Vladimir Putini hakimiyyətdən uzaqlaşdırmaq üçün Xersonu işğalçılardan azad etmək və Krım körpüsünü dağıtmaq lazımdır.

Axar.az xəbər verir ki, bunu rusiyalı politoloq Andrey Piontkovski deyib.

"Sizi inandırıram ki, bu iki hadisədən sonra Putin hakimiyyətdən uzaqlaşdırılacaq. Hakimiyyətə də onun kimilər gələcək. Amma onun yerinə gələnlər reallıqla hesablaşmalı olacaqlar və ümumi təklifi ciddi qəbul edəcəklər. Danışıqlara yalnız Rusiya qoşunlarının fevralın 23-dəki xəttə geri çəkilməsindən sonra başlanılacaq. Daha sonra isə Ukraynanın ərazi bütövlüyünün tam bərpası ilə bağlı danışıqlara başlanılacaq”, - o bildirib.

O qeyd edib ki, yalnız ABŞ Ukraynaya Krım körpüsü ilə bağlı məsələnin texniki həllinə və Xersonu azad etməyə kömək edə bilər:

“Bunun üçün daha çox zirehli texnika, aviasiya, hava hücumundan müdafiə sistemləri və HİMARS sistemlərinə ehtiyac var”.