İrlandiya hökuməti ordunun xüsusi təyinatlı qüvvələrinin ölkə hüdudlarından kənarda yerləşdirilməsi imkanlarını əhəmiyyətli dərəcədə genişləndirə biləcək qanun layihəsini nəzərdən keçirir.

Axar.az xəbər verir ki, bu barədə “İriş Tayms” məlumat yayıb.

Qeyd olunub ki, söhbət Ukrayna paytaxtına potensial olaraq ordu reyncerlərinin (hava-desant hücum qüvvələrinin bölmələri) göndərilməsindən gedir:

“Təşəbbüs Kiyevdə yerləşən İrlandiya diplomatik nümayəndələrinin təhlükəsizliyinin təmin edilməsi məqsədi ilə yüksək ixtisaslı hərbi mütəxəssislərin yerləşdirilməsi üçün hüquqi əsasların yaradılmasını nəzərdə tutur. Peşəkarlığı və xüsusi hazırlığı ilə məşhur olan ordu reyncerləri diplomatik missiyanın qorunmasında əsas vasitə ola bilər”.

Hökumət mənbələri vurğulayıb ki, qanun layihəsi hazırda müzakirə olunur və davam edən geosiyasi gərginlik şəraitində İrlandiya rəsmilərinin təhlükəsizliyinin təmin edilməsinə kompleks yanaşma təklif edir.