2025-ci ilin dövlət büdcəsi layihəsi Milli Məclisdə təsdiq olundu.

Büdcə layihəsinin ilkin versiyasında gələn il büdcə xərclərinin 320.5 milyon manatının və yaxud 0.8 faizinin Naxçıvan Muxtar Respublikasının büdcəsinə verilən dotasiyanın payına düşməsi nəzərdə tutulub. Bu 2024-cü ilin təsdiq olunmuş proqnozu ilə müqayisədə 4.8 faiz azdır. Qeyd edək ki, 2024-cü ildə dövlət büdcəsi xərclərinin 343.3 milyon manatı və yaxud 0.9 faizi Naxçıvan büdcəsinə verilən dotasiya kimi nəzərdə tutulub. Bu da 2023-cü illə müqayisədə 24.2 faiz azdır.

Axar.az xəbər verir ki, bu barədə deputat, iqtisadçı-alim Vüqar Bayramov qeyd edib.

O bildirib ki, büdcə layihəsinin yekun sənədində isə dotasiya 34 milyon 816 min manat azaldılaraq 285 milyon 713 min manat nəzərdə tutuldu:

"Son sənəddə dövlət büdcəsindən Naxçıvana ödəniləcək dotasiyanın məbləğinin azaldılması iki səbəblə bağlıdır: Naxçıvanda energetika və su ehtiyatları qurumlarının funksiyalarının mərkəzə ötürülməsi və ikinci istiqamət üzrə dotasiyanın dövlət büdcəsinin mərkəzləşdirilmiş xərcləri vasitəsilə yenə də Muxtar Respublikasının ərazisində tədbirlərin maliyyə təminatına sərf olunmasının nəzərdə tutulması".

Deputat qeyd edib ki, bütövlükdə isə son illər dövlət büdcəsindən Naxçıvana dotasiya məbləğinin azaldılmasının səbəbi bu bölgəmizdə aparılan struktur islahatları və daxili maliyyə mənbələrinin genişlənməsidir:

"Eyni zamanda, vəsaitlərin xərclənməsində səmərəliliyin və şəffaflığın gücləndirməsi də dövlət büdcəsindən dotasiya tələbini azaldır. Bir tərəfdən Naxçıvan Muxtar Respublikasının öz daxili gəlirlərinin artması, digər tərəfdən dövlət büdcəsindən ayrılan, paralel olaraq yerli səviyyədə xərclənən vəsaitlərin istifadəsinə nəzarətin güclənməsi Naxçıvan dövlət büdcəsinin strukturunu dəyişib. Bu, son illər vəsaitlərdən istifadədə səmərəliliyin artması nəticəsində dotasiyaya tələbin azalmasında özünü göstərir. Bu baxımdan Muxtar Respublikanın iqtisadiyyatı daha da gücləndikcə dövlət büdcəsindən ödənilən dotasiyaların məbləğlərində azalmalar davam edəcək".