Donald Tramp administrasiyasının Kiyevə təklif etdiyi ABŞ-ın Ukraynanın təbii sərvətlərinə çıxışı haqqında saziş Vaşinqtonun mineral və neft-qaz ehtiyatlarına, limanlara və digər infrastrukturlara nəzarətini nəzərdə tutur.

Axar.az xəbər verir ki, bu barədə “Telegraf” saziş layihəsinə istinadən məlumat yayıb.

“Trampın tələbi ölkənin ən mühüm mineral ehtiyatları üzərində ABŞ-ın nəzarətindən xeyli kənara çıxır. Bu, limanlardan və infrastrukturdan tutmuş neft və qaza qədər hər şeyə təsir edir”, - məlumatda deyilir.

Sənədə əsasən, Vaşinqton və Kiyev münaqişənin düşmən tərəflərinin Ukraynanın bərpasından faydalanmaması üçün birgə investisiya fondu yaratmalıdır.

Tramp administrasiyası Ukraynanın resursların hasilatından əldə etdiyi cari gəlirlərin 50%-ni, habelə üçüncü tərəflərə verilmiş bütün yeni (resursların çıxarılması) lisenziyaların dəyərinin 50%-ni almaq istəyir.

Vurğulanır ki, Ukrayna Prezidenti Vladimir Zelenskinin özü ABŞ-a ölkəsinin resurslarına çıxış imkanı vermək ideyasını irəli sürüb:

“O, Amerika şirkətlərinin Ukraynada fəaliyyətə başlayacağını və bunun Vladimir Putinin yenidən Ukraynaya hücumunun qarşısını alacaq tələ yaradacağını güman edib. Bu, xüsusilə, bəzi faydalı qazıntı yataqlarının ölkənin şərqində cəbhə xəttinə yaxın və ya Rusiyanın işğal etdiyi ərazilərdə yerləşməsinə əsaslanır. Zelenski yəqin ki, adətən müharibədə məğlub olmuş təcavüzkar dövlətlərə şamil olunan şərtlərlə qarşılaşacağını gözləmirdi. Onlar Almaniya və Yaponiyaya 1945-ci ildə məğlub olduqdan sonra tətbiq edilən maliyyə sanksiyalarından daha pisdir. Müqavilə layihəsi qəbul edilsəydi, Trampın tələbləri Versal müqaviləsinə əsasən Almaniyaya tətbiq edilən təzminatlardan daha çox, Ukrayna ÜDM-nin payına bərabər olacaqdı”.