 |
 |
Prezident İlham Əliyev Samir Nuriyevin Azərbaycan Respublikası Prezidentinin Administrasiyasının rəhbəri təyin edilməsi haqqında sərəncam imzalayıb.
Dövlət başçısının digər sərəncamı ilə S.Nuriyev Azərbaycan Respublikası Prezidentinin Administrasiyasının rəhbəri təyin edilib.
Qeyd edək ki, Ramiz Mehdiyev oktyabrın 23-də Azərbaycan Respublikası Prezidenti İlham Əliyevin sərəncamı ilə Azərbaycan Respublikası Prezidentinin Administrasiyasının rəhbəri vəzifəsindən azad olunub.
Samir Nuriyev buna qədər Azərbaycan Respublikası Dövlət Şəhərsalma və Arxitektura Komitəsinin sədri olub.
2015-ci ildən Azərbaycan Memarlar İttifaqının fəxri üzvüdür.
Seçkilərin gələn ilin əvvəlində keçiriləcəyi qeyd olunur; YAP parlament seçkilərində yaşlı namizədlər irəli sürməyək
Azərbaycan Milli Məclisi ətrafında gəzən söz-söhbətlər səngimək bilmir. Ölkə başçısı İlham Əliyevin 15 oktyabrda keçirdiyi iqtisadi müşavirədən sonra iddialar daha da artıb. Prezidentin yaşlı məmurlara ünvanladığı “gedin” mesajının qanunverici orqanda təmsil olunan qocaman deputatlara da şamil olunduğu bildirilir.
Artıq Azərbaycan hökumətinin yaşlılarla sağollaşmaq fikrində qətiyyətli olduğu son günlərdə bir neçə qərarda özünü büruzə verdi. Hakim Yeni Azərbaycan Partiyasının parlament seçkilərində yaşlı namizədlər irəli sürməyəcəyi iddia edilir. Əslində bu seçkilərlə bağlı da müəyyən söz-söhbətlər dolaşır. Seçkilərin vaxtından əvvəl, gələn ilin əvvəlində keçiriləcəyi qeyd olunur. Bu proseslərdə parlamentin tərkibinin hətta 90 faiz (ən azı 100 deputat yeri) dəyişə biləcəyi vurğulanır. “Lal”, qocaman, məmurlara yaxın mandat sahibləri üçün qanunverici orqanın qapılarının bağlanacağı barədə fikirlər də səslənir. Tərkibdə orta və gənc nəslin daha çox təmsil olunacağı deyilir. Ölkə iqtidarının gələcək üçün kadr bazasını Milli Məclis üzərində qurmaq fikrində olduğu söylənilir. Əslində bunun mesajları 2018-ci ilin aprelindəki prezident seçkilərindən sonra verilmişdi. Seçkilərdə qalib gələn İlham Əliyev təyinatlarda parlament deputatlarına üstünlük vermişdi, yəni onları yüksək vəzifələrə təyin etmişdi.
Müxalifətlə bağlı da müəyyən fikirlər dolaşır. Parlament partiyalarının bəzilərinin bu dəfə qanunverici orqandan kənar qalacağı ehtimal edilir. Onları başqa siyasi qurumların əvəzləyəcəyi bildirilir. Milli Məclisdə təmsil olunan partiyaların sayının da artırılacağı söylənilir.
Keçmiş maliyyə naziri Fikrət Yusifov da Milli Məclisin yenilənməsini arzu edir: “Azərbaycanda hakimiyyətin bu qanadının zəifliyi cəmiyyətdə əsas tənqid hədəfində olan mövzulardan biridir. İnsanlar arasında keçirilən sorğular göstərir ki, onların çoxu öz deputatlarını tanımırlar. Əgər seçici səs verdiyi deputatın adını belə bilmirsə, bu seçicinin günahı deyil – deputatın günahıdır. Deputat xalqın sözünü deyən, onu aidiyyəti yerə çatdırmalı olan birisidir. Bizim deputatların böyük bir hissəsi parlamentdə praktik olaraq söz sahibi deyillər. Yəni onlar parlamentdə ”danışmaq gümüşdürsə, susmaq qızıldır” prinsipinə söykənib, passiv mövqedə dayanmağa üstünlük verirlər. Kifayət qədər məlumatlar var ki, bu sıradan olan deputatların əksəriyyəti seçiciləri ilə də demək olar ki, görüşmürlər və onların problemlərinin həlli üçün heç nə etmirlər. Danışmayan, lakin həmişə seçicilərinin yanında və dəstəyində olan bir-iki deputat var. Deputat seçicilərinin içərisində olmalıdır və təbii ki, onların problemlərini təmsil olunduğu məclisdə qaldırmalı və bu problemlərin həllinə nail olmalıdır. Növbəti parlamentdə daha aktiv fəaliyyət göstərə biləcək deputatların olmasını arzu edirəm. Bu sırada daha çox iqtisadçıların və hüquqşünasların olması dövlətçiliyimiz üçün olduqca önəmlidir”.
Sabiq dövlət müşaviri Qabil Hüseynli parlamentin tərkibinin yenilənməsinin vacibliyinə toxundu: “Kadr siyasətinin mahiyyətinə parlamentin deputatları da daxil olmalıdır. Düzdür, onlar seçkili orqanların nümayəndələridir. Bu gün durub desək ki, onların ən passivini, yaxud yaşlısını fəaliyyətindən kənarlaşdırmaq lazımdır, bu düzgün olmazdı. Biz parlamentin fəaliyyətinin son günlərini gözləməli, üzümüzə gələn seçkiləri nəzərdə tutub danışmalıyıq. Sözsüz ki, Milli Məclisə seçilən adamın yaşı çox əhəmiyyətlidir. Yaş 70-dən yuxarıdırsa, bu adamın ictimai-siyasi fəallığı aşağıdırsa, ictimai intellektinin kəsərliyi yaxud yüksəkliyi ilə fərqlənmirsə, fəal siyasətçi, ictimai-siyasi xadim deyilsə, belə şəxslərin parlamentə seçilməsinə hər bir partiya imkan verməməlidir. Düzdür, seçkilərdə əsas rol xalqa məxsusdur. Amma seçicilər də maarifləndirilməli və onlara izah edilməlidir ki, Milli Məclisə ictimai-siyasi fəallar, intelektuallar, dünya siyasətini yaxşı bilən hazırlıqlı insanlar seçilməlidir. Onların yaş meyarları da mütləq nəzərə alınmalıdır. Amma bunu mütləqləşdirməyin tərəfdarı deyiləm. Birinin yaşı 70-dən yuxarı ola bilər, amma onun intellektual göstəriciləri yuxarıdırsa, fəal ictimai-siyasi xadimdirsə, ona meydan vermək mümkündür. Çünki siyasətçilər adətən kamil çağlarına yaşlaşanda çatırlar. Burada çox böyük yaşı nəzərdə tutmuram. Gənc nəsillə yaşlı təbəqə arasında qırılmaz nəsil əlaqəsi yaradılmalıdır. Gənc deputat olmalıdır deyib parlamenti tam şəkildə gəncləşdirmək də olmaz. Burada kamil siyasətçilərə yer verilməlidir deyib, Milli Məclisin qapılarını onların üzünə tam açmaq da olmaz. O kəslər parlamentə namizədliklərini verməlidir ki, deputat kimi yüksək funksiyasının öhdəsindən gələ biləcəklərini anlasınlar.
Bu işə özlərini hazır hesab etdikdən sonra deputatlığa namizəd ola bilərlər. Xalqın onlara olan etimadını doğrulda biləcəklərinə də əmin olmalıdırlar. Əlbəttə, xalq da aldanmamalı, hər şeyi götür-qoy edib seçimini etməlidir. Seçki marafonu olur. Bu marafonda insanlara seçki platformasını təqdim etmək, onlar arasında təbliğat aparmaq, əhali ilə görüşmək, KİV-lər vasitəsilə özünü təqdim etmək kimi imkanlar açılır. Bununla da insanlar namizədin hansı keyfiyyətlərinin olduğunu öyrənmək imkanı qazanırlar. Xalqımız düşünüb, daşınıb gənc, enerjili, yüksək keyfiyyətlərə malik olan, vətənpərvər, səhəri gün onun hüquqları uğrunda mübarizə apara biləcək insanlara səs verməyi hədəfləməlidir. Parlament düşüncə parlamenti olmalıdır. Orada işləyən şəxslər təmsil olunmalıdır. Qanunlar hazırlayan, büdcənin hazırlanmasına töhfə verən insanlar mandat qazanmalıdır. Təsadüfi adamların, o qədər də cəlbedici göstəricilərə malik olmayan insanların heç bir halda deputat olmalarına yol vermək olmaz. Çünki qanunverici orqan hər bir hakimiyyət üçün böyük rol oynayan qurumdur. Bu orqanın yaxşı qanunlar hazırlaması, müsbət təşəbbüslərlə çıxış etməsi üçün oraya seçilən adamların mənəvi, əxlaqı keyfiyyətləri və digər insanı tərəfləri ciddi surətdə nəzərə alınmalıdır. Zənnimcə, belə olduqda parlament daha yüksək iş əmsalına sahib ola bilər”.
Prezident İlham Əliyev Şəmsəddin Xanbabayevin Xaçmaz Rayon İcra Hakimiyyətinin başçısı vəzifəsindən azad edilməsi haqqında sərəncam imzalayıb.
Sərəncamla Şəmsəddin Hüseynqulu oğlu Xanbabayev Xaçmaz Rayon İcra Hakimiyyətinin başçısı vəzifəsindən azad edilib.
Dövlət başçısının digər sərəncamı ilə Elnur Şahbaz oğlu Rzayev Xaçmaz Rayon İcra Hakimiyyətinin başçısı təyin olunub.
Prezident həmçinin İlham Əliyev Qoca Səmədovun Yevlax Şəhər İcra Hakimiyyətinin başçısı vəzifəsindən azad edilməsi haqqında da sərəncam imzalayıb.
Sərəncamla Qoca Çərkəz oğlu Səmədov Yevlax Şəhər İcra Hakimiyyətinin başçısı vəzifəsindən azad edilib.
Prezidentin digər sərəncamı ilə Anar Aqil oğlu Tağıyev Yevlax şəhərinin icra başçısı təyin edilib.
"Sizin qarşınızda duran əsas vəzifələr rəhbərlik edəcəyiniz rayonların sosial-iqtisadi inkişafını təmin etməkdir. Siz vətəndaşlarla daim təmasda olmalısınız, bütün kəndləri gəzməlisiniz, kənd camaatı ilə görüşməlisiniz".
Bunu Azərbaycan Respublikasının Prezidenti İlham Əliyev Anar Tağıyevi Yevlax Şəhər İcra Hakimiyyətinin başçısı, Elnur Rzayevi Xaçmaz Rayon İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.
Ölkə başçısı bildirib ki, yeni başçıların işi kabinet işi olmamalıdır: "Sizin işiniz kabinet işi olmamalıdır. Düzdür, əlbəttə ki, hər bir rəhbərin işi, o cümlədən qəbul edilən qərarlar, görülən işlər, keçirilən müşavirələr - bütün bunlar hər bir rəhbər işçinin gündəlik həyat tərzidir. Ancaq siz çox model başçılar kimi fəaliyyət göstərməlisiniz. Mən bir neçə dəfə demişəm, əgər ölkəmizin bütün kəndlərinin problemləri həll olunarsa, deməli, bütün problemlər də həll olunacaq. Xüsusilə nəzərə alsaq ki, hazırda regionların sosial-iqtisadi inkişafı üzrə dördüncü dövlət proqramı icra edilir. Hesab edirəm ki, dördüncü proqramın icrası nəticəsində bu günə qədər həll olunmamış məsələlər tam şəkildə öz həllini tapacaqdır. Bu proqramın icrası Xaçmaz və Yevlax rayonlarını da əhatə edir. Siz vətəndaşların qayğıları ilə yaşamalısınız, onların problemlərini öyrənməlisiniz, düzgün təhlil aparmalısınız. Hansı məsələ rayon səviyyəsində həll oluna bilərsə, onları həll etməlisiniz. Əgər gücünüz çatmasa, onda mərkəzi icra orqanlarına müraciət etməlisiniz, o cümlədən Prezident Administrasiyasına ki, biz mövcud olan problemləri həll edək".
Prezident yeni icra başçıları qarşısında bir sıra tələblər qoyub: "Eyni zamanda, siz vətəndaşlarla daim ünsiyyət əsnasında rayonun problemlərini və vətəndaşları narahat edən məsələləri daha dərindən öyrənib adekvat tədbirlər görməlisiniz. Bütün xoşagəlməz hallara son qoyulmalıdır, rüşvətxorluq, korrupsiya tamamilə yığışdırılmalıdır. Mən sizə şəxsən bu göstərişi verirəm. Əgər eşitsəm, bilsəm ki, əyri yola gedirsiniz, onda siz çox ciddi cəzalandırılacaqsınız. Bunu bəri başdan bilin və bütün başqa yerli icra orqanlarının nümayəndələri, rəhbərləri məni yaxşı eşitsinlər. Korrupsiyaya, rüşvətxorluğa qarşı Azərbaycanda amansız mübarizə aparılmalıdır. Bu yara bizim inkişafımızı ləngidir və gələcəyə olan planlarımızı sarsıda bilər. Düzdür, bu bəla hər bir ölkədə var. Amma əsas məsələ ondadır ki, rəhbərlik bu məsələyə necə münasibət göstərir. Azərbaycanda şəffaflıq, dürüstlük hər bir dövlət məmuru üçün həyat tərzi olmalıdır. Ona görə bu məsələ ilə bağlı aidiyyəti dövlət qurumları ilə birlikdə çox ciddi fəaliyyət göstərməlisiniz, tamamilə şəffaf vəziyyət yaradılmalıdır".
Xaçmaz rayonu və Yevlax şəhəri İcra Hakimiyyətində rəhbər şəxslərin dəyişidiriləcəyi gözlənilir.
Modern.az məlumatına görə, yaxın vaxtlarda Xaçmaz rayon İcra Hakimiyyətinin 80 yaşlı başçısı Şəmsəddin Xanbabayevin və Yevlax şəhər İcra Hakimiyyətinin 60 yaşlı başçısı Qoca Səmədovun tutduqları vəzifədən azad edilməsi barədə müvafiq sərəncamlar imzalanacaq.
Modern.az məsələ ilə bağlı Yevlaxın deputatı İlham Məmmədov ilə əlaqə saxlayıb.
Deputat xəbəri təsdiqləyib. İ.Məmmədov bildirib ki, Yevlaxa yeni icra başçısının təyin olunacağı barədə xəbəri o da eşidib.
“Yəqin ki, bu gün sərəncam veriləcək. Mən də dünən eşitdim ki, icra başçımız dəyişəcək. Çox ehtimal ki, bu gün yeni təyinat haqqında qərar elan olunacaq”.
Artıq yaşlı icra başçılarının yerinə gətiriləcək kadrların kimliyi barədə də məlumat verilib. Belə ki, Gəncə şəhər İcra Hakimiyyəti başçısının I müavini Elnur Rzayevin (1980-ci il təvəllüdlü) Xaçmaz rayon İcra Hakimiyyətinin yeni başçısı təyin olunacağı gözlənilir.
Nəsimi rayon İcra Hakimiyyəti başçısının müavini Anar Tağıyevin (1981-ci il təvəllüdlü) isə Yevlax şəhər İcra Hakimiyyətinin başçısı vəzifəsinə aparılacağı gözlənilir.
Məlumata görə, Anar Tağıyev Bakı Şəhəri İcra Hakimiyyətinin başçısı Eldar Əzizovun kürəkənidir.
Məhəmməd Əsədullazadə: “Paşinyan Robert Koçaryan və Serj Sarkisyanın tərəfdarlarını siyasi səhnədən silməyə çalışır”
Ramil Məmmədli: “Güman etmək olar ki, saxlanılan şəxslərin bəzilərindən Saakyana və qondarma rejimin rəhbəliyində təmsil olunan digərlərinə qarşı ifadələr alınacaq”
Bugünlərdə, daha dəqiq desək, oktyabrın 11-də Ermənistan parlamentində 2016-cı il aprel döyüşlərinin detallarını araşdıran İstintaq Komissiyasının iclası baş tutub. Qeyd edək ki, iclasda Ermənistan parlamentinin “İşıqlı Ermənistan” fraksiyasının deputatı Harutyun Babayanın köməkçisi, həmin döyüşlərinin iştirakçısı olan Sarkis Niazyan dindirilib. Bununla bağlı ordu.az-da yer alan informasiyada isə deyilir ki, aprel döyüşlərini araşdıran İstintaq Komissiyasının “Mənim Addımım” fraksiyasından olan üzvü Armen Xaçatryanın sözlərinə görə, komissiyanın görüləsi çox işi olduğu üçün məcburi olaraq zaman uzadılmalıdır: “İstiqamətlər çoxdur və bütün bunlar qeyd ediləcək, bundan nəticə çıxarmaq üçün çox vaxt lazımdır”. Xaçatryan həmçinin, bildirib ki, təxminən bir onluğa çatan keçmiş və indiki yüksək vəzifəli mərmurlar dindirilib, yaxın gələcəkdə mətbuatda adları səslənən şəxslərin hamısı dəvət olunacaq.
Aprel döyüşlərini araşdıran Ermənistanın parlament komissiyasının Serj Sarkisyanı da dindirəcəyi gözlənilir
Bu arada, Ermənistan mediası düşmən ölkənin keçmiş müdafiə naziri Vaqarşak Arutyunyana istinadən bəyan edib ki, 2016-cı ilin aprel müharibəsində erməni tərəfi yaranmış vəziyyəti düzgün qiymətləndirə bilməyib və nəticədə əməliyyat, taktiki uğursuzluqlara yol verib. Bununla bağlı kaspi.az-da gedən məlumata görə, “Azatutyun” yazır ki, general-leytenant Arutyunyan hazırda dördgünlük müharibəni araşdıran parlament istintaq komissiyasının məsləhətçisi kimi çıxış edir. Arutyunyanın sözlərinə görə, erməni tərəfi canlı qüvvənin hansı şəraitdə itirilməsini araşdırmalıdır. “Azatutyunu”n “kəşfiyyat səhvləri də buraxılıbmı” sualına cavab verən Arutyunyan deyib ki, bu məsələ hələ araşdırılır: “Kəşfiyyatın rolu hələ öyrəniləcək. İnformasiya olubmu, bu barədə məruzə edilibmi, kimə məruzə edilib və hansı qərarlar qəbul olunub? Bu günün əsas vəzifəsi bu informasiyanın necə olduğu, kimə məruzə edildiyi və hansı qərarın qəbul edildiyinin öyrənilməsidir”. Onun fikrincə, bu müharibədə hər bir öldürülmüş əsgərin hansı şəraitdə həlak olmasının aydınlaşdırılması əsas vəzifələrdən biridir. Ermənistanın sabiq müdafiə naziri belə bir fikirlə razılaşmır ki, “dördgünlük müharibəni” araşdıran komissiyanın məqsədi kimlərinsə cəzalandırılmasıdır. Onun sözlərinə görə, parlamentin istintaq komissiyasının məqsədi səhvləri üzə çıxarmaq və onların gələcəkdə təkrar olunmasının qarşısını almaqdır. Lakin Arutyunyan istisna etməyib ki, araşdırma əsgər ölümlərinə, ərazi itkisinə səbəb olmuş səhvləri və şəxsləri aşkar etsə, onda məsuliyyətə cəlbetmə də gündəmə gələ bilər.
Ermənistan parlamentinin müdafiə və təhlükəsizlik məsələləri üzrə daimi komissiyasının üzvü, hakim “Mənim addımım” fraksiyasının deputatı Tiqran Karapetyan isə bu qənaətdədir ki, aprel məğlubiyyətini araşdıran parlament komissiyasının Serj Sarkisyanı da dindirəcəyi gözlənilir. Karapetyan bildirib ki, komissiyanın 2016-cı ilin aprel döyüşləri ilə bağlı iclasına Sarkisyan da çağırıla bilər: “Hakimiyyətin keçmiş və indiki nümayəndəsi olmasından asılı olmayaraq, istənilən adamı çağırmaq üçün məhdudiyyət yoxdur. Ehtiyac olarsa, Serj Sarkisyan da dəvət olunacaq”. Onun sözlərinə görə, komissiyanın istintaq orqanı statusu var və ona görə də dəvətli, iclasa gəlməkdən imtina edə bilməz.
“Aprelə kimi Paşinyanı cəbhədə və Kreml tərəfindən yeni sürprizlər gözləyə bilər”
Məsələ ilə bağlı mövqeyini bildirən Cənubi Qafqaz Təhlükəsizlik və Sülh İnstitutunun sədri, politoloq Məhəmməd Əsədullazadə isə hesab edir ki, aprel döyüşlərinin araşdırılması üçün yaradılan komissiya Nikol Paşinyanın “Qarabağ klanı”na qarşı başladılan 2008-ci il 1 mart hadisələrinin araşdırılması cinayət təqibinin məntiqi davamıdır: “1 mart hadisələri ilə bağlı “Qarabağ klanı”na zərbə vuran Paşinyanın növbəti hədəfi bununla işğal olunmuş ərazilərdə separatçılardır. Qeyd edim ki, “Qarabağ klanı”nın əsas dayağı Qarabağdır və burada toparlanması istiqamətində işlər aparılır. Gələn il qondarma qurumda keçiriləcək “seçkilər”də yenidən rəhbərliyi öz əllərində saxlamağa çalışacaqlar. Məhz buradakı separatçıları Paşinyan öz iqtidarına qarşı təhlükə görməklə yanaşı, onları Robert Koçaryan və Serj Sarkisyanın əsas tərəfdarları olaraq siyasi səhnədən silməyə çalışır”.
Politoloqun fikrincə, Ermənistan parlamentində yaradılan komissiyanın araşdırmaları Xankəndində separatçılara çatacaq: “Onların istintaqa cəlb edilməsi qaçılmaz ola bilər. Komissiyanın nəticələrindən sonra Paşinyan separatçıları orduda baş verən uğursuzluğa görə ittiham edəcək və Qarabağ ermənilərini onlara qarşı qaldırması istisna deyil. Aprel döyüşlərində işğal olunmuş ərazilərdə orduda müəyyən rəhbərliyi həyata keçirən separatçıları korrupsiyada, orduda yeyintiyə yol verməkdə və uğursuz hərbi əməliyyatlarda ittiham etməsi gözlənilir. Göründüyü kimi, Paşinyanın daxili siyasi intriqası davam edir və hakmiyyətini qorumaq üçün Qarabağda öz adamlarını qondarma rəhbərliyə gətirməyi hədəfləyir. Bununla özünə qarşı qatı düşmən olan klanı zərərləşdirəcək Paşinyanın Qarabağ münaqişəsinin həllində hansı addımlar atacağı gələn il apreldən sonra bəlli olacaq. Aprelə kimi isə Paşinyanı cəbhədə və Kreml tərəfindən yeni sürprizlər gözləyə bilər”.
“Hesab edirəm ki, istintaq məsələyə hüquqi don geyindirərkən, Koçaryan və Sarkisyan onlara yaxın olan daha bir neçə yüksək rütbəli zabitlərini itirməli olacaq”
Mövzu ilə bağlı mövqeyini öyrənmək məqsədiylə müraciət etdiyimiz hərbi-siyasi icmalçı Ramil Məmmədli isə “Hürriyyət”ə bildirdi ki, hakimiyyətə gəldikdən sonra Nikol Paşinyanın daxili siyasətlə əlaqədar atdığı addımların hamısı birmənalı olaraq Robert Koçaryan və Serj Sarkisyan iqtidarına qarşı yönəlib: “Burada əsas məqsəd Robert Koçaryan və Serj Sarkisyan iqtidarının yerlərdəki mövqelərini zəiflətmək, eyni zamanda xalqla onlar arasında uçurum yaratmaq, onların imicini korlamaqdır. Onu da qeyd edim ki, 2016-cı ilin aprel ayında baş verən hadisə, yəni Azərbaycanın cəbhə xəttində döyüşlərdə uğur qazanması və Ermənistanın milyonlarla xərc bahasına qurduğu müdafiə xətti uğurlu olmadığından, Paşinyanın bundan istifadə etmə şansı yaranıb. Əlbəttə, ilk dövrlərdə bu məsələnin qabardılmasına imkan, vaxt yox idi. Çünki proseslər sürətlə gedirdi. Lakin hazırda artıq bunun üçün imkan var. Hesab edirəm ki, araşdırma mərhələsindən sonra istintaq məsələyə hüquqi don geyindirərkən, Koçaryan və Sarkisyan onlara yaxın olan daha bir neçə yüksək rütbəli zabitlərini itirməli olacaq. Belə ki, onların bəziləri həbsxanaya göndəriləcək, bəziləri isə ordudan uzaqlaşdırılacaq”.
“Saakyan Dağlıq Qarabağdakı qondarma rejimdə söz sahibi olduğu müddətcə Paşinyanın orada manevr imkanları məhdudlaşacaq”
Nikol Paşinyan hakimiyyətinin 2016-ci il aprel döyüşlərini araşdırmasının Azərbaycan tərəfinə yönəlik addım olmadığını vurğulayan hərbi-siyasi icmalçının fikrincə, bununla Ermənistanın mövcud iqtidarı daxili imkanlarını gücləndirməyi planlaşdırır: “Nəzərinizə çatdırım ki, Dağlıq Qarabağdakı separatçı, qondarma rejimin rəhbəri Bako Saakyanın 2016-ci il aprel döyüşlərindəki məğlubiyyətdə, itkilərin çox olmasında rolunun olmaması inkaredilməz məntiqdir. Onunla bağlı yeganə səbəb odur ki, Bako Saakyan Dağlıq Qarabağdakı separatçı qüvvələrin “ali baş komandanı”dır. Belə olan təqdirdə, təbii ki, orduda baş verən hadisələrdə, uğursuzluqlarda Bako Saakyanın da payı var. Bundan başqa, bir məqamı da qeyd etmək lazımdır ki, Bako Saakyan Dağlıq Qarabağdakı qondarma rejimdə söz sahibi olduğu müddətcə Nikol Paşinyanın, o cümlədən Ermənistandakı hazırkı siyasi sistemin orada manevr imkanları məhdudlaşacaq. Ona görə də yəqin ki, istintaq materiallarında, təhqiqatlarda ittiham olunacaq şəxslər arasında Bako Saakyanın da adı hallanacaq. Güman etmək olar ki, saxlanılan şəxslərin bəzilərindən Bako Saakyana və Dağlıq Qarabağdakı qondarma rejimin rəhbəliyində təmsil olunan digərlərinə qarşı ifadələr alınacaq”.
Rusiyanın baş verənlərə münasibətinə gəlincə, Ramil Məmmədli qeyd etdi ki, artıq Kreml “Qarabağ klanı” ilə bağlı mövqeyini açıq şəkildə bildirib: “Belə ki, Rusiya prezidenti Vladimir Putinin İrəvana səfəri zamanı Robert Koçaryanın ailə üzvləriylə görüşməsi, təcridxanada olmasına baxmayaraq, ona təbrik məktubu göndərməsi və bu tip digər addımların atılması onu göstərir ki, Kremlin Robert Koçaryan və Serj Sarkisyana, eyni zamanda Dağlıq Qarabağdakı separatçı qüvvələrə olan münasibəti bəllidir. Və burda əsas məqsəd “Qarabağ klanı”nın qorunub saxlanılması, onların Ermənistanda söz sahibi olmasını bərqərar etməkdir”.
ABŞ Nümayəndələr palatasının “erməni soyqırımı” haqqında qəbul etdiyi qətnaməni pisləyir, qərəzli, ədalətsiz hesab edirik və qınayırıq.
Bunu millət vəkili Qənirə Paşayeva deyib. Onun sözlərinə görə, bu qərarın heç bir hüquqi və tarixi əsası yoxdur.
“ABŞ Konqresinin Nümayəndələr Palatasının bu qətnaməsi açıq siyasi xarakter daşıyır və qardaş Türkiyəyə siyasi təzyiq məqsədilə qəbul edilib.
Türkiyənin xarici işlər naziri Mövlud Çavuşoğlunun bəyan etdiyi kimi Türkiyə Barış Pınarı Hərəkatı ilə ABŞ-ın böyük oyununu, bölgədə həyata keçirmək istədiyi layihəni pozdu. Çünki ABŞ-ın bu böyük oyunu Türkiyənin milli maraqlarına, sərhəd təhlükəziliyinə ciddi problemlər yaradırdı və terror təşkilatları ilə mübarizəsini çətinləşdirirdi.
ABŞ Nümayəndələr Palatası qondarma erməni soyqırımı ilə bağlı qərar da daxil olmaqla, aldığı iki qərarla Türkiyədən intiqam almaq və ona təzyiqlər edərək qardaş ölkəni cəzalandırmaq, geri çəkilməyə məcbur etmək istəyir.
Türkiyə dövləti isə artıq rəsmi bəyan edib ki, bu cür qərarlarla Türkiyəni milli maraqlara xidmət edən mövqedən geri çəkilməyə məcbur edə bilməyəcəklər, Türkiyə dövləti və xalqı bu qətnaməni qəbul etmir, heç bir zaman da qəbul etməyəcək. Nümayəndələr Palatası bu qərarı ilə ABŞ-ın ATƏT-in Minsk qrupunun həmsədri kimi roluna da bir daha ciddi kölgə düşürdü”, - deyə millət vəkili bildirib.
Millət vəkili bildirib ki, onsuz da cəmiyyətimizdə ABŞ-ın bu məsələdə neytral, obyektiv rol oynamasına və ya oynayacağına dair inam həddindən artıq zəif idi:
“Bu qərardan sonra isə insanların inamı tamamilə itdi. Çünki müasir dünyanın gözləri qarşısında işğalçı Ermənistanın Xocalıda törətdiyi soyqırım barədə danışmayan Nümayəndələr Palatasının qondarma erməni soyqırımı ilə bağlı qərarı bir daha ikili standartlardan xəbər verdi və Türk millətinin övladları bu ədalətsiz qərarları heç zaman qəbul etməyəcək. Qardaş Türkiyənin yanındayıq və gənclərimiz media, sosial şəbəkələrdə, diaspor təşkilatlarımız yaşadıqları və fəaliyyət göstərdikləri ölkələrdə bu cür qərarların nə qədər ədalətsiz olması, heç bir tarixi fakta əsaslanmaması barədə geniş təbliğat işləri aparmalıdırlar. Biz hamımız harada doğulub harada yaşamamızdan asılı olmayaraq Türk millətinin övladları olaraq bu ədalətsiz qərarları qınamaqla yanaşı qondarma erməni soyqırımı yalanları ilə mübarizəmizi də daha da gücləndirməliyik”.
ABŞ Konqresinin aşağı palatasının uydurma erməni soyqırımı haqqında qəbul etdiyi qətnamə, bu ölkənin Ermənistan-Azərbaycan, Dağlıq Qarabağ münaqişəsinin həllində vasitəçilik missiyasını həyata keçirən ATƏT-in Minsk qrupunun həmsədri olaraq obyektivliyini şübhə altında qoyur.
Bunu açıqlamasında millət vəkili Sahib Alıyev deyib.
Onun sözlərinə görə, son 30 illik tarixdə baş verən işğalçılıq, etnik təmizləmə, Xocalı kimi soyqırım hadisəsinə qiymət verməyən, özünü dünyada insan haqlarının, demokratiyanın, təhlükəsizliyin təminatçısı kimi təqdim edən, işğalı qəbul etməyən bir ölkənin bir əsr bundan öncə əslində baş vermədiyi bir hadisəyə belə bir münasibət bəsləməsi heç bir məntiqə sığmır.
“Əgər bu belə deyilsə, ABŞ o zaman ilk olaraq Ermənistanın Azərbaycana qarşı yürütdüyü işğalçılıq, etniktəmizləmə və soyqırım siyasətinə qiymət verməlidir. Öz ata yurdundan didərgin düşən yüz minlərlə insanın pozulan hüququnun pozulmasına münasibət bildirməlidir və onların hüquqlarının bərpasına nail olmalıdır. Lakin biz bunun heç birinin şahidi olmuruq”, - deyə millət vəkili bildirib.
S.Alıyev əlavə edib ki, ABŞ Konqresinin aşağı palatasının uydurma erməni soyqırımı haqqında qəbul etdiyi qətnamə demək olar ki, 1984-cü ildəkinin təkrarıdır.
“O zaman ABŞ senatı və Prezidenti təsdiqləmədiyi üçün qətnamə qanun şəkli almadı, yəni heç bir təsir qüvvəsi olmayan sənədlər içində itib-batdı.
Amma onda Türkiyə-ABŞ və Türkiyə-İsrail əlaqələri indiki kimi gərgin deyildi. Yəni indi bu qətnamənin qanuna çevirilməsi təhlükəsi var. Yəhudi lobbisinin Türkiyəyə yanaşmasını nəzərə alsaq, hər halda onun senatdan keçməsi mümkün görünür.
Bütün hallarda ABŞ Konqresinin aşağı palatasının atdığı bu addım “Azadlığa dəstək” aktına edilən 907-ci düzəliş kimi qərəzli və ədalətsizdir. Eyni zamanda da Birləşmiş Ştatların Minsk qrupunun həmsədri olaraq obyektivliyini şübhə altına qoyur”, - deyə deptat bildirib.
Azərbaycan Respublikasının Birinci vitse-prezidenti Mehriban Əliyeva rəsmi İnstaqram səhifəsində Bakı şəhərinin 31 oktyabr - Dünya Şəhərlər Günündə “dizayn” tematikası üzrə UNESCO-nun “Yaradıcı şəhərlər şəbəkəsi” siyahısına daxil edilməsi ilə əlaqədar paylaşım edib.
Birinci vitse-prezidentin paylaşımında deyilir:
"Təkrarsız tarixi siması qorunaraq müasir memarlıq inciləri ilə daim gözəlləşən Bakı şəhəri 31 oktyabr - Dünya Şəhərlər Günündə “dizayn” tematikası üzrə UNESCO-nun “Yaradıcı şəhərlər şəbəkəsi” siyahısına daxil edilib. Paytaxtımızın tarixi üçün əlamətdar olan bu hadisə münasibətilə həmvətənlərimi təbrik edirəm, ölkəmizin bütün şəhərlərinə sülh, inkişaf, tərəqqi, mehriban, qonaqpərvər sakinlərinə isə xoşbəxtlik və firavanlıq arzulayıram!"
Azərbaycan daxili işlər orqanlarının daha bir əməkdaşı xidmətdə olmanın son yaş həddi ilə əlaqədar işdən çıxarılıb.
Report xəbər verir ki, Daxili İşlər Nazirliyinin (DİN) Növbətçi Hissələri İdarəetmə Xidmətinin rəisi, polis polkovniki Fuad Bəxtiyarov vəzifəsindən azad edilib.
Bununla bağlı Daxili İşlər naziri, general-polkovnik Vilayət Eyvazov müvafiq əmr imzalayıb.
Əmrə əsasən, F.Bəxtiyarov xidmətdə olmanın son yaş həddi ilə əlaqədar olaraq, təqaüdə göndərilib.
Qeyd edək ki, Nazirliyin idarə səlahiyyətli Növbətçi Hissələri İdarəetmə Xidmətinə növbətçi hissələr, “102” Xidməti-Zəng Mərkəzi və Təhlükəsiz Şəhər Xidməti daxildir.