Bakıda avtobusda olan basabas elə sərnişinlər tərəfindən telefona çəkilib.

“Qafqazinfo” xəzərxəbər-ə istinadən məlumatına görə, görüntülər metronun “Koroğlu” stansiyası ilə Ramana kəndi arasında işləyən 204 nömrəli marşrutdandır.

Sərnişinlər deyir ki, günün pik saatlarında bu marşrutla hərəkət edən avtobuslarda belə mənzərə normal hala çevrilib.

Sərnişinlər həmçinin bildiriblər ki, Ramanada sakinlərin sayı gündən-günə artmağına baxmayaraq, bura əlavə xətlər verilmir və sıxlığın əsas səbəblərindən bir də budur.

Amma görünən odur ki, vətəndaşların qapıdan bu formada sallanaraq getməsi hər an faciəyə səbəb ola bilər.

Məsələ ilə bağlı Bakı Nəqliyyat Agentliyindən isə bildirilib ki, sözügedən qayda pozuntusu ilə bağlı daşıyıcıya agentlik tərəfindən xəbərdarlıq ediləcək. Sərnişindaşıma qaydalarını bu cür pozan sürücülər isə 100 manat məbləğində pul və 4 balla cərimələnə bilərlər. O ki qaldı Ramana sakinlərinin avtobus çatışmazlığı ilə bağlı şikayətlərinə, Agentlikdən bildirilib ki, hazırda Bakı kəndlərinin marşrut xətlərinin optimallaşdırılması işləri aparılır və yaxın vaxtlarda bu problemə də aydınlıq gətiriləcək.