Deputat qeyd edib ki, ötən əsrin 90-cı illərindən başlayaraq daxili və xarici qüvvələr Azərbaycanın dövlətçiliyini sarsıtmaq istiqamətində əlbir iş görürdülər: “Səriştəsiz, dövlətçilik təcrübəsi olmayan, milli təəssübkeşlikdən xəbərsiz şəxslərin ölkəmiz və xalqımız üçün çətin bir dövrdə hakimiyyəti ələ keçirmələri Azərbaycanın varlığını şübhə altına almışdı. Belə bir çətin vaxtda Ulu Öndərimizin hakimiyyətə qayıdışı və Dahi Liderin səyi nəticəsində ictimai-siyasi sabitliyi pozan qanunsuz silahlı dəstələrin ləğv edilməsi ölkəmizdə möhkəm ictimai-siyasi sabitlik yaratdı. Bu barədə Azərbaycan Respublikasının Prezidenti İlham Əliyev belə deyirdi: “Müstəqilliyimizin tarixində 1993-cü il müstəsna əhəmiyyətə malikdir. O zaman, mürəkkəb durumda xalqımız çox müdrik və tarixi bir seçim etmiş, Heydər Əliyevi ölkənin Prezidenti seçmişdir. Böyük nüfuza və şöhrətə malik olan bu siyasi xadim Azərbaycanda inkişafın təməlini qoymuşdur”. Bəli, siyasi baxışlarından və dünyagörüşündən asılı olmayaraq hər kəs etiraf edir ki, əgər bu həlledici mərhələdə tarixə Milli Qurtuluş Günü kimi daxil olmuş əlamətdar hadisə baş verməsəydi, xalqın istəyi və tələbi ilə 1993-cü il iyunun 15-də Ulu Öndərimizin hakimiyyətə qayıdışı gerçəkləşməsəydi, indi biz müstəqil, qüdrətli, hər zaman tərəqqi edən, yeniləşən və demokratikləşən Azərbaycan dövlətindən danışa bilməzdik.

Ümummilli Liderimizin siyasi hakimiyyətə qayıdışı ilə ölkəmizdəki anarxiyaya, xaosa son qoyuldu, Azərbaycan 1969-cu ildən başlanan quruculuq xəttinə qayıtdı. Heydər Əliyevin müdrik siyasəti nəticəsində ölkə iqtisadiyyatında tənəzzül prosesinin qarşısı alındı, büdcə, vergi və pul-kredit siyasətində tarazlıq əldə olundu, inflyasiyanın səviyyəsi minimal həddə endirildi. Ölkəmizin təbii sərvətlərindən səmərəli istifadə edilməsi, “Əsrin müqaviləsi”nin imzalanması, vaxtilə çoxlarının əfsanə hesab etdiyi Bakı-Tbilisi-Ceyhan, Bakı-Tbilisi-Ərzurum neft və qaz kəmərlərinin çəkilişinin reallaşdırılması Azərbaycanda iqtisadiyyatın bütün sahələrinin inkişafına, yerli və xarici investisiyalar, müasir texnologiyalar, idarəetmə təcrübəsi cəlb etməklə rəqabətqabiliyyətli məhsul istehsal edən müəssisələrin yaradılmasına, infrastrukturun yeniləşməsinə, yeni iş yerlərinin açılmasına imkan verdi. Ulu Öndərimiz Heydər Əliyevin 1969-cu ildən başladığı quruculuq xəttini 1993-cü ildən sonra davam etdirməsi hərtərəfli inkişaf edən, müasir, demokratik, regionda lider ölkəyə çevrilən Azərbaycan dövlətinin yaradılmasına səbəb oldu. Bu gün də Azərbaycan Prezidenti İlham Əliyev tərəfindən uğurla davam etdirilən Heydər Əliyev siyasi kursu bütün istiqamətlərdə Azərbaycanın inkişaf etdirilməsi prinsipinə söykənir”.