Neft hasilatının azalması fonunda qiymətlərin qalxması Azərbaycana gəlirlərini qoruması üçün əlavə şans verir.

Bu sözləri Axar.az-a Neft Araşdırmalar Mərkəzinin rəhbəri İlham Şaban neftin bahalaşmasına münasibət bildirərkən deyib. O bildirib ki, bahalaşmanın bir çox səbəbləri var:

“Əvvəla, dünən Amerika Neft İnstitutu (API) həftəlik neft ehtiyatlarıyla bağlı hesabatı açıqladı. Bu hesabat öz təsirini göstərdi. Bundan əlavə, klimatik təsirlərin də burada payı var. Yəni avqust ayının sonu, sentyabrın əvvəlində Meksika körfəzində, ABŞ-ın ən böyük hasilat ştatı olan Texasda bir-birinin ardınca baş verən güclü qasırğalar, Meksikadakı zəlzələ və sunami bahalaşmaya şərait yaradır. Digər səbəb isə Venesualada daxili stabilliyin pozulması və neft hasilatının aşağı düşəcəyi ilə bağlı yayılan xəbərlər, Şimali Koreya ilə münasibətlərin gərginləşməsinin mənfi hərbi-siyasi fəsadlarının Cənubi Koreya, Yaponiya, Çin kimi ölkələrə neft ixracında problemlər yaradacağı ehtimallarıdır”.

İ.Şaban qeyd edib ki, qiymət artımı Azərbaycan iqtisadiyyatına müsbət təsir göstərəcək:

“Azərbaycanda əsasən avqust ayında neft hasilatında ciddi azalma baş vermişdi. Azərbaycan Energetika Nazirliyinin açıqlamasına görə, iyul ayı ilə müqayisədə hasilat 793 min barreldən 730 min barreləcən azalıb. Hazırda neft hasilatında 2012-ci ildən sonrakı dövr üçün ən aşağı göstərici qeydə alınıb. 7 ay ərzində hasilat 2.3 milyon ton azalıb. Ona görə də son 8 ayda neftin qiymətinin təqribən 30%-ə yaxın artması neft hasilatının aşağı düşməsi səbəbindən yaranacaq fərqin aradan götürülməsinə gətirib çıxaracaq. İlin sonuna qədər neftin qiyməti artmaqda davam edərsə, ölkəmizdə iqtisadiyyatın inkişafında müsbət nəticələr gözlənə bilər. Neftin ilin birinci yarısında orta qiyməti 52 dollar olub. İlin ikinci yarısında orta qiymət 55 dollar həcmində olarsa, Azərbaycanın neft-qaz hasilatından əldə edəcəyi gəlir ötən ilkindən az olmayacaq. Azərbaycan ötən il neft-qaz satışından 5.1 milyarddan bir qədər çox vəsait əldə etmişdi”.

Qeyd edək ki, dünya bazarında “Azəri Layt” markalı neftin bir barrelinin qiyməti hazırda 59 dollara yaxındır.