İnsanlara hər zaman zövqlü olmağı, geyim tendensiyalarından düzgün istifadə etməyi məsləhət edirəm. Çünki bu, hər zaman gündəmdədir.
Bu sözləri Axar.az-a insanların istifadə etdiyi geyimlərə münasibət bildirən modelyer Gülnarə Xəlilova deyib. O bildirib ki, ən böyük trend zövqlü olmaqdır.
"Bəzi insanlar qarderoblarını yalnız yeni dəbə uyğunlaşdırmağı sevir. Dəb gözəldir, yaxşı geyinmək də gözəldir. Amma dəbdə olan hər şey hamıya yaraşmaya bilər. Yaxşı olardı ki, insanlar yeni çıxan hər şeyi dərhal öz üzərlərində görmək istəməsinlər. Dəbdə olan geyim onu geyinənə yaraşmalıdır. Ona görə də insanlar daha çox zövqlə geyinməyə üstünlük versinlər. Zövqlü olmaq elə dəbdə olmaq deməkdir. Həqiqətən zövqlü insanlar isə hər zaman yeni çıxan geyimləri geyinməyi sevmir. Toplumdan fərqlənmək istəyən zövqlü insanlar seçimlərini bu cür edirlər. Şəxsən mən özüm də yeni paltarları istifadə etməyi sevmirəm. Ona görədir ki, illər əvvəl hazırladığım geyimləri bu gün də podiumlarda görürəm".
Modelyer paltar seçimi zamanı onun zahiri görünüşünə, yaşa uyğun olmasına diqqət etməyin vacib olduğunu vurğulayıb:
“Hər zaman deyirəm ki, güzgü bizim ən yaxın dostumuzdur. İnsan güzgüdə özünə tənqidi yanaşmağı bacardığı müddətdə düzgün geyim seçmə şansı daha çox olur. Ancaq bu gün deyə bilmərik ki, bütün insanlar geyim seçərkən bədən quruluşlarını, yaşlarını nəzərə alırlar. Bədən quruluşuna uyğun geyim seçmək üçün insan özünə bir az tənqidi yanaşmalıdır. Çünki hər kəs başa düşməlidir ki, hər yaşın, bədənin özünə uyğun geyimləri var. Bu gün paltar seçimində xanımların bir çoxu geyimləri ilə cavan görünmək istəyir və bununla da gülünc vəziyyətə düşür. İnsan geyinərkən yaşı nəzərə alanda daha gözəl gürünür. Geyimin həm funksional baxımdan, həm də estetik görünüşcə düzgün seçilməsi onu mükəmməl edir. Hər hansısa bir faktoru qeydə almadıqda isə artıq yanlış geyim ortaya çıxır”.