Bazar günü Türkiyədə bələdiyyə seçkilərinə bloksuz getmiş Cümhuriyyət Xalq Partiyası (CHP) 1977-ci il seçkilərindən sonra qeyri-rəsmi nəticələrə görə, birinci yerə çıxaraq özü üçün tarixi “qələbə” qazanıb.

SİA Türkiyədəki bələdiyyə seçkilərinin region üçün əhəmiyyəti barədə siyasi ekspert, Strateji Planlaşdırma və Araşdırmalar İnstitutunun rəhbəri, politoloq Azad Məsiyevin fikirlərini öyrənib.

O bildirib ki, Türkiyə Avropada ən demokratik dövlətlərdən biridir: "İstər parlament seçkiləri, istər prezident seçkiləri, istərsə də bələdiyyə seçkiləri Türkiyədə açıq və şəffaf keçirilir. Keçən il Türkiyədə keçirilən prezident seçkilərində ikinci tur baş verdi, prezident ikinci turda seçildi. Prezident Ərdoğan alternativi ilə rəqabətdə idi və seçkidə güclü səs çoxluğu ilə irəli keçdi. Demək istədiyim odur ki, ən demokratik seçkilər Türkiyədə keçirilir.

Təbiidir ki, bələdiyyə seçkiləri də Türkiyədə əsas seçkilərdən biri sayılır. Türkiyə daxilində xalq və ictimaiyyət bu seçkiyə daha çox önəm verir. Çünki xalqın sosial problemlərinin həllində bələdiyyələrin müstəsna xidmətləri olur. Bu baxımdan partiyalar bu seçkilərə önəm verir. Hakim partiya olsa belə, bu seçkilərdə ikinci yer tutdu. Seçkiləri Cümhuriyyət Xalq Partiyası qazandı. Əhalinin sosial məsələlərinin həllində həmin partiya xidmət edəcək. Buna baxmayaraq Türkiyədə xalqın seçkilərə həvəsi böyükdür. Xalq bu seçkilərə önəm verir və seçki prosesinə inamı çoxdur. Hesab edirəm ki, Türkiyədəki keçirilən seçkilər beynəlxalq aləmdə tanınan və etiraf olunandır. Demokratik proseslər Türkiyədə Avropada gedən proseslərdən öndədir. Türkiyədəki seçkilərə kölgə salacaq heç bir addım yoxdur və bunu demokratiyanın qələbəsi kimi qiymətləndirmək lazımdır".