Onun sözlərinə görə, ikinci Qarabağ müharibəsindən sonra Ermənistanda baş verən proseslərə diqqət yetirmək lazımdır: “Bu zaman biz nələrin şahidi oluruq? Ermənistan hökuməti və Paşinyan ikinci Qarabağ müharibəsində böyük məğlubiyyətə uğradı. Hərbi, siyasi məğlubiyyətə baxmayaraq, Paşinyan hökuməti hakimiyyətdə qala bildi. 2021-ci ilin iyun ayında Ermənistanda keçirilən parlament seçkilərində Paşinyan və partiyası növbəti dəfə qələbə əldə etdi və öz hakimiyyətini möhkəmləndirdi. Paşinyanın seçkilərdə qalib gəlməsi və Paşinyana qarşı etiraz aksiyalarına Ermənistan müxalifətinin, revanşist qüvvələrinin lazımi kütlə toplaya bilməməsi ondan xəbər verir ki, Ermənistan cəmiyyəti Azərbaycanla müharibədə maraqlı deyil. Yəni, Ermənistan müharibə istəmir. Amma eyni zamanda, onu da qeyd etmək istəyirəm ki, Ermənistan cəmiyyəti müharibə istəməməklə bərabər, həm də Azərbaycanla sülhə də hazır deyil. Qeyd etdiyim kimi, Ermənistanda hazırda belə bir produksal vəziyyət hökm sürür, nə müharibə istəyirlər, nə də ki, sülhə hazırdırlar. Ona görə də Ermənistanla biz sülhə nail ola bilmirik. Ancaq Azərbaycan dövlətinin mövqeyi və məqsədi ondan ibarətdir ki, qısa müddət ərzində Ermənistanla sülh müqaviləsi imzalansın”.