28 dekabr 2021-ci il tarixində saat 19:00 da Müslüm Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalında "Gənclərə dəstək" layihəsi çərçivəsində 31 dekabr Dünya Azərbaycanlılarının Həmrəylik Günü və "Yeni ilə" həsr olunmuş "Qış nağılı" adlı konsert keçiriləcək.

İstedadlı gənc solistlər - Müslüm Rzayev (klarnet), Səid Vəlizadə (piano), Şəmistan Əliyev (klarnet), Xədicə Hacılı (violin), Əli Vəliyev (piano), Elmira Dadaşova (violin), Aytac Vəlizadə (piano), Toğrul Abdullayev (violin), Nuranə Əliyeva (piano),  Məhəmməd Allahverdiyev (piano), Sabir Quliyev (qarmon), İluzər İbrahimzadə (piano), Nigar Həsənli (piano), İnci Vəlizadə (piano), Məsumə Əliyeva (fleyta), Şəms Əlili (viola), Nuray İsmayılova (vokal), Sevgim Musazadə (bəstəkar) müxtəlif əsərlər səsləndirərək dinləyicilərin qarşısına çıxacaq. Eləcə də bədii rəhbər, dosent Leyla Zalıyevanın rəhbərliyi ilə Azərbaycan Milli Konservatoriyasının tələbələrindən ibarət "Şəmsi Qəmər" kamera xoru da "Qış nağılı" adlı konsertdə iştirak edəcək.
Konsertdə - Azərbaycan, rus və qərbi-avropa bəstəkarlarının əsərləri səslənəcək.

Qeyd edək ki, bu il "Gənclərə dəstək" layihəsi 5 illiyini qeyd edir. Onun əsas vəzifəsi ölkədə gənc istedadların üzə çıxarılması və dəstəklənməsidir. Bundan əlavə, məqsədləri: dünya və yerli musiqi mədəniyyəti ənənələrinin qorunub saxlanılması və inkişafıdır.

Layihə çərçivəsində təqdim olunan proqramlar müxtəlif zövqlərə malik çox geniş auditoriyaya - yüksək akademik üslubun bilicilərinə, muğam, caz, estrada, eləcə də xor musiqisi həvəskarlarına ünvanlanıb.

"Gənclərə dəstək" layihəsi Azərbaycan Dövlət Akademik Filarmoniyasının direktoru, Xalq artisti, professor, tanınmış piano ifaçısı Murad Adıgözəlzadə,koordinator musiqişünas Ayla Kərimova-Zəkəriyyənin təşəbbüsü və Azərbaycan Respublkası Mədəniyyət Nazirliyinin dəstəyi ilə 15 noyabr 2016-cı ildə yaradılmışdır. Layihənin ilk konserti "Multikulturalizm ili" çərçivəsində keçirilmişdir. "Gənclərə dəstək" layihəsi çərçivəsində konsertlər mütəmadi olaraq hər ay bir neçə dəfə həm Filarmoniya həm də Kamera və Orqan Musiqi Zalının səhnəsində keçirilir.

Bu günə qədər keçirilən konsertlərin hər biri geniş tamaşaçı auditoriyasının diqqətini cəlb edir və rəğbətini qazanir. Layihədə iştirak etmək üçün, Ü.Hacıbəyli adına Bakı Musiqi Akademiyasının, Azərbaycan Milli Konservatoriyasının, A. Zeynallı adına Musiqi Kollecinin tələbələri və Bülbül adına Orta İxtisas Musiqi Məktəbinin, AMK tərkibində İncəsənət gimnaziyasının şagirdləri cəlb olunmuşdurlar. Layihənin hər bir konserti müxtəlif mövzulara həsr olunur.

İnformasiya dəstəyi - Trend.az, Day.az, Milli.Az