O bildirib ki, qoyun, keçi, inək, hətta dəvə də qurbanlıq üçün yararlı heyvanlardır: "İki ayaqlı heyvanları kəsmək olmaz, yəni toyuq, qaz, ördəyi qurban kimi kəsmək olmaz. Qurbanın düzgün kəsilməsi birinci növbədə qurbanlıq günü olmalıdır. Ondan bir gün əvvəl, bir gün sonra qurbanlıq deyil. Növbəti məsələ odur ki, düz üzü qibləyə olmalıdır. Yəni cənubdan azacıq qərb tərəfə, üzü Kəbəyə tərəf olmalıdır. Heyvanın sinəsi, başı gün çıxana, ayaqları gün batana formada olmalıdır. Daha sonra ya "Bismillahir-Rahmənir-Rahim"ya "Bismillah", ya Allah deyilməlidir. Xülasə Allah sözü olmalıdır. Bıçaq iti olmalıdır ki, heyvan inciməsin. Heyvanın qanı kifayət qədər getdikdən sonra daxilindəki qan təmiz sayılır. Heyvanın başı yuyulmalıdır. Onun qanını uşaqların alnına vururlar ki, bunlar əsaslı, dini məsələlər deyil. O qan murdardır, həmin hissə yuyulmalıdır. Heyvanın canı tamamilə çıxmadan əvvəl heyvanın başını qoparmaq olmaz. Bunu qəssablar tələsdikləri üçün edirlər. Düzgün iş deyil. Xüsusilə dinimizdə təkid olunur ki, heyvanlar uşaqlar və yeniyetmələrin gözləri qarşısında kəsilməsin. Onların psixologiyasına pis təsir göstərir. Böyüklər heyvanları kəssinlər. Çünki onlar başa düşürlər ki, Allahın əmrini yerinə yetirmək nə deməkdir. Uşaqlar başa düşmürlər. Bu kimi hökümlər olmalıdır.

Heyvanın əti üç yerə bölünsə, yaxşı olar. Bir hissəsi ailəyə, bir hissəsi qohum-əqrəbaya, bir hissəsi də yoxsullara, qonşulara və sair verilməlidir. Bir heyvana bir neçə nəfər şərik ola bilər. Şəriklərin sayının önəmi, məhdudiyyəti yoxdur. Bəziləri deyirlər ki, bu saydan artıq olmaz. Bunlar əsassız söhbətlərdir. Həcc mərasiminə gedən adamlara qurban kəsmək vacibdir. Həcc mərasiminə getməmiş insanlara müstəhəbdir, vacib deyil. Amma bu ənənəni yaşatmaq çox təkid olunur ki, bu, müstəhəbi yaşadın. Allah qurbanınızı qəbul etsin".