Azərbaycan Prezidenti İlham Əliyev Şeyxülislam Allahşükür Paşazadənin anadan olmasının 70, şeyxülislamlıq fəaliyyətinin 40 illik yubileyinin qeyd edilməsi haqqında sərəncam imzalayıb.
 Sərəncamda deyilir:

1. Azərbaycan Respublikasının Dini Qurumlarla İş üzrə Dövlət Komitəsi Qafqaz Müsəlmanları İdarəsinin təkliflərini nəzərə almaqla, Şeyxülislam Allahşükür Paşazadənin anadan olmasının 70, şeyxülislamlıq fəaliyyətinin 40 illik yubileyinə həsr edilmiş tədbirlər planını hazırlayıb həyata keçirsin.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

Şəhidlər-qürurumuz, and yerimiz! Şəhidlər-əbədi ölməzlik qazanan müqəddəslər!
Onlar canlarından, qanlarından keçərək müqəddəs vəzifənin öhdəsindən ləyaqətlə gəldilər. Bəs bizlər necə onların ruhu qarşısında hörmətdə , yaxınlarına ,əzizlərinə qarşı qayğı və diqqətdə üzərimizə düşən vəzifənin öhdəsindən nə dərəcədə gəlirik.?!
Ölkə rəhbəri Cənab İlham Əliyevin, birinci vitse – prezident Mehriban Əliyevanın şəhidlərimizə, onların ailələrinə göstərdiyi qayğı və diqqət göz önündədir. Şəhid ailələrinin, onların yaxınlarının rifah halının yaxşılaşdırılmasına yönəlik tədbirlər , onların mənzillə, minik avtomobili ilə təmin olunması mütəmadi hal almışdır. Elə bu yaxınlarda Aprel şəhidlərinin ildönümünə aid tədbirdə Mehriban xanım Əliyevanın hərbçilərimizə “mənim qardaşlarım “- deyərək müraciətinin artıq şərhə ehtiyacı yoxdur.
Bütün bunlarla yanaşı çox təsssüf ki, şəhidlərə, onların ailə üzvlərinə biganə yanaşan, hörmət etməyənlər də var.
Haqqında danışmaq istədiyim şəhid – Süleymanov Vüqar Natiq oğlu Şəki rayonu Böyük Dəhnə kəndində dünyaya göz açıb. İki bacının bir qardaşı, ailənin yeganə oğul övladı idi. Ata-ananın, bacılarının onunla bağlı neçə-neçə arzuları, ümidləri vardı . Ən başlıcası gənc bir ömrün istəkləri, arzuları ... Ancaq Vüqar bütün arzuların üzərindən xətt çəkdi. Bircə müqəddəs arzudan, amaldan, istəkdən başqa . Şəhidlik! Bu arzunun, istəyin qarşısında nə bitirdiyi Bakı Slavyan Universiteti, nə ailənin yeganə oğul övladı olması dura bildi.

Aprel ayının 5-də Böyük Dəhnə kəndində Vüqarın, o cümlədən Aprel şəhidlərinin xatirəsinə həsr edilmiş tədbir keçirildi. Tədbir iştirakçıları-şəhidin ailə üzvləri , kənd sakinləri,  məktəb kollektivi, mətbuat nümayəndələri şəhidin məzarı üzərində nitq söylərək, Aprel döyüşləri haqqında ,  onun siyasi, hərbi əhəmiyyəti haqqında qürurla danışdılar. Məktəblilərin ifasında ədəbi-bədii kompozisiya qəlbləri qürur hissi ilə doldurdu.

   İnsanlar öz əllərindən gələni edir, bir quru sözlə də olsa şəhid ailəsinə təsəlli verməyə çalışırdılar. Lakin  rayonun məsul vəzifə sahibləri, nə rayon İcra başçısı, nə müavinləri bu tədbirdə iştirak etdilər.

Ən acınacaqlı vəziyyət isə Vüqarın ailəsinin yaşadığı evin vəziyyəti idi. Evin üzəri köhnə kirəmitlə örtülüdür. Yağış yağarkən evin içərisi gölməçəyə dönür. Evdəki bütün qablar yağış daman yerlərə düzülür.

 Əgər dağ cüssəli, ali təhsilli Vüqar sağ olsaydı, yəqin ki onların evi də bugün ən müasir dam örtüyü ilə örtülərdi. Bəlkə dam örtüyü deyil, evin özü də yenilənərdi. Lakin Vüqar bunları fikirləşmədi. Fikirləşdiyi Vətən oldu , torpaq oldu !

   Bəlkə də fikirləşdiki ki, mən canımdan keçirəm yerdə qalanlar nə ki ..

       Lakin bu gün Vüqar kimi oğulların hesabına qışda isti , yayda sərin kabinetlərində oturan, bəlkə də bir günə bir dam örtüyünün pulunu xərcləyənlər- İcra başçıları , müavinlər , rayonun digər məsullarının vicdan anlayışından xəbərləri varmı ?! Bir türk gözəlçəsinə  torpaq vəd edənlər, qiymətli hədiyyələr verənlər  bir şəhid evini təmir etməkdə bu qədərmi maraqsızdırlar.

        Budur , Cənab başçı Aprel şəhidinin evi !

          Baxın və əməllərinizə özünüz qiymət verin .

Müşfiq Kişiyev.

Tanınmış aparıcı Hacı Nuran Hüseynov dünən Azərbaycanda dünyaya gələn 10 milyonuncu sakini xəstəxanada ziyarət edib.

 O, Mehriban adı verilən körpə ilə çəkdirdiyi fotonu sosial şəbəkədə paylaşıb və əhalimizin sayının 10 milyona çatması münasibətilə Azərbaycan xalqını təbrik edib.

Azərbaycanın 10 milyonuncu sakininin dünyaya gəlməsi münasibətilə aprelin 7-də Dənizkənarı Milli Parkda konsert proqramı təşkil edilib.

“Qafqazinfo” “Azərtac”a istinadən xəbər verir ki, konsert atəşfəşanlıqla başa çatıb.

Şəhər sakinləri və paytaxtımızın qonaqları incəsənət ustalarının ifasında şən mahnıları dinləyib, atəşfəşanlığa maraqla tamaşa ediblər.

On milyonuncu sakinin doğulması münasibətilə gün ərzində Bakı şəhərinin bir sıra rayonlarında ağacəkmə aksiyası və konsert proqramları təşkil olunub.

Xatırladaq ki, aprelin 6-da keçmiş Ağdərə rayonunun sakinləri, hazırda Ağdam rayonunun Baş Güneypəyə kəndində qeydiyyatda olan məcburi köçkün Ocaqova Nigar Çərkəz qızı ilə Həsənov Rauf Yunis oğlunun ailəsində Azərbaycanın 10 milyonuncu sakini dünyaya gəlib.

Azərbaycan Prezidenti İlham Əliyev və birinci xanım Mehriban Əliyeva bu münasibətlə Azərbaycan xalqını və uşağın valideyinlərini təbrik ediblər.

Son günlər içində uşaqlar üçün ziyanlı ola biləcək yad cisim çıxmasıyla müzakirələrə səbəb olan “Malyutka-2 uşaq qidalarının laborator müayinəsi yekunlaşıb.

Qida Təhlükəsizliyi Agentliyindən “Qafqazinfo”ya verilən məlumata görə, “Malyutka – 2” əmtəə nişanlı uşaq qidalarından götürülən nümunələrin ekspertiza nəticələri açıqlanıb. Aparılan araşdırmalar nəticəsində qablaşdırmanın tamlığının məqsədyönlü şəkildə pozulduğu, içərisinə yad cisimlərin doldurularaq kustar üsullarla yenidən qablaşdırıldığı aşkar olunub. 

“Malyutka – 2” əmtəə nişanlı uşaq qidasının qutusuna doldurulan yad cismin istehlak üçün  yolverilməz olan torpaq süxurları, qum və daş hissəcikləri olduğu müəyyən edilib.

Eyni zamanda yad cisim radioloji və toksikoloji müayinələrə cəlb olunub və tərkibində hər hansı təhlükə aşkarlanmayıb. 

Əlavə olaraq bildiririk ki, “Malyutka – 2” əmtəə nişanlı uşaq qidaları ölkəyə “İDC 2000” MMC tərəfindən idxal edilir. Digər qida məhsulları kimi  “Malyutka – 2” əmtəə nişanlı uşaq qidaları da risk əsaslı ekspertizaya cəlb olunur və təhlükəsizlik göstəriciləri yoxlanıldıqdan sonra idxalına icazə verilir. Adı çəkilən məhsul idxal olunarkən 11 nümunə üzrə ekspertizaya cəlb edilmiş və istehlak üçün hər hansı uyğunsuzluq aşkar olunmamışdır.

Qida məhsulunun qablaşdırmasına müdaxilə ilə bağlı hüquq-mühafizə orqanları tərəfindən müvafiq araşdırmalar aparılır. 

İstehlakçılardan oxşar hallarla qarşılaşdıqları zaman Agentliyin 1003 “Çağrı Mərkəzi”nə zəng edib məlumat vermələri xahiş olunur.

Azərbaycan Prezidenti İlham Əliyev Culfa Rayon İcra Hakimiyyətinə yeni icra başçısı təyin edib. 

“Qafqazinfo” xəbər verir ki, sərəncama əsasən, Siyam Çərkəz oğlu Hacıyev Naxçıvan Muxtar Respublikasının Culfa Rayon İcra Hakimiyyətinin başçısı təyin edilib.

Prezident İlham Əliyev Bakı-Şamaxı-Yevlax (12 km)-Xocəsən avtomobil yolunun tikintisi ilə bağlı tədbirlər haqqında sərəncam imzalayıb.

“Qafqazinfo”nun məlumatına görə, sərəncama əsasən, Bakı-Şamaxı-Yevlax (12 km)-Xocəsən avtomobil yolunun tikintisi məqsədilə 2019-cu il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 2,8 milyon (iki milyon səkkiz yüz min) manatı Azərbaycan Avtomobil Yolları Dövlət Agentliyinə ayrılıb.