Bu vəziyyətdə Türkiyə ilə Ermənistanı müqayisə etməzdim: nə iqtisadiyyat baxımından, nə əhali baxımından, nə də AB standartlarına uyğunlaşmaq üçün lazım olan resurslar baxımından.

Axar.az xəbər verir ki, bunu rusiyalı politoloq Dmitri Solonnikov Kremlin sözçüsü Dmitri Peskovun “Türkiyə onilliklərdir ki, AB-yə daxil olmaq istəyir, amma buna imkan vermirlər, AB Ermənistanla da eyni yolu tuta bilər” sözlərini şərh edərkən deyib.

“Ermənistanın AB-yə daxil olmaq şansı Türkiyədən qat-qat çoxdur. Niyə? Çünki Qərb Türkiyədən qorxur. Türkiyə iqtisadiyyatdır. Ermənistan kiçikdir və heç kim onun AB-yə daxil olmasının fərqinə varmayacaq. Onun AB ilə ortaq sərhədi belə yoxdur. Amma Ermənistanın hesabına uzaq Cənubi Qafqazda özünün “müdaxilə anklavını” əldə etmək müəyyən Qərb qüvvələri üçün sərfəlidir. Bu məqsədlə Ermənistanın AB-yə daxil olması üçün sürətləndirilmiş prosedur başlaya və İrəvan AB-yə kifayət qədər tez qəbul oluna bilər. Bu mövqeyi Fransa Prezidenti Emmanuel Makron irəli sürəcək. Düzdür, Makronun bu il və ya ondan sonrakı illərdə, xüsusən də 2027-ci ildə prezident seçkiləri təyin olunduğu zaman necə sağ qalacağı məlum deyil”, - o bildirib.