Rusiya heç kimə cavab zərbəsi zamanı hərəkətlərinin məntiqini və motivasiyasını izah etməməlidir.

Axar.az Oxu.az-a istinadla xəbər verir ki, bu barədə hərbi analitik, "Milli Müdafiə" jurnalının baş redaktoru İqor Korotçenko bildirib.

Onun sözlərinə görə, doktrina hər şeyi müəyyən edib, hansı konkret qərarların qəbul ediləcəyi artıq ali siyasi rəhbərliyin səlahiyyətidir:

"Hərbçilər Ali Baş Komandanın verəcəyi hər bir əmri yerinə yetirməyə hazırdırlar. Bu halda söhbət ATACMS raketlərinin istifadə olunmasından gedir, reaksiya və qiymətləndirmə məsələləridir - burada əgər konkret qərar qəbul edilibsə, heç kimi əvvəlcədən məlumatlandırmaq lazım deyil, heç bir xəbərdarlığa ehtiyac yoxdur. Hücum var, cavab tədbirləri faktı var, qüvvəyə minmiş sənəd var. Ona görə də, bilirsiniz, "indi vuracağıq", - deyə bağırmağın mənası yoxdur. Hərəkətlərimizin məntiqini və motivasiyasını heç kimə izah etmək lazım deyil. Çünki artıq doktrina səviyyəsində hər şey müəyyən edilib", - deyə Korotçenko bildirib.

O vurğulayıb ki, nüvə silahının tətbiqinin nəzəri şərtləri və meyarları müəyyən edilib, doktrina var, sənədin konkret vəziyyətdə tətbiqi isə artıq RF Baş Qərargahının və Ali Baş Komandanın "məhz belə nüvə reaksiyası variantının məqsədəuyğunluğunun nəticələrinə görə" səlahiyyətidir.

Xatırladaq ki, "Nyu York Tayms" qəzeti mənbələrə istinadən ABŞ Prezidenti Co Baydenin Ukrayna ərazisindən Rusiyanın dərinliklərinə ABŞ-ın ATACMS taktiki ballistik raketləri ilə zərbələr endirməyə icazə verdiyi barədə məlumat yayıb.

Rusiya Prezidenti Putin isə ötən gün nüvə doktrinasına dəyişikliyi təsdiqləyib.