Bəzən aldığımız kompüterlərdə bir müddət sonra müəyyən problemlər üzə çıxır.

Vətəndaşlar tez-tez kompüter alarkən hansı məsələlərə diqqət etməklə bağlı suallar qarşısında qalırlar.

Məsələ ilə bağlı Axar.az-a danışan Azərbaycan İnternet Forumunun prezidenti Osman Gündüz kompüter alarkən diqqət yetirməli olduğumuz nüansları açıqlayıb. O, əvvəlcə kompüteri nə üçün istifadə edəcəyimizi aydınlaşdırmalı olduğumuzu bildirib:

“İlk növbədə kompüter almazdan əvvəl ondan nə üçün istifadə edəcəyinizi özünüz üçün aydınlaşdırmalısınız. “Kompüter sizə internetdən istifadə, yazı yazmaq, yoxsa hansısa mühüm əməliyyatları həyata keçirmək üçün lazımdır?” sualına cavab verdikdən sonra məsələnin əsas hissəsini həll etmiş olursunuz və beləcə axtarışa çıxa bilərsiniz”.

O.Gündüz bildirib ki, siz özünüzə uyğun kompüteri 500 manata da ala bilərsiniz:

“Kompüter almamışdan öncə müəyyən etməlisiniz ki, onu hardan alacaqsınız. Yəni bəzən müşahidə edirik ki, kompüter mağazası açılır və tez bir zamanda bağlanıb, başqa ad altında fəaliyyətini davam etdirir. Bu hallar hazırda çox müşahidə olunur. Buna görə də oturuşmuş mağazalardan kompüter alınması daha məqsədə uyğundur. Əsas diqqət yetirilməli olduğumuz məqam isə zəmanətin verilməsi ilə bağlıdır. Yəni zəmanətin şərtlərinə diqqət yetirmək lazımdır. Zəmanət alarkən onun üzərində bütün zəruri qeydlər olmalıdır.

Nəhayət, sizin model seçiminizdir. Model seçimi zamanı isə həmin brendin Bakıda normal servisinin olmasına diqqət yetirməlisiniz. Məsələn, siz “Lenovo”, “Əpl”, HP və s. alırsınız. Bu cür şirkətlərin Bakıda servisinin olduğunu müəyyənləşdirmək lazımdır”.