmək olar ki, Azərbaycan Respublikasının Ekologiya və Təbbi Sərvətlər naziri cənab Muxtar Babayev Göygöl Milli Parkı ərazisində baş verənlərə gözucu baxdığından, hazırda bu parkın ərazisində hər cür həngamələrə, çoxsaylı qanunsuzluqlara qol qoyulur.