Onun sözlərinə görə, maşinistlərin hansı hallarda işdən çıxarılması məsələsi çox geniş mövzudur: "Çünki bu peşə ilə bağlı olan qayda və vəzifələri tənzimləyən kifayət qədər çoxsaylı sənədlər, şərtlər var.

Ümumiyyətlə, maşinistlərlə bağlı bütün hadisələr mütləq qaydada ən operativ şəkildə araşdırılır və nəticə ilə bağlı qərar verilir. Araşdırmanın nəticəsinə görə məsuliyyətə cəlb edilmənin də tətbiqi istisna olunmur".

Bəxtiyar Məmmədov sözlərinə belə davam edib: "Qeyd edim ki, maşinistlərin qayda pozuntuları öz dərəcələrinə görə təsnifatlanır. Xüsusi olaraq sərnişin və hərəkət təhlükəsizliyinə xələl gətirə biləcək bir sıra məsələlərdə bəzi qərarlar avtomatik verilir. Məsələn, qatarın geriyə verilməsi, qatarın qapısının açıq saxlanılaraq sürülməsi kimi hallar birmənalı olaraq maşinistlikdən kənarlaşdırma ilə nəticələnir. Daha sonra müvafiq araşdırma aparılır və qərarlar qəbul edilir. Bu sadaladığım hallar bir maşinist üçün birmənalı olaraq yolverilməzdir.

Bundan əlavə, deyək ki, hər hansısa hadisə baş verdikdə, yaxud da maşinistin psixoloji vəziyyətinə təsir göstərə biləcək, onu stress halına salacaq bütün hallarda da dərhal maşinist qatarın idarə edilməsi prosesindən kənarlaşdırılır. Vəziyyət tam aydınlaşana qədər maşinist idarəetməyə buraxılmır.

Bir sözlə, Bakı Metropolitenində maşinistlərin fəaliyyəti ilə bağlı olan məsələlərə xüsusi yanaşılır. Bir sıra hallarda yol verilən nöqsanlara görə Azərbaycan Respublikasının Əmək Məcəlləsi, Bakı Metropoliteninin təlimat qaydaları və digər normativ sənədlərə uyğun müvafiq məsuliyyət növləri tətbiq olunur. Eyni zamanda, bəzi halların dəfələrlə təkrarlanmasına görə müxtəlif cəzalar da tətbiq edilir. Bura işdən azad edilmə, maşinistlikdən kənarlaşdırılma və s. kimi nəticələr aiddir.

Hər bir hadisə fərdi qaydada araşdırılır. Xüsusilə qeyd edim ki, hər bir maşinist işə başlamazdan əvvəl müvafiq testlərdən keçir. Maşinistlərin hər gün işə başlamazdan əvvəl sağlamlığı yoxlanılır, müvafiq testlərdən keçir. Bu çox ağır peşə olsa da, metropoliten üçün ölkəmizdə ən çox sevilən və diqqətdə olan peşələrdəndir.

Son olaraq qeyd edim ki, maşinistlikdən kənarlaşdırma heç də işdən azad edilmə demək deyil".