Onun sözlərinə görə, Qarabağın azadlığını, suverenliyimizin tam bərpasını, Xankəndidə, Xocalıda, Sərsəngdə, Ağdərədə, Əsgəranda Ali Baş Komandan İlham Əliyevin bayrağımızı qaldırmasının hansı məna, mahiyyət kəsb etdiyini qısa bir yazı, fikirlə izah etmək mümkün deyil: “Təsəvvür edin ki, 200 illik bir problem həll olunub, yəni Azərbaycan ərazisində separatizmə son qoyulub. Səmimi deyək, çoxları inanmırdı ki, belə qısa zamanda Xankəndidə Azərbaycanın idarəetməsi, nəzarəti tam həyata keçəcək. Ancaq cənab İlham Əliyev apardığı cəsarətli və doğru siyasətlə, habelə xalqa və Ordumuza güvənərək bu məsələni qısa bir zamanda həll etdi”.
Elşad Məmmədli sözlərinə belə davam edib: “Prezidentin bu səfərinin 15 oktyabrda baş tutması təsadüfi deyil. Bilirsiniz ki, 2003-cü il oktyabrın 15-də cənab İlham Əliyev ilk dəfə Azərbaycan Prezidenti seçilib. 20 illik hakimiyyəti dövründə Azərbaycanı yenidən şəkilləndirib, dərin islahatlar aparıb və ən böyük problemimizi – Qarabağ məsələsini birdəfəlik həll edib. Bu, əsl sərkərdə işi olmaqla yanaşı, dahi, tam uğurlu, mahir bir siyasətçi gedişidir. Hesab edirəm, bunu digər bir şəxs bacara bilməzdi. Cənab İlham Əliyev Azərbaycanı dünyanın ən ciddi, qüdrətli bir ölkəsinə çevirməyi bacardı. Biz iki əsrdir xəyal etdiklərimizi artıq reallıqda görürük və bunun qürurunu yaşayırıq.
Prezident Xankəndidə dünyaya bir daha mesaj verdi ki, biz barış, sülh, tərəqqi, inkişaf maraqları, düşüncəsi ilə yaşayan xalqıq, dövlətik. Bundan hər kəs özü üçün ciddi nəticələr çıxarmalı və Azərbaycanın bölgədə yaratdığı tam yeni reallıqlara uyğun davranmalıdır”.