Astarada toyda dava düşüb, xəsarət alan var.

Axar.az Report-a istinadla xəbər verir ki, hadisə ötən gecə Astara şəhərindəki şadlıq evlərindən birində baş verib.

Belə ki, 1994-cü il təvəllüdlü Nəhmətulla Natiq oğlu Səfərli baş nahiyəsindən küt alətlə xəsarət alıb. Məlum olub ki, N.Səfərliyə xəsarət yetirən şəxs bibisi oğludur.

Onların hər ikisinin Lənkəran rayonu, Şıxəkəran kənd sakinləri olduğu və aralarındakı münaqişənin iştirak etdikləri qohum toyunda yenidən qızışdığı bildirilir.

N.Səfərli Lənkəran Rayon Mərkəzi Xəstəxanasına çatdırılıb.

Faktla bağlı araşdırma aparılır.

Kiyev metrosunda silahlı şəxs tutulub.

Axar.az xəbər verir ki, bu barədə Kiyev polisi məlumat yayıb.

Bildirilib ki, metro stansiyasına keçmək istəyən şəxsin sənədlərini və əşyalarını yoxlayan zaman onun üzərindən sursat və patronlar çıxıb.

“Şübhəli şəxsin idman çantasından F-1 qumbarası və 76 ədəd avtomat patronu çıxıb. Araşdırma zamanı məlum olub ki, şübhəli şəxs 1997-ci il təvəllüdlü Jitomir sakinidir”, - məlumatda qeyd olunub.

Çempion ürək tutmasından dünyasını dəyişib.

Axar.az Unikal.org-a istinadən xəbər verir ki, əslən Qax rayonundan olan 1993-cü il təvəllüdlü Dəmirçi Nurlan Nurullah oğlu martın 23-də Qazaxıstanın Komenqorsk şəhərində ürək tutmasından dünyasını dəyişib.

1997-ci ildən Qazaxıstanda yaşayan N.Dəmirçi idmanın boks, kiqboks, qaydasız döyüş və K- 1 idman növləriylə məşgul olub. O boks və kiqboks üzrə dəfələrlə Qazaxıstan çempionu olub.

N.Dəmirçi idman ustalığına namizəd idi. İdmançı doğuldugu Qax rayonuna gətirilərək dəfn olunacaq.

Bərdə Rayon Polis Şöbəsinin əməkdaşları tərəfindən keçirilmiş tədbirlər nəticəsində narkotik vasitələrin qanunsuz dövriyyəsində şübhəli bilinən şəxs saxlanılıb.

DİN-in Mətbuat Xidmətinin Bərdə regional qrupundan Axar.az-a verilən məlumata görə, Bərdə RPŞ-nin əməkdaşlarının keçirdiyi əməliyyat-axtarış tədbirləri nəticəsində narkotik vasitələrin qanunsuz dövriyyəsində şübhəli bilinən rayon sakini, əvvəllər məhkum edilmiş Vaqif Əliyev saxlanılıb.

Onun üzərinə və yaşadığı ünvana baxış keçirilən zaman 4 kiloqramdan artıq marixuana və 29 qramdan artıq heroin aşkar edilərək götürülüb.

Faktla bağlı Bərdə RPŞ-də cinayət işi başlanılıb və V.Əliyevin barəsində məhkəmənin qərarı ilə həbs qətimkan tədbiri seçilib.

Zaqatala rayonunun Çökək kənd sakini 1995-ci il təvəllüdlü Rəna Ramazanovanın martın 21-də saat 14 radələrində Zaqatala Rayon Mərkəzi Xəstəxanasının Reanimasiya şöbəsində ölməsi faktı ilə bağlı Cinayət Məcəlləsinin 314.2-ci maddəsi ilə cinayət işi başlanıb.

Bakı şəhəri, Xəzər rayonu, Mərdəkan qəsəbəsində tikinti materialları satışı mağazası və anbarında yanğın başlayıb.

Axar.az xəbər verir ki, bu barədə Fövqəladə Hallar Nazirliyinin (FHN) “112” qaynar telefon xəttinə məlumat daxil olub.

Məlumat qəbul ediləndən dərhal sonra FHN-in Dövlət Yanğından Mühafizə Xidmətinin yanğından mühafizə bölmələri yanğın baş verdiyi ünvana cəlb olunub.

Hal-hazırda yanğınsöndürmə işləri davam etdirilir.

Əlavə məlumat veriləcək.

Naməlum şəxslər Moskvada Xalq Təsərrüfatı Nailiyyətləri Sərgisində “Azərbaycan” pavilyonunda partlayış təhlükəsi barədə məlumat veriblər.

Axar.az xəbər verir ki, bu barədə TASS məlumat yayıb.

"XTNS-nin “Azərbaycan” pavilyonunda partlayış təhlükəsi barədə anonim məlumat daxil olub. Yoxlama aparılır", - məlumatda qeyd olunub.