Yol hərəkəti qaydaları haqqında qanuna əsasən, asma mühərrikli velosipedi 16, adi velosipedi isə 14 yaşdan yuxarı hər kəsin nəqliyyat yollarında hərəkət istiqamətində sürməsinə icazə verilir.
Bu sözləri Axar.az-a açıqlamasında “Digesta” hüquq firmasının direktoru, ekspert Ərşad Hüseynov söyləyib. O bildirib ki, ümumi istifadə olunan yollarda 14 yaşına çatmayan uşaqların velosipedlə hərəkəti qanunla qadağan edilir:
“16 yaşından yuxarı şəxslər üçün ümumi istifadə olunan yollarda hərəkət etməklə bağlı xüsusi qaydalar mövcuddur:
1. Velosiped yollarda xüsusi velosiped zolaqları və ya velosiped yolları ilə hərəkət etməlidir;
2. Əgər belə zolaq və ya xüsusi yol yoxdursa, onların yolun hərəkət hissəsi ilə, yəni avtomobillərin hərəkəti üçün nəzərdə tutulan zolaqla hərəkətinə yol verilir. Yolda eyni istiqamətdə bir və ya bir neçə hərəkət zolağı olmasından asılı olmayaraq, velosipedi yalnız yolun ən sağ kənarı ilə sürmək olar. Özü də bu zaman velosipedçilər yalnız bir cərgədə hərəkət edə bilərlər. Yəni yolun sağ kənarı ilə də iki velosipedin yanaşı hərəkəti qadağandır.
3. Velosiped və moped sürücülərinə velosiped yolu olduğu halda, onun yanındakı yolla hərəkət etmək qadağandır. Bu qaydaların pozulması müşahidə edilərsə, velosipedi idarə edən şəxs cərimələnəcək”.
Ekspert velosipedlə hərəkət zamanı yol nəqliyyat hadisələri baş verərsə, hər bir hadisəyə fərdi hüquqi qiymət verilməli olduğunu da vurğulayıb:
“Bu zaman hadisəni törədən tərəfi müəyyənləşdirmək üçün iş aparılmalıdır. Ola bilsin ki, velosipedi idarə edən şəxs maşının qarşısına elə tərzdə çıxıb ki, sürücünün təhlüləsizlik üçün manevr etmək imkanı olmayıb. Bu halda sürücünün heç bir günahı olmur. Ancaq azyaşlı uşaq baxmayaraq ki, onun yolda hərəkəti qadağan olunsa belə, sürücü uzaqdan onu görüb təhlükəsizlik tədbiri görmədən o uşağı vurarsa, sürücü günahkar hesab olunur”.