“Koroğlu” stansiyasının çıxışında yerləşən marşrut dayanacağında hər gün xaos yaşanır.

Taksi xidməti göstərən avtomobillərin marşrut dayanacağında, marşrutların sərnişinlər üçün nəzərdə tutulmuş yerdə, sərnişinlərin isə yolun ortasında dayanması ərazidəki problem daha da qəlizləşdirir. Uzun illərdir davam edən bu problem isə heç kəsi narahat etmir. Mütəmadi olaraq sözügedən ərazidə reydlər keçirib, təmizlənmə işləri aparılır. Gələcəkdə hansısa bədbəxt hadisənin baş verməməsi üçün daha ciddi tədbirlər görülməlidir.

Problemlə əlaqədar Axar.az-a danışan Bakı Nəqliyyat Agentliyinin mətbuat xidmətinin rəhbəri Mais Ağayev bildirib ki, bu məsələ onları da narahat edir. Lakin buna qarşı dəfələrlə mübarizə aparsalar da, nəticəsiz qalıb:

“Bu məsələ BNA-nı ciddi şəkildə narahat edir. “Koroğlu” stansiyası ətrafında, xüsusilə bildirdiyiniz ərazidə taksilərin dayanması üçün yerlər ayrılıb. Ancaq siz də şahidi olmusunuz ki, taksilər onlara ayrılan yerdə deyil, avtobuslar üçün nəzərdə tutulmuş dayanacaqlarda dayanaraq xaotik vəziyyət yaradırlar.

Orada dayanan taksilərin əksəriyyəti qeyri-qanuni taksi xidməti göstərənlərdir. BNA olaraq dəfələrlə orada maarifləndirici tədbirlər keçirib, taksi sürücüləri ilə müəyyən izahedici işlər aparmışıq. Lakin nəticə əldə etmək münkün olmayıb”.

M.Ağayev bildirib ki, həmin ərazidə təmizlənmə işlərinin aparılması üçün daha çox yük Dövlət Yol Polisinin üzərinə düşür:

“Bu gün BNA müəyyən məcburedici və cəzalandırma mexanizimlərinə malik olmadığı üçün ciddi tədbirlər də görə bilmir. İndiki halda həmin ərazidə vəziyyətin dəyişməsi üçün daha çox DYP üzərinə iş düşür. Taksi sürücülərini cəzalandırmaq və cərimələmək də Dövlət Yol Polisi əməkdaşlarının işidir”.